Gipakaon ni Kristo ang pundok sa katawhan

Pakan-a Sila, ni Jorge Cocco

Marso 25–31

Mateo 14–15; Marcos 6–7; Juan 5–6

“Ayaw Kamo Kalisang”

Samtang mangandam ka sa pagtudlo gikan sa Mateo 14–15; Marcos 6–7; ug Juan 5–6, pangitaa ang mga mensahe nga may kalabutan sa imong klase. Sa pagbuhat nimo sa ingon, ikonsiderar kon unsaon pagpaapil ang mga sakop sa klase sa makahuluganon nga kasinatian gamit ang mga kasulatan.

Irekord ang Imong mga Impresyon

pagpaambit nga icon

Awhaga ang Pagpaambit

Usa ka paagi sa pagsugod og panaghisgutan bahin niining mga kapitulo mao ang pagdapit sa pipila ka sakop sa klase nga ang matag usa mopili og kapitulo gikan sa basahunon ug moabut nga andam sa pagpakigbahin og mensahe gikan nianang kapitulo nga makahuluganon ngadto kanila. Samtang mopakigbahin sila, ang ubang mga sakop sa klase mahimong mangutana o modugang og mga ideya.

pagtudlo nga icon

Itudlo ang Doktrina

Juan 5:16–47

Si Jesukristo mao ang Hinigugmang Anak sa Langitnong Amahan.

• Sa Juan 5, mihatag si Jesus og pipila ka ideya mahitungod sa Iyang kaugalingon, sa Iyang Amahan, ug sa Iyang relasyon ngadto sa Amahan. Aron matabangan ang klase nga madiskubrihan kining mga ideya, sulayi sila sa pagbahin ngadto sa mga grupo ug sa paghatag kanila og pipila ka minuto sa paglista og daghang kamatuoran kutob sa ilang makita diha sa mga bersikulo 16–47 mahitungod sa kinaiya sa Dios, ni Jesukristo, ug sa Ilang relasyon. Dapita ang mga grupo nga magpuli-puli sa pagbasa sa mga kamatuoran gikan sa ilang mga lista hangtud nga ang matag kamatuoran diha sa matag lista mapakigbahin na. Sa unsang paagi nga kining mga kamatuoran makatabang kanato aron mas masabtan ang atong Langitnong Amahan ug ang Iyang Anak? Unsaon nato sa pagsunod sa ehemplo ni Jesukristo sa pagkamasulundon ngadto sa Amahan?

• Usa ka kalihokan diha sa outline karong semanaha sa Dali, Sunod Kanako—Alang sa mga Indibidwal ug mga Pamilya nagdapit sa mga tigkat-on nga hinumduman ang matag higayon nga gigamit ni Jesus ang pulong nga Amahan sa Juan 5. Dapita ang pipila ka sakop sa klase sa pagpakigbahin kon unsa ang ilang nakat-unan samtang gikompleto nila ang kalihokan. Unsa nga mga ideya ang ilang nabatunan mahitungod sa Langitnong Amahan ug sa Iyang Hinigugmang Anak? Unsa ang gitudlo sa gipahiuling ebanghelyo nga makatabang kanato aron mas masabtan kon si kinsa ang atong Amahan ug nganong simbahon nato Siya? Ang ubang mga ideya makita diha sa entry sa Giya ngadto sa mga Kasulatan alang sa “Dios” ug ang “Dios nga Amahan” sa Matinud-anon sa Tinuhoan, 24–26. Isip kabahin niining panaghisgutan, mahimo nimong kantahon, paminawon, o basahon ang “O Akong Amahan,” Mga Himno ug mga Awit sa mga Bata, nu. 24, isip usa ka klase.

Mateo 14:16–21; Marcos 6:33–44; Juan 6:5–14

Ang Manluluwas makapalambo sa atong halad aron matuman ang Iyang mga katuyoan.

• Unsa ang makatabang sa mga sakop sa klase nga makita ang personal nga kahulugan diha sa milagro ni Jesus nga mipakaon sa lima ka libo? Mahimo nimong ipangutana kon sa unsang paagi nga ang pagbasa mahitungod sa milagro makatabang nga mapalambo ang ilang pagtuo sa abilidad sa Manluluwas nga personal nga mopanalangin kanila. Nabati ba nila sukad nga ang ilang pamaagi ug mga abilidad dili paigo aron matuman ang usa ka tumong o sugo gikan sa Dios? Nabati ba nila sukad nga ang Manluluwas mipalambo o mipilo-pilo sa ilang mga paningkamot aron matabangan sila nga matuman ang butang nga daw imposible?

  mga tinapay ug mga isda

  Milagrusong gipakaon ni Jesus ang 5,000 ka tawo pinaagi sa lima ka tinapay ug duha ka isda.

• Unsaon nimo pagtabang ang mga sakop sa klase nga mamalandong og mas lawom sa milagro nga gihulagway niining tudling. Unsa nga mga detalye ang atong makita niining istorya nga makapalambo sa atong pagtuo diha sa Manluluwas? Sa unsang mga paagi nga mapakaon kita sa Manluluwas sa espiritwal nga paagi? Kanus-a man kita napakaon ug napatunhay ni Jesukristo? Alang sa usa ka ehemplo sa usa ka milagro sa atong panahon nga susama sa milagro sa mga tinapay ug mga isda, tan-awa sa Paul VanDenBerghe, “Gahum diha sa Pag-ampo,” Liahona, Hulyo 2012, 34–36.

Mateo 14:22–33

Gidapit kita ni Jesukristo sa pagpadaplin sa atong mga kahadlok ug mga pagduha-duha aron mas hingpit kitang makaduol ngadto Kaniya.

• Ang istorya diha sa Mateo 14:22–33 makatabang sa mga sakop sa klase nga mapalambo ang ilang pagtuo sa Manluluwas ug sa ilang tinguha nga mosunod Kaniya. Dapita ang mga sakop sa klase sa pagbasa niining istorya, nga maghatag og espesyal nga pagtagad ngadto sa mga pulong nga gilitok ni Kristo, ni Pedro, ug sa ubang mga Apostoles. Sa unsa kaha nga paagi nga ang mga pulong ni Jesus nakatabang kang Pedro nga makabaton og pagtuo nga mobiya sa sakayan ug molakaw ibabaw sa tubig? Sa unsang paagi nga ang tambag ni Jesus nga “mosalig” ug “dili malisang” (bersikulo 27) magamit ngari kanato karon? Unsa man ang atong makat-unan gikan ni Pedro kon unsay kahulugan sa mahimong disipulo ni Jesukristo ug sa pagsalig Kaniya?

• Ang Mateo 14:22–33 naglangkob og mga pulong nga makapadasig sa mga sakop sa klase sa paggamit og mas dako nga pagtuo diha sa Manluluwas. Hangyoa sila sa pagsiksik sa maong makapadasig nga mga pulong, ipasulat kini diha sa pisara, ug pahisguti kon unsay ilang gisulat. Ang mga sakop sa klase maka-relate ba ngadto sa kasinatian ni Pedro? Mahimo nimo silang awhagon sa paghunahuna ug sa pagpakigbahin og mga kasinatian diin sila, sama ni Pedro, milihok aron mosunod sa Manluluwas, bisan kon ang resulta dili sigurado. Unsa man ang ilang nakat-unan gikan sa kasinatian? Giunsa man sila pagluwas ni Jesukristo diha sa ilang mga gutlo sa kahadlok o pagduha-duha?

Juan 6:22–71

Isip mga disipulo ni Kristo, kinahanglan nga andam gayud kitang motuo ug modawat sa kamatuoran bisan kon lisud kining buhaton.

• Ang mga panghitabo diha sa Juan 6 makahatag og makatabang nga panglantaw kon ang mga tawo mokwestiyon sa doktrina, kasaysayan, o mga polisiya sa Simbahan ni Kristo. Niining kapitulo, ang ubang mga sumusunod ni Kriso mibalibad sa pagdawat sa Iyang mga pagtulun-an nga Siya mao ang Buhi nga Tinapay ug nga sila maluwas pinaagi lamang sa Iyang sakripisyo sa unod ug dugo. Aron matabangan ang mga sakop sa imong klase nga magamit kining istorya diha sa ilang kinabuhi, mahimo nimong isulat ang mga pangutana sama sa mosunod diha sa pisara ug hangyuon ang mga sakop sa klase sa pagpangita sa mga tubag diha sa mga bersikulo 22–71: Unsa may gipaabut sa mga tawo? (tan-awa sa bersikulo 26). Unsa man hinoon ang gitanyag ni Kristo ngadto kanila? (tan-awa sa bersikulo 51). Unsay may nasaypan pagsabut sa mga tawo? (tan-awa sa mga bersikulo 41–42, 52). Unsa ang ubang mga paagi nga makapili kita sa paglakaw uban ni Kristo bisan kon kita adunay mga pangutana? Dapita sila sa pagpamalandong sa pangutana sa Manluluwas ug sa tubag ni Pedro diha sa mga bersikulo 67–69. Unsa ang ubang mga doktrina, mga ordinansa, o laing “mga pulong mahitungod sa kinabuhing dayon” nga makita diha lamang sa gipahiuli nga Simbahan ni Kristo? Dapita ang mga sakop sa klase sa pagpakigbahin kon sa unsang paagi nga kining mga doktrina ug mga ordinansa nakapanalangin kanila ug sa ilang mga pamilya. Alang sa mga ideya gikan sa usa ka modernong Apostol, dapita ang usa ka sakop sa klase sa pagbasa sa pamahayag ni Elder M. Russell Ballard diha sa “Dugang nga mga Kapanguhaan.”

pagkat-on nga icon

Awhaga ang Pagkat-on diha sa Panimalay

Ang mga sakop sa klase mahimong mobati nga madasig sa pagbasa sa mga tudling alang sa klase sa sunod semana kon imong ipasabut nga ang mga panghitabo nga ilang basahon makapalambo sa ilang kasinatian sa pagpaminaw sa kinatibuk-ang komperensya. Awhaga sila sa pagtungha sa sunod nga klase nga andam sa pagpakigbahin sa ilang mga ideya.

mga kapanguhaan nga icon

Dugang nga mga Kapanguhaan

Mateo 14–15; Marcos 6–7; Juan 5–6

“Buot ba usab kamong mobiya kanako?”

Human mikutlo sa Juan 6:68–69, si Elder M. Russell Ballard nagtudlo:

“Alang sa uban, ang imbitasyon ni Kristo sa pagtuo ug pagpabilin padayon nga malisud—o lisud dawaton. Pipila sa mga disipulo nanglimbasug sa pagsabut sa piho nga polisiya o pagtulun-an sa Simbahan. Ang uban makakita og problema sa kasaysayan sa Simbahan o sa mga apan sa pipila ka mga miyembro ug mga lider, kaniadto ug karon. Ang uban maglisud usab sa pagsunod og relihiyon nga nagkinahanglan og sakripisyo. Sa katapusan, ang uban ‘[na]luya diha sa maayo nga buhat’ [DP 64:33]. Tungod niini ug ubang mga rason, ang ubang mga miyembro sa Simbahan dili sigurado sa ilang pagtuo, naghunahuna kon tingali angay silang mosunod niadtong ‘mitalikod ug wala na managpanglakaw’ uban ni Jesus.

“Kon dunay usa kaninyo nga nagduhaduha sa inyong pagtuo, mangutana ako kaninyo sa samang pangutana ni Pedro: ‘Kang kinsa man kamo moadto?’ …

“… Sa dili pa kamo mobuhat nianang makuyaw sa espirituhanon nga pagpili nga mobiya, moawhag ko kaninyo sa paghunong ug paghunahuna og maayo sa dili pa hunungan ang bisan unsa man nga unang midala kaninyo ngadto sa inyong pagpamatuod sa gipahiuli nga Simbahan ni Jesukristo. Hunong ug paghunahuna kabahin sa unsay inyong gibati dinhi ug nganong gibati ninyo kini. Hunahunaa ang mga higayon nga ang Espiritu Santo nagpamatuod kaninyo kabahin sa mahangturong kamatuoran” (“Kang Kinsa Man Kami Moadto?” Liahona, Nob. 2016, 90–91).

Pagpalambo sa Atong Pagtudlo

Paminaw. “Ang pagpaminaw usa ka buhat sa gugma. … Hangyoa ang Langitnong Amahan sa pagtabang kanimo nga makasabut kon unsay isulti sa mga sakop sa imong klase. Samtang hatagan nimo og mainampingong pagtagad ang ilang gipamulong ug wala gipamulong nga mga mensahe, mas makasabut ka sa ilang mga panginahanglan, sa ilang mga kabalaka, ug sa ilang mga tinguha” (Pagtudlo sumala sa Pamaagi sa Manluluwas, 34).