Lix yo’lajik li Jesus, xb’aan laj J. Kirk Richards

20–26 diciembre

Li Ralankil

Li maatan li maak’a’ xjuntaq’eetankil li kixk’e chaq li Dios sa’ lix choxahil Alal

Jultikaq aawe naq li tzolok tz’aqal chaab’il ut aajel ru chirix li evangelio, a’an li neke’xb’aanu li komon sa’ rochocheb’. Naq nakakawresi aawib’ re k’utuk, k’oxla chan ru naq li tzolok nakab’aanu sa’ li Dominkil Tzoleb’aal naru naxkawob’resi li tzolok sa’ junesal ut jo’ junkab’al neke’xb’aanu li komon.

Tz’iib’a li nakak’oxla

Xkanab’ankileb’ chi wotzok

Chan ru naq xtzolb’al “Li Yo’yookil Kristo” (ChurchofJesusChrist.org) chiru li xamaan a’in xrosob’tesiheb’ li komon? Naru nakawotz li raatin li Awa’b’ej Jean B. Bingham, Awa’b’ej re li Komonil re Tenq’ank, ut chirix a’an taakanab’eb’ li komon chi aatinak chirix junaq xnumsihomeb’ chanchan a’an: “Naq nintzol lix yu’am ut eb’ lix k’utum li Jesukristo chi k’eek’o inch’ool ut ninkanab’ sa’ ink’a’uxl “Li Yo’yookil Kristo,” lin b’antioxihom ut lin rahom choq’ re li qaKolonel nak’i. Sa’ li junjunq chi ch’ol aatin sa’ li musiq’anb’il hu a’an natawman jun esil ut xniman lin nawom chirixeb’ lix choxahil k’anjel ut lix k’anjel sa’ ruchich’och’. Li k’a’ru intzolom ut week’ahom sa’ li tzolok ut tz’ilok-ix a’an naxch’olob’ naq li Jesus tz’aqal “a’an lix saqen, lix yu’am ut li royb’enihom li ruchich’och’ ” ” (“Re naq tz’aqalaq lix sahil aach’ool,” Jolomil ch’utub’aj-ib’ re octubre 2017).

Xk’utb’al li tzolʼlebʼ

“Maajun chik junaq wanjenaq xwankil chixtoch’b’al li qayu’am.”

• Eb’ li komon naru neke’ril ru li xb’een raqal “Li Yo’yookil Kristo” ut te’xwotz li na’leb’ chirix k’a’ut naq lix wankil li Jesukristo jwal nim wi’chik chiru yalaq ani chik. B’ar chik wankeb’ li na’leb’ sa’ “Li Yo’yookil Kristo” li neke’xch’olob’ xyaalal li na’leb’ a’in? Kanab’eb’ li komon chixwotzb’al chan ru naq nak’anjelak lix wankil a’an sa’ xyu’ameb’. Li video “Por qué necesitamos un Salvador” (ChurchofJesusChrist.org) naru naxtz’aqob’resi ru li aatinak.

• Ma xch’olob’ahomeb’ li komon jun sutaq chiru anihaq k’a’ut naq neke’xninq’ehi li Ralankil? Maare naru neke’xwotz xnumsihomeb’. Malaj ut naru taapatz’ reheb’ naq te’xk’oxla anihaq li ka’ch’in ajwi’ xnawom chirixeb’ laj Kristiano li naxpatz’ raj li na’leb’ a’an reheb’. Chan raj ru naru naqasume li patz’om a’an? Waklesi xch’ooleb’ li komon chirilb’al wi’chik ru “Li Yo’yookil Kristo” naq yooqeb’ chixk’oxlankil li patz’om a’an, ut patz’ re junjunqeb’ naq te’xwotz lix k’a’uxleb’. Naru ajwi’ nekeril ru Lukas 2:10–14 sa’ komonil, malaj naru nekeb’icha jun li b’ich li na’aatinak chirix li sahil ch’oolej sa’ Ralankil (jo’ “Sahaq eechʼool, li Qaawaʼ xchal,” Eb’ li B’ich, 123), ut tex’aatinaq chirix k’a’ut naq lix yo’lajik li Kristo naxk’e “xnimal sahil ch’oolej.” K’a’ru naru naqab’aanu re “xk’ulb’al chi tz’aqal li qaRey”?

  

  Xsaqenkil li ruchich’och’, xb’aan laj Howard Lyon

“B’antioxinb’ilaq taxaq re li Dios lix maatan li maak’a’ xjuntaq’eetankil li kixk’e chaq.”

• Sa’ “Li Yo’yookil Kristo,” eb’ li apostol neke’aatinak chirix li Kolonel jo’ jun “maatan” kixk’e chaq li qaChoxahil Yuwa’. Re xtenq’ankileb’ li komon chixtawb’al xkomon xnawomeb’ chirix li maatan a’an, naru nakatz’iib’a chiru li pizarron Rik’in li Jesukristo, li Dios naxke’ qe li maatan re … ut taapatz’ reheb’ li komon naq te’xye chan raj ru naru natz’aqob’resiman ru li ch’ol aatin rik’in li xe’ril ru sa’ “Li Yo’yookil Kristo” ut sa’ li raatin li Awa’b’ej Russell M. Nelson li wan sa’ “Xkomon chik li k’anjeleb’aal.” Chan ru neke’qak’ul li maatan a’an? Naru taapatz’ reheb’ li komon naq te’xsik’ ru junaq reheb’ li maatan a’an, ut te’xyal xq’e chixk’ulb’al li maatan chi tz’aqal re ru.

Xkomon chik li k’anjeleb’aal

Eb’ li maatan naxyeechi’i li Kolonel.

Naq ki’aatinak sa’ li Ralankil, li Awa’b’ej Russell M. Nelson ki’aatinak chirix kaahib’ li maatan naxk’e li Kolonel reheb’ chixjunileb’ li neke’raj k’uluk re:

“Xb’een, a’an kixk’e aawe laa’at ut we laa’in li qawankilal maak’a’ roso’jik re rahok. A’an ajwi’ li wankilal re xraab’al li ani ch’a’aj xraab’al jo’ ajwi’ li ani ink’a’ nakatxra, li neke’b’aanunk b’an maa’usilal eere ut neke’rahob’tesink eere.

“Chi tenq’anb’il xb’aan li Qaawa’, naru taqatzol rahok jo’ kirahok a’an. …

“Li xkab’ maatan naxq’axtesi aawe li Kolonel a’an li wankilal re kuyuk maak. Sa’ xk’ab’a’ lix tojb’al rix li maak maak’a’ roso’jik xb’aan, naru taakuy xmaakeb’ li ani xe’rahob’tesink aawe ut maajun sut xe’xk’ulub’a li rahob’tesink xe’xb’aanu aawe. …

“Lix rox maatan li Kolonel a’an li jalb’a-k’a’uxlej. Moko natawman ta ru chi us li maatan a’in chi kok’ aj xsa’. … Li jalb’a-k’a’uxlej a’an jun chaq’al ru maatan. Ink’a’ raj taqaxuwa xb’aanunkil. A’an jun maatan taqak’ul raj chi sa qach’ool ut taqoksi raj—li taqak’ul raj chi anchal qach’ool—wulaj wulaj naq naqasik’ wulak jo’ chanru li qaKolonel. …

“Li xkaa maatan re li qaKolonel a’an jun yeechi’ihom—jun yeechi’ihom re li yu’am maak’a roso’jik. … Li yu’am chi junelik a’an li chaab’il yu’am li wan re li qaChoxahil Yuwa’ ut lix Raarookil Alal. Naq li Yuwa’b’ej naxyeechi’i qe li junelik yu’am, chanchan naq yoo chixyeeb’al, “Wi taasik’ ru xtaaqenkil li Walal—wi wan li rajom aach’ool chi wulak chi yaal jo’ chanru a’an—chi jo’kan, sa’ junaq kutan tatwanq jo’ wanko laa’o ut tat-awa’b’ejinq sa’xb’eeneb’ li ruchich’och’ ut li awa’b’ejihom jo’ naqab’aanu laa’o.”

“Eb’ li kaahib’ chi maatan a’in te’xk’am chaq qe li sahil ch’oolejil chi numtajenaq naq naqak’uleb’. Wankeb’ li maatan a’an xb’aan naq li Jehova kixk’ulub’a chalk sa’ ruchich’och’ jo’ li k’uula’al Jesus” (“Kaahib’ li maatan q’axtesinb’ileb’ aawe xb’aan li Jesukristo” [Xch’utam li Xb’eenil Awa’b’ejil re li Ralankil, 2 diciembre, 2018], broadcasts.ChurchofJesusChrist.org).

Xchaab’ilob’resinkil li qak’utum

Kawresi aawib’ sa’ musiq’ej. “Xk’utb’al li evangelio rik’in wankilal ink’a’ ka’ajwi’ naraj naxye xkawresinkil jun tzol’leb’, naraj ajwi’ naxye xkawresinkil qib’ laa’o. … Eb’ laj chaab’il k’utunel re li evangelio, xb’een wa chiru xk’oxlankil xnumsinkil li hoonal re li tzolok, neke’xjayali rib’ sa’ xnujob’resinkil li raameb’ rik’in li Santil Musiq’ej” (Li k’utuk jo’ li Kolonel, 12).