fakatātā ʻo Mele mo e valevale ko Sīsuú

Ko e ʻAloʻí ʻi he Kopá mo e ʻŪmipá, tā fakatātā ʻa J. Kirk Richards

20–26 Tīsema

Kilisimasí

Ko e Meʻaʻofa Taʻe Mafakatataua ʻo e ʻAlo Fakalangi ʻo e ʻOtuá

Manatuʻi ʻoku fakahoko ʻi he tukui ʻapi ʻo e kau mēmipa ʻo e kalasí ʻa e ako mahuʻinga mo ʻaonga taha ʻo e ongoongoleleí. ʻI hoʻo teuteu ke faiakó, fakakaukau ki he founga ʻe lava ke fakamālohia ai ʻe hoʻo kalasi Lautohi Faka-Sāpaté ʻenau ako fakafoʻituituí mo fakafāmilí.

Lekooti Hoʻo Ngaahi Ongó

fakaʻilonga ʻo e feʻinasiʻakí

Fakaafeʻi e Feʻinasiʻakí

Kuo faitāpuekina fēfē ʻe hono ako ʻo e “Ko e Kalaisi Moʻuí” (ChurchofJesusChrist.org) he uike ní ʻa e kau mēmipa hoʻo kalasí? Te ke lava ʻo vahevahe ʻa e ngaahi lea ko ʻeni meia Palesiteni Sini B. Pingihami, Palesiteni Lahi ʻo e Fineʻofá, pea fakaafeʻi leva ʻa e kau mēmipa ʻo e kalasí ke nau fakamatala ha faʻahinga aʻusia tatau ne nau maʻu: “ʻI heʻeku ako ki he moʻui mo e ngaahi akonaki ʻa Sīsū Kalaisí ʻi he tokanga lahi mo tukupā ange ke ako maʻuloto e ‘Ko e Kalaisi Moʻuí,’ naʻe tupulaki ai ʻeku houngaʻia mo e ʻofa ki hotau Fakamoʻuí. ʻOku ʻi he sētesi takitaha ʻo e tohi fakalaumālie ko iá, ha akonaki pea ʻokú ne fakalahi ʻa e mahino ʻoku ou maʻú ki Hono ngaahi fatongia fakalangí mo e misiona he māmaní. ʻOku fakapapauʻi mai ʻi he ngaahi meʻa naʻá ku ako mo ongoʻi ʻi he vahaʻataimi ʻo ʻeku ako mo fakakaukauloto ki aí, ko Sīsū moʻoni ‘ʻa e māmá, mo e moʻuí, pea mo e ʻamanaki leleiʻanga ʻo e māmaní’” (“Ke Kakato Ai Hoʻomou Fiefiá,” Ensign pe Liahona, Nōvema 2017, 85).

fakaʻilonga ʻo e akoʻí

Akoʻi ʻa e Tokāteliné

“Kuo teʻeki ke ʻi ai ha taha kuo ʻi ai hano mālohi pehē.”

• ʻE lava ke lau ʻe he kau mēmipa ʻo e kalasí ʻa e “Ko e Kalaisi Moʻuí” pea vahevahe ʻenau fakakaukau ki he ʻuhinga kuo mālohi ange ai ʻa e ivi tākiekina ʻo Sīsū Kalaisí ʻi ha toe taha kehé. Ko e hā ha toe fakamatala ʻi he “Ko e Kalaisi Moʻuí” ʻokú ne poupouʻi ʻa e tala ko ʻení? Fakaafeʻi e kau mēmipa ʻo e kalasí ke nau vahevahe ʻa e founga kuó Ne tākiekina fakataautaha ai kinautolú. ʻE lava ke tānaki atu ʻa e vitiō “Why We Need a Savior” (ChurchofJesusChrist.org) ki hoʻomou fealeaʻakí.

• Kuo fie maʻu nai ke fakamatalaʻi ʻe he kau mēmipa ʻo e kalasí ki ha taha ʻo ha anga fakafonua kehe ʻa e ʻuhinga ʻoku nau fakamanatua ai ʻa e Kilisimasí? Mahalo naʻa lava ke nau vahevahe ʻenau ngaahi aʻusiá. Pe te ke fakaafeʻi e kau mēmipa ʻo e kalasí ke nau fakakaukauloto ne fehuʻi ange ʻe ha taha ʻoku ʻikai maheni mo e anga faka-Kalisitiané ʻa e fehuʻi ko ʻení kiate kinautolu. Te tau tali fēfē nai ʻa e fehuʻi ko ʻení? Poupouʻi e kau mēmipa ʻo e kalasí ke nau toe vakaiʻi ʻa e “Ko e Kalaisi Moʻuí” mo fakakaukau ki he fehuʻi ko ʻení, pea fakaafeʻi ha niʻihi ke nau vahevahe ʻenau fakakaukaú. Te mou lava ʻo lau mo e kalasí ʻa e Luke 2:10–14 pe hivaʻi ha foʻi himi ʻoku fakahaaʻi ai ʻa e fiefia ʻo e Kilisimasí (hangē ko e “Fiefia ki Māmaní,” Ngaahi Himí, fika 110) pea talanoa ki he ʻuhinga ʻoku ʻomi ai ʻe he ʻaloʻi ʻo Kalaisí ʻa e “fiefia lahí.” Ko e hā te tau lava ʻo fai ke “tali hotau Tuʻí”?

  Sīsū Kalaisi

  Maama ʻo e Māmaní, tā fakatātaaʻi ʻe Howard Lyon

“Fakafetaʻi ki he ʻOtuá ʻi Heʻene meʻaʻofa taʻe mafakatatauá.”

• ʻI he “Ko e Kalaisi Moʻuí,” ʻoku lave ʻa e kau ʻAposetoló ki he Fakamoʻuí ko ha “meʻaʻofa” mei heʻetau Tamai Hēvaní. Ke tokoni ki he kau mēmipa ʻo e kalasí ke nau ako lahi ange ki he meʻaʻofa ko ʻení, te ke lava ʻo tohiʻi ʻi he palakipoé ʻOku fakafou ʻia Sīsū Kalaisi ʻa hono ʻomi ʻe he ʻOtuá ʻa e meʻaʻofa ʻo e … pea fakaafeʻi e kau mēmipa ʻo e kalasí ke nau fokotuʻu ha ngaahi founga ke fakakakato ʻaki ʻa e sētesi ko ʻení, ʻo makatuʻunga ʻi he meʻa ne nau lau ʻi he “Ko e Kalaisi Moʻuí” mo e lea ne fai ʻe Palesiteni Lāsolo M. Nalesoni ʻi he “Ngaahi Maʻuʻanga Tokoni Kehé.” Te tau maʻu fēfē ʻa e ngaahi meʻaʻofa ko ʻení? Te ke lava ʻo fakaafeʻi ʻa e kau mēmipa ʻo e kalasí ke nau fili ha taha ʻo e ngaahi meʻaʻofa ko ʻení pea ngāue ke maʻu kakato ange ʻa e meʻaʻofa ko iá.

fakaʻilonga ki he ngaahi maʻuʻanga tokoni kehé

Ngaahi Maʻuʻanga Tokoni Kehé

Ngaahi Meʻaʻofa ʻoku ʻomi ʻe he Fakamoʻuí.

ʻI ha lea ʻa Palesiteni Lāsolo M. Nalesoni ʻi he taimi Kilisimasí, naʻá ne fakalau ai ha ʻū meʻaʻofa ʻe fā ʻoku foaki ʻe he Fakamoʻuí ki he tokotaha kotoa pē ʻokú ne fie maʻu iá:

“ʻUluakí, naʻá Ne foaki mai ʻa e malava taʻefakangatangata ke ʻofá. ʻOku kau ai e malava ke ʻofa ʻi he niʻihi ʻoku ʻikai ʻofaʻí mo kinautolu ʻoku ʻikai ke nau ʻofa ʻiate koé pea lolotonga fakatanga mo fai kovi atú.

“ʻI he tokoni ʻa e Fakamoʻuí, te tau lava ʻo ako ke ʻofa ʻo hangē ko ʻEne ʻofá. …

“Ko e meʻaʻofa hono ua ʻoku foaki atu ʻe he Fakamoʻuí ko e malava ko ia ke fakamolemolé. Te ke lava fakafou ʻi Heʻene Fakalelei taʻefakangatangatá, ʻo fakamolemoleʻi ʻa kinautolu kuo nau fakamamahiʻi koé pea mahalo he ʻikai ke nau teitei tokanga ki heʻenau angakoví. …

“Ko ha meʻaʻofa hono tolu mei he Fakamoʻuí ko e fakatomalá. ʻOku ʻikai faʻa mahino lelei e meʻaʻofa ko ʻení. … Ko e fakatomalá ko ha meʻaʻofa maʻongoʻonga ia. Ko ha founga ia ʻoku ʻikai totonu ke ilifiaʻi. Ko ha meʻaʻofa ia ke tau maʻu ʻi he fiefia pea ke fakaʻaongaʻi—ʻo tali—ʻi he ʻaho takitaha ʻi heʻetau faifeinga ke hoko ʻo hangē ange ko hotau Fakamoʻuí. …

Ko e meʻaʻofa hono fā mei hotau Fakamoʻuí ko ha talaʻofa moʻoni—ko ha talaʻofa ʻo e moʻui taʻengatá. … Ko e moʻui taʻengatá ko e faʻahinga mo e tuʻunga ia e moʻui ʻa e Tamai Hēvaní pea mo Hono ʻAlo ʻOfaʻangá. ʻI he taimi ʻoku ʻomi ai ʻe he Tamaí ʻa e moʻui taʻengatá, ʻoku hangē ʻokú Ne pehē mai, ‘Kapau te ke fili ke muimui ki hoku ʻAló—kapau ko hoʻo holí ke ke hoko moʻoni ʻo hangē ange ko Iá—te ke malava ʻi he fakalau ʻa e taimí ʻo moʻui hangē ko kimauá pea pule ki he ngaahi māmaní mo e ngaahi puleʻangá.’

“ʻE ʻomi ʻe he ngaahi meʻaʻofa makehe ʻe fā ko ʻení ha fiefia lahi ange ʻi heʻetau tali kinautolú. Naʻe malava ʻo fakahoko ia koeʻuhí naʻe afeitaulalo ʻa Sihova ke hāʻele mai ki he māmaní ko e pēpē ko Sīsuú” (“Four Gifts That Jesus Christ Offers to You” [First Presidency Christmas devotional, Dec. 2, 2018], broadcasts.ChurchofJesusChrist.org).

Fakatupulaki ʻEtau Founga Akoʻí

Teuteuʻi fakalaumālie koe. “ʻOku ʻuhinga e akoʻi ʻo e ongoongoleleí ke ongó, ke ʻoua naʻa tau teuteu lēsoni pē kae teuteuʻi foki mo kitautolu. … ʻOku tukutaha e tokanga a e kau faiako lelei ʻo e ongoongoleleí—kimuʻa pea nau fakakaukau ke fakakakato e taimi kalasí—ki hono fakafonu honau lotó ʻaki e Laumālie Māʻoniʻoní” (Ko e Faiako ʻi he Founga ʻa e Fakamoʻuí, 12).