Si Jesus nagtudlo sa daplin sa baybayon

Si Jesus Nagtudlo sa mga Tawo sa Daplin sa Baybayon, ni James Tissot

Pebrero 25–Marso 3

Mateo 6–7

“Kanila Nagpanudlo man Siya ingon nga May Kagahum”

Samtang mangandam ka sa pagtudlo, sugdi pinaagi sa pag-andam sa imong kaugalingon. Tun-i ang Mateo 6–7, ug i-rekord ang imong espiritwal nga mga impresyon. Makatabang kini kanimo nga makadawat og pagpadayag kon unsaon pagtubag ang mga panginahanglan sa imong klase sa labing maayo nga paagi. Dayon pangitaa kining outline alang sa mga ideya sa pagtudlo.

Irekord ang Imong mga Impresyon

pagpaambit nga icon

Awhaga ang Pagpaambit

Dapita ang mga sakop sa klase sa pagpakigbahin kon hain sa mga tudling diha sa Wali sa Bungtod ang ilang gibati nga labing gikinahanglan karon. Awhaga ang mga sakop sa klase sa pagdugang og mga ideya sa usag usa.

pagtudlo nga icon

Itudlo ang Doktrina

Mateo 6–7

Kon kita maminaw ug molihok sa mga pagtulun-an sa Ginoo, ang atong kinabuhi matukod diha sa lig-on nga pundasyon.

• Unsa nga piho nga mga pagtulun-an gikan sa Mateo 6–7 ang mas makabenepisyo niadtong imong tudloan? Ikonsiderar ang pagsulat diha sa pisara sa pipila ka pakisayran gikan sa Mateo 6–7 nga naglangkob niining mga pagtulun-an. Ang mga sakop sa klase mahimong mopili og usa sa mga pakisayran nga tun-an sa hilum ug dayon isulat diha sa pisara ang bisan unsa nga espiritwal nga mga kamatuoran nga ilang makat-unan. Sa unsang paagi nga kining mga pagtulun-an nakaimpluwensya sa atong kinabuhi?

• Gitapos sa Manluluwas ang Iyang wali pinaagi sa usa ka sambingay nga mahimong makatabang sa imong klase nga mas makasabut sa kaimportante sa pagsunod sa mga pagtulun-an sa Manluluwas (tan-awa sa Mateo 7:24–27; tan-awa usab sa Helaman 5:12). Aron ma-visualize kini nga sambingay, ang mga sakop sa klase mahimo nga magtinabangay aron makatukod og lig-on nga pundasyon gamit ang mga bloke, mga tasa, o ubang mga materyal ug dayon testingan ang kalig-on sa mga pundasyon niini. Mahimo usab nilang butangan og label ang ilang mga materyal sa building pinaagi sa mga butang nga ilang mabuhat aron magamit ang mga pagtulun-an sa Manluluwas. Sa unsang paagi nga ang pagbuhat niining mga butanga makatabang kanato sa pagbuntog sa mga unos sa kinabuhi?

Mateo 6:5–13

Gitudloan kita sa Manluluwas kon unsaon sa pag-ampo.

• Ang pagtuon sa Pag-ampo sa Ginoo mahimong makatabang sa mga sakop sa klase nga mahibalo kon unsaon nila sa pagpalambo sa ilang kaugalingong mga pag-ampo pinaagi sa pagsunod sa ehemplo sa Ginoo. Mahimo nimo silang dapiton sa pagsulat diha sa pisara sa mga pulong gikan sa Mateo 6:9–13 (o Lucas 11:1–4) nga importante ngadto kanila. Samtang mamalandong kita sa mga pulong sa Manluluwas, unsa may atong makat-unan mahitungod sa mga kinaiya nga kinahanglan natong mabatunan samtang mag-ampo kita? Unsay atong makat-unan mahitungod sa mga matang sa mga butang nga kinahanglan natong i-ampo? Mahimong makatudlo kini sa mga sakop sa klase sa pag-paraphrase sa pipila ka mga pulong sa Manluluwas isip mga butang nga tingali ilang isulti sa ilang kaugalingong mga pag-ampo. Pananglitan, ang “Hatagi kami karon sa pagkaon namo sa matag-adlaw” mahimong i-paraphrase nga “Palihug tabangi ko sa akong mga paningkamot nga makasangkap sa akong pamilya.”

• Kadtong imong tudloan mahimong makabenepisyo gikan sa pagtuon sa ubang mga ehemplo sa pag-ampo sa Manluluwas ngadto sa Iyang Amahan, sama sa Mateo 26:36–42 ug Juan 17. Mahimo nimong dapiton ang mga sakop sa klase sa pagtuon sa pipila niining mga tudling, nga magsiksik sa mga tubag sa mga pangutana sama sa “Unsay atong makat-unan mahitungod sa pag-ampo gikan sa paagi sa pag-ampo sa Manluluwas?” ug “Unsaon man nato sa paghimo sa atong mga pag-ampo nga mas mahisama sa pag-ampo sa Manluluwas?” Alang sa ubang talagsaon nga ehemplo sa mga pag-ampo, tan-awa sa Enos 1:3–17; Alma 31:26–35; 33:3–11.

• Ikaw ba adunay bisan unsang mga kasinatian nga imong mapakigbahin nga may kalabutan sa pag-ampo? Ang pagpakigbahin sa imong mga kasinatian mahimong makapadasig sa mga sakop sa klase sa pagbuhat sa ingon. Si Presidente Thomas S. Monson mipakigbahin og personal nga mga kasinatian kalabut sa pag-ampo diha sa iyang mensahe nga “Hunahunaon ang mga Panalangin” (Liahona, Nob. 2012, 86–89). Mahimo nimong hisgutan ang mga baruganan gikan niining mensahe ug gikan sa mga kinutlo diha sa “Dugang nga mga Kapanguhaan.” Ang entry nga “Pag-ampo” diha sa Giya ngadto sa mga Kasulatan mahimong makatabang usab.

Mateo 7:7–11

Ang Langitnong Amahan motubag sa mga pag-ampo.

• Aron matabangan ang mga sakop sa klase nga mapalig-on ang ilang pagtuo nga ang Dios modungog ug motubag sa ilang mga pag-ampo, mahimo nimong isulat ang pangayo, pangita, ug panuktok diha sa pisara. Dayon dapita ang mga sakop sa klase sa pagsiksik sa mga kasulatan alang sa mga ehemplo sa mga tawo nga “nangayo,” “nangita,” ug “nanuktok” (alang sa mga ehemplo, tan-awa sa 1 Nephi 11:1; Ether 2:18–3:6; Joseph Smith—Kasaysayan 1:11–17). Unsa ang atong makat-unan gikan niining mga ehemplo mahitungod sa pagbaton og mga tubag sa atong mga pag-ampo?

• Ang ubang importante nga konteksto alang sa Mateo 7:7–11 makita diha sa Hubad ni Joseph Smith sa Mateo 7:12–17 (diha sa Giya ngadto sa mga Kasulatan). Niining mga bersikulo, ang mga disipulo ni Jesus nagpaabut sa pipila ka rason nga tingali ihatag sa mga tawo bahin sa wala pagpangita sa kamatuoran gikan sa Langitnong Amahan. Mahimo nimong hangyuon ang mga sakop sa klase sa pag-imagine nga sila adunay higala nga nagduha-duha nga magtinguha sa giya o mga panalangin gikan sa Ginoo. Unsa kaha ang masulti sa mga sakop sa klase aron sa pagdasig niini nga higala? Unsaon kaha nila paggamit ang mga pulong sa Manluluwas diha sa Mateo 7:7–11?

Mateo 7:15–20

Makaila kita sa tinuod ug sa mini nga mga propeta pinaagi sa ilang mga bunga.

• Ang mga sakop sa imong klase mahimong nakasugat og sayop nga mga pilosopiya ug ubang pagpanglingla sa kaaway, maanaa man sa internet o gikan sa laing mga tinubdan. Mahimong nakadungog usab sila sa uban nga misaway sa mga sulugoon sa Ginoo. Unsaon nimo sa pagtabang kanila nga makasabut kon unsaon pag-ila ang mini nga mga propeta ug mga pagtulun-an gikan sa unsay tinuod? Mahimo nimong i-display ang pipila ka piraso sa bunga ug ipangutana kon unsay atong mahunahuna mahitungod sa gigikanan niini nga mga kahoy. Sa unsang paagi nga kining kalihokan makatabang kanato nga makasabut sa Mateo 7:15–20? Mahimo usab kamo nga magbasa og dungan sa pipila ka bag-ohay nga mga mensahe gikan sa buhi nga mga propeta. Unsa nga “mga bunga” o mga resulta ang mahimo sa pagsunod sa ilang tambag?

  bunga

  Makaila kita sa tinuod nga mga propeta pinaagi sa ilang mga bunga.

• Ang Mateo 7:15–20 mahimong makatabang sa pag-ugmad sa pagtuo sa mga sakop sa klase diha sa balaang misyon ni Propeta Joseph Smith. Unsa ang mga bunga sa buhat nga nahimo ni Joseph Smith? Alang sa ubang mga ideya, tan-awa sa mensahe ni Elder Neil L. Andersen sa “Joseph Smith” (Liahona, Nob. 2014, 28–31). Unsaon nato paggamit sa analohiya diha sa Mateo 7:15–20 sa pagpamatuod ngadto sa atong mga higala ug pamilya mahitungod ni Propeta Joseph?

pagkat-on nga icon

Awhaga ang Pagkat-on diha sa Panimalay

Karong semanaha, samtang magtuon ang mga sakop sa klase sa daghang milagro nga gipahigayon sa Manluluwas, dapita sila sa pagpamalandong sa mga ehemplo sa mga milagro sa modernong panahon—madako man o magamay—nga ilang nasinati o nadunggan.

mga kapanguhaan nga icon

Dugang nga mga Kapanguhaan

Mateo 6–7

Mga awit nga gamiton diha sa classroom.

• Unsa nga mga baruganan kalabut sa pag-ampo ang nakat-unan sa mga sakop sa klase gikan sa mga pulong sa “Ikaw Naghunahuna ba sa Pag-ampo”? (Mga Himno ug mga Awit sa mga Bata, nu. 48).

• Ang pagbasa, pagkanta, o pagpaminaw sa “Pagdayeg sa Tawo,” Mga Himno ug mga Awit sa mga Bata, nu. 50, mahimong makatabang sa mga sakop sa klase sa paghunahuna sa pipila ka bunga diin atong mahibaloan nga si Joseph Smith usa ka propeta sa Dios (tan-awa usab sa DP 135:3).

Mga istorya mahitungod sa pag-ampo.

Si Presidente Boyd K. Packer naghisgot bahin sa usa ka pag-ampo sa pamilya nga nahimo sa iyang pamilya sa wala pa siya mobiyahe paingon sa California. Gisultihan sila sa usa ka beterinaryo nga ang ilang baka dili na molungtad nianang adlawa. “Ang among gamayng anak nga lalaki ang namulong sa among pag-ampo. Human siya nangayo sa Langitnong Amahan sa ‘pagpanalangin ni Papa sa iyang mga biyahe ug sa pagpanalangin kanamong tanan,’ nagsugod dayon siya og usa ka tinuoray nga pangamuyo. Siya miingon, ‘Langitnong Amahan, palihug panalangini ang baka nga si Bossy aron mamaayo siya.’”

“Sa California, misulti ko sa insidente ug miingon, ‘Kinahanglan siya nga makakat-on nga dili nato makuha ang tanan nga atong giampo nga ingon niana lang kasayon.’

“Adunay usa ka leksyon nga angayang makat-unan, apan ako ang nakakat-on niini, dili ang akong anak nga lalaki. Sa dihang miuli ako Dominggo sa gabii, si Bossy ‘namaayo ra’” (“Pag-ampo ug mga Pag-aghat,” Liahona, Nob. 2009, 45).

Si Brother Mangal Dan Dipty, usa ka sakop sa Simbahan gikan sa India, miingon: “Sa pagkabata regular ko nga mitambong sa German Lutheran nga simbahan. Kanunay mi nga mangadto sa kabungturan alang sa dungan nga pag-ampo. Usa ka ulanon nga adlaw, ang tanan nga diha sa grupo nga pag-ampo nangabasa, ug usa sa mga tigsangyaw mihalad og tinuoray nga pag-ampo nga naghangyo sa Ginoo nga ipahunong ang ulan. Sa among katingala mihunong ang ulan. Sinugdanan kadto sa akong pagtuo sa Dios ug sa pag-ampo” (“Ang Akong Panaw isip usa ka Pioneer gikan sa India,” Liahona, Hulyo 2016, 67).

Alang sa ubang mga istorya mahitungod sa pag-ampo, tan-awa sa seksyon sa Mga Tingog sa mga Santos sa Ulahing mga Adlaw Ensign o Liahona.

Pagpalambo sa Atong Pagtudlo

Ayaw og kahadlok sa kahilum. “Ang maayo nga mga pangutana nagkinahanglan og panahon sa pagtubag. Nagkinahanglan kini og pagpamalandong, pagsiksik, ug inspirasyon. Ang panahon nga imong gigahin sa paghulat og mga tubag sa usa ka pangutana mahimong usa ka sagrado nga panahon sa pagpamalandong. Likayi ang tintasyon nga hunungon dayon kini nga panahon pinaagi sa pagtubag sa imong kaugalingong pangutana o pagbalhin ngadto sa laing butang” (Pagtudlo sumala sa Pamaagi sa Manluluwas, 31).