Iti Amin a Maikari a Lallaki a Miembro, ni Emma Allebes

Disiembre 6–12

Ti Pagannurotan ti Pammati ken Opisial a Palawag 1 ken 2

“Mamatikami”

Nainkararagan a basaem ti Pagannurotan ti Pammati ken Opisial a Palawag 1 ken 2, ket dawatem ti inspirasion ti Espiritu Santo bayat ti panangplanom iti napateg a padas iti panagsursuro para kadagiti miembro ti klase iti Domingo.

Isuratmo dagiti Impresionmo

Yawis ti Panagbibinninglay

Mabalinmo nga awisen dagiti miembro ti klase a mangkumpleto iti sumaganad a palawag: “Naragsakak ta nabasak dagiti nasantuan a kasuratan ita a lawas gapu ta …”

Isuro ti Doktrina

Ti Pagannurotan ti Pammati

Ti Pagannurotan ti Pammati naglaon kadagiti kinapudno a mainaig iti pundasion ti naisubli nga ebanghelio.

• Adtoy ti maysa a wagas a pakatulongam kadagiti miembro ti klase a mangibinglay no ania ti nasarakanda a naipangpangruna ti kinapategna iti Pagannurotan ti Pammati: Mabalinmo nga isurat iti pisarra dagiti numero 1 agingga iti 13 ket idawat kadagiti miembro ti klase nga isuratda iti abay dagiti numero ti maysa a banag a nasursuroda manipud iti maitutop a pagannurotan ti pammati. Ania dagiti pagdumaan nga aramiden dagitoy a kinapudno iti relasiontayo iti Nailangitan a Nagannaktayo ken ni Jesucristo? Nalabit a mabalin nga ibinglay dagiti miembro ti klase no kasano a pinadur-as ti Pagannurotan ti Pammati ti panagadalda iti ebanghelio wenno nangtulong kadakuada a mangiburay iti ebanghelio kadagiti dadduma.

Pagannurotan ti Pammati 1:9; Opisial a Palawag 1 ken 2

Maiwanwan ti Simbaan ni Jesucristo babaen iti paltiing.

• Apay a napateg kadatayo ti agtultuloy a paltiing? Awisem dagiti miembro ti klase a mangiburay kadagiti riknada maipapan iti daytoy a saludsod. Mabalin pay a paglilinnawagan dagiti miembro ti klase no kasano a mainaig ti prinsipio ti agtultuloy a paltiing iti Opisial a Palawag 1 ken 2. (Ti balabala iti daytoy a lawas iti Umaykayo, Sumurot Kaniak—Para kadagiti Indibidual ken Pamilia mangisingasing kadagiti makatulong a resources a mainaig kadagitoy a paltiing.) Ania ti masursurotayo manipud iti Opisial a Palawag 1 ken 2 maipapan iti akem ti paltiing iti panangiwanwan iti Simbaan? (kitaen met iti Pagannurotan ti Pammati 1:9 ken ti palawag ni Presidente Gordon B. Hinckley iti “Dagiti Nainayon a Resources”). Ania dagiti dadduma pay a pagarigan ti agtultuloy a paltiing a mapanunot dagiti miembro ti klase? Kasano a mangimpluensia iti biagtayo dagitoy a paltiing ken makatulong kadatayo a mangbangon iti pagarian ti Nailangitan nga Ama?

• Ibilang ti panangawis kadagiti miembro ti klase a mangrebyu iti Opisial a Palawag 1 ken 2 ket mangibinglay iti maysa a banag manipud kadagitoy a paltiing a makatulong iti maysa a tao nga agkarkarigatan nga umawat iti kaudian a panagbalbaliw iti annuroten, paltiing, wenno doktrina ti Simbaan. Kasano a nasursuro dagiti miembro ti klase nga agtalek iti Dios no agkarkarigatanda iti maysa a banag iti Simbaan? Kasano a nangpapigsa iti pammatida ti panagadalda iti daytoy a lawas nga idadauluan ti Apo ti Simbaanna? Makatulong pay dagiti nalawag a pannakaammo ken pannakaawat manipud ken ni Presidente Dieter F. Uchtdorf iti “Dagiti Nainayon a Resources.”

  

  Wilford Woodruff, ni H. E. Peterson

Dagiti Nainayon a Resources

“Adda idiay ti Espiritu ti Dios.”

Agserserbi ni Presidente Gordon B. Hinckley kas miembro ti Korum dagiti Sangapulo-ket-dua nga Apostol idi ti paltiing a nailadawan iti Opisial a Palawag 2 ket naawat. Kalpasan dagiti tawen, inladawanna ti padasna:

“Adda nasagraduan ken napasanto nga aglawlaw iti siled. Para kaniak, marikna a kasla adda maysa a naluktan a tubo iti nagbaetan ti nailangitan a trono ken ti nakaparintumeng ken umar-araraw a propeta ti Dios a kinadua dagiti Kakabsatna. Adda idiay ti Espiritu ti Dios. Ket babaen ti bileg ti Espiritu Santo adda immay iti dayta a propeta a pammatalged a ti banag nga inkararaganna ket umisu, a dimtengen ti oras, ket itan nasken a maited dagiti nakaskasdaaw a bendision ti priesthood kadagiti maikari a lallaki iti amin a lugar ania man a puli.

“Tunggal lalaki iti dayta a sirkulo, babaen ti bileg ti Espiritu Santo, ammona ti isu met la a banag.

“Maysa a naulimek ken naindaklan a gundaway. … Awan mangngegan a timek a napigsa kadagiti pisikal a lapayagmi. Ngem ti timek ti Espiritu a nayarasaas nga awan duadua kadagiti panunotmi ken mismo a kararuami” (“Priesthood Restoration,” Ensign, Okt. 1988, 70).

“Gagangay nga adda dagiti saludsod.”

Kinuna ni Presidente Dieter F. Uchtdorf ti sumaganad kadagiti addaan duadua maipapan iti pakasaritaan ken doktrina ti Simbaan:

“Gagangay laeng ti maaddaan kadagiti saludsod,—ti bin-i ti napudno a panagsaludsod ket masansan nga agsulbod ken dumakdakkel a maitulad iti dakkel a kayo ti pannakaawat. Adda dagiti sumagmamano a miembro ti Simbaan nga, iti ania man a gundaway, ket saanda a naaddaan kadagiti napasnek wenno sensitibo a saludsod. Maysa kadagiti panggep ti Simbaan ti mangaywan ken mangtaripato iti bukel ti pammati—uray pay no adda man daytoy iti nadarat a daga ti panagduadua ken awan kinaawan namnama. Ti pammati ket panangnamnama kadagiti banag a saan a makita ngem pudno.

“Ngarud, ay-ayatek a kakabsatko —ay-ayatek a gagayyemko—pangngaasiyo, unaenyo a pagduaduaan dagiti duaduayo sakbay a pagduaduaanyo ti pammatiyo. Nasken a ditayo kaano man palugodan ti duadua a mangtengngel kadatayo a balud ken mangyadayo kadatayo manipud iti nadiosan nga ayat, talna, ken sagsagut a sumangbay babaen iti pammati ken ni Apo Jesucristo” (“Come, Join with Us,” Ensign wenno Liahona, Nob. 2013, 23; kitaen met iti Lawrence E. Corbridge, “Stand Forever” [Brigham Young University devotional, Ene. 22, 2019], speeches.byu.edu).

Panangpadur-as iti Panangisurotayo

OK laeng nga isao ti, “Diak ammo.” Idinto a nasken nga aramidem ti amin a kabaelam a makatulong kadagiti miembro ti klase a mangsungbat kadagiti saludsodda maipapan iti ebanghelio, saan a namnamaen ti Apo nga ammom ti amin a banag. No saanmo nga ammo no kasano a sungbatan ti maysa a banag, akuem daytoy. Kalpasanna itudom kadagiti agad-adal ti naipalgak a doktrina, ket iburaymo ti napudno a pammaneknek maipapan iti no ania ti ammom. (Kitaen iti Panangisuro iti Wagas ti Mangisalakan,24.)