pamilya nga nagtan-aw sa album

Disyembre 31–Enero 6

Kita Ang Responsable sa Atong Kaugalingong Pagkat-on

Samtang nagbasa ug namalandong ka sa mga tudling sa kasulatan niini nga outline, irekord ang espiritwal nga mga impresyon nga imong nadawat. Modapit kini sa Espiritu diha sa imong pagpangandam. Ang Dali, Sunod Kanako—Alang sa mga Indibidwal ug mga Pamilya ug ang mosunod nga mga ideya makatabang kanimo nga makadasig sa mga tawo diha sa imong klase nga magtuon sa Bag-ong Tugon karong tuiga.

Irekord ang Imong mga Impresyon

pagpaambit nga icon

Awhaga ang Pagpaambit

Usa sa imong mga tumong isip magtutudlo mao ang pag-awhag sa mga sakop sa klase nga makakat-on gikan sa mga kasulatan nga sila ra ug kauban sa ilang mga pamilya. Ang pagkadungong sa mga kasinatian sa uban makapadasig kanila nga magtinguha sa ilang kaugalingong kasinatian. Busa, sa pagsugod sa matag klase, hangyoa ang mga sakop sa klase sa pagpaambit og mga kasulatan gikan sa ilang pagtuon nga nakapadasig o nakapatandog kanila.

pagtudlo nga icon

Itudlo ang Doktrina

Aron tinuoray nga makakat-on gikan sa Manluluwas, kinahanglan gayud kitang modawat sa Iyang pagdapit, “Dali, sunod kanako.”

• Ang pagtuon sa Bag-ong Tugon usa ka oportunidad dili lamang aron makakat-on mahitungod sa Manluluwas ug sa Iyang doktrina apan aron usab makadiskubre kon unsaon sa pagsunod Kaniya sa mas hingpit nga paagi. Ang istorya diha sa Mateo 19:16–22 usa ka maayong paagi sa pagpaila niini nga tema (tan-awa usab sa video nga “Christ and the Rich Young Ruler” sa LDS.org). Mahimo nimong dapiton ang mga sakop sa klase sa pagpangita niining istorya alang sa butang nga ilang nakat-unan mahitungod sa pagkahimong usa ka disipulo ni Jesukristo ug sa pagpakigbahin sa unsay ilang makit-an. Alang sa laing ideya sa kalihokan nga may kalabutan niini nga baruganan, tan-awa sa outline karong semanaha sa Dali, Sunod Kanako—Alang sa mga Indibidwal ug mga Pamilya.

Ang pagkat-on nagkinahanglan og paglihok pinaagi sa hugot nga pagtuo.

• Unsaon nimo pagdasig ang mga sakop sa imong klase nga mas mahimong aktibo sa ilang pagkat-on, imbis nga mobutang sa maong responsibilidad diha sa magtutudlo? Aniay usa ka ideya. Dapita ang usa ka sakop sa klase sa pag-itsa og humok nga butang nganha nimo, samtang wala ka maningkamot nga masalo kini. Gamita kini nga kalihokan sa pagsugod og panaghisgutan mahitungod sa mga tahas sa mga tigkat-on ug sa mga magtutudlo sa pagkat-on sa ebanghelyo. Ang pamahayag ni Elder David A. Bednar mahitungod sa pagkat-on pinaagi sa hugot nga pagtuo, nga makita sa “Dugang nga mga Kapanguhaan,” makatabang niini nga panaghisgutan.

• Aron matabangan ang mga sakop sa klase nga makasabut nga ang pagkat-on sa ebanghelyo nagkinahanglan og hugot nga pagtuo nga molihok, mahimo nimo silang bahin-bahinon ngadto sa mga grupo ug dapita ang matag grupo nga basahon ang usa sa mosunod nga mga istorya: Marcos 5:25–34; Lucas 5:17–26; ug Juan 9:1–7. Unsa ang gibuhat sa mga tawo sa matag istorya aron mapakita ang ilang hugot nga pagtuo diha sa Manluluwas? Unsa nga mga aksyon ang atong mahimo aron makakat-on sa ebanghelyo ug mapakita ang atong hugot nga pagtuo nga ang Ginoo motabang kanato aron makakat-on sa kamatuoran?

• Ang tanang sakop sa klase adunay responsibilidad sa pagdapit sa Espiritu nganha sa klase. Aron matabangan ang mga sakop sa klase nga makasabut niini, hangyoa sila sa pagbasa sa Alma 1:26 ug Doktrina ug mga Pakigsaad 50:13–22; 88:122–23 ug mopakigbahin kon unsay mahimo sa mga magtutudlo ug mga estudyante sa pagdapit sa Espiritu. Tingali makatabang ang pagsulat sa ilang mga tubag diha sa pisara ubos sa mga ulohan sama niini: Unsay mahimo sa magtutudlo ug Unsay mahimo sa mga tigkat-on. Makatabang ba ang paghimo og poster nga anaa ang mga tubag sa mga sakop sa klase nga ma-display sulod sa sunod nga mga semana?

Kinahanglan natong masayran ang kamatuoran nga kita mismo.

• Daghang tudling sa Bag-ong Tugon ang nagtudlo sa mga baruganan nga makagiya sa atong pagpangita sa kamatuoran. Ang mga ehemplo naglakip sa Lucas 11:9–13; Juan 5:39; 7:14–17; ug 1 Mga Taga-Corinto 2:9–11. Mahimo nimong dapiton ang mga sakop sa imong klase nga nakabasa niining mga tudling sa ilang personal nga pagtuon sa pagpakigbahin sa unsay ilang nakat-unan. O mahimo nimong basahon kining mga tudling isip usa ka klase ug dapiton ang mga sakop sa klase sa pagpakigbahin kon giunsa nila pagkabaton ang ilang mga pagpamatuod.

  mga batan-ong lalaki ug babaye diha sa classroom

  Ang pagtinguha sa pagkat-on pinaagi sa hugot nga pagtuo makatabang kanato nga makabaton sa kaugalingon natong mga pagpamatuod.

• Bisan unsa pa kita kadugay sa Simbahan, nagkinahanglan kitang tanan nga padayong molig-on sa atong mga pagpamatuod. Aron matabangan ang mga sakop sa klase nga mailhan ang mga kamatuoran nga kinahanglan nilang mahibaloan nga sila mismo, mahimo nimong isulat sa ginunting nga mga papel ang pipila ka pakisayran sa kasulatan nga nagtudlo og importante nga mga kamatuoran, sama sa Juan 3:16–17; 1 Mga Taga-Corinto 15:22; Mosiah 3:13; Alma 7:11–13; ug Doktrina ug mga Pakigsaad 135:3. Hangyoa ang mga sakop sa klase sa pagbasa niining mga kasulatan, sa pag-summarize sa mahangturong mga kamatuoran nga ilang makit-an, ug sa paghisgot kon unsay ilang mahimo aron makabaton og pagpamatuod niini. Sa paghimo niining kalihokan nga mas makapaapil sa kabatan-onan, ikonsiderar ang pagtago sa ginunting nga mga papel palibut sa kwarto ug pagdapit sa kabatan-onan sa “pagtinguha sa kamatuoran.”

• Ang Mga Buhat 17:10–12 naghulagway sa mga Santos nga misiksik sa mga kasulatan ug nakabaton sa ilang kaugalingong pagsaksi sa kamatuoran. Aron maawhag ang mga sakop sa klase sa pagsunod sa ilang ehemplo, basaha kining mga bersikulo nga magdungan ug dapita ang mga sakop sa klase sa pagpakigbahin sa mga tudling sa kasulatan nga nakapalig-on sa ilang mga pagpamatuod sa ebanghelyo.

Unsaon man nato sa paghimo sa atong pagtuon sa kasulatan nga mas makahuluganon?

• Ang pagpalambo og kinaiya sa pagtuon sa kasulatan mahimong mahagiton alang sa mga sakop sa klase nga mibati nga sila wala sa gikinahanglan nga panahon, panabut, o mga kahanas. Unsa man ang imong mahimo aron sa pagtabang kanila nga magmalampuson? Mahimo nimong sugdan pinaagi sa paghisgot sa istorya mahitungod sa mga mamumutol og kahoy diha sa “Dugang nga mga Kapanguhaan.” Aron matabangan ang mga sakop sa klase nga makabaton og pagsalig sa pagtuon sa mga kasulatan, mahimo kang mopakigbahin og impormasyon gikan sa “Mga Ideya sa Pagpalambo sa Inyong Personal nga Pagtuon sa Kasulatan” sa Dali, Sunod Kanako—Alang sa mga Indibidwal ug mga Pamilya. Tingali ikaw o ang ubang mga sakop sa klase mahimong mopakigbahin sa mga kasinatian gamit ang pipila niining mga ideya o sa ubang makahuluganon nga mga kasinatian sa pagtuon sa mga kasulatan. Mahimo usab nga mopili ka og usa ka kapitulo sa Bag-ong Tugon ug mosulay sa pagtuon niini isip usa ka klase gamit ang uban niining mga ideya.

pagkat-on nga icon

Awhaga ang Pagkat-on diha sa Panimalay

Aron maawhag ang mga sakop sa klase sa pagtuon sa Mateo 1 ug Lucas 1 diha sa panimalay agig pagpangandam alang sa panaghisgutan sa sunod semana, mahimo nimo kining ipangutana: “Nakasulay na ba kamo nga gihangyo sa pagbuhat og butang nga daw imposible?” Kining mga kapitulo naghulagway sa kamatuoran nga “sa Dios walay butang nga dili mahimo” (Lucas 1:37).

mga kapanguhaan nga icon

Dugang nga mga Kapanguhaan

Pag-angkon og espirituhanong kahibalo alang sa atong kaugalingon.

Si Elder David A. Bednar mipasabut: “Nakaobserbar ko og komon nga kinaiya sa mga magtutudlo kinsa adunay dakong impluwensya sa akong kinabuhi. Mitabang sila kanako sa pagpaningkamot nga makat-on pinaagi sa hugot nga pagtuo. Nagdumili sila sa paghatag kanako og sayon nga tubag sa mga pangutana nga lisud. Gani, wala gayud sila mohatag kanako og tubag. Hinoon, ilang gitudlo ang paagi ug mitabang kanako sa paghimo sa mga lakang aron makit-an ang kaugalingon nakong mga tubag. … Ang tubag nga gihatag sa laing tawo sa kasagaran dili mahinumduman og dugay, kon mahinumduman man gani. Apan ang tubag nga atong nadiskubrihan o naangkon pinaagi sa paggamit sa hugot nga pagtuo, sa kasagaran, mahinumduman sa tibuok kinabuhi. ... Niini lamang paagiha nga ang usa ka tawo molihok lapas sa pagsalig sa espirituhanong kahibalo ug kasinatian sa uban ug moangkon niadtong mga panalangin alang sa iyang kaugalingon” (“Paningkamot sa Pagkat-on pinaagi sa Hugot nga Pagtuo,” Liahona, Sept. 2007, 23).

Paggahin og panahon alang sa pagtuon sa kasulatan.

Si Brother Tad R. Callister nagtudlo:

“Duha ka mamumutol og kahoy … nga nagkontest aron matino kon kinsay mas daghan og maputol nga kahoy sa usa ka adlaw. Gisugdan ang kontest sa pagsubang sa adlaw. Matag oras ang mas gamay nga tawo mosulod sa kalasangan sulod sa mga 10 minutos. Sa matag higayon nga iya kining buhaton, ang iyang kontra mipahiyom ug miyango, masaligon nga nag-una na siya. Ang mas dako nga tawo wala gayud mobiya sa iyang puwesto, wala mohunong sa pagputol, wala gayud mopahulay.

“Dihang nahuman na ang adlaw, ang mas dako nga tawo nakugang sa pagkasayud nga ang iyang kontra, kinsa daw nag-usik kaayo og panahon, nakaputol og mas daghang kahoy kay kaniya. ‘Giunsa man to nimo pagbuhat nga kadaghan man ka mipahulay?’ nangutana siya.

“Ang mananaug mitubag, ‘Ah, nagbaid ko ato sa akong atsa.’

“Matag higayon nga magtuon kita sa mga kasulatan, atong gibaid ang atong espirituhanon nga atsa” (“Ang Kalipay sa Pagkat-on,” Liahona, Okt. 2016, 14).

Pagpalambo sa Atong Pagtudlo

Pabiling naka-focus sa doktrina. Siguroa nga ang mga panaghisgutan sa klase magpabiling nakabase sa mga kasulatan ug sa mga pagtulun-an sa mga propeta. Mahimo nimo kini pinaagi sa pagpangutana og sama niini: “Unsa nga mga kamatuoran sa ebanghelyo ang atong makat-unan gikan sa mga komentaryo nga atong nadungog?” o “Aduna bay tawo nga mahimong mopakigbahin og kasulatan nga may kalabutan sa unsay atong nahisgutan?” (Tan-awa sa Pagtudlo sumala sa Pamaagi sa Manluluwas, 20–21.)