Maria ug Elisabet

Enero 7–13

Mateo 1; Lucas 1

“Matuman Unta Kanako Kanang Imong Giingon”

Sa dili pa ka magbasa og bisan unsa nga dugang nga mga materyal sa pagtuon, basaha ug pamalandungi ang Mateo 1 ug Lucas 1, ug irekord ang imong espiritwal nga mga impresyon. Tuguti ang Espiritu nga mogiya sa imong pagpangandam. Dayon usisaha ang mga ideya niini nga outline ug sa Dali, Sunod Kanako—Alang sa mga Indibidwal ug mga Pamilya.

Irekord ang Imong mga Impresyon

pagpaambit nga icon

Awhaga ang Pagpaambit

Hatagi ang mga sakop sa klase og pipila ka minutos sa pagribyu sa Mateo 1 o Lucas 1, ug dapita sila sa pagpakigbahin sa ilang paborito nga bersikulo ug ipasabut kon unsa nga doktrinal nga mga kamatuoran ang ilang nakat-unan. Mahimong makatabang nimo ang pagribyu sa daklit sa mga panghitabo niining mga kapitulo aron mapakigbahin ang pipila ka konteksto sa mga bersikulo.

pagtudlo nga icon

Itudlo ang Doktrina

Mateo 1:18–25; Lucas 1:5–80

Ang Langitnong Amahan molihok pinaagi sa Iyang matinud-anong mga anak aron sa pagtuman sa Iyang mga katuyoan.

• Ang mga sakop sa klase mas makabaton og makahuluganong mga kasinatian samtang magtuon sa Bag-ong Tugon karong tuiga kon makakat-on sila og mga leksyon gikan sa mga kasinatian sa mga tawo nga ilang nabasahan. Aron matabangan sila sa pagbuhat niini, mahimo nimong isulat ang mga ngalan sa mga tawo sa Mateo 1 ug Lucas 1 diha sa pisara, kauban sa mga pakisayran sa kasulatan mahitungod niining mga indibidwal, sama sa mosunod:

  • Maria (Lucas 1:26–56)

  • Jose (Mateo 1:18–25)

  • Elisabet (Lucas 1:5–7, 24–25, 40–45, 57–60)

  • Zacarias (Lucas 1:5–23, 59–64)

  Dapita ang mga sakop sa klase sa pagpili og usa ka tawo nga gusto nilang makat-unan pa, sa pagbasa sa nalista nga mga bersikulo, ug sa pagpakigbahin ngadto sa laing tawo diha sa klase kon unsay ilang nakat-unan gikan sa kasinatian nianang tawhana. Unsay atong buhaton aron sa pagsunod sa matinud-anong ehemplo nianang tawhana?

  Si Gabriel nagpakita ngadto ni Maria

  Ang Pagpahibalo [Annunciation], ni John Scott

• Aron matabangan ang mga sakop sa klase nga maghunahuna og mas lawom pa mahitungod sa kinaiya ug tahas ni Maria diha sa plano sa Amahan, mahimo nimong ipasalida ang mga video nga “An Angel Foretells Christ’s Birth to Mary” ug “Mary and Elisabeth Rejoice Together” (LDS.org) o magbasa nga magdungan sa Lucas 1:26–38, 46–56, nga mangita sa mga butang nga gisulti ni Maria nga nagpadayag mahitungod sa iyang kinaiya. Unsa pa man ang atong makat-unan mahitungod ni Maria? Unsa may iyang matudlo kanato mahitungod sa pagdawat sa kabubut-on sa Dios alang kanato?

Lucas 1:5–25

Ang mga panalangin sa Dios moabut sa kaugalingon Niyang panahon.

• Mahimong adunay mga tawo sa inyong klase kinsa, sama nila ni Elisabet ug Zacarias, nga nagpuyo sa matarung nga paagi ug sa gihapon wala makadawat sa gilauman nga panalangin. Unsaon nimo sa pagtabang kanila nga makakat-on gikan sa mga ehemplo nila ni Elisabet ug Zacarias? Mahimo nimong sugdan pinaagi sa paghangyo sa mga sakop sa klase sa pagsulat sa mga panalangin nga ilang gilauman. Dayon mahimo silang mosiksik sa Lucas 1:5–25, nga mangita sa mga leksyon nga mahimo nilang makat-unan gikan nila ni Elisabet ug Zacarias mahitungod sa paghulat sa Ginoo. Mahimo usab silang mobasa ug mamalandong sa kinutlo diha sa “Dugang nga mga Kapanguhaan.” Awhaga sila sa pagsulat sa unsay ilang makat-unan tupad sa gilauman nga panalangin ug, kon angay, ipakigbahin ang ilang mga hunahuna.

• Unsa ang ubang mga ehemplo sa paghulat sa gitakda nga panahon sa Ginoo nga mapakigbahin sa mga sakop sa klase gikan sa ilang kaugalingong kinabuhi o gikan sa mga istorya diha sa mga kasulatan? Unsa ang atong makat-unan gikan niini nga mga ehemplo?

Lucas 1:26–38

“Sa Dios walay butang nga dili mahimo.”

• Ang mga sakop sa klase mahimong maghunahuna usahay—sama ni Maria—kon sa unsang paagi nga ang mga plano sa Dios o ang mga saad ngadto kanila matuman. Aron matabangan ang mga sakop sa klase nga makasabut nga pinaagi sa gahum sa Dios ang tanang butang posible, mahimo nimong i-display ang hulagway nga Ang Pagpahibalo: Ang Anghel Gabriel Mipakita ni Maria (Libro sa mga Hulagway sa Ebanghelyo, nu. 28) ug dapita sila nga magbasa og dungan sa Lucas 1:26–38. Unsay atong makat-unan mahitungod sa pagbuntog sa daw imposible pinaagi sa pagtuon sa mga pulong ug mga aksyon ni Maria? Hangyoa ang mga sakop sa klase sa pagpakigbahin og mga kasinatian diin ang Dios mitabang kanila nga matuman ang butang nga ilang gihunahuna nga imposible.

• Ang kinabuhi sa Manluluwas nagpakita sa kamatuoran nianang gipahayag ni Gabriel: “Sa Dios walay butang nga dili mahimo” (Lucas 1:37). Sa paghulagway niining baruganan, mahimo nimong hangyuon ang mga sakop sa klase sa paghunahuna sa mga higayon sa dihang ang Manluluwas nakatuman og daw imposible nga mga butang sa dihang nagbuhat sa kabubut-on sa Iyang Amahan (tan-awa, pananglitan sa, Juan 9:1–7). Aron matabangan ang mga sakop sa klase nga makita kon sa unsang paagi nga kining baruganan naglihok diha sa ilang kinabuhi, mahimo nimo silang dapiton sa pagpamalandong sa mga pangutana sama sa mosunod: Unsa ang kalainan nga nahimo niini sa inyong kinabuhi nga masayud nga walay imposible sa Dios? Sa unsang paagi kini nakapausab sa paagi sa inyong pagserbisyo sa Simbahan? sa paagi sa inyong inter-aksyon ngadto sa inyong pamilya? Mahimong makatabang usab ang pagtandi sa Lucas 1:37 ngadto sa mga pulong sa Manluluwas sa Marcos 14:36.

Mateo 1:18–25; Lucas 1:26–55

Si Jesukristo mao ang Anak sa Dios.

• Ang nag-unang katuyoan nila ni Mateo, Lucas, ug sa ubang mga tigsulat sa Ebanghelyo mao ang pagpamatuod nga si Jesukristo mao ang Anak sa Dios. Unsaon nimo pagtabang sa mga sakop sa klase nga mahibalo niining katuyoan diha mismo sa unang mga kapitulo nga ilang mabasa sa Bag-ong Tugon? Ania ang usa ka ideya: Bahina ang klase ngadto sa mga grupo o mga parisan, ug hatagi ang matag grupo og hugpong sa mga bersikulo gikan sa Mateo 1 o Lucas 1. Dapita sila sa pagpangita sa mga panghitabo o sa mga pulong nga makapalig-on sa ilang pagtuo sa balaanong misyon ni Jesukristo isip ang Anak sa Dios ug ipakigbahin sa klase kon unsay ilang makit-an. Ang ubang mga tudling nga mahimo nimong isugyot maglakip sa Mateo 1:18–25 ug Lucas 1:26–38, 39–45, 46–55. Isugyot ngadto sa klase nga samtang magtuon sila sa Bag-ong Tugon karong tuiga, mahimo silang magtinir og lista sa mga tudling nga nagpamatuod nga si Jesukristo mao ang Anak sa Dios. Mahimo gani kamong magtinir niini nga lista isip usa ka klase.

pagkat-on nga icon

Awhaga ang Pagkat-on diha sa Panimalay

Aron maawhag ang mga sakop sa klase nga mobasa sa Mateo 2 ug Lucas 2 alang sa klase sa sunod semana, mahimo nimong isugyot nga kon magbasa sila sa istorya bahin sa pagkatawo sa Manluluwas sa mainampuong paagi, makabaton sila og bag-ong mga ideya, bisan kon nabasa na nila kini sa makadaghang higayon kaniadto.

mga kapanguhaan nga icon

Dugang nga mga Kapanguhaan

Mateo 1; Lucas 1

Naghulat sa Ginoo.

Si Elder Neal A. Maxwell nagtudlo, “Ang hugot nga pagtuo … naglakip sa pagsalig sa gitakda nga panahon sa Dios, kay Siya miingon, ‘Ang tanan nga mga butang kinahanglan gayud mahinabo diha sa ilang panahon.’ (DP 64:32.)” (“Lest Ye Be Wearied and Faint in Your Minds,” Ensign, Mayo 1991, 90).

Si Presidente Dieter F. Uchtdorf nagtudlo:

“Ang matag usa kanato gisultihan sa paghulat sa atong kaugalingong pamaagi. Kita maghulat alang sa mga tubag sa atong mga pag-ampo. Kita maghulat alang sa mga butang diin sa tukmang higayon mahimong magpakita nga husto kaayo ug maayo kaayo alang kanato diin kita maglisud sa paghunahuna kon ngano nga ang Langitnong Amahan molangan sa tubag.

“Nahinumdom ako sa dihang nangandam ako nga bansayon isip usa ka fighter pilot. Migahin kami og dugay kaayo nga panahon sa among pasiuna nga military training sa pisikal nga pagbansay. … Kami mibalik-balik og dagan ug midagan pa og mas daghan.

“Samtang ako nagdagan nakamatikod ko og usa ka butang nga, sa prangka nga pagkasulti, misamok kanako. Kanunay ako nga maapsan sa mga tawo kinsa motabako, moinom, ug nagbuhat sa tanang butang nga supak sa ebanghelyo ug ilabi na gayud sa Pulong sa Kaalam.

“Nahinumdom ako nga naghunahuna, ‘Taym pa usa! Dili ba unta nga makadagan ako ug dili maluya?’ Apan naluya ako, ug naapsan ako sa mga tawo kinsa piho nga wala magsunod sa Pulong sa Kaalam. Akong itug-an, nga nakasamok kini kanako niadtong higayuna. Nangutana ko sa kaugalingon, “ang saad tinuod ba o dili?

“Ang tubag wala moabut dayon. Apan sa kaulahian akong nakat-unan nga ang mga saad sa Dios dili kanunay nga matuman dayon o sa paagi nga atong gilauman; kini moabut sa Iyang panahon ug sa Iyang mga pamaagi. Paglabay sa mga tuig akong makita ang klaro nga ebidensya sa temporal nga mga panalangin nga madawat niadtong kinsa nagsunod sa Pulong sa Kaalam––agig dugang sa espirituhanon nga mga panalangin nga moabut dayon tungod sa pagkamasulundon sa bisan unsang mga balaod sa Dios” (“Ipadayon ang Pagpailub,” Liahona, Mayo 2010, 58).

Pagpalambo sa Atong Pagtudlo

Awhaga ang mga sakop sa klase sa pagtuon sa mga kasulatan diha sa panimalay. Usa ka paagi nga maawhag nimo ang pagtuon sa kasulatan diha sa panimalay mao ang paghatag og panahon aron mapakigbahin sa mga sakop sa klase ang mga nadiskubrihan ug mga ideya gikan sa ilang personal ug pamilya nga pagtuon sa kasulatan. (Tan-awa sa Pagtudlo sumala sa Pamaagi sa Manluluwas, 29.)