Sa qaqa na Karisito vei Setani

Sa Qaqa na Karisito vei Setani, maivei Robert T. Barrett

4–10 ni Feperueri.

Maciu 4; Luke 4–5

“Sa Tu Vei Au na Yalo i Jiova”

Ni ko vulica na Maciu 4 kei na Luke 4–5, vola na nomu nanuma vakayalo. Oqo ena sureta na veivakauqeti ki na sala me sotavi vakacava na nodra gagadre na kalasi. Sa rawa mo vakayagataka talega na Lako Mai, Mo Muri Au—Me Baleta na Tamata Yadua kei na Matavuvale vakakina ena ituvatuva oqo me kunei na ikuri ni vakasama.

Vola na Nomu Nanuma

ivakatakilakila ni veiwasei

Sureta na Veiwasei

Na wiliwili ena macawa oqo e oka kina na itukutuku oqo: “A ra sa kurabui sara ena nona ivakavuvuli: ni sa vosa ko koya ena kaukauwa vakai koya” (Luke 4:32; raica talega na Marika 1:22). Na tikini ivolanikalou cava era rawa ni wasea na lewe ni kalasi mai na wase oqo a vukea nodra vakila vakai ira na kaukauwa vakaivunau o ya?

ivakatakilakila ni veivakavulici

Vakavulica na iVunau

Maciu 4:1–11; Luke 4:1–13

Sa solia vei keda na Tamada Vakalomalagi na kaukauwa kei na sala meda vorata kina na veitemaki.

• Na itukutuku ni nona vorati Setani na iVakabula ena vukei ira na kalasi mera kila na sala e dau temaki ira kina o Setani. Mera digitaka na kalasi e dua na veitemaki e tiko ena Maciu 4:1–11 se Luke 4:1–13 ka vakasamataka e dua na veitemaki vou, e veisemati (e rawa ni veivuke na itukutuku ena “iKuri ni iVurevure”). Cava na vuna e veivukei kina noda kila ni a sotava talega na iVakabula na veitemaki vata ga eda sotava tiko nikua? Na cava na vuna a vorata rawa kina na Karisito na veitemaki? Na ikuri ni ivakaraitaki vakaivolanikalou ni tamata era vorata na veitemaki i Setani, raica na Vakatekivu 39:7–20; 2 Nifai 4:16–35; kei na Mosese 1:10–22.

• Dua na sala me vakayaloqaqataka na veivosaki baleta na Maciu 4:1–11 kei na Luke 4:1–13 o ya me volai e rua na taro ena vava ni volavola: Na cava eda vulica baleti Karisito mai na italanoa oqo? kei Na cava eda vulica baleti Setani? Sureti ira sara na lewe ni kalasi mera vakasaqara ena itukutuku na isau ni rua na taro oqo ka vola ena vava ni volavola.

• Na cava ena vukei ira na lewe ni kalasi me ra vorata rawa na veitemaki? Sa rawa mo kerea na lewe ni kalasi mera taleva na gauna ena Maciu 4:1–11 se Luke 4:1–13 a vukea na iVakabula nona kila na ivolanikalou me sabai Setani kina (ena nona kaya, “Sa volai”). Solia na gauna ki na lewe ni kalasi mera kunea ka wasea na ivolanikalou ena vaqaqacotaka ka vakaukauwataki ira ni ra vakila na veitemaki. (Era rawa ni raica na kena vakasama ena Topical Guide ena vosa “Temptation.”)

Luke 4: 16–30

O Jisu Karisito na Mesaia sa parofisaitaki.

• Me vukei na lewe ni kalasi mera kila vinaka na itukutuku oqo, mo vakamacalataka na itutu ni Mesaia kei na Karisito e kena ibalebale ruarua “sa lumuti.” Ni ra wilika na Luke 4:18–21, kerea mera vakasamataka na ibalebale ni kena cavuti tiko o Jisu na Karisito, na Mesaia, se O Koya sa Lumuti. Ena veivuke talega vei ira mera wilika na “Anointed One” ena Bible Dictionary. E vakaraitaka vakacava o Jisu ni sai Koya na Mesaia edaidai? Sureta na lewe ni kalasi mera wasea era a kila vakacava ni o Jisu Karisito sa nodra iVakabula.

• Ena tiko eso na lesoni veivukei me vulici ena kena dikevi na vuna era a sega kina ni ciqomi Jisu na kai Nasareci ni sa Mesaia a parofisaitaki. Dua na kena sala o ya me vakatauvatani na duidui ni nodra nanuma kei na yada mai Sarifaci kei Neamani ena Veiyalayalati Makawa. Sa rawa mo kerea tiko mai eso na lewe ni kalasi mera na mai vakalekalekataka na itukutuku yadua oqo (raica na 1 Tui 17:8–24; 2 Tui 5:1–17; Luke 4:16–30). Na cava e vakavulica vei keda na itukutuku oqo baleta na cakamana kei na rogoci ira na italai ni Kalou? Era raica beka na kalasi e dua na itukutuku me nodra na lewe ni Lotu nikua e tiko ena vosa ni iVakabula vei ira mai Nasareci?

Maciu 4:18–22; Luke 5:1-11

Na noda dinata meda muria na Karisito sai koya na noda ciqoma na Lomana ka biuta noda ka kecega.

• Eso na gauna na veidusimaki ni Turaga e sega tu ni matata ni se qai soli mai. Mera vakasaqara na lewe ni kalasi ena Luke 5:1–11, na ka a kerea na iVakabula vei Pita kei na vuna a rairai lomatarotaka kina o Pita na Nona ivakaro o ya. Ena rawa vakacava ki na ka oqo me veisautaka na rai nei Pita baleta na iVakabula vata kei koya? Sa rawa mo sureta na lewe ni kalasi mera wasea na gauna era a vakaraitaka kina na nodra vakabauta ena veidusimaki vakalou, dina ga ni ra sega tu ni kila vinaka. Na cava a yaco ni ra a vakabauta tiko ga?

  A kacivi Pita kei Adriu o Jisu e baravi

  “Drau muri au mai, kau na qisi kemudrau mo drau gonedau ni tamata” (Maciu 4:19).

• Me vaka nodrau “sa biuta na ka kecega” na gonedau me muri Jisu Karisito (Luke 5:11), e tiko na veika eso meda na biuta meda sa Nona tisaipeli. Na cava e tukuna tiko na Maciu 4:18–22 me baleta na ivakarau kei na vakabauta nei Pita, Adriu, Jemesa, kei Joni? E rawa ni veivuke ke kau mai e dua na lawa ni qoli ki na kalasi ka sureta na lewe ni kalasi mera vola na veika mera sa biuta se sa biuta oti ka viritaka ena lawa ka mera muria na Karisito. Mo sureta e vica na lewe ni kalasi mera wasea na kena sa veisau na nodra bula ni ra sa digitaka mera biuta nodra ka kecega ka muria na iVakabula.

ivakatakilakila ni vuli

Vakayaloqaqataki na Vuli ena iTikotiko

Ni gadrevi mera vakauqeti na lewe ni kalasi mera wilika na Joni 2–4 ena loma ni macawa mai oqo, mo na kerea mera vakasamataka vakatitobu na cava e kena ibalebale vei ira na “sucu tale.” Tukuna vei ira ni wiliwili ni macawa mai oqo ena vukea mera sauma na taro oqo.

ivakatakilakila ni ivurevure

iKuri ni iVurevure

Maciu 4; Luke 4–5

O Jisu na Mesaia.

“Jesus Declares He Is the Messiah” (video, LDS.org)

Veimataqali veitemaki.

Ni oti nona vakamacalataka na mataqali veitemaki a sotava na iVakabula ena lekutu, a vakavulica oqo o Peresitedi David O.McKay:

“Na veitemaki kece era yaco mai vei iko kei au e wase tiko vakatolu:

“(1) Na kena temaki na gagadre se na kete;

“(2) Coriti ena dokadoka, veika vovou, se veika wale;

“(3) Na gaganotaka na iyau vakavuravura se kaukauwa kei na taukena na qele se na iyau ni tamata” (Nodra iVakavuvuli na Peresitedi ni Lotu: David O. McKay [2003], 82).

Ena nona tukuna na ka a sotava o Jisu ena Maciu 4, a vakavulica o Elder Jeffrey R. Holland:

“‘Kevaka ko sa Luve ni Kalou, mo kaya mada me vuki mei buli madrai na veivatu oqo.’ …

“Na veitemaki e sega ni baleta na kana. … Na tikina ni veitemaki, au via vakamatatataka, sai koya me caka ena sala oqo, me rawata na kena madrai—marau na yagona, vakacegui na gagano ni yagona—na sala rawarawa, ena vakacacani ni kaukauwa ka sega ni lomana me waraka na gauna donu kei na sala dodonu. …

“‘Kevaka ko sa luve ni Kalou mo rika sobu’ mai na dela ni vale ni soro. …

“Na veitemaki oqo e vakamataitaki cake toka mai na kena imatai. Oqo na kena temaki na yalo, e dua na gagadre vakai koya ga e ka dina cake mai na kana madrai. Ena vakabulai koya beka na Kalou? … Taura ga mai na veivakadeitaki vakayalo, rawata e dua na ivavakoso yalodina, ka sauma na veicavilaki nei tevoro lailai oqo—ena dua ga na kerekere ki na kaukauwa ni Kalou? …

“Ia a cata o Jisu me temaki na yalona. Na cakitaka kei na vorata sa tiki talega ni vakavakarau vakalou. … Io na Luve ni Kalou mada ga me na wawa. Na Dauveivueti sa sega vakadua ni solia na loloma soliwale takiveiyaga vei ira na tamata ena sega ni taura e dua me nona ga. …

“… ‘A ka kece oqori kau na solia vei iko, kevaka ko na cuva sobu ka vakarokoroko vei au.’

“A [taroga] o Setani …, ‘Na cava na kena isau? Mo vorata na madrai sau lailai. O na vorata na drama Vakamesaia nei Tawdry, ia e sega ni dua e rawa ni vorata na iyau kei vuravura. Vica na kemu isau.’ Sa toso tiko o Setani ena imatai ni nona yavu ni tawavakabauta—na vakabauta dina ni rawa mo volia na ka cava ga ena ilavo.

“Ena lewa o Jisu na vuravura oqo ena dua na siga. Ena liutaka na veituvaki cecere kei na kena kaukauwa e tiko kina. Ena nodra Tui na Tui ka nodra Turaga na Turaga.. Ia sega ena sala oqo” (“The Inconvenient Messiah,” Ensign, Feb. 1984, 68–71).

Vakatorocaketaki ni Noda Veivakavulici

Vinaka vakalevu kemuni na vuli tiko. “Me kakua ni vesuki iko na lesoni mo na laki guilecava kina na vakavinavinaka vei ira na vakaitavi. E dodonu mera kila ni ko taleitaka na nodra gugumatua mera wasea na nodra rarama kei na ivakadinadina” (Veivakavulici ena iVakarau ni iVakabula, 33).