dagiti tao iti lubong dagiti espiritu

Nakita ni Joseph ti ama, ina, ken kabsatna a lalaki iti celestial a pagarian (Parmata ni Joseph Smith iti Celestial a Pagarian, Robert Barrett).

Nobiembre 29–Disiembre 5

Doktrina ken Katulagan 137–138

“Ti Parmata ti Pannakasubbot dagiti Natay”

Insuro ni Presidente Dallin H. Oaks: “Mabalin a masdaawtayo amin maipapan kadagiti kasasaad iti lubong dagiti espiritu. … Ngem ditayo koma isuro wenno usaren kas opisial a doktrina ti saan a makaipaay kadagiti pagrukodan ti opisial a doktrina” (“Trust in the Lord,” Ensign wenno Liahona, Nob. 2019, 28). Siguraduen a dagiti paglilinnawaganyo ket nabangon kadagiti nasantuan a kasuratan ken pannursuro dagiti propeta.

Isuratmo dagiti Impresionmo

icon iti panagbibinninglay

Yawis ti Panagbibinninglay

Adu dagiti makaparegta a kinapudno a mainaig iti doktrina a masarakan iti Doktrina ken Katulagan 137–38. Awisem dagiti miembro ti klase a mangilista iti sumagmamano kadagitoy. Kalpasanna mabalinmo a bubosen ti sumagmamano a minuto iti panangrebyu kadagiti nailistada kas klase ken pagsasaritaan no apay a napateg dagitoy a kinapudno kadakuada. Adda kadi asino man a makasursuro iti maysa a banag manipud kadagitoy a benneg a saanda a naawatan idi damo?

icon iti panangisuro

Isuro ti Doktrina

Doktrina ken Katulagan 137; 138:32–37

Addaanto ti tunggal kararua iti gundaway a pumili iti celestial a gloria.

• Adu kadatayo ti makaam-ammo kadagiti tao a saan a naaddaan iti gundaway nga umawat iti ebanghelio iti daytoy a biag—agraman dagiti natay kas ubbing. Awisem dagiti miembro ti klase a mangibinglay iti maysa a kinapudno a masarakanda iti benneg 137 a mangtulong kadakuada a makaawat iti plano ti Dios para kadagitoy nga indibidual. Ania dagiti kinapudno a masarakantayo iti Doktrina ken Katulagan 138:32–37 a mangnayon iti pannakaawattayo iti plano ti Dios? Mabalin nga ibinglay dagiti miembro ti klase no kasano nga iparikna dagitoy a kinapudno kadakuada maipapan iti Nailangitan nga Ama, ti planona iti pannakaisalakan, ken ti Pannubbot ni Jesucristo. Mabalin a makatulong ti palawag iti “Dagiti Nayon a Resources” iti daytoy a panaglilinnnawagyo.

Doktrina ken Katulagan 138:1–11, 25–30

Ti panagbasa ken panagutob kadagiti nasantuan a kasuratan ti mangisagana kadatayo nga umawat iti paltiing.

• Ti padas nga inladawan ni Joseph F. Smith iti Doktrina ken Katulagan 138:1–11, 25–30 mangtulong kadatayo a makaawat no kasano a maisaganatayo ti bagbagitayo nga umawat iti paltiing. Nalabit a makapagtitinnulong dagiti miembro ti klase tapno mangilasin no ania ti masursuroda maipapan iti paltiing manipud kadagitoy a bersikulo. Mabalin a paibinglaymo kadagiti miembro ti klase no kasano nga insagana ida ti panagbasa ken panagutob kadagiti nasantuan a kasuratan tapno umawatda iti paltiing (kitaen met iti Joseph Smith—Pakasaritaan 1:11–12).

• Ti mensahe ni Presidente M. Russell Ballard “The Vision of the Redemption of the Dead” (Ensign wenno Liahona, Nob. 2018, 71–74) ket mangiladawan iti “unos ti biag a panagsagana ni Joseph F. Smith tapno umawat iti daytoy nakaskasdaaw a paltiing [Doktrina ken Katulagan 138].” No basaen dagiti miembro ti klasem ti mensahe ni Presidente Ballard iti daytoy a lawas, allukoyem ida a mangibinglay iti maysa a banag a nakaawis iti riknada. Wenno mabalinmo a basaen dagiti paset ti mensahe kas maysa a klase. Ania ti makaawis iti riknatayo maipapan iti biag ni Presidente Smith ken iti kinataona? Ania ti masursurotayo manipud iti daytoy a pagarigan?

  naipinta a ladawan Joseph F. Smith

  Joseph F. Smith, ni Albert E. Salzbrenner

Doktrina ken Katulagan 138:12–60

Agtultuloy ti aramid ti pannakaisalakan kalpasan ti ipapatay.

• Tapno matulongan dagiti miembro ti klase a mangtakuat kadagiti kinapudno iti Doktrina ken Katulagan 138:12–60, mabalinmo nga ikkan ida iti sumagmamano a saludsod maipapan iti lubong dagiti espiritu a masungbatan kadagitoy a bersikulo. Kas pagarigan: Ania ti inaramid ti Mangisalakan bayat ti kaaddana iti lubong dagiti espiritu? Asino dagiti mensahero ti Apo, ken ania ti mensaheda? Mabalin a pilien dagiti miembro ti klase ti maysa wenno ad-adu pay kadagitoy a saludsod ket agtitinnulong iti babassit a grupo a mangsukisok kadagiti sungbat. Kalpasanna mabalinda nga ibinglay iti tunggal maysa dagiti kinapudno a nasarakanda. Ania ti pagdumaan nga aramiden dagitoy a kinapudno iti biagtayo?

• Ania koma ti isaotayo iti maysa a tao nga agsaludsod, “Ania ti mapasamak no mataytayo?” Ania koma ti ibinglaytayo manipud iti Doktrina ken Katulagan 138:12–60 a makatulong a masungbatan daytoy a saludsod? (kitaen iti Alma 40:11–15).

dagiti nainayon a resources icon

Dagiti Nainayon a Resources

Ti plano ti Dios ti mangipaay iti wagas para iti amin nga annakna nga umawat iti ebanghelio.

Insuro ni Presidente Henry B. Eyring:

“Bassit laeng dagiti annak ti Dios a manggun-od ditoy a biag iti naan-anay a pannakaawat iti plano ti Dios, kasta met iti gundawayna a manggun-od kadagiti ordinansa iti priesthood ken katulagan a mamagbalin iti pangsubbot a bileg ti Mangisalakan a naan-anay nga epektibo iti biagtayo. …

“Adda dagiti mangibilang a saan a nainkalintegan daytoy. Mabalin nga ibilangda pay daytoy kas pakakitaan nga awan ti plano, awan dagiti naipangruna a kasapulan para iti pannakaisalakan—a mariknada a ti maysa a nalinteg, managayat a Dios saan nga agaramid iti plano a sidadaan a gun-oden ti kasta a bassit a sangkapaset dagiti annakna. Mabalin a patien dagiti dadduma nga inkeddengen ti Dios a nasapsapa no asino kadagiti annakna ti isalakanna ken inaramidna a sidadaan ti ebanghelio kadakuada, idinto a dagiti saan pay a nakangngeg iti ebanghelio ket saan a ‘napili.’

“Ngem ammoyo ken ammok, gapu kadagiti kinapudno a naisubli babaen ken ni Propeta Joseph Smith, a ti plano ti Dios ad-adda nga amang a naay-ayat ken nalinlinteg ti plano ti Dios ngem iti dayta. Aggagar ti Nailangitan nga Ama a mangummong ken mangbendision iti amin ti pamiliana. Idinto nga ammona a saanto a mapili ti amin kadakuada nga aguummong, mangted ti planona iti tunggal maysa kadagiti annakna iti gundaway nga umawat wenno saan nga umawat iti awisna” (“Gathering the Family of God,” Ensign wenno Liahona, Mayo 2017, 20–21).

Panangpadur-as iti Panangisurotayo

Usarenyo dagiti balikas dagiti propeta. “Dagiti nasantuan a kasuratan ken balikas dagiti propeta ken apostol iti ud-udina nga aldaw ti paggapuan dagiti kinapudno nga isurotayo. Iti tunggal gundaway, paregtaem dagiti sursuruam nga umasideg iti balikas ti Dios para iti pannarabay” (Panangisuro iti Wagas ti Mangisalakan, 21).