Ikaw Usa ka Magtutudlo sa Simbahan ni Jesukristo

Gitawag ka sa Dios sa pagtudlo sa Iyang mga anak sa pamaagi sa Manluluwas. Gi-set apart ka niini nga calling pinaagi sa awtoridad sa Iyang balaan nga priesthood. Bisan kon dili ka eksperyensyado nga magtutudlo, samtang magpakabuhi ka nga takus, mag-ampo kada adlaw, ug magtuon sa mga kasulatan, ang Langitnong Amahan mohatag kanimo sa impluwensya ug gahum sa Espiritu Santo (tan-awa sa 2 Nephi 33:1).

Kadtong gisalig nganha kanimo mga anak sa Dios, ug nasayud Siya kon unsay ilang gikinahanglan ug sa unsang paagi nga matabangan gayud sila. Pinaagi sa Espiritu Santo, pagagiyahan ka atol sa imong pagpangandam ug samtang magtudlo ka. Ipadayag Niya kanimo kon unsay angayan nimong isulti ug unsay angay nimong buhaton.

Ang mahinungdanong katuyoan sa pagkat-on sa ebanghelyo mao ang pag-usab og mga kinabuhi. Ang imong tumong isip usa ka magtutudlo mao ang pagtabang niadtong imong tudloan nga mobuhat sa tanan kutob sa ilang mahimo aron makabig ngadto sa ebanghelyo ni Jesukristo—usa ka tumong nga molapas pa sa oras sa klase. Dapita kadtong imong tudloan nga aktibong moapil diha sa kaugalingon nilang pagkat-on sa mga baruganan ug doktrina ni Jesukristo ug molihok sa unsay ilang makat-unan. Awhaga sila sa paghimo sa ilang indibidwal ug pamilya nga pagtuon gawas sa klase nga maoy mag-unang focus sa ilang pagkat-on sa ebanghelyo. Samtang molihok sila uban sa pagtuo pinaagi sa pagtuon isip mga indibidwal ug mga pamilya, magdapit sila sa Espiritu ngadto sa ilang kinabuhi ug mas mapanalanginan kay sa bisan unsa pa nga buhaton sa magtutudlo.

Itudlo lamang ang doktrina sa gipahiuli nga ebanghelyo ni Jesukristo sigun sa makita diha sa mga kasulatan ug sa mga pulong sa mga propeta sa ulahing mga adlaw. Ang putli nga doktrina—mahangturon, dili mausab nga kamatuoran nga gitudlo sa Dios ug sa Iyang mga sulugoon—magdapit sa Espiritu ug adunay gahum sa pag-usab og kinabuhi.

Ang calling sa pagtudlo usa ka sagradong pagsalig, ug normal ra nga mobati usahay nga mabug-atan. Apan hinumdumi nga ang Dios mitawag kanimo, ug dili gayud Siya mobiya kanimo. Buhat kini sa Ginoo, ug samtang magserbisyo ka “sa tibuok [nimo] nga kasingkasing, gahum, hunahuna ug kusog” (DP 4:2), palambuon Niya ang imong mga kapasidad, mga gasa, ug mga talento, ug ang imong pagserbisyo makapanalangin sa kinabuhi niadtong imong tudloan.