Kutumia Njoo, Unifuate—Kwa Ajili ya Shule ya Jumapili

Kujiandaa Kufundisha katika Shule ya Jumapili

Kujifunza binafsi na kama familia nyumbani kunapaswa kuwa kitovu cha kujifunza injili. Hii ni kweli kwako na kwa wale unaowafundisha. Unapojiandaa kufundisha, anza kwa kuwa na uzoefu wako mwenyewe katika maandiko. Maandalizi yako muhimu zaidi yatatokea wakati unapokuja kwa Kristo, unapopekua maandiko na kutafuta mwongozo wa kiungu wa Roho Mtakatifu.

Njoo, Unifuate—Kwa Ajili ya Watu Binafsi na Familia ni sehemu muhimu kwa vyote kujifunza kwako binafsi na maandalizi yako ya kufundisha. Itakusaidia kupata uelewa wa kina wa kanuni za mafundisho zinazopatikana katika maandiko. Itakuwezesha pia kuwatia moyo na kuwaalika washiriki wa darasa kutumia Njoo, Unifuate—Kwa Ajili ya Watu Binafsi na Familia ili kuboresha kujifunza kwao binafsi maandiko na kama familia (kwa msaada katika hili, ona “Mawazo ya Kuhimiza Kujifunza Binafsi na Kifamilia” katika nyenzo hii). Unapofanya hivi, kumbuka kuwa mwepesi kuona washiriki wa darasa ambao mazingira ya familia zao yanaweza yasiruhusu kujifunza maandiko kama familia na jioni ya familia nyumbani kila mara.

Wakati wa maandalizi yako, mawazo na fikra zitakujia kuhusu watu unaowafundisha, jinsi kanuni katika maandiko zitakavyobariki imani yao kwa Baba wa Mbinguni na Yesu Kristo, na jinsi unavyoweza kuwatia moyo kuzigundua kanuni hizo wanapojifunza maandiko kwa ajili yao wenyewe.

Mawazo ya Kufundisha

Unapojiandaa kufundisha, unaweza kupata mwongozo wa ziada kwa kuchunguza muhtasari katika nyenzo hizi. Usifikirie mawazo haya kama maelekezo ya hatua kwa hatua lakini badala yake ni kama mapendekezo ya kuchochea kupata msukumo wako mwenyewe. Unawajua washiriki wa darasa lako, na utapata kuwajua hata vizuri zaidi pale mnapojifunza pamoja darasani. Bwana anawajua pia, na atakupa mwongozo wa njia nzuri zaidi za kuwasaidia washiriki wa darasa kujenga juu ya kujifunza injili wanakokufanya manyumbani mwao.

Nyenzo nyingine nyingi zinapatikana kwa ajili yako kuweza kutumia wakati unapojiandaa, ikiwa ni pamoja na mawazo katika Njoo, Unifuate—Kwa Ajili ya Watu Binafsi na Familia na magazeti ya Kanisa. Kwa maelezo zaidi kuhusu nyenzo hizi na zingine, ona sehemu yenye kichwa cha habari “Nyenzo za Ziada” ndani ya nyenzo hii.

Baadhi ya vitu vya Kukumbuka

• Kama mwalimu, una wajibu muhimu kusaidia, kutia moyo, na kujenga juu ya kujifunza injili kwa washiriki wa darasa kibinafsi na kwa amilia. Huku baadhi ya washiriki wa darasa yawezekana wasisome kwa uthabiti injili nyumbani, unaweza kuleta tofauti kubwa katika kuwahimiza na kuwasaidia kufanya nyumbani kwao kuwa kitovu cha kujifunza injili.

• Uongofu wa washiriki wa darasa katika injili ya Yesu Kristo utaongezeka wanapoelewa na kutumia mafundisho ya kweli. Wahimize kuandika na kutenda juu ya ushawishi wanaopokea kutoka kwa Roho Mtakatifu.

• Kufundisha ni zaidi ya kutoa mhadhara, lakini pia ni zaidi ya kuongoza tu majadiliano. Sehemu ya wajibu wako ni kutia moyo ushiriki ambao unaadilisha na wenye msingi wake katika maandiko. Huna budi pia kushiriki utambuzi wenye msukumo uliopokea pale ulipojifunza maandiko.

• Kumbuka kwamba washiriki wengi wa darasa wanapata uzoefu wa kiroho wanapojifunza maandiko nyumbani. Unaweza kuunga mkono kujifunza kwao injili kwa kuwapa nafasi za kila mara za kuelezea wanachojifunza nyumbani na jinsi kinavyogusa maisha yao.

• Baba wa Mbinguni anataka wewe ufanikiwe kama mwalimu. Ametoa nyenzo nyingi ili kukusaidia, ikiwa ni pamoja na mikutano ya baraza la walimu. Katika mikutano hii unaweza kushauriana na walimu wengine kuhusu changamoto unazopata. Unaweza pia kujadili na kufanyia mazoezi kanuni za kufundisha kama Kristo.

• Watu wengine hujifunza vizuri zaidi wanapokuwa na nafasi ya kufundisha. Mara kwa mara, fikiria kuwaruhusu washiriki wa darasa, ikijumuisha vijana, kufundisha sehemu ya somo. Fanya uamuzi huu kulingana na mahitaji na uwezo wa washiriki wa darasa. Kama unamualika mshiriki wa darasa kufundisha, chukua muda kumsaidia kujiandaa mapema kwa kutumia mawazo yanayopatikana katika nyenzo hii na katika Njoo, Unifuate—Kwa Ajili ya Watu Binafsi na Familia. Kumbuka kwamba kama mwalimu aliyeitwa, unawajibika ipasavyo kwa kile kinachofundishwa katika darasa.

• Nyenzo hii inajumuisha muhtasari wa kufundisha kwa kila wiki ya mwaka. Wakati wa Jumapili ambayo Shule ya Jumapili haifanyiki, familia zinaweza kuendelea kusoma Mafundisho na Maagano nyumbani kufuatana na ratiba ya muhtasari katika Njoo, Unifuate—Kwa Ajili ya Watu Binafsi na Familia. Unaweza kuchagua kuruka masomo yanayokuja siku ya wiki wakati ambapo Shule ya Jumapili haifanyiki, au unaweza kufundisha masomo mengi wakati wa darasa moja.