Marso 18–24

Mateo 13; Lucas 8; 13

“Ang May mga Dalunggan nga Makadungog, Kinahanglan Siya Magpatalinghug”

Samtang magbasa ka, hunahunaa ang mga pangutana nga mahimong duna ang mga sakop sa imong klase samtang naningkamot sila nga makasabut sa mga mensahe sa mga sambingay. Unsa kaha ang lisud masabtan? Sa unsang paagi nga ang imong pagtuon moandam kanimo sa pagtubag sa ilang mga pangutana?

Irekord ang Imong mga Impresyon

Awhaga ang Pagpaambit

Ribyuha uban sa klase ang “Mga Ideya sa Pagpalambo sa Inyong Pamilya nga Pagtuon sa Kasulatan” sa Dali, Sunod Kanako—Alang sa mga Indibidwal ug mga Pamilya. Dapita ang mga sakop sa klase sa pagpakigbahin sa mga pamaagi nga ilang gigamit aron sa pagtuon sa Mateo 13 ug Lucas 8; 13.

Itudlo ang Doktrina

Mateo 13:1–23

Ang atong kasingkasing kinahanglang andam nga modawat sa pulong sa Dios.

• Aron matabangan kadtong imong tudloan nga ma-visualize ang mga mensahe sa sambingay sa magpupugas, mahimong magdala ka og pipila ka liso, usa ka kaang nga dunay yuta, ug usa ka kaang nga dunay gagmayng mga bato ngadto sa klase. Hangyoa ang usa ka sakop sa klase sa pagtanom og usa ka liso diha sa yuta ug usa diha sa mga bato. Hain nga liso ang mas maayo nga motubo, ug ngano man? Sa unsang paagi nga kining object lesson may kalabutan sa sambingay diha sa Mateo 13:1–23? Sa unsang paagi nga makaandam kita sa atong kasingkasing nga modawat sa pulong sa Dios?

• Unsaon nimo paggamit ang sambingay sa magpupugas sa pagdasig sa mga sakop sa imong klase nga maandam ang ilang kasingkasing nga modawat sa pulong sa Dios? Mahimo nimong isulat ang Mga Disipulo ug Uban diha sa pisara. Dapita ang mga sakop sa klase sa pagbasa sa Mateo 13:10–17 ug mangita kon giunsa paghulagway sa Manluluwas ang mga kalainan tali sa Iyang mga disipulo ug sa uban kinsa nakadungog sa Iyang mga sambingay. Dayon hangyoa ang mga sakop sa klase sa pagsiksik sa mga bersikulo 18–23, nga mangita kon unsa kaha ang hinungdan nga ang atong mga dalunggan mahimong “magalisud sa pagpakabati” o ang atong mga mata mopiyong ngadto sa espiritwal nga mga butang. Unsa nga direksyon ang atong madawat sa atong panahon gikan sa Dios ug sa Iyang mga sulugoon? Sa unsang mga paagi nga kita nag-ugmad og “maayong yuta”? (bersikulo 23).

• Mahimo nimong dapiton ang pipila ka sakop sa klase nga ang matag usa moabut nga andam sa pagtudlo og usa ka seksyon gikan sa mensahe ni Elder Dallin H. Oaks nga “Ang Sambingay sa Magpupugas” (Liahona, Mayo 2015, 32–35). Unsa ang gikadugang sa iyang mensahe sa atong panabut bahin sa sambingay?

Mateo 13:24–35, 44–53

Ang sambingay ni Jesus makatabang kanato nga makasabut sa paglambo, kapalaran, ug bili sa Iyang Simbahan.

• Unsaon nimo pagtabang sa mga sakop sa klase nga makasabut sa mga kamatuoran mahitungod sa Simbahan nga gitudlo diha sa sambingay ni Jesus sa Mateo 13? Mahimo nimong ilista ang pipila ka sambingay diha sa pisara (tan-awa sa outline karong semanaha sa Dali, Sunod Kanako—Alang sa mga Indibidwal ug mga Pamilya ug sa Mga Pagtulun-an sa mga Presidente sa Simbahan: Joseph Smith, 355–367). Hangyoa ang gagmayng mga grupo sa mga sakop sa klase sa pagtuon sa matag sambingay ug mangita sa unsay ilang nakat-unan mahitungod sa paglambo ug kapalaran sa Simbahan. Usa ka paagi sa paghugpong sa tanang ideya gikan sa matag grupo mao ang pagdrowing og dakong lingin diha sa pisara ug butangan kini og label nga Simbahan ni Kristo (“ang gingharian sa langit”). Samtang ang matag grupo mopakigbahin, mahimo silang magsulat og butang diha sa lingin nga ilang nakat-unan mahitungod sa paglambo ug kapalaran sa Simbahan.

  

  Ang gingharian sa langit sama sa usa ka pukot sa mangingisda.

• Unsay atong makat-unan mahitungod sa bili sa pagkahisakop ngadto sa Simbahan gikan sa mga sambingay sa bahandi diha sa uma ug sa perlas nga labing bililhon, nga makita sa Mateo 13:44–46? Ang ubang mga sakop sa imong klase (o mga tawo nga ilang nailhan) tingali mihimo og mga sakripisyo—madako o magamay—aron mahimong mga miyembro sa Simbahan. Dapita ang mga sakop sa klase sa pagpakigbahin og mga sakripisyo nga ilang nahimo o nakita nga nahimo sa uban aron mahisakop sa Simbahan. Unsa nga mga panalangin ang miabut isip resulta? Ikonsiderar ang pagpakigbahin sa istorya ni Presidente Gordon B. Hinckley mahitungod sa opisyal sa navy diha sa “Dugang nga mga Kapanguhaan.” Dapita ang mga sakop sa klase sa pagpamalandong kon unsay ilang gibati nga giaghat nga isakripisyo alang sa Simbahan.

Mateo 13:24–30, 37–43

Sa katapusan sa kalibutan, ang Ginoo mopundok sa mga matarung ug pagalaglagon ang mga dautan.

• Unsaon nimo pagtabang ang imong klase nga makakuha og mga leksyon gikan sa sambingay sa trigo ug bunglayon nga makatabang kanila nga magpabiling matinud-anon nga mga Santos sa Ulahing mga Adlaw? Sugdi pinaagi sa pagdapit og usa ka sakop sa klase sa pag-summarize sa sambingay ug sa interpretasyon niini. Mahimo usab nga makatabang ang pag-display sa hulagway sa trigo ug bunglayon gikan sa outline karong semanaha sa Dali, Sunod Kanako—Alang sa mga Indibidwal ug mga Pamilya. Unsa ang pipila ka leksyon niini nga sambingay alang sa atong panahon? Nganong importante man nga masayran nga ang Ginoo motugot sa Iyang mga Santos nga “managkaipon karon sa pagtubo” (Mateo 13:30) uban sa mga dautan hangtud sa panahon sa ting-ani? Unsaon nato sa pagpabiling lig-on ang atong pagtuo niini nga kahimtang, diin ang pagkadautan naglibut kanato? Ang Doktrina ug mga Pakigsaad 86 naghatag og dugang nga mga ideya sa paggamit niining sambingay sa ulahing mga adlaw.

• Ang pamahayag ni Elder L. Tom Perry diha sa “Dugang nga mga Kapanguhaan” nagsugyot nga ang bunglayon mahimong magrepresentar sa “dautan ug kalibutanong mga paagi” nga mosulod sa atong kinabuhi. Aron matabangan ang mga sakop sa klase nga mamalandong kon unsaon nila sa pag-ila niining matang sa espiritwal nga bunglayon, isulat sa mga piraso nga papel ang pipila ka kamatuoran sa ebanghelyo ug pipila ka sayop, kalibutanong mga ideya o mga binuhatan. Ibutang ang mga piraso nga papel diha sa usa ka sudlanan. Dayon hangyoa ang mga sakop sa klase sa pagpili og pipila ug hisguti kon hain ang mga kamatuoran ug hain ang mga sayop. (Daghan niining mga kamatuoran ug mga sayop giila sa mga pakigpulong sa kinatibuk-ang komperensya; mahimo kang motan-aw niana alang sa mga ideya.) Unsaon man nato “sa pagsunod sa tambag ni Elder Perry sa “pag-amuma nianang unsay maayo” diha sa atong kinabuhi?

Awhaga ang Pagkat-on diha sa Panimalay

Mahimo nimong hisgutan nga ang sunod semana nga basahunon maghisgot sa mga tawo kinsa misunod kang Jesus apan dayon “wala na managpanglakaw uban kaniya” (Juan 6:66). Sultihi ang mga sakop sa klase nga makakita sila og mga ideya nga makatabang kanila ug sa uban nga magpabiling matinud-anon ngadto sa Manluluwas.

Dugang nga mga Kapanguhaan

Mateo 13; Lucas 8; 13

“Tinuod kini, di ba?”

Si Presidente Gordon B. Hinckley mipakigbahin og kasinatian uban sa usa ka opsiyal sa navy gikan sa Asia kinsa bag-ohay lang nga mipasakop sa Simbahan:

“Gipaila-ila siya nako sa wala pa siya mobalik sa iyang yutang natawhan. Gihisgutan namo ang bahin sa [mga kamatuoran sa ebanghelyo], ug dayon miingon ko: ‘Ang mga tawo sa inyo dili mga Kristiyanos. Unsa ang mahitabo kon ikaw mopauli sa inyo nga usa ka Kristiyano, ug ilabi na, usa ka Mormon nga Kristiyano?’

“Ang iyang nawong naminghoy, ug siya mitubag, ‘Ang akong pamilya masagmuyo. Mahimo nga ila kong isalikway ug isipon nga patay. Alang sa akong kaugmaon ug sa akong trabaho, ang tanan nga oportunidad mahimo nga dili ihatag kanako.’

“Nangutana ako, ‘Andam ka ba nga mobayad sa ingon ka dako nga bugti alang sa ebanghelyo?’

“Ang iyang itumon nga mga mata, nga naumog sa mga luha, misanag … samtang siya mitubag, ‘Tinuod kini, dili ba?’

“Naulaw nga nakapangutana niana, mitubag ko, ‘Oo, tinuod kini.’

“Diin siya mitubag, ‘Nan unsa pay lain nga kinahanglan?’” (“It’s True, Isn’t It?” Ensign, Hulyo 1993, 2).

Kinahanglan natong amumahon ang maayo.

Si Elder L. Tom Perry nagtudlo: “Kanang karaan nga kaaway sa katawhan nakakita og daghang himan kutob sa iyang mahunahuna sa pagsabwag og bunglayon sa tanang dapit. Siya nakakita og mga paagi aron makatuhop kini gani sa kabalaan sa atong panimalay. Ang dautan ug kalibutanong mga paagi nagkatap nga daw wala nay paagi sa pagwagtang niini. Kini anaa sa internet ug pinaagi sa kahanginan sa mga himan nga atong gipalambo sa pag-edukar ug paglingaw kanato. Ang trigo ug bunglayon dungan nga nanubo. Ang tinugyanan sa umahan, uban sa tanan niyang gahum, nag-amuma nianang maayo ug naglig-on ug nagpanindot niini aron ang mga bunglayon bati tan-awon o paminawon” (“Pagkaplag og Malungtarong Kalinaw ug Pagtukod og Mahangturong mga Pamilya,” Liahona, Nob. 2014, 44).

Pagpalambo sa Atong Pagtudlo

Itutok ang imong pagtudlo diha sa doktrina. Siguroa nga ang inyong mga panaghisgutan sa klase nakatutok sa pundasyon nga doktrina diha sa mga kasulatan. Mahimo nimo kining buhaton pinaagi sa paghangyo sa mga estudyante nga mobasa pag-una sa mga kasulatan, pagtutok sa inyong mga panaghisgutan sa klase diha sa mga kasulatan, ug sa paghangyo sa mga sakop sa klase sa pagpakigbahin sa ilang mga pagpamatuod bahin sa tinuod nga doktrina. (Tan-awa sa Pagtudlo sumala sa Pamaagi sa Manluluwas, 20–21.)