Usa ka Sundanan sa Pagtudlo

Niini nga kapanguhaan, makita ninyo ang mosunod nga sundanan nga gibalik-balik sa matag outline: awhaga ang pagpaambit, itudlo ang doktrina, ug awhaga ang pagkat-on diha sa panimalay. Sa daghang sitwasyon, samtang nagtudlo kamo, ang mga elemento niining sundanan mahimong magsapaway o mahitabo sa laing han-ay. Pananglitan, ikonsiderar nga ang pagpakigbahin usa ka oportunidad sa pagtudlo sa doktrina, ug ang pagtudlo sa doktrina kinahanglang maglakip sa mga pagdapit nga mopakigbahin. Sa samang paagi, ang pag-awhag sa pagkat-on diha sa panimalay mahitabo sa tibuok panaghisgutan sa klase. Tuguti kini nga pagsapaway nga mahitabo sa natural nga paagi, nga magsunod sa mga pag-aghat sa Espiritu aron matubag ang mga panginahanglan sa mga tawo nga inyong tudloan.

Awhaga ang Pagpaambit

Isip kabahin sa klase, dapita ang mga sakop sa klase sa pagpakigbahin og mga ideya ug mga kasinatian nga ilang nasinati sa miaging semana samtang nagtuon sila sa mga kasulatan isip mga indibidwal ug mga pamilya ug gigamit ang unsay ilang nakat-unan. Tabangi ang mga sakop sa klase nga makita nga ang ilang personal nga pagkat-on sa gawas sa klase importante. Ang ilang indibidwal nga pagkakabig moabut dili lamang pinaagi sa pagkat-on ma-Dominggo apan pinaagi usab sa ilang inadlaw nga mga kasinatian. Kon ang mga sakop sa klase makadungog sa mga kasinatian sa usag usa, mahimong mas madasig sila aron magtinguha sa susamang mga kasinatian sa ilang kaugalingon.

Mahimong dili tanan ang nakabasa na sa mga kapitulo sa matag leksyon, ug gani ang uban nga nakabasa mahimong dili komportable nga mopakigbahin. Siguroa nga ang tanang sakop sa klase mobati sama sa bililhong kabahin sa klase, maaduna man o wala silay butang nga mapakigbahin.

Itudlo ang Doktrina

Ikaw ug ang mga sakop sa imong klase kinahanglang mag-focus sa doktrina—ang mahangturong mga kamatuoran sa ebanghelyo—nga makita diha sa gi-assign nga mga tudling sa kasulatan. Samtang maghisgot ka sa doktrina gikan sa mga kasulatan, unsa nga mga bersikulo, mga kinutlo, mga kasinatian, mga pangutana, ug dugang nga mga kapanguhaan ang mahimo nimong mapakigbahin? Unsaon kaha nimo paggamit niining mga kapanguhaan sa pagtabang sa mga sakop sa klase nga makadiskubre ug makasabut sa mga baruganan sa ebanghelyo? Unsaon nimo sa pag-awhag ang mga sakop sa klase sa pagrekord ug paglihok sa mga hunahuna ug mga impresyon nga ilang madawat?

Awhaga ang Pagkat-on diha sa Panimalay

Sa katapusan sa leksyon, paggahin og higayon sa pag-preview sa panaghisgutan sa sunod semana. Ikonsiderar kon unsaon pagdasig sa mga sakop sa klase nga magpadayon sa pagkat-on gikan sa Bag-ong Tugon diha sa panimalay, sa indibidwal nga paagi ug kauban sa ilang mga pamilya.