11–17 Feperueri

Joni 2–4

“E Dodonu Mo Sucu Tale”

Na wiliki ni Joni 2–4 sa sala vinaka ni vakavakarau ni veivakavulici. Vola na vakauqeti vakayalo o sa ciqoma, ka vakayagataka na ituvatuva oqo mo kunea na ikuri ni veivakararamataki kei na vakasama ni veivakavulici.

Vola toka na Nomu Nanuma

Sureta na Veiwasei

Vola ena vava ni volavola e tolu na ulutaga oqo: Joni 2, Joni 3, kei na Joni 4. Solia ki na lewe ni kalasi e vica na miniti me ra taleva lesu nai ulutaga e tolu oqo, ka kerea me ra vola ena ruku ni ulutaga yadua e dua na tikini ivolanikalou a vukei ira me ra kila vinaka na ivunau kei na ka a yaco ena wase o ya. Me veivosakitaki na veitikina era sa vola.

Vakavulica na iVunau

Joni 2:1–11

E veisau na noda bula ni da muri Jisu Karisito.

• Ena so na gauna eda rawa ni vakararamataki vakayalo ni da vakarorogo matua ki na matailalai ni itukutuku vakaivolanikalou. E rawa mo sureti ira na lewe ni kalasi me ra wilika na Joni 2:1–11 ka vola na ka matata e titobu kina na nodra vakavinavinakataka na cakamana ena kana magiti ni vakamau. E vakaraitaka vakacava na cakamana oqo na lagilagi ni Kalou? (raica na tikina e 11).

• Ena rawa ni vukei ira na lewe ni kalasi me ra kila vinaka na italanoa oqo ke ra raica na cakamana oqo ni a dua na ka cecere vei ira a tiko kina. Era dau raica vakacava na cakamana eso me vakataki ira a tiko ena kana magiti ni vakamau—me vakataki Meri, ni sa kila tu ena yaco na cakamana, se na tui, a sega ni kila ni sa yaco na cakamana? Sa rawa mo sureta e vica ena lewe ni kalasi me ra talanoataka na kana magiti me vaka ga a dua vei ira a tiko kina.

Joni 2:13–22

Sa rawa meda taqomaka na veivanua kei na veika tabu.

• O na vukei ira vakacava na lewe ni kalasi mai na italanoa kei Jisu ni a cemuri ira na dauveisau ilavo mai na valetabu? Era na taqomaka vakacava na veivanua kei na veika tabu me vaka na itikotiko, veivalenilotu, valetabu, kei na ivolanikalou? Ena rawa ni veivuke na itukutuku oqo nei Peresitedi David O. McKay: “‘Kakua ni cakava na vale nei tamaqu me vale ni veivoli.’ (Joni 2: 16) Na caka ilavo kei na vakayagataki ilavo, … vaqara cala, vakabibi na kakasetaki ni itokani ena vale ni sokalou, sa voroka sara tikoga na ivakaro oqo a soli voleka ni rua na udolu na yabaki sa oti” (ena Conference Report, Oct. 1956, 7). Eda na maroroya vakacava na savasava vakalou ni valetabu kei na veivanua tabu tale eso?

Joni 3:1–21

E dodonu meda sucu vou meda curu ki na matanitu ni Kalou.

• Ni gadrevi mera kila vinaka na lewe ni kalasi na veisureti i Jisu meda sucu vou (raica na Joni 3:3), mo sureti ira mera wasea na veivakararamataki era ciqoma mai na veivakavulici ni iVakabula vei Nikotimo ena veitikina oqo. Na vosa kei na malanivosa cava a taurivaka o Koya? Na veiivolanikalou se nodra itukutuku cava na iliuliu ni Lotu e rawa ni vakarabailevutaka na nodra kila vinaka na lewe ni kalasi na veisureti oqo? (Raica na Topical Guide, “Man, New, Spiritually Reborn” me ivakaraitaki vakaivolanikalou; raica na “iKuri ni iVurevure” baleta na nodra itukutuku na iliuliu ni Lotu.)

• Era na vakamacalataka vakacava na lewe ni kalasi vua e dua e sega ni lewenilotu na ibalebale ni sucu vou? Era na okata vakacava na veivutuni, papitaiso, kei na veivakadeitaki ena veivosaki oqo? Mo sureta na lewe ni kalasi mera vakatovotovotaka vei koya e toka e yasana mera sauma vakacava na taro oqo? Ena rawa ni oka na vosa nei Parofita Josefa Simici ena “iKuri ni iVurevure” ki na veivosaki oqo.

• Eso era vakabauta ni sega ni veisau rawa e dua na tamata; ia o Nikotimo, a ivakaraitaki ni dua a veisau rawa ena vuku ni a muria na kosipeli i Jisu Karisito. Ni gadrevi me vukei na lewe ni kalasi mera raica na ka oqo, sureti ira mera vakasaqara na Joni 3:1–2; Joni 7:40–52; kei na Joni 19:39–40. Na cava eda vulica mai na itukutuku oqo baleta na nanuma kei na vakabauta nei Nikotimo? A veisau vakacava ni toso na gauna? Na ivakaraitaki cava eda rawa ni wasea baleti ira na tamata eda kila ni ra sa veisau ena vuku ni kosipeli?

• Ena madigi vinaka ki na kalasi me ra raica e dua na gone lailai se kena iyaloyalo mera vakatauvatana kina na ituvaki ni gone sucu vou kei koya sa mai sucu vou vakayalo.

Joni 4:6–34

Sa solia tu vei keda o Jisu Karisito na wai ni bula vata kei na “magiti” ni cakava na cakacaka ni Kalou.

• Ena gadreva na yagoda na kakana kei na wai ena veisiga. A tukuna ko Jisu na gagadre ni vuravura taucoko oqo ena nona vakavulici yalewa ni Samaria kei iratou Nona tisaipeli. Me vukei ira na lewe ni kalasi mera kila vinaka na ka e vakavulica tiko na iVakabula, mo vakabira na iyaloyalo ni kakana kei na wai ena vava ni volavola ka sureti ira na lewe ni kalasi mera vola ena ruku yadua ni iyaloyalo na dina vakayalo a vakavulica tiko ko Jisu. Ena vakaotia rawa vakacava na noda karamaca vakayalo nida so-Kalou tiko vakayalo ka vakaidina? Ena vakamamautaki vakacava na noda viakana vakayalo nida cakava tiko na loma ni Kalou?

  

  Sa solia tu vei keda o Jisu Karisito na wai ni bula.

• Ena vukei ira na lewe ni kalasi ni raici lesu na kena toso cake na nona ivakadinadina na yalewa ni Samaria me baleti Jisu Karisito sa rawa mera vakasamataka vakatitobu na sala era a kila kina ni sai Koya dina na Mesaia. Mera raica vata va-kalasi na vosa a taurivaka ko yalewa ni Samaria me tukuna kina na iVakabula ena Joni 4:6–30. Na cava era tukuna tiko na vei vosa oqo me baleta na nona kila se ko cei sara mada Jisu? Eda sa tubu tiko vakacava ena noda ivakadinadina nida kila ni sai Koya na noda iVakabula?

Vakauqeta na Vuli e Vale

Ni gadrevi mera vakauqeti na lewe ni kalasi mera wilika na Maciu 5 kei na Luke 6, tukuna vei ira ni iwase oqo era sa umani tu kina na ka e vakatoka o Peresitedi Joseph Fielding Smith me “[ivunau] cecere duadua se bau vunautaki, eda se qai bau kila” (Nodra iVakavuvuli na Peresitedi ni Lotu: Joseph Fielding Smith [2013], 234).

iKuri ni iVurevure

Joni 2–4

Na vidio eso ni cakacaka kei na veivakavulici nei Jisu.

“Jesus Turns Water into Wine,” “Jesus Cleanses the Temple,” “Jesus Teaches of Being Born Again,” “Jesus Teaches a Samaritan Woman” (LDS.org)

Na cava na ibalebale ni sucu vou tale.

E vakavulica o Parofita Josefa Simici: “E vinaka cake mo papitaisotaka e dua na taga nuku me vaka e dua na tamata, kevaka e sega ni qaravi ena vakasama ni kena bokoci na ivalavala ca kei na kena rawati na Yalo Tabu. Na papitaiso ena wai sa papitaiso e veimama ga, ka sega na betena ke sega na ikarua ni kena veimama—o ya na papitaiso ena Yalo Tabu.”(Nodra iVakavuvuli na Peresitedi ni Lotu: Josefa Simici [2007], 95).

E vakavulica o Elder David A. Bednar: “Ni yaco na veisau … e dua na ka cecere, era sega ni ka lailai—e dua na sucu vou vakayalo kei na veisau cecere ena veika eda vakila ka gadreva kei na ka eda vakasamataka ka cakava, kei na veika e baleti keda. E ka dina sara, na kosipeli i Jisu Karisito e vakavurea e dua na veisau levu ka tudei ena noda bula ka rawa mai na noda vakararavi ena ‘nona yalovinaka kei na nona loloma kei na nona lomasoli na Mesaia Yalosavasava’ (2 Nifai 2:8). Ni da digitaka meda muria na iVakavuvuli, eda digitaka meda veisau—meda sucu vou tale vakayalo” (“E Dodonu mo Sucu Tale,” Ensign se Liaona, Me 2007, 20).

E vakavulica o Elder D. Todd Christofferson: “O ni na taroga beka, Na cava beka e sega ni yaco totolo kina vei au na veisau cecere oqo? E dodonu mo ni nanuma tiko, na nodra ivakaraitaki cecere na tamata i Penijamini na Tui, ko Alama kei ira tale eso na tamata ena ivolanikalou—era sa totoka dina ka sega ni dau vakawasoma. Ni vuqa vei keda, na veisau e dau yaco vakamalua ka taura e dua na gauna. Ni da sucu vou tale, e sega ni vaka noda sucu mai vakayago, ia e dua na ka vakaituvatuva. Na ka sa yaco ena ituvatuva oqo sa ikoya na iusutu ni inaki ni bula vakayago oqo” (“Sucu Tale,” Ensign se Liaona, Me 2008, 78).

E vakavulica o Elder Dallin H. Oaks:

“Eda sa sucu vou tale ni da cakava e dua na veiyalayalati kei na noda iVakabula ni da sa sucu ena wai kei na Yalo ka taura vei keda na yaca i Jisu Karisito. Eda vakavouia na veiyalayalati oqo ena noda laki vakayagataka na sakaramede ena vei Sigatabu.

“Era vakadeitaka na Yalododonu Edaidai ni o ira sa sucu tale ena sala oqo era sa luvena tagane ka luvena yalewa vakayalo i Jisu Karisito (raica na Mosaia 5:7; 15:9–13; 27:25). Ia, ni gadrevi me kilai na inaki ni veivakalougatataki ni sucu tale oqo, e dodonu meda maroroya tikoga na noda veiyalayalati ka vosota ki na ivakataotioti. Ena gauna oqo, ena loloma soliwale ni Kalou, eda sa sucu tale ka sa tamata vou kei na kena itubutubu vakayalo ka rawata e dua na itutu lagilagi” (“Have You Been Saved?” Ensign, Me 1998, 56).

Vakatorocaketaki ni Noda Veivakavulici

E sega ni uasivi cake o qasenivuli mai vei gonevuli. E ka bibi na nomu itutu vaka-qasenivuli, ia e sega ni o iko duadua ga na ivurevure ni veivakauqeti ena kalasi. Mo vukei ira na lewe ni kalasi mera vuli mai vua na Yalo ka veiwasei vakai ira ena ka era sa vulica.