Si Jesukristo mi-orden kang Pedro

Marso 11–17

Mateo 10–12; Marcos 2; Lucas 7; 11

“Kining Napulog Duha Gipalakaw ni Jesus”

Ang pagbasa sa Mateo 10–12; Marcos 2; ug Lucas 7; 11 nga naghunahuna sa imong mga tigkat-on makatabang kanimo aron makadawat og inspirasyon gikan sa Espiritu Santo mahitungod kon unsay ilang gikinahanglan. I-rekord ang espiritwal nga mga impresyon nga imong madawat, ug basaha kini nga outline alang sa dugang nga mga panabut ug mga ideya sa pagtudlo.

Irekord ang Imong mga Impresyon

pagpaambit nga icon

Awhaga ang Pagpaambit

Dapita ang pipila ka sakop sa klase nga moabut nga andam sa pagpakigbahin og bisan unsa nilang mga pangutana mahitungod sa Mateo 11:28–30. (Alang sa ubang mga ehemplo sa mga pangutana, tan-awa sa outline karong semanaha sa Dali, Sunod Kanako—Alang sa mga Indibidwal ug mga Pamilya.) Unsa nga mga tubag ang ilang nakit-an?

pagtudlo nga icon

Itudlo ang Doktrina

Mateo 10

Ang Ginoo mihatag sa Iyang mga sulugoon og gahum sa paghimo sa Iyang buhat.

• Ang sugo sa Manluluwas ngadto sa Iyang mga Apostoles makatabang kanato diha sa atong indibidwal nga mga responsibilidad. Ang mga sakop sa klase mahimong duna nay mga ideya niini nga hilisgutan pinaagi sa ilang personal nga pagtuon; sama pananglitan, dunay kalihokan bahin niining hilisgutan diha sa Dali, Sunod Kanako—Alang sa mga Indibidwal ug mga Pamilya. Dapita sila sa pagpakigbahin sa unsay ilang nakat-unan o magtrabaho diha sa gagmay nga mga grupo sa pagkompleto sa kalihokan diha sa klase. Dapita ang mga sakop sa klase sa pagpakigbahin og mga kasinatian sa dihang gibati nila ang gahum sa Manluluwas samtang ilang gituman ang ilang mga calling.

• Ang laing paagi aron maribyu sa mga sakop sa klase ang Mateo 10 mao ang pagsiksik niining kapitulo alang sa butang nga gihangyo sa Manluluwas nga buhaton sa mga Apostoles ug pagdrowing og hulagway nga nagrepresentar nianang butanga. Mahimo nilang ipakigbahin ang ilang mga gidrowing ug unsay ilang nakat-unan mahitungod sa sugo ngadto sa Napulog Duha ka mga Apostoles.

• Sa unsang paagi nga ang pagtuon sa sugo ni Kristo ngadto sa Iyang mga Apostoles diha sa Mateo 10 makatabang sa mga sakop sa imong klase aron makasabut sa tahas sa modernong mga propeta ug mga apostoles? Mahimong makatabang ang pagtandi sa sugo sa Manluluwas ngadto sa Napulog Duha sa sugo nga gihatag ngadto sa Korum sa Napulog Duha ka mga Apostoles niini nga dispensasyon, nga makita diha sa “Dugang nga mga Kapanguhaan.” Sa unsang paagi nga ang mga sakop sa klase naimpluwensyahan sa pagpangalagad sa buhi nga mga Apostoles? Ihatag ang imong pagpamatuod bahin sa balaanong calling sa buhi nga mga propeta ug mga apostoles, ug dapita ang mga sakop sa klase sa paghatag sa ilang pagpamatuod.

• Sa paghulagway sa kamatuoran nga ang matag naghupot sa priesthood makasubay sa iyang awtoridad balik ngadto sa gutlo sa dihang giordinahan ni Jesus ang Iyang mga Apostoles, dapita ang usa ka naghupot sa priesthood sa pagpakigbahin sa iyang linya sa awtoridad.

Korum sa Napulog Duha

Ang Napulog Duha ka mga Apostoles nagpahigayon sa buhat sa Ginoo karon.

Mateo 10:17–20

Kon kita anaa sa pagserbisyo sa Ginoo, kita Iyang dasigon kon unsa nga mga pulong ang atong isulti.

• Ang mga tawo mobati usahay og kakulba kon magtudlo o mag-istorya sa uban mahitungod sa ebanghelyo. Apan ang Ginoo misaad sa mga disipulo nga Siya motabang kanila aron mahibalo kon unsa ang isulti. Unsa ang kinahanglan natong buhaton aron makadawat sa gisaad nga tabang sa Ginoo alang sa atong kaugalingon? Dapita ang mga sakop sa klase nga magbasa sa Mateo 10:19–20; Doktrina ug mga Pakigsaad 84:85; ug Doktrina ug mga Pakigsaad 100:5–8 sa pagpangita sa mga tubag niini nga pangutana. Kanus-a nga ang Espiritu Santo mitabang kanimo nga mahibalo kon unsa ang isulti? Mahimo nimong ipakigbahin ang imong mga kasinatian ug dapita ang mga sakop sa klase sa pagpakigbahin sa ilang kagalingong kasinatian.

Mateo 12:1–13; Marcos 2:23–28

Ang Igpapahulay usa ka adlaw sa pagbuhat og maayo.

• Aron mabalaan ang adlaw nga Igpapahulay, ang mga Pariseo mi-implementar og istrikto nga mga lagda ug binuhat sa tawo nga mga tradisyon, nga sa katapusan milibug sa ilang panabut bahin sa tinuod nga katuyoan sa Igpapahulay. Kadto bang imong tudloan makabenepisyo gikan sa panaghisgutan nganong mihatag ang Ginoo kanato og adlaw nga Igpapahulay? Mahimo nimong dapiton ang mga sakop sa klase sa pagribyu sa mga istorya diha sa Mateo 12:1–13 ug Marcos 2:23–28 ug ipakigbahin kon unsay gitudlo sa Manluluwas mahitungod sa adlaw nga Igpapahulay. Unsa nga dugang nga mga ideya mahitungod sa Igpapahulay ang atong makuha gikan sa Exodo 31:16–17; Isaias 58:13–14; ug Doktrina ug mga Pakigsaad 59:9–13? Unsa nga mga tradisyon o mga lagda ang tingali makapabalda kanato gikan sa tinuod nga katuyoan sa Igpapahulay?

• Samtang gihatagan og gibug-aton sa mga Pariseo ang daghang detalyado nga mga lagda kalabut sa Igpapahulay, ang Manluluwas nagtudlo og yano nga baruganan: “Uyon sa kasugoan ang pagbuhat ug maayo sa adlaw nga igpapahulay” (Mateo 12:12). Kadtong nagtuman niining baruganan sa kasagaran wala kaayoy problema sa pagbalaan sa adlaw nga Igpapahulay. Unsa ang laing mga baruganan nga makatabang sa mga sakop sa klase sa pagbalaan sa adlaw nga Igpapahulay? Nganong ang pagtudlo og mga baruganan mas epektibo man kay sa pagtakda og mga lagda sa pagpalambo sa espiritwal nga pagpaningkamot sa kaugalingon? (tan-awa sa pamahayag ni Propeta Joseph Smith diha sa “Dugang nga mga Kapanguhaan”). Aduna bay laing mga baruganan nga atong mahunahunaan nga makatabang kanato sa pagtuman sa mga sugo sa Dios? Pananglitan, unsa nga mga baruganan ang makatabang sa mga ginikanan nga madasig ang ilang mga anak sa pagtuman sa Pulong sa Kaalam o sa pagbuhat og pagsiksik sa family history?

• Ang mensahe ni Presidente Russell M. Nelson nga “Ang Igpapahulay usa ka Kahimut-an” (Liahona, Mayo 2015, 129–32) ug ang mga video uban sa tambag ni Elder Jeffrey R. Holland diha sa “Dugang nga mga Kapanguhaan” mahimong makadugang sa panaghisgutan mahitungod sa adlaw nga Igpapahulay.

• Mahimong makatabang alang sa mga sakop sa klase ang pagribyu sa “Pagtuman sa Adlaw nga Igpapahulay” sa Alang sa Kalig-on sa mga Kabatan-onan. Mahimo sila nga mag-role-play kon unsaon nila sa pagpasabut ang usa ka tawo nga dili miyembro sa atong simbahan kon ngano nga gituman nila ang pagbalaan sa adlaw nga Igpapahulay.

Lucas 7:36–50

Samtang gipasaylo na ang atong mga sala, ang atong gugma alang sa Manluluwas mas molambo.

• Unsa man ang atong makat-unan gikan sa ehemplo sa babaye ug sa mga pagtulun-an sa Manluluwas diha sa Lucas 7:36–50 samtang magtinguha kita og kapasayloan alang sa atong kaugalingong mga sala? Sa unsang paagi nga ang pagpasaylo makapalig-on sa atong relasyon ngadto kang Kristo? Unsaon nato paggamit niini nga istorya sa pagtudlo sa usa ka tawo kon unsay gipasabut sa pagtinguha og kapasayloan?

pagkat-on nga icon

Awhaga ang Pagkat-on diha sa Panimalay

Mahimo nimong hagiton ang mga sakop sa klase nga magbasa sa mga sambingay diha sa Mateo 13 ug Lucas 8; 13 ug mangandam sa pagpakigbahin sa klase sa sunod semana og ideya sa usa ka baruganan sa ebanghelyo nga ilang nabatunan gikan sa usa sa mga sambingay.

mga kapanguhaan nga icon

Dugang nga mga Kapanguhaan

Mateo 10–12; Marcos 2; Lucas 7; 11

Usa ka sugo ngadto sa mga Apostoles sa ulahing mga adlaw.

Sa dihang gitawag ang pipila sa unang mga sakop sa Korum sa Napulog Duha ka mga Apostoles niining dispensasyon, gihatagan sila og usa ka sugo ni Oliver Cowdery nga susama sa usa nga gihatag ni Jesukristo diha sa Mateo 10. Siya miingon:

“‘Kinahanglan ninyong pakigbatukan ang tanang pagpihig [prejudice] sa tanang kanasuran. … Busa, pahimangnoan ko kamo nga ugmaron ninyo ang dakong pagpaubos, kay nasayud ako sa garbo sa tawhanong kasingkasing. Pagbantay, basin ang mga ulug-ulogan sa kalibutan modasig kaninyo. Pagbantay basin ang inyong mga pagbati mabihag sa kalibutanong mga butang. Himoang mag-una ang inyong pangalagad. … [Kini] gikinahanglan nga makadawat kamo og pagpamatuod gikan sa Langit para sa inyong kaugalingon, aron makapamatuod kamo sa kamatuoran. …

“‘… Kinahanglan ninyong dad-on kining mensahe ngadto niadtong nagkonsiderar sa ilang kaugalingon nga maalamon. Ug kadto sila mahimong molutos kaninyo; sila mahimong magtinguha sa inyong kinabuhi. Ang kaaway kanunayng nagtinguha sa kinabuhi sa mga sulugoon sa Dios. Mao nga, kinahanglan kamong mangandam sa tanang panahon sa pagsakripisyo sa inyong kinabuhi, kon gikinahanglan man kini sa Dios alang sa pagpadayon ug pagpalig-on sa Iyang kawsa. …

“Iya dayon silang gikuptan sa kamot sa tagsa-tagsa ug miingon, ‘Ikaw ba uban sa tibuok katuyoan sa kasingkasing moapil niining pagpangalagad, sa pagsangyaw sa ebanghelyo uban sa tanang kakugi kauban niining imong mga kaigsoonan, sumala sa kahulugan ug tinguha sa sugo nga imong nadawat?’ Ang matag usa positibong mitubag” (sa Joseph Smith Papers, Documents, Volume 4: Abril 1834–Septyembre 1835, ed. Matthew C. Godfrey ug uban pa [2016], 243–44, 247; ang spelling ug punctuation gi-standardize).

Pagtudlo sa husto nga mga baruganan.

Dunay tawo nga kausa nangutana kang Propeta Joseph Smith kon giunsa niya sa pagdumala sa daghan kaayong mga tawo didto sa Nauvoo sa epektibong paagi. Ang Propeta mipasabut, “Ako mitudlo kanila sa husto nga mga baruganan, ug gidumala nila ang ilang nga kaugalingon” (tan-awa sa Mga Pagtulun-an sa mga Presidente sa Simbahan: Joseph Smith [2007], 343–44).

Pagpalambo sa Atong Pagtudlo

Saad og mga panalangin. Kon mohatag ka og pagdapit aron molihok, ipamatuod ngadto sa imong mga tigkat-on nga makadawat sila sa mga panalangin nga gisaad sa Dios kon sila molihok uban sa hugot nga pagtuo sa Iyang mga pagtulun-an. Ang mga panalangin kinahanglang dili mao ang atong nag-unang tinguha alang sa pagkamasulundon, apan ang Langitnong Amahan nagtinguha sa pagpanalangin sa tanan Niyang mga anak. (Tan-awa sa Pagtudlo sumala sa Pamaagi sa Manluluwas, 35.)