Wali sa Bungtod, ni Jorge Cocco

Pebrero 18–24

Mateo 5; Lucas 6

“Bulahan Kamo”

I-rekord ang imong espiritwal nga mga impresyon samtang magtuon ka sa Mateo 5 ug Lucas 6. Ang pagpadayag moabut samtang magtinguha ka sa pagtubag sa mga panginahanglan sa imong klase. Kini nga outline makatabang sa paghatag og dugang nga mga ideya.

Irekord ang Imong mga Impresyon

Awhaga ang Pagpaambit

Si Presidente Joseph Fielding Smith miingon nga ang Wali sa Bungtod mao “ang pinakatalagsaon nga sukad nasangyaw, sigun sa atong nahibaloan” (Mga Pagtulun-an sa mga Presidente Simbahan: Joseph Fielding Smith [2013], 267). Nganong ang mga sakop sa klase mibati man nga tinuod kini? Unsa ang ilang mapakigbahin?

Itudlo ang Doktrina

Mateo 5:1–12

Ang malungtarong kalipay moabut tungod sa pagsunod sa paagi nga gitudlo ug gipuy-an ni Jesukristo.

• Ang Wali sa Bungtod sa Manluluwas, nga gipamulong og una ngadto sa Iyang labing suod nga mga disipulo, nagsugod sa mga pamahayag nga nailhan isip Kabulahanan, diin gidapit kita ni Kristo sa paghunahuna og balik sa unsay kahulugan sa pagpakabuhi og bulahan nga kinabuhi—usa ka kinabuhi sa malungtarong kalipay. Aron masugdan ang panaghisgutan mahitungod sa malungtarong kalipay, mahimo nimong hangyuon ang mga sakop sa klase sa pagpakigbahin kon unsay makapalipay kanila. Sumala sa Kabulahanan, unsay gisulti ni Jesus nga makapahimo sa tawo nga “bulahan,” o malipayon sa mahangturong paagi? Sa unsang paagi nga ang mga pagtulun-an ni Jesus lahi kay sa ubang mga paagi nga gisulayan sa pagpangita sa mga tawo ang kalipay?

• Aron matabangan ang mga sakop sa klase nga makasabut sa mga termino sama sa maputli og kasingkasing o magbubuhat og kadaitan, mahimo nimong ilista ang ubang mga termino gikan sa mga bersikulo 3–12 diha sa pisara. Dapita dayon ang mga sakop sa klase sa pagsugyot sa katugbang sa matag termino ug unsay ilang nakat-unan mahitungod sa matag termino pinaagi sa pagbuhat niini. Hangyoa ang mga sakop sa klase sa pagpamalandong kon unsay ilang mausab aron mahimong matang sa tawo nga gihulagway dinhi niini nga mga bersikulo. Unsa ang gikadugang sa 3 Nephi 12:3, 6 sa atong panabut bahin sa Mateo 5:3, 6?

• Ang laing paagi sa pagsusi niining mga bersikulo mao ang pagdapit sa matag sakop sa klase sa pagtuon sa dugang nga mga kasulatan mahitungod sa usa sa Kabulahanan ug ipakigbahin ngadto sa klase ang unsay ilang nakat-unan. Sa unsang paagi nga ang tawo nga ilang nailhan nakapakita niana nga baruganan?

Ang Wali sa Bungtod, ni Frank Adams

Mateo 5:14–16

Ang mga disipulo sa Manluluwas kinahanglang mahimong kahayag alang sa kalibutan.

• Unsay gibati sa mga sakop sa imong klase sa dihang nabasahan nila ang pamahayag ni Jesus nga sila mao “ang kahayag sa kalibutan”? Unsay gipasabut sa itago ang atong kahayag “ilalum sa gantangan,” ug ngano nga mahimo man kitang matintal sa pagbuhat niini? Ang pamahayag ni Elder Robert D. Hales diha sa “Dugang nga mga Kapanguhaan” mahimong makapadasig. Kinsa ang nahimong “kahayag” ngadto sa mga sakop sa imong klase?

• Hunahunaa ang usa ka paagi sa pagpakita sa pagtulun-an ni Kristo nga kita ang kahayag sa kalibutan. Mahimo ba nimong mapakita ang litrato sa usa ka siyudad nga gipahayagan panahon sa kagabhion? Makadala ka ba og ispat ug itago kini sa ilawom sa basket? Nganong gitandi man sa Manluluwas ang Iyang mga disipulo ngadto sa kahayag? Unsaon nato sa paggamit niini nga panabut nga mahimong kahayag ngadto sa uban? (tan-awa sa DP 103:9–10). Mahimong hisgutan o i-role play sa mga sakop sa klase ang mga paagi nga ang kahayag sa ebanghelyo makadan-ag sa ilang kinabuhi ug makapanalangin sa uban.

• Ang ubang mga kasulatan nga makadugang sa inyong panaghisgutan mahitungod sa kahayag maglakip sa 3 Nephi 18:24; Doktrina ug mga Pakigsaad 50:24; 84:44–47; 88:50, 67; ug 93:36–40. Unsa ang ikadugang niining mga himno ug mga kasulatan sa atong panabut bahin sa Mateo 5:14–16?

Mateo 5:17–48

Si Jesukristo nagtudlo og mas taas nga balaod nga makagiya kanato paingon sa pagkahingpit.

• Ang mga sitwasyon nga gihulagway diha sa Mateo 5 piho gayud alang sa panahon sa Manluluwas, apan ang mga baruganan nga Iyang gitudlo para sa tanan. Aron matabangan ang mga sakop sa klase nga makita ang magamitan niini sa ilang kinabuhi, dapita sila sa pagpili og usa sa mosunod nga mga tudling ug sa paghunahuna og moderno nga ehemplo nga naghulagway kon unsay gitudlo sa Manluluwas: mga bersikulo 21–24; 27–30; 33–37; 38–39; 40–42; ug 43–44. Mahimo nila kining buhaton sa tinagsa-tagsa o diha sa mga grupo ug ipakigbahin ang ilang mga ehemplo ngadto sa klase.

• Ang mga batan-on mahimong malingaw og matching game nga makatabang nila nga makita nga ang mga pagtulun-an sa Manluluwas nga makita diha sa Mateo 5:21–48 mihulip sa balaod ni Moises. Makabuhat ka og usa ka hugpong sa mga kard nga dunay mga pulong nga magsugod og “nakadungog kamo” (nga naghulagway sa balaod ni Moises) gikan sa Mateo 5:21–44. Pagbuhat og laing hugpong nga dunay mga pulong gikan sa mga bersikulo nga nagsugod og “apan sultihan ko kamo” (nga naghulagway sa mas taas nga balaod ni Kristo). Ibutang ang parehong mga hugpong sa mga kard nga magkulob, ug papilia ang usa ka sakop sa klase og usa sa “nakadungog kamo” nga mga kard, nga pagasundan sa usa nga gikan sa laing hugpong, nga mangita og katukma. Ipadayon hangtud nga ang mga sakop sa klase makatukma sa balaod ni Moises ngadto sa bag-ong pagtulun-an ni Kristo. Alang sa matag katukma, hisguti nganong ang pagtulun-an sa Manluluwas gikinahanglan sa atong panahon.

• Unsaon nimo pagtabang sa mga sakop sa klase nga makita nga ang mando sa Manluluwas nga mahimong “hingpit” nagkahulugan, sama sa gipasabut ni Presidente Russell M. Nelson, nga mahimong “kompleto” o “nahuman”? (Mateo 5:48; “Perfection Pending,” Ensign, Nob. 1995, 86–88). Ania ang ideya: paggunting og hulagway ni Jesus ngadto sa usa ka puzzle, ug dapita ang mga sakop sa klase sa pagsulat diha sa likod sa matag piraso og usa ka pagtulun-an gikan sa Mateo 5 nga ilang gibati nga gidasig nga magamit sa ilang kinabuhi. Tuguti sila nga magtinabangay sa pagkompleto sa puzzle. Sa unsang paagi ang Pag-ula ni Jesukristo makatabang kanato nga mahimong “kompleto” o “nahuman”? (tan-awa sa Giya ngadto sa mga Kasulatan, “Grasya”).

• Mahimo usab nimong dapiton ang mga sakop sa klase sa paghimo og tumong sa paglihok sa pag-aghat nga ilang madawat samtang magtuon sa Mateo 5. Ikonsiderar kon unsaon nimo sa pag-follow up niini nga pagdapit sa umaabut nga mga leksyon.

Awhaga ang Pagkat-on diha sa Panimalay

Aron madasig ang mga sakop sa klase nga magbasa sa Mateo 6–7 atol sa umaabut nga semana, mahimo nimo silang sultihan nga si Presidente Harold B. Lee mitawag sa Wali sa Bungtod nga mao “ang katukuran sa hingpit nga kinabuhi” (Mga Pagtulun-an sa mga Presidente sa Simbahan: Harold B. Lee [2000], 246).

Dugang nga mga Kapanguhaan

Mateo 5; Lucas 6

Magmahimong usa ka kahayag.

Si Elder Robert D. Hales nagtudlo: “Mihunong ba kamo sa paghunahuna nga tingali kamo mao ang kahayag nga gipadala sa Langitnong Amahan sa paggiya sa laing tawo nga luwas nga makapauli o mahimong suga sa pagpakita sa agianan balik ngadto sa higpit ug pig-ot nga dalan nga padulong ngadto sa kinabuhing dayon? Ang inyong kahayag mao ang suga ug kinahanglang dili mohunong sa pagsiga o makapahisalaag niadtong nangita sa agianan pauli” (“That Ye May Be the Children of Light” [fireside sa Brigham Young University, Nob. 3, 1996], 9; speeches.byu.edu).

Pagtinguha og kahingpitan.

Si Presidente Harold B. Lee nagtudlo: “Motuo ba kamo nga ang Manluluwas nagsugyot og usa ka tumong nga dili mahimo nga kab-uton ug sa ingon mobiay-biay kanato sa atong mga paningkamot sa pagpuyo aron makakab-ot nianang pagkahingpit? Imposible alang kanato dinhi sa mortalidad nga moabut niana nga kahimtang sa pagkahingpit nga gisulti sa Magtutudlo, apan niini nga kinabuhi gipahiluna nato ang pundasyon diin atong gitukod didto sa kahangturan; busa, kinahanglan gayud nga sigurohon nato nga ang atong pundasyon gipahimutang sa kamatuoran, sa pagkamatarung ug sa hugot nga pagtuo” (Mga Pagtulun-an sa mga Presidente sa Simbahan: Harold B. Lee, 240).

Si Presidente Joseph Fielding Smith miingon: “[Ang kahingpitan] dili moabut diha dayon, apan pagtulun-an human sa usa ka pagtulun-an ug lagda human sa usa ka lagda, ehemplo human sa usa ka ehemplo, ug dili hangtud nia pa kita niining kinabuhia. … Apan dinhi nagpahimutang kita og tukuranan. Dinhi kita gitudloan niining yano nga mga kamatuoran sa Ebanghelyo ni Jesukristo, niining panahon sa pagsulay, sa pag-andam kanato alang sa kahingpitan. Kini akong katungdanan, inyong katungdanan, ang pagkahimo nakong mas maayo karon kay sa kagahapon, ug kamo sa pagka-mas maayo karon kay sa kagahapon ug pagka-mas maayo ugma kay sa karon” (Mga Pagtulun-an sa mga Presidente sa Simbahan: Joseph Fielding Smith [2013], 267).

Pagpalambo sa Atong Pagtudlo

Palamboa ang pag-apil sa mga sakop sa klase. Daghang mga kalihokan ang mahimo isip usa ka klase, sa ginagmay nga mga grupo, sa mga parisan, o isip panel discussion. Paggamit og lain-laing mga paagi sa pagtudlo aron matugutan ang mga tawo nga makaapil kinsa mahimong walay kahigayunan nga moapil. (Tan-awa sa Pagtudlo sumala sa Pamaagi sa Manluluwas, 33.)