Si Kristo nagmadaugon batok kang Satanas

Si Kristo Nagmadaugon batok kang Satanas, ni Robert T. Barrett

Pebrero 4–10

Mateo 4; Lucas 4–5

“Ang Espiritu sa Ginoo ania Kanako”

Samtang magtuon ka sa Mateo 4 ug Lucas 4–5, i-rekord ang imong espiritwal nga mga impresyon. Makadapit kini og inspirasyon kon unsaon pagtubag ang mga panginahanglan sa imong klase sa labing maayo nga paagi. Mahimo usab nimong ikonsiderar ang paggamit sa Dali, Sunod Kanako—Alang sa mga Indibidwal ug mga Pamilya ingon man usab kini nga outline sa pagpangita og dugang nga mga ideya.

Irekord ang Imong mga Impresyon

pagpaambit nga icon

Awhaga ang Pagpaambit

Ang basahunon karong semanaha naglakip niining pamahayag: “Nahibulong sila sa iyang pagpanudlo: kay ang iyang pagpamulong inubanan man sa kagahum” (Lucas 4:32; tan-awa usab sa Marcos 1:22). Unsa nga mga bersikulo ang mapakigbahin sa mga sakop sa klase gikan niining mga kapitulo nga nakatabang kanila nga mobati nianang doktrinal nga gahum alang sa ilang kaugalingon mismo?

pagtudlo nga icon

Itudlo ang Doktrina

Mateo 4:1–11; Lucas 4:1–13

Ang Langitnong Amahan mihatag kanato og gahum ug pamaagi sa pagbuntog sa tintasyon.

• Ang istorya bahin sa Manluluwas nga mibatok kang Satanas makatabang sa mga sakop sa klase nga mahibalo sa mga paagi nga si Satanas mosulay sa pagtintal kanila. Ang mga sakop sa klase mahimong mopili og usa ka tintasyon diha sa Mateo 4:1–11 o Lucas 4:1–13 ug maghunahuna og moderno, may kalabutan nga tintasyon (ang mga pamahayag diha sa “Dugang nga mga Kapanguhaan” mahimong makatabang). Nganong makatabang man nga mahibalo nga ang Manluluwas nag-atubang og mga tintasyon susama niadtong atong giatubang karon? Nganong nakahimo man si Kristo sa pakigbatok sa tintasyon? Alang sa ubang mga ehemplo sa kasulatan bahin sa mga tawo nga mibatok kang Satanas, tan-awa sa Genesis 39:7–20; 2 Nephi 4:16–35; ug Moises 1:10–22.

• Usa ka paagi sa pag-awhag og panaghisgutan mahitungod sa Mateo 4:1–11 ug Lucas 4:1–13 mao ang pagsulat og duha ka pangutana diha sa pisara: Unsa man ang atong makat-unan mahitungod ni Kristo gikan niini nga istorya? ug Unsa man ang atong makat-unan mahitungod ni Satanas? Dapita dayon ang mga sakop sa klase sa pagsiksik sa mga tudling aron makita ang mga tubag niining mga pangutana ug isulat ang ilang mga tubag diha sa pisara.

• Unsa ang makatabang sa imong klase sa pagpakigbatok sa tintasyon? Mahimo nimong hangyuon ang mga sakop sa klase sa pagribyu sa mga sitwasyon diha sa Mateo 4:1–11 o Lucas 4:1–13 diin ang kahibalo sa Manluluwas bahin sa mga kasulatan nakatabang Kaniya sa pagtubag kang Satanas (pinaagi sa pag-ingon, “Nahisulat na”). Hatagi og panahon ang mga sakop sa klase sa pagpangita ug sa pagpakigbahin sa mga kasulatan nga makasuporta ug makapalig-on kanila kon bation nila nga gitintal. (Alang sa mga ideya, mahimo nilang tan-awon sa Giya ngadto sa mga Kasulatan ubos sa “Pagtintal, Tintal.”)

Lucas 4:16–30

Si Jesukristo mao ang gipanagna nga Mesiyas.

• Aron matabangan ang mga sakop sa imong klase nga mas makasabut niini nga istorya, mahimo nimong ipasabut nga ang mga tawag nga Mesiyas ug Kristo parehong nagpasabut og “ang dinihogan.” Samtang magbasa sila sa Lucas 4:18–21, hangyoa sila sa paghunahuna kon unsay buot ipasabut sa pag-ingon nga si Jesus mao ang Kristo, ang Mesiyas, o ang Usa nga Dinihogan. Mahimong mabantayan nila nga makatabang ang pagbasa sa “Usa nga Dinihogan” diha sa Giya ngadto sa mga Kasulatan. Giunsa pagpahayag ni Jesus nga Siya mao ang Mesiyas karon? Dapita ang mga sakop sa klase sa pagpakigbahin kon giunsa nila pagkaila nga si Jesukristo mao ang ilang Manluluwas.

• Mahimong dunay pipila ka makatabang nga leksyon nga makat-unan pinaagi sa pagsusi nganong ang katawhan sa Nazaret wala modawat kang Jesus isip ang gipanagna nga Mesiyas. Usa ka paagi sa pagbuhat niini mao ang paghatag og kalainan sa ilang mga kinaiya niadtong sa biyuda sa Sarepta ug ni Naaman sa DaangTugon. Mahimo nimong kontakon og sayo ang ubang mga sakop sa klase ug hangyuon sila nga moabut nga andam sa pag-summarize sa matag usa niining mga istorya (tan-awa sa 1 Mga Hari 17:8–24; 2 Mga Hari 5:1–17; Lucas 4:16–30). Unsa man ang gitudlo niining mga asoy ngari kanato mahitungod sa mga milagro ug sa pagtubag ngadto sa mga sulugoon sa Dios? Duna bay nakita ang mga sakop sa klase nga bisan unsang mensahe alang sa mga miyembro sa Simbahan karon diha sa mga pulong sa Manluluwas ngadto sa katawhan sa Nazaret?

Mateo 4:18–22; Lucas 5:1–11

Ang pasalig nga mosunod kang Kristo nagpasabut nga dawaton ang Iyang kabubut-on ug kalimtan ang atong kaugalingon.

• Usahay ang direksyon nga ihatag sa Ginoo kanato morag walay pulos sa sinugdanan. Ang mga sakop sa klase mahimong mosiksik sa Lucas 5:1–11, nga mangita kon unsay gipabuhat sa Manluluwas kang Pedro ug ngano kaha nga nagduha-duha man si Pedro sa Iyang mga instruksyon. Sa unsa kaha nga paagi nga kining kasinatian nakaapekto sa mga panglantaw ni Pedro mahitungod sa Manluluwas ug sa iyang kaugalingon? Mahimo nimong dapiton ang mga sakop sa klase sa pagpakigbahin og mga kasinatian diin nagpakita sila sa ilang hugot nga pagtuo sa balaanong giya, bisan wala pay hingpit nga panabut. Unsa man ang resulta sa dihang gipakita nila ang ilang hugot nga pagtuo?

  Gitawag ni Jesus sila si Pedro ug Andres diha sa baybayon

  “Sumunod kamo kanako, ug himoon ko kamong mga mangingisdag tawo” (Mateo 4:19).

• Ingon nga ang mga mangingisda “gibiyaan ang tanan” aron mosunod kang Jesukristo (Lucas 5:11), dunay mga butang nga kinahanglan natong biyaan aron mahimong Iyang mga disipulo. Unsa may gipasabut sa Mateo 4:18–22 mahitungod sa mga kinaiya ug hugot nga pagtuo nilang Pedro, Andres, Santiago, ug Juan? Mahimong makatabang ang pagdala og pukot ngadto sa klase ug dapita ang mga sakop sa klase sa pagsulat og mga butang nga andam nilang biyaan o nabiyaan na nila aron mosunod kang Kristo ug ibutang kini diha sa pukot. Ikonsiderar ang pagdapit sa pipila ka sakop sa klase sa pagpakigbahin kon sa unsang paagi nga ang ilang kinabuhi nausab samtang mipili sila nga biyaan ang tanan aron mosunod sa Manluluwas.

pagkat-on nga icon

Awhaga ang Pagkat-on diha sa Panimalay

Aron madasig ang mga sakop sa klase nga magbasa sa Juan 2–4 atol sa umaabut nga semana, mahimo nimo silang hangyuon sa pagpamalandong kon unsa sa ilang hunahuna ang gipasabut sa mahimong “matawo pag-usab.” Sultihi sila nga ang basahunon sa sunod semana makatabang kanila nga matubag kini nga pangutana.

mga kapanguhaan nga icon

Dugang nga mga Kapanguhaan

Mateo 4; Lucas 4–5

Si Jesus mao ang Mesiyas.

Mga matang sa tintasyon.

Human mamulong bahin sa mga matang sa tintasyon nga giatubang sa Manluluwas didto sa kamingawan, si Presidente David O. McKay nagtudlo:

“Ang matag tintasyon nga moabut nganha kaninyo ug kanako magagikan sa usa sa tulo ka mga matang:

“(1) Tintasyon sa gana o kahinam;

“(2) Pagpadala sa garbo, uso, o panghambog;

“(3) Tinguha alang sa kalibutanong mga katigayunan o gahum ug dominyon sa mga yuta o yutan-ong mga kabtangan sa mga tawo” (Mga Pagtulun-an sa mga Presidente sa Simbahan: David O. McKay [2003], 99–100).

Naghisgot bahin sa kasinatian ni Jesus diha sa Mateo 4, si Elder Jeffrey R. Holland nagtudlo:

“‘Kay ikaw Anak man sa Dios, sugoa kining mga bato nga mahimong mga tinapay.’ …

“Ang tintasyon dili sa pagkaon. … Ang tintasyon, ang bahin niini nga gusto nakong i-focus, mao nga buhaton kini niining paagiha, sa pagkuha sa iyang tinapay—ang iyang pisikal nga katagbawan, kahupayan alang sa iyang tawhanong gana—sa sayon nga paagi, pinaagi sa pag-abuso sa gahum ug dili andam nga maghulat alang sa hustong panahon ug sa hustong paagi. …

“‘Kay ikaw Anak man sa Dios, umambak ikaw ngadto sa ubos’ gikan sa kinahitas-an niini nga templo. …

“Ang tintasyon dinhi mas bantayanan pa gani kay sa una. Tintasyon kini sa espiritu, sa pribado nga kagutom nga mas tinuod kay sa panginahanglan sa tinapay. Luwason ba siya sa Dios? … Nganong dili man magbaton og espiritwal nga kumpirmasyon, mag-angkon og matinud-anong kongregasyon, ug motubag niining demonyo nga mohagit—ang tanan modangup ngadto sa gahum sa Dios? …

“Apan si Jesus mibalibad sa tintasyon sa espiritu. Ang paglimud ug ang pagpugong kabahin usab sa balaanong pagpangandam. … Bisan gani ang Anak sa Dios kinahanglan gayud nga maghulat. Ang Manunubos kinsa dili gayud mohatag sa ubos og kalidad nga grasya ngadto sa uban dili usab mangayo sa susama alang sa iyang kaugalingon. …

“… ‘Kining tanan akong ihatag kanimo, kon ikaw mohapa ug mosimba kanako.’

“Si Satanas … [nangutana], ‘Unsa may bugti? Ubos og kalidad nga tinapay nga imong gibalibaran. Ubos og moral nga Mesiyanikanhong drama nga imong gibalibaran, apan walay tawo nga makabalibad sa katigayunan niining kalibutan. Ibungat ang imong gusto.’ Si Satanas nagpadayon ubos sa iyang unang artikulo sa kawalay pagtuo—ang lig-on kaayo nga pagtuo nga makapalit ka og bisan unsa niini nga kalibutan pinaagi sa kwarta.

“Si Jesus sa usa ka adlaw momando sa kalibutan. Iyang dumalaon ang matag gingharian ug gahum nga anaa niini. Siya ang mahimong Hari sa mga Hari ug Ginoo sa mga Ginoo. Apan dili niining paagiha” (“The Inconvenient Messiah,” Ensign, Peb. 1984, 68–71).

Pagpalambo sa Atong Pagtudlo

Pasalamati ang imong mga tigkat-on. “Ayaw kaayo og sobrang paghunahuna sa unsay imong itudlo nga makalimot na ka sa pagpasalamat sa mga tigkat-on alang sa ilang mga natampo. Kinahanglang masayud sila nga nakadayeg ka sa ilang kaandam sa pagpakigbahin sa ilang mga panabut ug mga pagpamatuod” (Pagtudlo sumala sa Pamaagi sa Manluluwas, 33).