Pebrero 11–17

Juan 2–4

“Kinahanglan nga Igaanak Kamo Pag-usab”

Ang pagbasa sa Juan 2–4 usa ka maayong paagi sa pagsugod nga mag-andam sa pagtudlo. I-rekord ang bisan unsang espiritwal nga mga impresyon nga imong madawat, ug gamita kini nga outline sa pagpangita og dugang nga mga panabut ug mga ideya sa pagtudlo.

Irekord ang Imong mga Impresyon

Awhaga ang Pagpaambit

Isulat ang tulo ka ulohan diha sa pisara: Juan 2, Juan 3, ug Juan 4. Hatagi ang mga sakop sa klase og pipila ka minuto sa pagribyu niining mga kapitulo, ug dayon hangyoa sila sa pagsulat ubos sa matag ulohan sa bersikulo nga nakatabang kanila nga makasabut sa doktrina ug mga panghitabo niana nga kapitulo. Hisguti ang mga bersikulo nga ilang gisulat.

Itudlo ang Doktrina

Juan 2:1–11

Ang atong kinabuhi mausab kon mosunod kita kang Jesukristo.

• Usahay makabaton kita og espiritwal nga mga ideya [panabut] pinaagi sa paghatag og pagtagad sa mga detalye sa usa ka istorya sa kasulatan. Ikonsiderar ang pagdapit sa mga sakop sa klase nga magbasa sa Juan 2:1–11 ug ilista ang mga detalye nga mas makapalambo sa ilang pagdayeg sa milagro atol sa kumbira sa kasal. Sa unsang paagi nga kining milagro nagpakita sa himaya sa Dios? (tan-awa sa bersikulo 11).

• Mahimong makatabang sa mga sakop sa klase nga makasabut niini nga istorya kon ilang ikonsiderar ang milagro gikan sa talagsaong panglantaw niadtong kinsa nakasaksi niini. Sa unsang paagi nga ang atong mga kinaiya ngadto sa mga milagro usahay susama niadtong mga tawo nga diha sa kumbira sa kasal—pananglitan, sama ni Maria, kinsa nasayud nga ang milagro mahitabo, o sa magmamando, kinsa wala masayud nga dunay milagro nga nahitabo? Ikonsiderar ang pagdapit sa pipila ka sakop sa klase sa pagsaysay bahin sa kumbira nga ingon og sila usa sa mga tawo nga anaa didto.

Juan 2:13–22

Makahimo kita sa pagpanalipod sa sagradong mga dapit ug mga butang.

• Unsaon nimo sa pagtabang ang mga sakop sa klase nga makakat-on gikan sa istorya bahin ni Jesus nga mipapahawa sa mga tigpangilis og salapi pagawas sa templo? Unsaon nila pagpanalipod sa sagradong mga dapit ug mga butang sama sa mga panimalay, mga simbahan, mga templo, ug mga kasulatan? Kini nga pamahayag gikan ni Presidente David O. McKay mahimong makatabang: “‘Ang balay sa akong Amahan ayaw ninyo paghimoang merkado.’ (Juan 2:16.) Ang pagpangwarta ug paggasto sa kwarta, … pagpangita og sayop, ug ilabi na ang pagpanglibak mahitungod sa mga silingan diha sa balay sa pagsimba, mga paglapas niini nga mando nga gihatag dul-an na sa duha ka libo ka tuig na ang milabay” (sa Conference Report, Okt. 1956, 7). Unsaon man nato sa pagpreserbar sa kabalaan sa templo ug sa uban pang balaan nga mga dapit?

Juan 3:1–21

Gikinahanglan gayud nga kita matawo pag-usab aron makasulod sa gingharian sa Dios.

• Aron matabangan ang mga sakop sa klase nga makasabut sa pagdapit ni Jesus nga matawo pag-usab (tan-awa sa Juan 3:3), mahimo nimo silang dapiton sa pagpakigbahin og mga ideya nga ilang nabatunan gikan sa unsay gitudlo sa Manluluwas kang Nicodemo niining mga bersikulo. Unsa nga mga pulong ang Iyang gigamit? Unsa pa ang ubang mga kasulatan o mga pamahayag gikan sa mga lider sa Simbahan ang makapalambo sa panabut sa mga sakop sa klase bahin niini nga pagdapit? (tan-awa sa “Dugang nga mga Kapanguhaan” alang sa mga pamahayag gikan sa mga lider sa Simbahan.)

• Unsaon kaha sa mga sakop sa klase sa pagpasabut ngadto sa usa ka tawo sa laing tinuohan kon unsay gipasabut sa matawo pag-usab? Unsaon man nila pag-apil sa paghinulsol, bunyag, ug kumpirmasyon niini nga panag-istoryahanay? Ikonsiderar ang pagdapit sa mga sakop sa klase sa pagpraktis kon unsaon nila pagtubag niini nga pangutana kauban ang tawo nga naglingkod sa tupad nila. Ang kinutlo gikan ni Propeta Joseph Smith diha sa “Dugang nga mga Kapanguhaan” makadugang niini nga panaghisgutan.

• Ang ubang mga tawo nagtuo nga ang tawo dili gayud mausab; hinoon, si Nicodemo, usa ka ehemplo sa tawo kinsa nausab isip resulta sa pagsunod sa ebanghelyo ni Jesukristo. Aron matabangan ang mga sakop sa klase nga masabtan kini, mahimo nimo silang dapiton sa pagsiksik sa Juan 3:1–2; Juan 7:40–52; ug Juan 19:39–40. Unsa may atong makat-unan gikan niining mga tudling mahitungod sa mga kinaiya ug mga gituohan ni Nicodemo? Giunsa man niya pagkausab paglabay sa panahon? Unsa nga mga ehemplo ang atong mapakigbahin mahitungod sa mga tawo nga atong nailhan kinsa nausab tungod sa ebanghelyo?

• Ang pagtan-aw sa usa ka gamayng bata o litrato sa gamayng bata mahimong makahatag sa imong klase og maayong oportunidad nga matandi ang mga kinaiya sa bag-ong natawo ngadto sa mga kinaiya sa tawo nga natawo pag-usab sa espirituhanong paagi.

Juan 4:6–34

Si Jesukristo mitanyag kanato og buhi nga tubig ug sa “makaon” sa paghimo sa buhat sa Dios.

• Ang atong lawas nagkinahanglan og pagkaon ug tubig kada adlaw. Mipasabut si Jesus niining kinatibuk-ang mga panginahanglan sa dihang nagtudlo Siya sa babayeng Samarianhon ug sa Iyang mga disipulo. Aron matabangan ang mga sakop sa klase nga makasabut kon unsay gitudlo sa Manluluwas, mahimong magplastar ka og mga litrato sa pagkaon ug tubig diha sa pisara ug dapita ang mga sakop sa klase sa pagsulat sa ubos sa matag litrato sa espiritwal nga mga kamatuoran nga gitudlo ni Jesus. Sa unsang paagi nga ang pagsimba sa Dios diha sa espiritu ug sa kamatuoran makatagbaw sa atong espiritwal nga kauhaw? Sa unsang paagi nga ang atong espiritwal nga kagutom matagbaw pinaagi sa pagbuhat sa kabubut-on sa Dios?

  

  Si Jesukristo mitanyag kanato og buhi nga tubig.

• Ang pagpamalandong bahin sa paglambo sa pagpamatuod sa babayeng Samarianhon bahin ni Jesukristo makatabang sa mga sakop sa imong klase nga mamalandong kon giunsa nila pagkasayud nga Siya mao ang Mesiyas. Isip usa ka klase, pangitaa ang mga termino nga gigamit sa babayeng Samarianhon nga nagpasabut ngadto sa Manluluwas diha sa Juan 4:6–30. Unsay buot ipasabut niining mga termino mahitungod sa iyang kahibalo kon si kinsa si Jesus? Giunsa nato paglambo diha sa atong mga pagpamatuod nga Siya mao ang atong Manluluwas?

Awhaga ang Pagkat-on diha sa Panimalay

Aron sa pagdasig sa mga sakop sa klase sa pagbasa sa Mateo 5 ug Lucas 6, sultihi sila nga kini nga mga kapitulo naglakip kon unsa ang gitawag ni Presidente Joseph Fielding Smith og “ang pinakatalagsaon nga sukad nasangyaw, sigun sa atong nahibaloan” (Mga Pagtulun-an sa mga Presidente sa Simbahan: Joseph Fielding Smith [2013], 267).

Dugang nga mga Kapanguhaan

Juan 2–4

Mga video sa mga binuhatan ug mga pagtulun-an ni Jesus.

Unsay buot ipasabut sa matawo pag-usab.

Si Propeta Joseph Smith nagtudlo: “Mas maayo pang mobunyag og usa ka bag sa balas sama sa usa ka tawo, kon kini wala himoa alang sa kapasayloan sa mga sala ug pag-angkon sa Espiritu Santo. Ang bunyag pinaagi sa tubig katunga lamang sa bunyag, ug walay bili kon wala ang laing katunga—kana mao, ang bunyag sa Espiritu Santo” (Mga Pagtulun-an sa mga Presidente sa Simbahan: Joseph Smith [2007], 112).

Si Elder David A. Bednar nagtudlo: “Ang pagkakabig … dako, dili gamay—–usa ka espirituhanong pagkatawo pag-usab ug usa ka sukaranang kausaban sa unsay atong gibati ug gitinguha, unsay atong gihunahuna ug gibuhat, ug unsa kita. Gani, ang lintunganay sa ebanghelyo ni Jesukristo nagkinahanglan sa sukaranan ug permanente nga kausaban sa atong pagkatawo nga mahimong posible pinaagi sa atong pagsalig diha sa ‘“maayo nga buhat, ug kalooy, ug grasya sa Balaan nga Mesiyas’ (2 Nephi 2:8). Kon kita mopili sa pagsunod sa Ginoo, kita mipili nga mag-usab—espirituhanong magpakatawo pag-usab” (“Kinahanglang Matawo Kamo Pag-usab,” Liahona, Mayo 2007, 20).

Si Elder D. Todd Christofferson nagtudlo: “Kamo mangutana, Ngano nga kining dako nga kausaban dili dayon mahitabo kanako? Kinahanglang hinumduman ninyo ang talagsaong mga ehemplo sa mga katawhan ni Haring Benjamin, si Alma ug ang uban sa kasulatan ingon lamang niana—talagsaon ug dili kasagaran. Alang sa kadaghanan kanato, ang mga kausaban, mas hinay-hinay ug mahitabo sa kadugayan. Ang pagkatawo pag-usab, dili sama sa atong pisikal nga pagkatawo, mas labaw nga proseso kay sa usa ka hitabo. Ug ang pag-apil niana nga proseso mao ang labing importante nga katuyoan sa pagkamortal” (“Natawo Pag-usab,” Liahona, Mayo 2008, 78).

Si Elder Dallin H. Oaks nagtudlo:

“Gipakatawo kita pag-usab sa dihang kita misulod sa usa ka relasyon diha sa pakigsaad uban sa atong Manluluwas pinaagi sa pagpakatawo pag-usab sa tubig ug sa Espiritu ug sa pagdala ngari kanato sa ngalan ni Jesukristo. Mabag-o nato kana nga pagpakatawo pag-usab sa matag Igpapahulay kon kita moambit sa sakrament.

“Ang mga Santos sa Ulahing mga Adlaw mopanghimatuod nga kadtong natawo pag-usab niining paagiha nahimong mga anak ni Jesukristo sa espiritwal nga paagi (tan-awa sa Mosiah 5:7; 15:9–13; 27:25). Bisan pa man niana, aron madawat ang gitinguha nga mga panalangin niining kahimtang sa pagkatawo pag-usab, kinahanglan gayud gihapon kitang motuman sa atong mga pakigsaad ug molahutay hangtud sa katapusan. Sa kasamtangan, pinaagi sa grasya sa Dios, natawo na kita pag-usab isip bag-ong mga nilalang uban sa bag-ong espiritwal nga ginikanan ug sa malaumong panglantaw sa usa ka mahimayaong panulundon” (“Have You Been Saved?” Ensign, Mayo 1998, 56).

Pagpalambo sa Atong Pagtudlo

Ang magtutudlo dili ingon nga maayo pa kay sa tinudloan. Ang imong tahas isip magtutudlo importante, apan dili lamang ikaw ang bugtong tinubdan sa inspirasyon diha sa klase. Tabangi ang mga sakop sa klase nga makakat-on gikan sa Espiritu ug mopakigbahin sa usag usa sa unsay ilang nakat-unan.