Laj Jose naril lix yuwa’, lix na’, ut li ras sa’ li choxahil awa’b’ejihom (Lix k’utb’esinkil matk’ laj Jose Smith chirix li choxahil awa’b’ejihom, Robert Barrett).

29 noviembre–5 diciembre

Tzolʼlebʼ ut Sumwank 137–138

“Li k’utb’esinb’il matk’ chirix lix tojb’aleb’ rix li kamenaq”

Li Awa’b’ej Dallin H. Oaks kixk’ut: “Sa’ junesal, chiqajunil nokoru chi k’oxlak chirix chan ru li ruchich’och’ reheb’ li musiq’ej. … A’b’an miqak’ut ut miqoksi jo’ tz’aqal tzol’leb’ li k’a’ru ink’a’ k’ulub’il choq’ tz’aqal tzol’leb’ ” (“Xkanab’ankil qib’ sa’ ruq’ li Qaawa’,” Jolomil ch’utub’aj-ib’ re octubre 2019). K’e reetal naq nakawoksiheb’ li loq’laj hu ut eb’ li raatin li profeet sa’ li tzolok nakab’aanu.

Tz’iib’a li nakak’oxla

Xkanab’ankileb’ chi wotzok

Wankeb’ naab’aleb’ li yaalil tzol’leb’ sa’ Tzol’leb’ ut Sumwank 137–138. Kanab’eb’ li komon chixtz’iib’ankileb’ a’an. Chirix a’an, naru nakawoksi wiib’ oxib’ k’asal re rilb’al li xe’xtz’iib’a ut tex’aatinaq chirix k’a’ut naq aajeleb’ ru li yaal a’an choq’ reheb’. Ma wan anihaq xtzolok junaq na’leb’ li ink’a’ naxnaw rub’elaj rilb’aleb’ ru li tasal a’in?

Xk’utb’al li tzolʼlebʼ

Tzol’leb’ ut Sumwank 137; 138:32–37

Chixjunil li aamej naraj ru xsik’b’al ru li choxahil awa’b’ejihom.

• Naab’al qe laa’o naqanaweb’ ru kristiaan li ink’a’ ke’ru chixnawb’al ru li evangelio sa’ li yu’am a’in—jo’ li ke’kam naq toj kok’eb’ chaq Kanab’eb’ li komon chixwotzb’al junaq li yaal li te’ril sa’ li tasal 137 li taatenq’anq reheb’ chixtawb’al ru lix k’uub’anb’il na’leb’ li Dios choq’ reheb’ li kristiaan a’an. K’a’ruheb’ li yaal neke’qataw sa’ Tzol’leb’ ut Sumwank 138:32–37 li neke’xnimob’resi li qanawom chirix lix k’uub’anb’il na’leb’ li Dios? Eb’ li komon naru neke’xwotz k’a’ru neke’reek’a xb’aaneb’ li yaal a’an chirix li qaChoxahil Yuwa’, lix k’uub’anb’il na’leb’ re li kolb’a-ib’, ut lix tojb’al rix li maak xb’aan li Jesukristo. Li aatin natawman sa’ “Xkomon chik li k’anjeleb’aal” maare naru natenq’an sa’ li aatinak.

Tzol’leb’ ut Sumwank 138:1–11, 25–30

Rilb’aleb’ ru ut xtz’ilb’aleb’ rix li loq’laj hu nokoxkawresi re xk’ulb’al li k’utb’esinb’il na’leb’.

• Lix numsihom laj Joseph F. Smith li kixch’olob’ sa’ Tzol’leb’ ut Sumwank 138:1–11, 25–30 nokoxtenq’a chixtawb’al ru chan ru naru naqakawresi qib’ re xk’ulb’al li k’utb’esinb’il na’leb’. Eb’ li komon maare naru neke’k’anjelak sa’ komonil chi aatinak chirix li natzolman chirix li k’utb’esinb’il na’leb’ sa’eb’ li raqal a’an. Naru taapatz’ reheb’ li komon naq te’xch’olob’ chan ru naq rilb’aleb’ ru ut xtz’ilb’aleb’ rix li loq’laj hu naxtenq’aheb’ chixk’ulb’al li k’utb’esinb’il na’leb’ (chi’ilmanq ajwi’ Jose Smith—Resilal 1:11–12).

• Li raatin li Awa’b’ej M. Russell Ballard “Li k’utb’esinb’il matk’ chirix lix tojb’aleb’ rix li kamenaq” (Jolomil ch’utub’aj-ib’ re octubre 2018) naxch’olob’ “lix kawresinkil rib’ laj Joseph F. Smith chiru chixjunil lix yu’am re xk’ulb’al lix chaq’al ru k’utb’esinb’il na’leb’ a’an [Tzol’leb’ ut Sumwank 138].” Wi eb’ li komon xe’ril ru li raatin li Awa’b’ej Ballard chiru li xamaan a’in, waklesi xch’ooleb’ chixwotzb’al k’a’ruhaq xwulak chiruheb’. Malaj ut, naru neke’ril b’ayaq ru li raatin sa’ komonil. K’a’ru nawulak chiruheb’ chirix lix yu’am ut lix na’leb’ li Awa’b’ej Smith? K’a’ru naqatzol rik’in li k’a’ru kixb’aanu?

  

  Joseph F. Smith, xb’aan laj Albert E. Salzbrenner

Tzol’leb’ ut Sumwank 138:12–60

Li k’anjel re kolb’a-ib’ toj nab’aanuman ajwi’ chirix li kamk.

• Re xtenq’ankileb’ li komon chixtawb’aleb’ li yaal wankeb’ sa’ Tzol’leb’ ut Sumwank 138:12–60, naru nakawoksi junjunqeb’ li patz’om chirix li ruchich’och’ reheb’ li musiq’ej li neke’sumeman sa’eb’ li raqal a’an. Qayehaq: K’a’ru kixb’aanu li Kolonel naq kiwan chaq sa’ li ruchich’och’ reheb’ li musiq’ej? Aniheb’ laj k’amol esil re li Qaawa’ ut k’a’ru li esil neke’xk’am? Eb’ li komon naru neke’xsik’ ru jun malaj junjunq reheb’ li patz’om a’an ut te’k’anjelaq sa’ kok’ ch’uut re xsik’b’aleb’ xsumenkil. Chirix a’an, naru neke’xwotz chirib’ileb’ rib’ li yaal te’xtaw. Chan ru naq eb’ li yaal a’an neke’xjal qayu’am?

• K’a’ raj ru taqaye re anihaq li tixpatz’: “K’a’ru nak’ulman naq nokokam?” B’ar wan reheb’ li na’leb’ li wankeb’ sa’ Tzol’leb’ ut Sumwank 138:12–60 taqawotz raj li taatenq’anq chixsumenkileb’ li patz’om a’an? (chi’ilmanq ajwi’ Alma 40:11–15).

Xkomon chik li k’anjeleb’aal

Lix k’uub’anb’il na’leb’ li Dios naxk’e jun li b’e re naq chixjunileb’ li ralal xk’ajol te’xk’ulub’a li evangelio.

Li Awa’b’ej Henry B. Eyring kixye:

“Yal jun ch’ina xraqal li ralal xk’ajol li Dios neke’xk’ul sa’ li yu’am a’in jun xnawom chirix lix na’leb’ li Dios, rochb’een ajwi’ li k’ojob’anb’il k’anjel ut li sumwank li neke’xk’e chi k’anjelak lix tojb’al rix li maak kixb’aanu li Kolonel sa’ qayu’am. …

“Wankeb’ li te’xye naq moko tiik ta a’in. Maare te’xk’oxla naq li Dios ink’a’ kixk’uub’ junaq xna’leb’, ut naq maak’a’ li teneb’anb’il choq’ re li kole’k—Neke’xye naq jun li Dios aj rahonel ink’a’ raj tixk’uub’ jun na’leb’ yal choq’ re jun xraqaleb’ li ralal xk’ajol. Maare jalaneb’ chik te’xye naq li Dios ak xye chi junxilaj aniheb’ li tixkol ut kixtaqla li evangelio choq’ reheb’, ut naq li jun siireb’ chik li ink’a’ xe’rab’i maawa’eb’ li “sik’b’ileb’ ru.”

“A’ut laa’at ut laa’in naqanaw, b’antiox re li na’leb’ k’ojob’anb’il wi’chik rik’in laj Jose Smith, naq lix na’leb’ li Dios jwal nim wi’chik xrahom ut xtiikilal. Li qaYuwa’ naraj xch’utub’ankil ut rosob’tesinkil chixjunil lix junkab’al. Us ta naxnaw naq moko chixjunileb’ ta te’raj te’chalq, lix k’uub’anb’il na’leb’ naxk’e naq chixjunileb’ te’ruuq chixk’ulb’al malaj chixtz’eqtaanankil li b’oqok” (“Xch’utub’ankil lix junkab’al li Dios,” Jolomil ch’utub’aj-ib’ re abril 2017).

Xchaab’ilob’resinkil li qak’utum

Oksi li raatineb’ li profeet. “Eb’ li loq’laj hu ut li raatineb’ li profeet ut apostol sa’ roso’jikeb’ li kutan a’aneb’ xyo’leb’aal li yaal nakak’ut. Sa’ chixjunil hoonal, waklesi xch’ooleb’ li ani tzolb’ileb’ aab’aan chixsutq’isinkil rib’ rik’in li raatin li Dios re xk’ulb’al xb’eresinkileb’, xsumenkil lix patz’omeb’, ut xtenq’ankileb’ ” (Li k’utuk jo’ li Kolonel, 21).