Sa Papitaisotaki Jisu o Joni na Dauveipapitaiso

Na iloilo rokataki ena Valetabu e Illinois, maivei Tom Holdman

28 ni Janueri–3 ni Feperueri

Maciu 3; Marika 1; Luke 3

“Dou Caramaka na Sala i Jiova”

Ni ko wilika ka vakasamataka vakatitobu na Maciu 3; Marika 1; kei na Luke 3, vola na nanuma o sa ciqoma. Oqo ena sureta na Yalo ni ko vakavakarau. Lako Mai, Mo Muri Au—Me Baleta na Tamata Yadua kei na Matavuvale kei na vakasama oqo me vukei iko mo vakauqeti ira na tamata ena nomu kalasi mera kila vinaka ka bulataka na vunau ena ivolanikalou oqo.

Vola na Nomu Nanuma

ivakatakilakila ni veiwasei

Sureta na Veiwasei

Me vukea nodra wasea na kalasi na nodra vuli mai na Veiyalayalati Vou sa vakalolugatataka na nodra bula, vola ena vava ni volavola na taro oqo: Na cava o sa cakava ena vuku ni nomu a wilika na Veiyalayalati Vou ena macawa oqo?

ivakatakilakila ni veivakavulici

Vakavulica na iVunau

Maciu 3:1–12; Luke 3:2–18

O ira na tisaipeli era na vakarautaki ira kei ira eso mera ciqomi Jisu Karisito.

• Eda na vakarautaki keda vakacava ni veisiko mai e dua na vulagi bibi? Na taro vakaoqo ena rawa mo tuvanaka kina e dua na veivosaki baleta na nona a vakarautaki ira na tamata o Joni na Dauveipapitaisotaki mera ciqomi Jisu Karisito. E rawa mo wasea na kalasi ki na tolu na ilawalawa mera wilika na Maciu 3:1–6; Maciu 3:7–12; kei na Luke 3:10–15, ka vakasaqara na sala a vakarautaki ira kina na tamata o Joni na Dauveipapitaisotaki mera ciqomi Jisu Karisito ki na nodra bula. Vakaveitarataravi mera wasea na ilawalawa yadua na veika era sa kunea.

• Me vaka ga na ka a cakava o Joni na Dauveipapitaisotaki, era vukei keda na parofita bula meda ciqoma na iVakabula ki na noda bula. Ni gadrevi me vukei na kalasi mera semati ira na parofita nikua vei Joni na Dauveipapitaisotaki, mo raica na veivakavulici nei Joni na Dauveipapitaisotaki ena Maciu 3:1–12 kei na Luke 3:2–18 kei na so na ivakasala mai na koniferedi raraba sa oti. Ena vukei keda vakacava na talairawarawa ki na ivakasala vakaparofita meda ciqoma kina na iVakabula?

• E veivakararamataki naJoseph Smith Translation, Luke 3:4–11 (ena ikuri ni iVola Tabu) baleta na ilesilesi i Jisu Karisito e uasivia yani na ka e kunei ena Luke 3:4–6. Na cava era vulica na kalasi mai na veitikina oqo baleta na iVakabula kei na kena gadrevi meda veivutuni?

  E vunau o Joni na Dauveipapitaisotaki

  E Vunau mai na Lekutu o Joni na Dauveipapitaisotaki, maivei Robert T. Barrett

Luke 3:3–14

E gadrevi meda taduvaka mai na “vua e kilikili kei na veivutuni.”

• Ena Luke 3:8, e vakavulici ira na tamata o Joni na Dauveipapitaisotaki ni bera mera na papitaiso, e dodonu mera vakaraitaka mai na “vuana,” se ivakadinadina ni ra sa veivutuni. O na vukea vakacava na kalasi mera raica na ivakadinadina ni nodra veivutuni? Mo kerei ira mera vakasaqaqara ena Luke 3:8–14 ka raica na ka e kaya tiko o Joni me “vua” ni veivutuni. Sa rawa talega mera raica na Moronai 6:1–3 kei na Vunau kei na Veiyalayalati 20:37. Sa rawa mo droinitaka e dua na vunikau vuata ena vava ni volavola ka mera vola na kalasi na yaca ni vuata ena vunikau kei na “vuata” ni veivutuni era sa kunea. Sa gauna vinaka talega me veivosakitaki kina na ibalebale dina ni veivutuni. Vakaraitaka ni dua na sala meda “cakava me dodonu na nona salatu” (Luke 3:4) o ya meda veivutunitaka na veivakataotaki ena rawa me tarova na Yalo me sobuti keda.

• Ena rawa ni veivakayaloqaqataki na lagati na serenilotu “More Holiness Give Me,” Serenilotu, naba 131, me veivosakitaki ni veivutuni ena rawa me vukei keda meda vakataka sara na iVakabula. Me baleta na vidio ni serenilotu oqo, raica na mormontabernaclechoir.org.

Maciu 3:13–17

Eda na muri Jisu Karisito ni da sa papitaiso ka ciqoma na Yalo Tabu.

• Me raicilesu na italanoa ni nona papitaiso o Jisu Karisito, tovolea na vakasama oqo: Tarogi ira na kalasi na sala cava mera vakayagataka kina na Maciu 3:13–17 mera vakavulica e dua baleta na papitaiso, vakataka e dua na gone se dua e sega ni lewenilotu. (Sa rawa mera vakayagataka talega na iyaloyalo ena ituvatuva ni macawa oqo ena Lako Mai, Mo Muri Au—Me Baleta na Tamata Yadua kei na Matavuvale.) Na gacagaca bibi cava ni papitaiso era na vakamacalataka? Mera vakatovotovotaka na nodra vakasama ena veivakavulici vakai ira.

• Me vukei mera nanuma tiko na kalasi na nodra papitaiso ka vakasamataka na kena bibi mera bulataka tiko na veiyalayalati ni papitaiso, mo sureta mera wilika na Maciu 3:13–17 kei na itukutuku nei Elder Robert D. Hales ena “iKuri ni iVurevure.” E dodonu mera marautaka na kalasi nodra wasea nodra nanuma baleta na nodra papitaiso kei na kena veiyalayalati. Sa rawa talega mera lagata na “Come, Follow Me,” Serenilotu, naba 116.

• A vakavulica o Joni na Dauveipapitaisotaki ni na rawa ni veipapitaisotaki na iVakabula “ena Yalo Tabu kei na bukawaqa” (Maciu 3:11). Ena yaco na papitaiso ena bukawaqa ni da sa vakadeitaki ka ciqoma na isolisoli ni Yalo Tabu. Cava na vuna meda taura kina na isolisoli ni Yalo Tabu meda torocake ena matanitu ni Kalou? E mana vakacava kivei keda na papitaiso ena bukawaqa kei na Yalo Tabu? (raica na Alama 5:14). Ena rawa ni veivuke na vidio “Baptism of the Holy Ghost” (LDS.org) ena veivosaki oqo.

• Oqo e dua na itaviqaravi ena vukea na kalasi mera tomana tiko na veivosakitaki ni vunau ni papitaiso. Vola na taro oqo ena vava ni volavola kei na veitiki ni ivolanikalou ena tiki ni pepa eso. Sureta na kalasi mera digitaka na tiki ni pepa ka wilika vata vakalasi na ivolanikalou yadua. Me veivosakitaki na taro cava ena saumi vakavinaka ena tikini ivolanikalou yadua. E tiko eso tale na ivolanikalou se veivakararamataki ena vukea me saumi na taro oqo?

  • Na cava era vakavulica na ivolanikalou oqo baleta na gadrevi dina ni papitaiso? (3 Nifai 11:38)

  • Na cava e vakatakarakarataka na papitaiso ena tabadromuci ena wai? (Roma 6:3–5)

  • Mena veisautaka vakacava na noqu bula na noqu veiyalayalati ni papitaiso? (Mosaia 18:8–10)

  • Cava na vuna eda sega ni papitaisotaki ira kina na gone lalai? (Moronai 8:8–12)

  • Na cava e bibi kina me veipapitaisotaki e dua sa tu vua na lewa, sega walega ena yalodina? (Iperiu 5:4)

  • Au sa papitaiso oti ena dua tale na lotu, na cava na vuna meu papitaisotaki tale kina? (V&V 22:1–4)

  • Cava na vuna me tarava kina na papitaiso na ciqomi ni isolisoli ni Yalo Tabu? (Joni 3:5)

ivakatakilakila ni vuli

Vakayaloqaqataki na Vuli ena iTikotiko

Ni gadrevi mera vakayaloqaqataki na kalasi mera vulica na Maciu 4 kei na Luke 4–5 ena itikotiko, sureta mera vakasamataka e dua na veitemaki era sotava, ka tukuna vei ira ni wase oqo ena vakavulica vei ira na ka a cakava na iVakabula ni sotava na veitemaki.

ivakatakilakila ni ivurevure

iKuri ni iVurevure

Maciu 3; Marika 1; Luke 3

Na ibalebale ni noda veiyalayalati ni papitaiso.

E vakavulica o Elder Robert D. Hales:

“Ni da sa kila na noda veiyalayalati ni papitaiso kei na isolisoli ni Yalo Tabu, ena veisautaka na noda bula, ka na tauyavutaka na noda sa na yalodina kina matanitu ni Kalou. … Sa ka bibi meda curuma na matanitu ni Kalou ka papitaiso kina o Jisu me vakaraitaka vei keda ‘na kena rabalailai na matamata’ [2 Nifai 31:9]. …

“Ni da vakamuria na ivakaraitaki i Jisu, eda sa vakaraitaka tale tikoga ni da na veivutuni ka talairawarawa meda maroroya na ivakaro nei Tamada Vakalomalagi. Eda vakayalomaluataki keda ena yalo raramusumusu ni da sa kila na noda ivalavala ca ka kerea na veivosoti ni noda caka cala [raica na 3 Nifai 9:20]. Eda yalataka ni rawa me da taura vakataki keda na yacai Jisu Karisito ka dau nanumi Koya. …

“Ni da digitaka meda tiko ena matanitu [ni Kalou], eda tawase tani—sega ni tu duadua ga—mai na vuravura oqo. Na noda isulusulu ena rakorako, makare na noda vakanananu, savasava na noda vosa. Na iyaloyalo kei na televiseni eda sarava, na ivakatagi eda rogoca, na ivola, mekasini, kei na niusipepa eda wilika mena veilaveti cake. Eda na digitaka na itokani era na vakayaloqaqataka noda lalawa tawamudu, ka da na veiqaravi ena lomavinaka. Eda na tarova na lawaki ni tawasavasava, qito ilavo, tavako, gunu, kei na waigaga ni mateni. Na noda itaviqaravi ni Siga Tabu ena tukuna tiko na ivakaro ni Kalou meda nanuma na Siga ni Vakacecegu ka vakatabuya. Eda na muria na ivakaraitaki i Jisu Karisito ena sala eda qaravi ira kina na tamata. Eda na bula kilikili meda curuma na vale ni Turaga” (“The Covenant of Baptism: To Be in the Kingdom and of the Kingdom,” Ensign, Nov. 2000, 7–8).

Vakatorocaketaki ni Noda Veivakavulici

Vakavulica na ivunau taumada. E vakavulica o Hyrum Smith, “Vunautaka na imatai ni ivakavuvuli ni Kosipeli—vunautaka tale; o na raica ena veisiga e tarava ena vakatakilai maivei iko na veivakasama vou kei na ikuri ni rarama baleti ira. Sa rawa mo vakalevutaka vei ira mo na kilai ira vakamatata. Sa na qai rawa mo cakava mera kilai vakamatata maivei ira o vakavulica” (Manuscript History of the Church, vol. E-1, p. 1994, josephsmithpapers.org).