Na Vunau ena Ulunivanua

Na Vunau ena Ulunivanua, maivei Jorge Cocco

18–24 ni Feperueri.

Maciu 5; Luke 6

“Dou sa Kalougata”

Vola na nomu nanuma vakayalo ni ko vulica tiko na Maciu 5 kei na Luke 6. Ena yaco mai na ivakatakila ni ko vakasaqara mo sotava na nodra gagadre na kalasi. Na ituvatuva oqo ena rawa me vakarautaka na ikuri ni vakasama.

Vola na Nomu Nanuma

ivakatakilakila ni veiwasei

Sureta na Veiwasei

E kaya o Peresitedi Joseph Fielding Smith ni Vunau ena Ulunivanua sa “[vunau] cecere duadua a bau vunautaki, ena keda eda kila rawa” (Nodra iVakavuvuli na Peresitedi ni Lotu: Joseph Fielding Smith [2013], 234). Na cava era vakila kina na kalasi ni dina oqo? Na veika cava e rawa me ra wasea?

ivakatakilakila ni veivakavulici

Vakavulica na iVunau

Maciu 5:1–12

Na marau tawayalani e tadu mai na bulataka na sala e vakavulica ka bulataka o Jisu Karisito.

• Na Vunau ena Ulunivanua, ka a tukuni taumada vei iratou na Nona tisaipeli voleka, a tekivu ena itukutuku e kilai tu me Sa Kalougata, sa sureti keda tu kina na Karisito meda vakasamataka tale mada na ibalebale ni bula kalougata—na bula marau tawayalani. Me tekivutaki na veivosaki baleta na marau tawayalani, kerei ira na kalasi mera wasea na ka e dauvakamarautaki ira. Me vaka na Sa Kalougata, na cava a kaya o Jisu e vakavuna na tamata me “vakalougatataki,” se marau tawamudu? E duidui vakacava na veivakavulici i Jisu mai na sala eso era saga na tamata mera kunea kina na marau?

• Ni gadrevi mera kila vinaka na kalasi na vosa me vakataka na yalo sa savasava se dautataro, mo vola eso na vosa mai na tikina e 3–12 ena vava ni volavola. Ka qai sureta na kalasi mera vakatura na veibasai ni vosa yadua oqori kei na ka era vulica mai na vosa yadua ni ra cakava oqo. Kerea na kalasi mera vakasamataka vakatitobu na veika era rawa ni veisautaka me yaco mera mataqali tamata e tukuni tiko ena veitikina oqo. E vakuria vakacava na 3 Nifai 12:3, 6 meda kila vinaka kina na Maciu 5:3, 6?

• E dua tale na sala me dikevi kina na veitikina oqo o ya mera sureti na lewe ni kalasi yadua mera vulica na ikuri ni ivolanikalou baleta e dua na Sa Kalougata ka wasea ki na kalasi na ka era sa vulica. E yaco vakacava e dua era kila e vakaraitaki kina na ivakavuvuli oqo?

Na Vunau ena Ulunivanua

Na Vunau ena Ulunivanua, maivei Frank Adams

Maciu 5: 14–16

O ira na tisaipeli ni iVakabula mera sa rarama kei vuravura.

• Na cava era nanuma na kalasi ni ra sa wilika na itukutuku i Jisu ni ra sa “rarama kei vuravura”? Na cava na ibalebale meda vunia na noda rarama “ena ruku ni vakarau ni sila,” kei na vuna eda rawa ni temaki meda na cakava? Na itukutuku nei Elder Robert D. Hales ena “iKuri ni iVurevure” ena veivakayaloqaqataki. O cei e sa bau “rarama” ki na nomu kalasi?

• Vakasamataka e dua na sala me vakaraitaki kina na veivakavulici i Karisito ni da sa rarama kei vuravura. E rawa beka mo vakaraitaka e dua na iyaloyalo ni siti levu ni waqa tu ena bogi? E rawa beka mo kauta mai e dua na cina livaliva ka vunia e ruku ni basikete? Na cava na vuna e vakatauvatana kina na iVakabula na Nona tisaipeli ki na rarama? Eda na vakayagataka vakacava na kila oqo meda sa rarama vei ira na tamata? (raica na VV 103:9–10). Sa rawa ki na kalasi mera veivosakitaka se dramataka na sala e dau veivakararamataki kina na kosipeli ena nodra bula ka vakalougatataki ira na tamata.

• Oqo eso tale na ivolanikalou e rawa ni vakuri ki na veivosaki baleta na rarama 3 Nifai 18:24; Vunau kei na Veiyalayalati 50:24; 84:44–47; 88:50, 67; and 93:36–40. Sa rawa ki na kalasi mera na lagata ena marau na serenilotu e baleta na rarama, me vaka na “The Lord Is My Light” kei na “Lead, Kindly Light,” Serenilotu, naba 89, 97. Na cava era vakuria na serenilotu kei na ivolanikalou oqo meda kila vinaka kina na Maciu 5:14–16?

Maciu 5:17–48

E vakavulica o Jisu Karisito e dua na lawa e cecere cake e rawa ni muataki keda meda uasivi sara.

• Na veika e tukuni tiko ena Maciu 5 a vakamatatataki tiko ki na siga ni iVakabula, ia na ivakavuvuli e vakavulica o Koya sa baleti vuravura taucoko. Ni gadrevi mera raica na kalasi na ka oqo ki na nodra bula, sureta mera digitaka e dua na itukutuku oqo ka vakasamataka e dua na ivakaraitaki nikua e vakaraitaka tiko na ka a vakavulica na iVakabula: tikina e 21–24; 27–30; 33–37; 38–39; 40–42; and 43–44. E rawa mera cakava vakayadudua se vakailawalawa ka wasea na nodra ivakaraitaki ki na kalasi.

• Sa rawa me marautaki e dua na qito veisotari ena vukea mera raica na veivakavulici ni iVakabula ena Maciu 5:21–48 sa mai sosomitaka na lawa i Mosese. Sa rawa mo vola ena so na kadi na malanivosa eso e tekivu ena “dou sa rogoca” (vakamacalataki kina na lawa i Mosese) mai na Maciu 5:21–44. Vola ena so tale na kadi na malanivosa e tekivu ena tikina “ia koi au kau sa kaya” (vakamacalataki kina na lawa cecere i Karisito). Vakacuvara sobu na ituvatuva kadi e rua oqo, ka me digitaka e dua na lewe ni kalasi e dua na kadi “dou sa rogoca” vakakina e dua mai na kena kadua, ka me rau veisotari. Me vakayacori me yacova ni ra sa vakasotara vata na kalasi na lawa i Mosese kei na veivakavulici vou i Karisito. Na kena sa veisotari donu, veivosakitaka na vuna sa gadrevi kina nikua na veivakavulici ni iVakabula.

• Mo na vukea vakacava na kalasi mera raica na ibalebale ni ivakaro ni iVakabula meda “vinaka sara” me vaka e vakamacalataka o Peresitedi Russell M. Nelson meda “taucoko” se “vakaoti”? (Maciu 5:48; “Perfection Pending,” Ensign, Nov. 1995, 86–88). Oqo e dua na vakasama: kotiva vakatikina e dua na iyaloyalo i Jisu, ka sureta na kalasi mera vola ena daku ni veitikina yadua e dua na ivakavuvuli mai na Maciu 5 era vakauqeti kina mera na bulataka. Mera na cakacaka vata me vakataucokotaki tale na veitikina. E vukei keda vakacava na Veisorovaki i Jisu Karisito meda “taucoko” se “vakaoti”? (raica na Bible Dictionary, “Grace”).

• Sa rawa mo sureta na kalasi mera lalawataka mera cakacakataka nodra vakauqeti ni ra vulica tiko na Maciu 5. Sa rawa mo talemuria tiko na veisureti oqo ena veilesoni e tarava.

ivakatakilakila ni vuli

Vakayaloqaqataki na Vuli ena iTikotiko

Ni gadrevi mera vakauqeti na kalasi mera wilika na Maciu 6–7 ena loma ni macawa mai oqo, tukuna vei ira ni vakatoka o Peresitedi Harold B. Lee na Vunau ena Ulunivanua me “na lawa ni vanua ni bula me vinaka sara” (Nodra iVakavuvuli na Peresitedi ni Lotu: Harold B. Lee [2000], 200).

ivakatakilakila ni ivurevure

iKuri ni iVurevure

Maciu 5; Luke 6

Mo dua na rarama.

E vakavulica o Elder Robert D. Hales: “O sa bau tu mada vakadua mo vakasamataka ni o rairai dua na rarama talai maivei Tamada Vakalomalagi mo taqomaka yani e dua ki vale se o dua na bikeni vakayawa o vakaraitaka na sala lesu ki na salatu rabalailai e mua ki na bula tawamudu? Na nomu rarama sa dua na bikeni ka me kakua ni boko se veivakacalai vei ira era vakasaqara tiko na sala i vale” (“That Ye May Be the Children of Light” [Brigham Young University fireside, Nov. 3, 1996], 9; speeches.byu.edu).

Vakasaqarai na vinaka sara

E vakavulica o Peresitedi Harold B. Lee: “O nanuma beka ni sega ni rawa na ka e lalawataka tiko na iVakabula ka vakalialiai keda ni da sasagataka meda bula ka vinaka sara? E sega ni rawa vei keda ena vuravura oqo meda yaco meda vinaka sara e tukuna tiko na iVakavuvuli, ia ena bula oqo eda vakadavora na yavu eda tara cake kina na tawamudu; koya gona, meda vakadeitaka sara me sa noda yavu na dina, ivalavala dodonu kei na vakabauta” (Nodra iVakavuvuli na Peresitedi ni Lotu: Harold B. Lee, 195).

E kaya o Peresitedi Joseph Fielding Smith: “Ena sega ni yaco meda [vinaka sara] ena dua vata ga na gauna, ia ena vosa ena vosa kei na vunau ena vunau, mai na ivakaraitaki ena ivakaraitaki, ia ena gauna mada ga eda na bula tiko kina ena vuravura oqo. … Ia eda vakaduria eke na kena yavu. Eda na vakatavulici eke ena dina rawarawa oqo ni Kosipeli i Jisu Karisito, ena ituvaki ni veivakarautaki oqo, me vakarautaki keda ki na bula vinaka sara oya. Sa noqu itavi, ka nomu talega, meu na vinaka cake nikua mai na kena au a tiko kina e nanoa, ka vakakina o iko mo na vinaka cake nikua mai na kena o a tiko kina e nanoa, ka vinaka cake ni mataka mai na kena o tiko kina nikua” (Nodra iVakavuvuli na Peresitedi ni Lotu: Joseph Fielding Smith [2013], 234–35).

Vakatorocaketaki ni Noda Veivakavulici

Vakalevutaki na nodra vakaitavi na lewe ni kalasi. E vuqa na itaviqaravi e rawa ni caka vakalasi, ena ilawalawa lalai, vakayarurua, se dua na mata veivosaki. Vakayagataka na veimataqali iwalewale eso mera vakaitavi taucoko rawa kina me kakua ni dua e lutu. (Raica na Veivakavulici ena Sala ni iVakabula, 33.)