13–19 diciembre

Li Junkab’al: Jun Jek’inb’il Aatin choq’ re li Ruchich’och’

“Li junkab’al q’axal aajel ru sa’ lix k’uub’anb’il na’leb laj Yo’ob’tesinel”

Naq taatzol “Li Junkab’al: Jun Jek’inb’il Aatin choq’ re li Ruchich’och’ ” chiru li xamaan a’in, k’oxlaheb’ li yaal li te’tenq’anq reheb’ li komon sa’ xyalb’aleb’ xq’e chixkawob’resinkil li rochocheb’ ut lix junkab’aleb’.

Tz’iib’a li nakak’oxla

Xkanab’ankileb’ chi wotzok

Re xwaklesinkil xch’ooleb’ li komon chixwotzb’al li xe’xtzol chiru li xamaan a’in naq xe’xtzol li jek’inb’il aatin chirix li junkab’al, naru nakapatz’ reheb’ naq te’xsik’ ru jun raqal chi sa’ ut te’xk’os ru li naxk’ut sa’ jun ch’ol aatin.

Xk’utb’al li tzolʼlebʼ

“Li junkab’al q’axal aajel ru sa’ lix k’uub’anb’il na’leb laj Yo’ob’tesinel.”

• Li Iglees nawb’il ru xb’aan lix aajelil ru li junkab’al chi sa’, ut li jek’inb’il aatin naxk’utb’esi li tzol’leb’ chirix a’an. Re xtikib’ankil li aatinak, naru taapatz’ reheb’ li komon naq te’xk’oxla anihaq li kixpatz’ reheb’ k’a’ut naq jwal na’ux aatinak chirixeb’ li junkab’al sa’ li Iglees. B’ar wan reheb’ li yaal wankeb’ sa’ li jek’inb’il aatin naru naqawotz re xsumenkil li patz’om a’an?

• Jun reheb’ lix yaalal naq li jek’inb’il aatin chirix li junkab’al aajel ru, a’an naq na’aatinak chirixeb’ li yaal li jwal neke’sache’ xwankil sa’eb’ li qakutankil. B’ar wan reheb’ li yaal sa’ li jek’inb’il aatin nokohe’xtenq’a re naq ink’a’ toob’alaq’iiq xb’aaneb’ li b’alaq’il na’leb’ chirix li junkab’al wankeb’ sa’ li ruchich’och’ anajwan? Chan ru naq eb’ li yaal a’an nokohe’xtenq’a rik’in li k’a’ru naqasik’ ru? Li raatin li Awa’b’ej Dallin H. Oaks li natawman sa’ “Xkomon chik li k’anjeleb’aal” naru nak’anjelak re xsumenkil li patz’om a’an.

  

  Eb’ li na’b’ej yuwa’b’ej tento naq te’xk’iresiheb’ lix kok’al rik’in rahok ut tiikilal.

“Li sahil ch’oolejil sa’ li junkab’al, k’a’jo’ wi’chik naq taatawmanq naq k’ojob’anb’il sa’ xb’een li na’leb’ k’utb’il xb’aan li Qaawa’ Jesukristo.”

• Li aatinak chirixeb’ li raqal waqib’ ut wuqub’ re li jek’inb’il aatin chirix li junkab’al naru naxtenq’aheb’ li komon chixtawb’al xnimal xsahileb’ xch’ool sa’eb’ lix junkab’al. Naru taatz’iib’aheb’ li na’leb’ chiru li pizarron ut taapatz’ reheb’ li komon naq te’xsik’ ru junaq li na’leb’ re te’aatinaq chirix sa’ ka’kab’il. Naru neke’roksi li patz’om jo’eb’ a’in re xb’eresinkil li aatinak: Chan ru naq qilom xb’aanunkil li na’leb’ a’in sa’ li junkab’al? Chan ru naq xyu’aminkil li na’leb’ a’an nak’amok sa’ li sahil ch’oolejil sa’ li qajunkab’al? Chan ru naq lix yu’aminkil li na’leb’ a’an natenq’an chixkanab’ankil li Kolonel jo xk’ojob’ankil li qajunkab’al? B’ar wankeb’ li raqal sa’eb’ li loq’laj hu li naru naxtenq’aheb’ li qajunkab’al chixtawb’al ru chi us li na’leb’ a’in? (Eb’ li komon naru neke’xsik’eb’ raqal sa’eb’ li loq’laj hu sa’ li K’utul Raqal reheb’ li Loq’laj Hu.) Chirix a’an, li junjunq chi ch’uut naru neke’xwotz li xe’xtzol.

  Aatinan chirix naq maak’a’ naxye chan ru li qawanjik sa’ li qajunkab’al anajwan, naru naqayal qaq’e chixwaklesinkil jun qajunelikil junkab’al sa’ xb’een xk’ojlajik li Kolonel ut lix evangelio.

“Naqak’e xb’oqb’aleb’ li komonil li tiikeb’ xk’a’uxl … naq te’xxaqab’ xwankil li jar paay chi na’leb’ li tuqub’anb’il re xk’uulankil ut xkawresinkil li junkab’al.”

• Chan ru naru nakatenq’aheb’ li komon chixtawb’al ru lix teneb’ankileb’ re xxaqab’ankil xwankileb’ li yaal wan chi sa’ li jek’inb’il aatin chirix li junkab’al? Re xtikib’ankil li aatinak, naru nakat-aatinak chirix li na’leb’ natzolman sa’ lix k’ab’a’ li jek’inb’il aatin. K’a’ru a’an jun li jek’inb’il aatin? K’a’ru xk’ehok reheb’ xliceens li Xb’eenil Awa’b’ejil ut lix Molameb’ li Kab’laju chi Apostol re xpuktesinkil junaq jek’inb’il aatin choq’ re li ruchich’och’ chirix li junkab’al? Eb’ li komon naru te’xye li na’leb’ neke’xk’oxla naq aajeleb’ ru sa’ li jek’inb’il aatin (waklesi xch’ooleb’ chi aatinak chirix junaq li ch’ol chi sa’). Chirix a’an naru neke’aatinak chirix chan ru naru neke’xwotzeb’ li na’leb’ a’an sa’ tenamiteb’. Sa’ li raatin li Hermana Bonnie L. Oscarson “Eb’ aj kolol re li Jek’inb’il Aatin chirix li Junk’ab’al” wankeb’ eetalil li naru nekerileb’ ru sa’ komonil (Jolomil ch’utub’aj-ib’ re abril 2015). Naru ajwi’ nekeril li video “Defensores de la fe” (ChurchofJesusChrist.org).

Xkomon chik li k’anjeleb’aal

Eb’ li junkab’al sa’ lix k’uub’anb’il na’leb’ li Dios.

Li Awa’b’ej Dallin H. Oaks kixye:

“Eb’ laj Santil Paab’anel sa’ Roso’jikeb’ li Kutan li neke’xtaw ru lix k’uub’anb’il na’leb’ li Dios choq’ re li kolb’a-ib’, wan k’a’ru nawb’il xb’aaneb’ li naxtenq’aheb’ chirilb’al k’a’ut naq wankeb’ lix taqlahom li Dios, chan ru naq ink’a’ neke’xjal rib’ lix k’ojob’anb’il k’anjel, ut lix aajelil ru lix k’anjel laj Kolol qe, li Jesukristo. Lix tojb’al rix li maak xb’aan li Kolonel nokoxkol chiru li kamk, ut rik’in xjalb’al li qak’a’uxl, nokoxkol ajwi’ chiru li maak. Rik’in xnawb’al li na’leb’ a’in, eb’ laj Santil Paab’anel sa’ Roso’jikeb’ li Kutan jalan wi’ li rajomeb’ ut lix b’aanuhomeb’, ut osob’tesinb’ileb’ rik’in li metz’ew chixkuyb’al li ch’a’ajkilal ut li rahilal re li yu’am a’in. …

“Li k’uub’anb’il na’leb’ re li evangelio li tento te’xtaaqe li junkab’al re xkawresinkil rib’ choq’ re li junelik yu’am ut li taqenaqil loq’al, wan chi tz’iib’anb’il sa’ li aatin jek’inb’il xb’aan li Iglees sa’ 1995, “Li Junkab’al: Jun Jek’inb’il Aatin choq’ re li Ruchich’och’.” Li jek’inb’il aatin a’in ink’a’ naxk’am rib’ rik’in junjunq lix chaq’rab’il tenamit, li na’leb’, ut li aatin yeeb’il sa’ li ruchich’och’ li wanko wi’. Sa’ li kutan a’in, li k’a’ru b’aanunb’il li mas nak’utun naq ink’a’ naxk’am rib’ rik’in, a’an li laq’ab’ank-ib’ chi maak’a’ li sumlaak, li sumlaak rik’in rech winqilal malaj rech ixqilal, ut xk’irisinkileb’ li kok’al sa’eb’ li sumalil a’in. Eb’ li ink’a’ neke’paab’ank re ut ink’a’ neke’sik’ok re li taqenaqil loq’al, ut eb’ li q’unb’esinb’ileb’ xch’ool xb’aan li ruchich’och’il na’leb’, neke’xk’oxla li jek’inb’il aatin a’in chirix li junkab’al jo’ yal jun li yeeb’il na’leb’ li tento raj taajalmanq. A’b’anan eb’ laj Santil Paab’anel sa’ Roso’jikeb’ li Kutan neke’xnaw naq li jek’inb’il aatin chirix li junkab’al naxch’olob’ xyaalal chan ru naq tento te’wanq li junkab’al re tooruuq chi chaab’ilo’k sa’ li junelik q’e kutan” (“Li k’uub’anb’il na’leb’ ut li jek’inb’il aatin,” Jolomil ch’utub’aj-ib’ re octubre 2017).

Xchaab’ilob’resinkil li qak’utum

Yu’ami li evangelio chi anchal aach’ool. “Li wankilal nachal naq jun aj k’utunel naxb’aanu chixjunil li naru chiru re xkawresinkil, ink’a’ ka’ajwi’ li na’leb’ tixk’ut, jo’kan ajwi’ lix yu’am, re taaruuq taawanq li Musiq’ej rik’in” (Boyd K. Packer, Teach Ye Diligently [1975], 306).