“6–12 Tīsema. Ko e Ngaahi Tefito ʻo e Tuí mo e Fanongonongo Fakamafaiʻi 1 mo e 2: ‘ʻOku Mau Tui,’” Haʻu, ʻo Muimui ʻIate Au—Maʻá e Lautohi Faka-Sāpate 2021 (2020)
“6–12 Tīsema. Ko e Ngaahi Tefito ʻo e Tuí mo e Fanongonongo Fakamafaiʻi 1 mo e 2,” Haʻu, ʻo Muimui ʻIate Au—Maʻá e Lautohi Faka-Sāpaté: 2021
Ki He Kau Mēmipa Tangata Kotoa Pē ʻOku Tāú, tā ʻa Emma Allebes
6–12 Tīsema
Ko e Ngaahi Tefito ʻo e Tuí mo e Fanongonongo Fakamafaiʻi 1 mo e 2
“ʻOku Mau Tui”
Lau ʻi he faʻa lotu ʻa e Ngaahi Tefito ʻo e Tuí mo e Fanongonongo Fakamafaiʻi 1 mo e 2, pea fekumi ki he ueʻi ʻa e Laumālie Māʻoniʻoní ʻi hoʻo palani ha aʻusia fakaako ʻoku ʻuhingamālié maʻá e kau mēmipa ʻo e kalasí ʻi he Sāpaté.
Lekooti Hoʻo Ngaahi Ongó
Fakaafeʻi e Feʻinasiʻakí
Te ke lava ʻo fakaafeʻi e kau mēmipa ʻo e kalasí ke nau fakakakato ʻa e fakamatala ko ʻení: “ʻOku ou fiefia ne u lau ʻa e folofolá he uiké ni koeʻuhí …
Akoʻi ʻa e Tokāteliné
ʻOku ʻi he Ngaahi Tefito ʻo e Tuí ha ngaahi moʻoni mahuʻinga ʻo e ongoongolelei kuo fakafoki maí.
-
Ko ha founga ʻeni ke tokoni ki he kau mēmipa ʻo e kalasí ke nau vahevahe ʻa e meʻa ne nau maʻu ʻoku ʻuhingamālie ʻi he Ngaahi Tefito ʻo e Tuí: Te ke lava ʻo hiki ʻa e fika 1 ki he 13 ʻi he palakipoé pea kole ki he kau mēmipa ʻo e kalasí ke nau hiki he tafaʻaki ʻo e mataʻifiká ha meʻa ne nau ako mei he tefito ʻo e tui ko iá. Ko e hā ha faikehekehe ʻoku fakahoko ʻe he ngaahi moʻoni ko ʻení ʻi hotau vā fetuʻutaki mo ʻetau Ongomātuʻa Fakalangí mo Sīsū Kalaisí? Mahalo naʻa lava ke vahevahe ʻe he kau mēmipa ʻo e kalasí ʻa e founga kuo fakalahi ai ʻe he Ngaahi Tefito ʻo e Tuí ʻenau ako ki he ongoongoleleí pe tokoni ke nau vahevahe ʻa e ongoongoleleí mo e niʻihi kehé.
Ngaahi Tefito ʻo e Tuí 1:9; Fanongonongo Fakamafaiʻi 1 mo e 2
ʻOku tataki ʻa e Siasi ʻo Sīsū Kalaisí ʻe he fakahā.
-
Ko e hā ʻoku mahuʻinga ai kiate kitautolu ke hokohoko atu ʻa e fakahaá? Fakaafeʻi e kau mēmipa ʻo e kalasí ke nau vahevahe ʻenau ngaahi ongo fekauʻaki mo e fehuʻi ko ʻení. ʻE lava foki ke aleaʻi ʻe he kau mēmipa ʻo e kalasí ʻa e founga ʻoku fekauʻaki ai ʻa e tefitoʻi moʻoni ʻo e hokohoko ʻo e fakahaá mo e Fanongonongo Fakamafaiʻi 1 mo e 2. (Lēsoni ki he uike ní ʻi he Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí ʻoku fokotuʻu mai ai e ngaahi maʻuʻanga tokoni ʻaonga ʻoku felāveʻi mo e ngaahi fakahā ko ʻení.) Ko e hā ʻoku tau ako mei he Fanongonongo Fakamafaiʻi 1 mo e 2 fekauʻaki mo e fatongia ʻo e fakahaá ʻi hono tataki ʻo e Siasí? (vakai foki, Ngaahi Tefito ʻo e Tuí 1:9 mo e lea ʻa Palesiteni Kōtoni B. Hingikelī ʻi he “Ngaahi Maʻuʻanga Tokoni Kehé”). Ko e hā ha toe ngaahi sīpinga kehe ʻo e hokohoko ʻo e fakahaá ʻoku lava ke fakakaukau ki ai ʻa e kau mēmipa ʻo e kalasí? ʻOku tākiekina fēfē ʻe he ngaahi fakahā ko ʻení ʻetau moʻuí mo tokoni ke tau langa hake ʻa e puleʻanga ʻo e Tamai Hēvaní?
-
Fakakaukau ke fakaafeʻi ʻa e kau mēmipa ʻo e kalasí ke nau toe vakaiʻi ʻa e Fanongonongo Fakamafaiʻi 1 mo e 2 pea vahevahe mo ha meʻa mei he ngaahi fakahā ko ʻení ʻa ia ʻe ala tokoni ki ha taha ʻoku faifeinga ke tali ha liliu kimuí ni ʻi he tuʻutuʻuní, fakahaá, pe tokāteline ʻo e Siasí. Ko e hā ha founga kuo ako ai ʻe he kau mēmipa ʻo e kalasí ke nau falala ki he ʻOtuá ʻi he taimi ʻoku nau faingataʻaʻia ai ʻi ha meʻa ʻi he Siasí? Naʻe hoko fēfē ʻenau ako he uike ní ke fakamālohia ai ʻenau tui ʻoku taki ʻe he ʻEikí ʻa Hono Siasí? ʻE lava foki ke tokoni e ngaahi fakakaukau meia Palesiteni Tieta F. ʻUkitofa ʻi he “Ngaahi Maʻuʻanga Tokoni Kehé.”
Uilifooti Utalafi, tā fakatātaaʻi ʻe H. E. Peterson
Ngaahi Maʻuʻanga Tokoni Kehé
“Ne ʻi ai e Laumālie ʻo e ʻOtuá.”
Naʻe hoko ʻa Palesiteni Kōtoni B. Hingikelī ko ha mēmipa ʻo e Kōlomu ʻo e Kau ʻAposetolo ʻe Toko Hongofulu Mā Uá ʻi he taimi naʻe mau ai e fakahā ʻoku fakamatalaʻi ʻi he Fanongonongo Fakamafaiʻi 2. Naʻá ne fakamatalaʻi ʻene aʻusiá ʻi he hili ha ngaahi taʻu mei ai:
“Ne ʻi ai ha ongo molumalu mo māʻoniʻoni ʻi he lokí. Ne u ongoʻi ne fakaava mai ha matapā mei he taloni ʻo e langí ʻi he tūʻulutui ʻa e palōfita ʻo e ʻOtuá mo hono ngaahi Tokouá ʻo fai ʻenau tautapá. Ne ʻi ai e Laumālie ʻo e ʻOtuá. Pea ʻi he mālohi ʻo e Laumālie Māʻoniʻoní naʻe ʻomai ki he palōfita ko iá ha tala fakapapau ko e meʻa naʻá ne lotu ki aí ʻoku tonu ia, kuo hokosia e taimí pea ʻi he taimi ní, ke foaki atu e ngaahi tāpuaki fakaofo ʻo e lakanga fakataulaʻeikí ki he houʻeiki tangata moʻui taau he feituʻu kotoa pē ʻo tatau ai pē ko e hā honau tupuʻangá.
“Naʻe ʻiloʻi ʻe he tangata kotoa pē ʻi he siakale ko iá ʻa e meʻa tatau ʻi he mālohi ʻo e Laumālie Māʻoniʻoní.
“Ko ha aʻusia molumalu mo fakaʻeiʻeiki ia. … Naʻe ʻikai ongo mai ha leʻo ki homau telinga fakatuʻasinó. Ka naʻe fanafana fakapapau mai ʻa e leʻo ʻo e Laumālié ki homau ʻatamaí mo homau laumālié tonu” (“Priesthood Restoration,” Ensign, Oct. 1988, 70).
“ʻOku fakanatula pē ke ʻi ai ha ngaahi fehuʻi.”
Naʻe lea ʻaki ʻeni ʻe Palesiteni Tieta F. ʻUkitofa ki he niʻihi ʻoku nau veiveiua kau ki he hisitōlia pe tokāteline ʻo e Siasí:
“ʻOku fakanatula pē ke ʻi ai ha ngaahi fehuʻi—kuo tāhuli e tenga ʻo e fekumi moʻoní ʻo hoko ko ha fuʻu ʻakau lahi ʻo e mahinó. ʻOku tokosiʻi pē ha kāingalotu ʻo e Siasí, kuo teʻeki ai ke nau fefaʻuhi mo ha ngaahi fehuʻi vivili pe pelepelengesi, ʻi ha taimi. Ko e taha e ngaahi taumuʻa ʻo e Siasí ke fafangaʻi mo tanumaki ʻa e tenga ʻo e tuí—ʻo aʻu ai pē he taimi ʻe niʻihi ki he kelekele touʻone ʻo e veiveiuá mo e taʻe-pauʻiá. Ko e tuí ko e ʻamanaki lelei ki ha ngaahi meʻa ʻoku ʻikai mamata ki ai ka ʻoku moʻoni.
“Ko ia ai, ʻe kāinga ʻofeina—mo hoku kaungāmeʻa ʻofeina—kātaki, ʻo tomuʻa fakafehuʻia hoʻo veiveiuá ka ke toki fakafehuʻia hoʻo tuí. Kuo pau ke ʻoua naʻa tau teitei tuku e veiveiuá ke ne haʻisia mo taʻofi kitautolu mei he ʻofa, nonga, mo e ngaahi meʻafoaki fakalangi ʻoku maʻu ʻi he tui ki he ʻEiki ko Sīsū Kalaisí” (“Haʻu Ke Tau Kau Fakataha,” Ensign pe Liahona, Nōv. 2013, 23; vakai foki, Lawrence E. Corbridge, “Stand Forever” [Brigham Young University devotional, Jan. 22, 2019], speeches.byu.edu).
Fakatupulaki ʻEtau Founga Akoʻí
ʻOku sai pē ke te pehē, “ʻOku ʻikai ke u ʻilo.” Neongo ʻoku totonu ke ke feinga ho lelei tahá ke tokoni ke tali e ngaahi fehuʻi ʻa e kau mēmipa ʻo e kalasí fekauʻaki mo e ongoongoleleí, ka ʻoku ʻikai ʻamanaki ʻa e ʻEikí ke ke ʻilo ʻa e meʻa kotoa pē. Ko e taimi ʻoku ʻikai te ke ʻilo ai ha tali ki ha meʻa, tala totonu ia. Hili iá pea tataki e kau akó ki he tokāteline kuo fakahaá, pea fai hoʻo fakamoʻoni ki he meʻa ʻokú ke ʻiloʻí. (Vakai, Ko e Faiako ʻi he Founga ʻa e Fakamoʻuí, 24.)