Paggamit sa Dali, Sunod Kanako—Alang sa Sunday School

Pagpangandam sa Pagtudlo sa Sunday School

Ang panimalay kinahanglang mao ang sentro sa pagkat-on sa ebanghelyo. Mao usab kini alang kanimo ug alang niadtong imong tudloan. Samtang mangandam ka sa pagtudlo, sugdi pinaagi sa pagbaton og kaugalingon nimong mga kasinatian diha sa mga kasulatan. Ang imong labing importante nga pagpangandam mahitabo samtang magtinguha ka sa inspirasyon sa Espiritu Santo.

Ang Dali, Sunod Kanako—Alang sa mga Indibidwal ug mga Pamilya usa usab ka importante nga bahin sa imong pagpangandam. Makatabang kini kanimo nga makaangkon og mas lawom nga panabut sa doktrinal nga mga baruganan nga makita diha sa mga kasulatan. Makadasig ug makadapit ka sa mga sakop sa klase sa paggamit sa Dali, Sunod Kanako—Alang sa mga Indibidwal ug mga Pamilya sa pagpalambo sa ilang personal ug pamilya nga pagtuon sa kasulatan (alang sa tabang sa pagbuhat niini, tan-awa sa “Mga Ideya alang sa Pag-awhag og Personal ug Pamilya nga Pagtuon” niini nga kapanguhaan). Sa pabuhat nimo sa ingon, hinumdumi nga magmahimong sensitibo sa mga sakop sa klase kansang mga kahimtang sa pamilya mahimong wala magsuporta sa regular nga pamilya nga pagtuon sa kasulatan.

Atol sa imong pagpangandam, ang mga hunahuna ug mga impresyon moabut kanimo mahitungod sa mga tawo nga imong tudloan, kon sa unsang paagi nga ang mga baruganan diha sa mga kasulatan makapanalangin sa ilang kinabuhi, ug sa unsang paagi nga imo silang madasig sa pagdiskubre niadtong mga baruganan samtang magtuon sila sa mga kasulatan nga sila ra.

Mga Ideya sa Pagtudlo

Samtang maghimo ka sa imong plano sa pagtudlo, mahimong makabaton ka og dugang nga inspirasyon pinaagi sa pag-explore sa mga outline niini nga kapanguhaan. Ayaw paghunahuna niining mga ideya isip step-by-step nga mga instruksyon apan isip mga sugyot sa pagdasig sa kaugalingon nimong inspirasyon. Nakaila ka sa mga sakop sa imong klase, ug nakaila usab kanila ang Ginoo. Dasigon ka Niya sa labing maayo nga mga paagi sa pagtabang sa mga sakop sa klase sa pag-ugmad og pagkat-on sa ebanghelyo nga ilang gibuhat diha sa ilang mga panimalay.

Ikaw adunay daghan pang mga kapanguhaan nga anaa samtang mangandam ka, lakip na ang mga ideya diha sa Dali, Sunod Kanako—Alang sa mga Indibidwal ug mga Pamilya ug sa mga magasin sa Simbahan. Alang sa dugang nga impormasyon mahitungod niini ug sa ubang mga kapanguhaan, tan-awa sa “Dugang nga mga Kapanguhaan.”

Ubang mga Butang nga angayang Hinumduman

• Ang panimalay mao ang labing maayong dapit sa pagkat-on sa ebanghelyo. Isip magtutudlo, ikaw adunay importante nga responsibilidad sa pagsuporta, pag-awhag, ug pag-ugmad og pagkat-on sa ebanghelyo diha sa panimalay.

• Ang pagkakabig sa mga sakop sa klase ngadto sa ebanghelyo ni Jesukristo mas molambo kon sila makasabut ug mogamit sa tinuod nga doktrina. Awhaga sila sa pagrekord ug pagsunod sa mga impresyon nga ilang madawat gikan sa Espiritu Santo.

• Ang pagtudlo mas labaw pa kay sa pag-lecture, apan mas labaw pa usab kini kay sa yano lamang nga paggiya og panaghisgutan. Kabahin sa imong tahas mao ang pagdasig og pag-apil nga makapalig-on ug gibase diha sa mga kasulatan.

• Ang Langitnong Amahan gusto nga molampus ka isip usa ka magtutudlo. Mihatag Siya og daghang kapanguhaan sa pagtabang nimo nga molampus, lakip na ang mga miting sa teacher council. Niining mga miting mahimo kang makigtinambagay sa ubang mga magtutudlo mahitungod sa bisan unsang mga hagit nga tingali imong atubangon. Mahimo usab nimong hisgutan ug praktison ang mga baruganan sa Kristohanon nga pagtudlo.

• Mas makakat-on ang mga tawo kon sila adunay mga oportunidad sa pagtudlo. Usahay, ikonsiderar ang pagtugot sa mga sakop sa klase, lakip na ang mga batan-on, sa pagtudlo og usa ka bahin sa leksyon. Ibase kini nga desisyon sa mga panginahanglan ug mga abilidad sa mga sakop sa klase. Kon modapit ka og usa ka sakop sa klase sa pagtudlo, paggahin og panahon sa pagtabang niya nga maandam daan pinaagi sa paggamit sa mga ideya nga makita niini nga kapanguhaan ug sa Dali, Sunod Kanako—Alang sa mga Indibidwal ug mga Pamilya. Hinumdumi nga isip gitawag nga magtutudlo, ikaw ang responsable sa unsay gitudlo diha sa klase.

• Kini nga kapanguhaan naglakip sa mga outline alang sa kada semana sa tuig gawas sa duha ka Dominggo kon ipahigayon ang kinatibuk-ang komperensya. Sa mga Dominggo nga walay ipahigayon nga Sunday School tungod sa stake conference o sa bisan unsa pang rason, ang mga pamilya mahimong mopadayon sa pagbasa sa Bag-ong Tugon diha sa panimalay sumala sa gi-outline nga iskedyul. Aron anaa sa iskedyul ang imong klase sa Sunday School, mahimo nimong pilion ang paglak-ang og leksyon o hiusahon ang duha ka leksyon. Aron malikayan ang kalibug, ang mga presidente sa Sunday School mahimong motambag sa sayo pa sa mga magtutudlo sa Sunday School mahitungod niining mga pagpahiangay.