Pagpang-ayo diha sa Iyang mga Pako, ni Jon McNaughton

Marso 4–10

Mateo 8–9; Marcos 2–5

“Ang Imong Pagsalig Nakapaayo Kanimo”

Ang imong pagpangandam sa pagtudlo magsugod samtang mainampuon kang magtuon sa Mateo 8–9 ug Marcos 2–5. Ang Dali, Sunod Kanako—Alang sa mga Indibidwal ug mga Pamilya makapalambo sa imong pagtuon ug moaghat og mga ideya sa pagtudlo agig dugang niadtong gipresentar dinhi.

Irekord ang Imong mga Impresyon

Awhaga ang Pagpaambit

Mahimong magdala ka og pipila ka hulagway nga nagpakita sa mga panghitabo gikan sa Mateo 8–9 ug Marcos 2–5 (tan-awa sa Libro sa mga Hulagway sa Ebanghelyo, nu. 40, 41, o LDS.org) o ilista kining mga panghitabo diha sa pisara. Hangyoa ang mga sakop sa klase sa pagpakigbahin sa unsay ilang nahibaloan mahitungod sa matag milagro. Unsa nga mga mensahe ang ilang nakita niini nga mga milagro?

Itudlo ang Doktrina

Mateo 8–9; Marcos 2; 5

Ang mga milagro mahitabo sumala sa pagbuot sa Dios ug sa atong hugot nga pagtuo kang Jesukristo.

• Ang mga sakop sa imong klase mahimong nakakita og lig-on nga mga ideya atol sa ilang personal nga pagtuon bahin sa mga milagro nga anaa niining mga kapitulo (tan-awa sa lista sa mga pagpang-ayo diha sa outline karong semanaha sa Dali, Sunod Kanako—Alang sa mga Indibidwal ug mga Pamilya). Ikonsiderar ang pagdapit sa mga sakop sa klase sa pagpakigbahin sa ilang mga ideya kauban ang kapares o diha sa tibuok klase.

• Aron matabangan ang mga sakop sa klase nga makasabut sa relasyon tali sa hugot nga pagtuo ug mga milagro, mahimo nimong basahon ang milagrusong mga pagpang-ayo gikan sa Mateo 8–9 ug Marcos 2; 5, nga mangita sa hugot nga pagtuo sa tawo nga giayo o sa hugot nga pagtuo sa uban. (Kon ikaw walay panahon sa paghisgot sa tanang milagro, pangutan-a ang mga sakop sa klase kon hain ang labing makahuluganon ngadto kanila.) Ang uban niining mga kasulatan makapalambo sa inyong panaghisgutan: Mormon 9:15–21; Ether 12:12–16; Moroni 7:27–37; ug Doktrina ug mga Pakigsaad 35:8. Unsa may gitudlo sa mga pagpang-ayo sa Ginoo ug niining mga kasulatan mahitungod sa hugot nga pagtuo ug mga milagro? Tan-awa usab sa Giya ngadto sa mga Kasulatan, “Mga Milagro.”

• Mahimong dunay mga tawo sa inyong klase kinsa dunay hugot nga pagtuo ug nagtinguha og milagro, apan ang milagro wala mahitabo sa paagi nga ilang gitinguha. Unsay gitudlo sa mga kasulatan ug sa atong mga lider sa Simbahan mahitungod niini? Sa usa ka artikulo nga giulohan og “Pagdawat sa Kabubut-on ug Panahon sa Ginoo,” si Elder David A. Bednar naghisgot kon giunsa niya pagtambag ang usa ka managtiayon niini nga sitwasyon (Liahona, Ago. 2016, 31–35; tan-awa usab sa 2 Mga Taga-Corinto 12:7–10; DP 42:43–52). Nakakita ba ang mga sakop sa klase og mga panalangin nga miabut sa ilang kinabuhi o sa kinabuhi sa uban sa dihang ang gitinguha nga mga milagro wala mahitabo?

• Kon magbasa mahitungod sa mga milagro diha sa Mateo 8–9 ug Marcos 2; 5, ang ubang mga tawo mahimong maghunahuna kon ang maong mga butang posible ba karon. Gihulagway ni Moroni ang atong adlaw isip usa ka panahon sa dihang “kini giingon nga ang mga milagro wala na,” apan misaad usab siya nga ang Dios usa gihapon ka Dios sa mga milagro, kay ang Dios “dili mabalhinon nga Binuhat” (Mormon 8:26; 9:18–21; tan-awa usab sa Moroni 7:27–29). Unsaon nimo pagtabang ang mga sakop sa imong klase nga mapalambo ang ilang pagtuo diha sa gahum sa Dios sa pagpanalangin sa ilang kinabuhi? Tingali imo silang mahangyo sa pagpakigbahin sa mga ehemplo sa mga milagro nga ilang nasaksihan. Mahimo usab nimong ikonsiderar ang pagpakigbahin sa mga istorya gikan sa kasaysayan sa Simbahan (tan-awa sa “Dugang nga mga Kapanguhaan”).

Salig sa Ginoo, ni Liz Lemon Swindle

Mateo 8:23–27; Marcos 4:35–41

Si Jesukristo dunay gahum nga makadala og kalinaw taliwala sa unos sa kinabuhi.

• Mahimong nakahibalo ka sa ubang mga hagit nga giatubang sa mga sakop sa imong klase. Tungod kay kitang tanan dunay mga pagsulay sa pipila ka gutlo sa atong kinabuhi, ang pagribyu sa istorya diha sa Marcos 4:35–41 makapalambo sa pagtuo sa mga sakop sa klase nga ang Manluluwas makadala kanila og kalinaw. Hatagi ang kada usa og usa ka piraso nga papel, ug hangyoa sila sa pagsulat sa usa ka bahin og pagsulay nga ilang nasinati. Sa laing bahin, hangyoa sila sa pagsulat og butang gikan sa Marcos 4:35–41 nga nakapadasig kanila nga modangup sa Manluluwas atol sa ilang mga pagsulay. Awhaga ang mga sakop sa klase sa pagpakigbahin kon unsay ilang nasulat, kon sila mobati nga komportable sa pagbuhat niini.

• Mahimo usab nga magpakita ka og usa ka hulagway nga may kalabutan sa sitwasyon (tan-awa sa Libro sa mga Hulagway sa Ebanghelyo, nu. 40) ug hisguti kon unsa nga gutlo ang gihulagway sa artist. Unsa ang ubang mga paagi nga imong matabangan ang mga sakop sa klase aron makasabut sa kahulugan ug gahum niini nga milagro?

Marcos 2:1–12

Ang pagluwas niadtong nangawala nagkinahanglan sa atong hiniusa nga mga paningkamot.

• Ang istorya bahin niining milagro nagtudlo sa bili sa pagtambayayong diha sa panaghiusa sa pag-abag sa Manluluwas sa pagluwas niadtong anaa sa espiritwal o pisikal nga panginahanglan. Ang mensahe ni Elder Chi Hong (Sam) Wong nga “Magkahiusa sa Pagluwas” (Liahona, Nob. 2014, 14–16) makadugang og panaghisgutan mahitungod niining kamatuoran. Ikonsiderar ang pagdapit sa usa ka sakop sa klase nga moabut nga andam sa pagribyu sa istorya gikan sa mga kasulatan ug dayon ipakigbahin ang unsay gitudlo ni Elder Wong. Unsa ang atong makat-unan gikan sa Marcos 2:1–12 mahitungod sa bili sa pagtambayayong diha sa panaghiusa sa pagluwas niadtong anaa sa panginahanglan? (tan-awa usab sa Marcos 3:24–25).

Awhaga ang Pagkat-on diha sa Panimalay

Aron maawhag ang mga sakop sa klase nga magbasa sa Mateo 10–12; Marcos 2; ug Lucas 7; 11 atol sa umaabut nga semana, sultihi sila nga makakita sila diha niining mga kapitulo og pipila ka tambag nga makatabang kanila aron matuman ang ilang mga calling ug mga responsibilidad sa Simbahan.

Dugang nga mga Kapanguhaan

Mateo 8–9; Marcos 2–5

Si Propeta Joseph Smith miayo sa masakiton.

Niadtong Hulyo 1839, usa ka dakong pundok sa mga Santos kinsa gipapahawa gikan sa Missouri ang nagpuyo sa mga karwahe, sa mga tolda, ug diha ra sa yuta duol sa Commerce, Illinois. Daghan ang grabe nga nangasakit, ug sila si Joseph ug Emma Smith naluya sa pagsulay sa pagtabang kanila. Gihulagway ni Wilford Woodruff kon unsay nahitabo niadtong Hulyo 22: “Usa kadto ka adlaw sa gahum sa Dios. Dunay daghang nangasakit taliwala sa mga Santos sa isigka daplin sa Suba sa [Mississippi], ug miadto si Joseph taliwala kanila, mikupot sa ilang mga kamot ug sa usa ka kusog nga tingog mimando kanila diha sa ngalan ni Jesukristo sa pagbarug gikan sa ilang mga higdaanan ug mamaayo, ug milukso sila gikan sa ilang mga higdaanan nga nangaayo pinaagi sa gahum sa Dios. … Usa gayud kadto ka panahon sa pagmaya” (Wilford Woodruff, Journal, Hulyo 22, 1839, Church History Library).

Si Elder Franklin D. Richards mipahunong sa unos.

Si Elder LeGrand Richards, usa ka sakop sa Korum sa Napulog Duha ka mga Apostoles, misaysay og kasinatian gikan sa kinabuhi sa iyang apohan, si Elder Franklin D. Richards, kinsa niadtong 1848 mao ang lider sa grupo sa mga Santos nga taga-Britain nga mitabok sa Atlantic Ocean paingon sa Estados Unidos: “Ang barko diin si [Elder Richards] naglayag nameligro og maayo [gikan sa grabe nga unos], grabe kaayo mao nga ang kapitan sa barko miadto kaniya ug nangamuyo kaniya nga mangaliya ngadto sa Ginoo alang sa barko ug sa mga pasahero niini; ug si Lolo, kay nahinumdom nga gisaaran siya nga makabaton siya og gahum ibabaw sa mga elemento, milakaw paingon sa tungtunganan sa barko ug miisa sa iyang mga kamot ngadto sa langit ug mibadlong sa dagat ug sa mga balud, ug mikalma dayon kini” (sa Conference Report, Abr. 1941, 84).

Pagpalambo sa Atong Pagtudlo

Hatag kanunay og pagpamatuod. Ang imong yano, kinasingkasing nga pagsaksi sa espiritwal nga mga kamatuoran mahimong dunay gamhanang impluwensya niadtong imong tudloan. Ang imong pagsaksi dili kinahanglan nga larino o taas. Sama pananglit, kini mahimong usa ka yano nga pagpamatuod bahin sa milagro nga makabaton sa ebanghelyo sa imong kinabuhi.