Si Juan Bautista nagbunyag ni Jesus

Stained-glass nga bintana sa Templo sa Nauvoo Illinois, ni Tom Holdman

Enero 28–Pebrero 3

Mateo 3; Marcos 1; Lucas 3

“Pag-andam Kamo sa Agianan sa Ginoo”

Samtang nagbasa ug namalandong ka sa Mateo 3; Marcos 1; ug Lucas 3, irekord ang mga impresyon nga imong nadawat. Modapit kini sa Espiritu samtang nangandam ka. Ang Dali, Sunod Kanako—Alang sa mga Indibidwal ug mga Pamilya ug ang mosunod nga mga ideya makatabang kanimo nga makapadasig sa mga tawo diha sa imong klase nga makasabut ug makagamit sa doktrina niini nga mga kasulatan.

Irekord ang Imong mga Impresyon

pagpaambit nga icon

Awhaga ang Pagpaambit

Aron matabangan ang mga sakop sa klase nga mapakigbahin kon sa unsang paagi nga ang pagkat-on gikan sa Bag-ong Tugon nakapanalangin sa ilang kinabuhi, mahimo nimong isulat ang mosunod nga pangutana diha sa pisara: Unsa man ang butang nga inyong nahimo tungod sa unsay inyong nabasa sa Bag-ong Tugon karong semanaha?

pagtudlo nga icon

Itudlo ang Doktrina

Mateo 3:1–12; Lucas 3:2–18

Giandam sa mga disipulo ang ilang kaugalingon ug ang uban nga modawat ni Jesukristo.

• Unsaon nato sa pagpangandam alang sa pagbisita sa usa ka importante nga dinapit [guest]? Ang pangutana nga sama niini makatabang nimo sa pagsugod og panaghisgutan mahitungod kon giunsa pag-andam ni Juan Bautista ang mga tawo nga modawat ni Jesukristo. Mahimo dayon nimong bahinon ang klase ngadto sa tulo ka grupo nga mobasa sa Mateo 3:1–6; Mateo 3:7–12; ug Lucas 3:10–15, nga mangita kon giunsa pag-andam ni Juan Bautista ang mga tawo nga modawat ni Jesukristo diha sa ilang kinabuhi. Papuli-puliha ang matag grupo sa pagpakigbahin sa unsay ilang nakit-an.

• Sama sa gibuhat ni Juan Bautista, ang buhing mga propeta nagtabang kanato nga maandam sa pagdawat sa Manluluwas sa atong kinabuhi. Aron matabangan ang mga sakop sa klase nga mohimo sa koneksyon tali sa modernong mga propeta ug kang Juan Bautista, mahimo nimong ribyuhon ang mga pagtulun-an ni Juan Bautista diha sa Mateo 3:1–12 ug Lucas 3:2–18 ug pipila ka tambag gikan sa labing bag-o nga kinatibuk-ang komperensya. Sa unsang paagi nga ang pagsunod niining propetikanhong tambag makatabang kanato nga maandam sa pagdawat sa Manluluwas?

• Ang Hubad ni Joseph Smith, Lucas 3:4–11 (sa Giya ngadto sa mga Kasulatan) naghatag og ideya sa misyon ni Jesukristo lapas pa sa unsay makita diha sa Lucas 3:4–6. Unsa ang makat-unan sa mga sakop sa klase gikan niining mga bersikulo mahitungod sa Manluluwas ug sa atong panginahanglan nga maghinulsol?

  Si Juan Bautista nagsangyaw

  Si Juan Bautista Nagsangyaw diha sa Kamingawan, ni Robert T. Barrett

Lucas 3:3–14

Kinahanglan kitang mopagawas og “mga bunga nga mahiangay sa paghinulsol.”

• Sa Lucas 3:8, si Juan Bautista nagtudlo sa katawhan nga sa dili pa sila mabunyagan, kinahanglan silang mopakita og “mga bunga,” o ebidensya, sa ilang paghinulsol. Unsaon nimo sa pagtabang ang mga sakop sa klase nga mahibalo sa ebidensya sa ilang kaugalingong paghinulsol? Mahimo nimo silang hangyuon sa pagsiksik sa Lucas 3:8–14 ug sa pagpangita sa unsay gikonsiderar ni Juan nga “mga bunga” sa paghinulsol. Mahimo usab nilang ribyuhon ang Moroni 6:1–3 ug Doktrina ug mga Pakigsaad 20:37. Mahimong magdrowing ka og mamunga nga kahoy diha sa pisara ug pabutangi og label sa mga sakop sa klase ang bunga sa kahoy sa “mga bunga” sa paghinulsol nga ilang makit-an. Mahimo usab kini nga maayong higayon nga hisgutan kon unsay gipasabut sa tinuoray nga paghinulsol. Ipasabut nga usa ka paagi nga atong “[matul-id] ang iyang mga agianan” (Lucas 3:4) mao ang pinaagi sa paghinulsol sa bisan unsang mga babag nga makapugong sa Espiritu nga makaabut kanato.

• Ang pagkanta sa himno nga “More Holiness Give Me,” Hymns, nu. 131, makaawhag og panaghisgutan kon sa unsang paagi nga ang paghinulsol makatabang kanato nga mas mahisama sa Manluluwas.

Mateo 3:13–17

Atong gisunod si Jesukristo kon kita magpabunyag ug modawat sa Espiritu Santo.

• Aron maribyu ang istorya bahin sa bunyag ni Jesukristo, sulayi kini nga ideya: Pangutan-a ang mga sakop sa klase kon unsaon nila paggamit ang Mateo 3:13–17 sa pagtudlo sa usa ka tawo, sama sa usa ka bata o tawo nga miyembro sa laing tinuohan, mahitungod sa bunyag. (Mahimo usab nilang gamiton ang litrato diha sa outline karong semanaha sa Dali, Sunod Kanako—Alang sa mga Indibidwal ug mga Pamilya.) Unsang importante nga mga elemento sa bunyag ang ilang hatagan og gibug-aton? Mahimo nilang mapraktis ang ilang mga ideya pinaagi sa pagtudlo sa usag usa.

• Aron matabangan ang mga sakop sa klase nga mahinumdom sa ilang kaugalingong mga bunyag ug makapamalandong sa kaimportante sa pagtuman sa ilang mga pakigsaad sa bunyag, mahimo nimo silang dapiton sa pagbasa sa Mateo 3:13–17 ug sa pamahayag ni Elder Robert D. Hales diha sa “Dugang nga mga Kapanguhaan.” Ang mga sakop sa klase mahimong malingaw sa pagpakigbahin sa ilang mga pagbati mahitungod sa ilang kaugalingong mga bunyag ug sa ilang mga pakigsaad sa bunyag. Mahimo usab nilang kantahon ang “Come, Follow Me,” Hymns, nu. 116.

• Si Juan Bautista nagtudlo nga ang Manluluwas mobunyag pinaagi sa “Espiritu Santo, ug kalayo” (Mateo 3:11). Ang bunyag sa kalayo mahitabo kon makumpirmahan kita ug makadawat kita sa gasa sa Espiritu Santo. Nganong kinahanglan man gayud nga kita adunay gasa sa Espiritu Santo aron mouswag diha sa gingharian sa Dios? Unsay epekto sa bunyag sa kalayo ug sa Espiritu Santo ngari kanato? (tan-awa sa Alma 5:14).

• Ania ang usa ka kalihokan nga makatabang sa mga sakop sa klase nga mahisgutan og dugang ang doktrina sa bunyag. Isulat ang mosunod nga mga pangutana diha sa pisara ug ang mga pakisayran sa kasulatan sa mga piraso nga papel. Dapita ang mga sakop sa klase sa pagpili og mga piraso nga papel ug dayon basaha ang matag kasulatan isip usa ka klase. Hisguti kon hain nga pangutana ang mas matubag sa matag kasulatan. Aduna bay laing mga kasulatan o mga ideya nga makatabang sa pagtubag niining mga pangutana?

  • Unsay gitudlo sa mga kasulatan mahitungod sa panginahanglan sa bunyag? (3 Nephi 11:38)

  • Unsay gisimbolo sa bunyag pinaagi sa pagpaunlod? (Mga Taga-Roma 6:3–5)

  • Sa unsang paagi nga ang akong mga pakigsaad sa bunyag makapausab sa paagi sa akong pagpakabuhi? (Mosiah 18:8–10)

  • Nganong dili man kita mobunyag og mga masuso? (Moroni 8:8–12)

  • Nganong importante man nga ang bunyag ipahigayon sa usa ka tawo nga adunay awtoridad, dili lang kay sinsero nga tinguha? (Mga Hebreohanon 5:4)

  • Kon nabunyagan na ko sa laing simbahan, nganong kinahanglan pa man kong bunyagan og usab? (DP 22:1–4)

  • Nganong kinahanglan gayud nga ang bunyag pagasundan sa pagdawat sa gasa sa Espiritu Santo? (Juan 3:5)

pagkat-on nga icon

Awhaga ang Pagkat-on diha sa Panimalay

Aron maawhag ang mga sakop sa klase nga magtuon sa Mateo 4 ug Lucas 4–5 diha sa panimalay, dapita sila sa paghunahuna og tintasyon nga ilang giatubang, ug dayon sultihi sila nga kining mga kapitulo motudlo kanila kon unsay gibuhat sa Manluluwas sa dihang nag-atubang Siya og mga tintasyon.

mga kapanguhaan nga icon

Dugang nga mga Kapanguhaan

Mateo 3; Marcos 1; Lucas 3

Ang kahulugan sa atong mga pakigsaad sa bunyag.

Si Elder Robert D. Hales nagtudlo:

“Kon kita nakasabut sa atong pakigsaad sa bunyag ug sa gasa sa Espiritu Santo, kini mousab sa atong kinabuhi ug moestablisar sa atong hingpit nga pagkamaunungon ngadto sa gingharian sa Dios. … Ang pagsulod ngadto sa gingharian sa Dios hilabihan gayud ka importante nga si Jesus gibunyagan aron ipakita kanato ‘ang kahigpit sa dalan’ [2 Nephi 31:9]. …

“Sa atong pagsunod sa ehemplo ni Jesus, kita usab, nagpakita nga kita maghinulsol ug magmasulundon sa pagtuman sa mga sugo sa atong Amahan sa Langit. Atong ipaubos ang atong kaugalingon uban sa usa ka masulub-on nga kasingkasing ug mahinulsulon nga espiritu samtang giila nato ang atong mga sala ug nagtinguha og kapasayloan sa atong mga kalapasan [tan-awa sa 3 Nephi 9:20]. Nakigsaad kita nga kita andam sa pagdala diha sa atong kaugalingon sa ngalan ni Jesukristo ug kanunay nga mohinumdom Kaniya. …

“Pinaagi sa pagpili nga maanaa sa gingharian sa [Dios], atong gibulag—wala gilain—ang atong kaugalingon gikan sa kalibutan. Tarung ang atong sinina, putli ang atong mga hunahuna, limpyo ang atong pinulongan. Ang mga salida ug telebisyon nga atong tan-awon, ang musika nga atong paminawon, ang mga libro, mga magasin, ug mga newspaper nga atong basahon makapadasig. Mopili kita og mga higala nga moawhag sa atong mahangturong mga tumong, ug atong tagdon ang uban sa pagkamabination. Atong isalikway ang mga bisyo sa imoralidad, sugal, tabako, ilimnong makahubog, ug dili maayo nga mga druga. Ang atong mga kalihokan sa Dominggo magpakita sa sugo sa Dios nga hinumduman ang adlaw nga Igpapahulay ug balaanon kini. Sundon nato ang ehemplo ni Jesukristo sa paagi sa atong pagtratar sa uban. Magpakabuhi kita aron mahimong takus nga mosulod sa balay sa Ginoo” (“The Covenant of Baptism: To Be in the Kingdom and of the Kingdom,” Ensign, Nob. 2000, 7–8).

Pagpalambo sa Atong Pagtudlo

Itudlo ang sukaranang doktrina. Si Hyrum Smith nagtudlo, “Isangyaw ang unang mga baruganan sa Ebanghelyo—balik-balika kini pagsangyaw; imong makita nga sa matag adlaw bag-o nga mga ideya ug dugang nga lamdag mahitungod niini ang ipadayag nganha kanimo. Mahimo nimong palambuon ang imong panabut niini aron mamahimo kining mas klaro alang kaninyo. Ikaw makahimo dayon sa pagpasabut niini sa mas sayon nga paagi ngadto sa imong tudloan” (Manuscript History of the Church, vol. E-1, p. 1994, josephsmithpapers.org).