e wasea tiko na kosipeli e dua na yalewa ena siteseni ni sitima ni vanua.

21–27 ni Janueri.

Joni 1

Keitou sa Kunea na Mesaia

Ni bera ni ko wilika e dua na ikuri ni itukutuku, wilika ka vakasamataka vakatitobu na Joni 1, ka vola na veivakauqeti o sa ciqoma. Oqo ena sureta na Yalo ena nomu vakavakarau. . Lako Mai, Mo Muri Au—Me Baleta na Tamata Yadua kei na Matavuvale kei na vakasama oqo ena vukea mo vakauqeta na nomu kalasi mera kila vinaka ka vakayagataka na vunau ena wase oqo.

Vola toka na Nomu Nanuma

ivakatakilakila ni veiwasei

Sureta na Veiwasei

Me vukea na nodra wasea na lewe ni kalasi na ka era sa vulica, sa rawa mo kerea mera vola na taro, nanuma, se veivakararamataki mai na nodra wiliwili ena tiki ni pepa ka biuta ena dua na koniteina. Tara mai na veitiki ni pepa mai na koniteina mera veivosakitaka na kalasi.

ivakatakilakila ni veivakavulici

Vakavulica na iVunau

Joni 1:1–5

“E nai vakatekivu e rau sa tiko vata ko Jisu Karisito kei na Kalou.”

• A tekivuna o Joni na nona ivakadinadina me baleta na Karisito ena ilesilesi ni iVakabula ni bera ni mai sucu o Koya. Na cava e vakavulica o Joni me baleta na bula taumada i Karisito? Na cava e bibi kina meda kila na ilesilesi taumada i Karisito? Ena veivuke mo vola na veitaro oqo ena vava ni volavola ka kerei ira na lewe ni kalasi mera vakasaqara na kena isau ena Joni 1:1–5 (raica talega na iVakadewa i Josefa Simici, Joni 1:1–5 [ena Bible appendix]) kei na itukutuku nei Elder James E. Talmage ena “iKuri ni iVurevure.” Na ivolanikalou cava tale eso e rawa mera wasea na lewe ni kalasi e vakavulica vakalevu cake na Karisito taumada? (Me vakataka, mo raica na “Jesus Christ, Antemortal Existence of” ena Topical Guide.) Sa rawa me talevi lesu vakalasi na “Se Bula Tiko na Karisito: Nodra iVakadinadina na iApositolo” (Ensign se Liaona, Apr. 2000, 2).

• Ke o gadreva me veivosakitaki na veitikina oqo me baleta nona veibuli na Turaga, sa rawa me wiliki na Joni 1:3 ka vakaraitaka na iyaloyalo ni veika totoka ni vuravura oqo. Sa rawa mo vakaraitaka na vidio “Our Home” (lds.org/topics/environmental-stewardship-and-conservation). Sureta na lewe ni kalasi mera wasea na sala a veivuke kina na iVakabula mera vakila na Nona loloma.

Joni 1:1–14

O Jisu Karisito na Rarama.

• Ena rawa ni vukei keda na cina meda kila vinaka na ivakatakilakila ni rarama vakayalo. O na vakamacalataka vakacava na ivakatakilakila oqo ki na kalasi? Sa rawa mo bokoca na cina ena rumu ka waqaca e dua na cina livaliva me raici kina na duidui ni rarama kei na butobuto. Mo qai kerei ira na lewe ni kalasi mera raica na veivanua e kune yadua kina na vosa rarama ena Joni 1:1–14, ka sureta mera wasea na sala sa vakarautaka kina na iVakabula kei na Nona kosipeli na rarama vakayalo ki na nodra bula. Era sa sotava vakacava na lewe ni kalasi na Nona rarama? Me tiki ni veivosaki oqo, ena gadrevi mera wilika tale vakalevu na Rarama i Karisito ena Vunau kei na Veiyalayalati 84:45–46; 88:11–13, se mera raica na “Light of Christ” ena Bible Dictionary. Eda na rarama beka vakacava kei vuravura?

  na rarama ni siga ena veivatu e baravi

  Rau sa vakarautaka na iVakabula kei na Nona kosipeli na rarama vakayalo.

• Baleta ga ni volai tu na Joni 1:1–14 ena vosa ni ivakatakilakila, ena dredre toka me kilai vakavinaka. Dua na sala me vukea na lewe ni kalasi mera kila vinaka na ivakadinadina i Joni o ya mera vola na vosa kei na malanivosa e tokaruataki tiko ena veitikina oqo ka wasea na ka era vakavulica yadua baleta na iVakabula.

• Oqo e dua na sala mera vakaitavi mai kina na lewe ni kalasi ena veitikina oqo: Vakaraitaka e vica na iyaloyalo (oka kina na kena ena ituvatuva ni macawa oqo ena Lako Mai, Mo Muri Au—Me Baleta na Tamata Yadua kei na Matavuvale) e tukuna tiko na ituvaki ni bula kei na ilesilesi vakalou i Karisito. Sureti ira na lewe ni kalasi mera vakasaqara ena Joni 1:1–14, na vosa kei na malanivosa eso e rawa ni ra ulutaga ni veiyaloyalo oqo.

Joni 1:35–51

Eda rawa ni vakadinadinataka na iVakabula vakai keda yadua ka sureta eso mera “lako mai ka raica.”

• Na veisureti ena Joni 1, na “lako mai ka raica” e kunei vakarua (raica na tikina e 39, 46). Eda na sega beka ni raica vakayago na iVakabula me vakataki Adriu kei Nacanieli, ia eda rawa ni vakaio ki na veisureti vata o ya. Mo tarogi ira na lewe ni kalasi se na cava na ibalebale ni “lako mai ka raica” ena noda gauna oqo ka wasea na gauna era a rawata kina e dua na ivakadinadina ni iVakabula.

• Me itekivu ni kena veivosakitaki na veitikina oqo, mo kerei ira na lewe ni kalasi mera talanoataka na gauna era a vakatakila kina na kosipeli i Jisu Karisito vei ira tale eso. O cei beka era a sureta me “lako mai ka raica”? Na cava eda sa vulica maivei Adriu kei Filipi me baleta na noda wasea yani noda ivakadinadina me baleti Karisito?

• Eso na gauna era sega ni wasea na tamata na kosipeli baleta ni ra yalolailai se ni rui vereverea vei ira. E vakaraitaka na itukutuku ena Joni 1:35–51 ni wasei ni kosipeli e rawarawa ka itovo ni bula. Mo kerei ira na lewe ni kalasi mera wilika na veitikini ivolanikalou oqo ka veivosakitaka na sala mera vukea kina e dua e lomarere me wasea na kosipeli. E rawa ni ra vakayagataka na vosa nei Elder Neil L. Andersen ena “iKuri ni iVurevure” me baleta na vei vakasama tale eso. (Raica talega na vidio “Good Things to Share” on LDS.org.)

ivakatakilakila ni vuli

Vakayaloqaqataki ni Vuli ena iTikotiko

Ni gadrevi mera vakayaloqaqataki na lewe ni kalasi mera vulica na Maciu 3, Marika 1, kei na Luke 3, kerea mera vakasamataka e dua era gadreva mera kauta maivei Karisito. Tukuna vei ira ni ra na wilika ena wase oqo e dua na parofita e nona ilesilesi me vakarautaki ira na tamata mera ciqoma na iVakabula.

ivakatakilakila ni ivurevure

iKuri ni iVurevure

Joni 1

A tiko vata kei na Tamana mai na ivakatekivu ko Jisu Karisito.

E vakavulica o Elder James E. Talmage: “Ni sai Jisu Karisito na Vosa, a tiko kei na Tamana mai [na] ivakatekivu ka sa soli Vua na kaukauwa kei na itutu va Kalou, ka sa lako mai ki vuravura ka mai bula ena kedra maliwa na tamata, ka sa vakadeitaki dina. Na itukutuku oqo sa veitokoni mai kina na ivakatakila vei Mosese, a vakatarai kina vua me raica na veimataqali ibulibuli ni Kalou, ka rogoca na domo nei Tamada me baleta na veika sa caka oti: ‘Ia ena vosa ni noqu kaukauwa, au sa buli ira kina, sai koya na noqu Le Duabau Ga, o koya sa sinai ena loloma soli wale kei na dina’ [Mosese 1:32, 33]” (Jisu na Karisito, ka 3 ni tabaki [1916], 10).

Eda rawa ni sureti ira mai eso mera “lako mai ka raica.”

E vakavulica o Elder Neil L. Andersen:

“Sa vakavulica vei keda na iVakabula na sala meda wasea kina na kosipeli. Au taleitaka na italanoa kei Adriu, ni a taroga, ‘Rapai, ko sa tiko mai vei?’ [Joni 1:38.]. A rawa sara ga vei Jisu me tukuna na vanua e vakaitikotiko kina. Ia a mani kaya ga yani vei Adriu, ‘Lako mai ka raica’ [Joni 1:39]. Au nanuma kina ni sa tukuna tiko na iVakabula, ‘Lako mai ka raica sega walega ni noqu itikotiko ia na ivakarau ni noqu bula. Lako mai ka raica o cei koi au. Lako mai mo vakila na Yalo.’ Eda sega ni kila na veika kece me baleta na siga ko ya, ia eda sa kila ni gauna a rai yani o Adriu me raici tacina o Saimoni, a kaya, ‘Keitou sa kunea … na Karisito’ [Joni 1:41].

“Kivei ira era taleitaka na noda veivosaki, eda sa rawa ni muria na ivakaraitaki ni iVakabula ena noda sureti ira me ra ‘lako mai ka raica.’ Eso era na ciqoma na noda veisureti, ka so ena sega. Eda kila taucoko e dua sa sureti oti vakavica ni bera ni ciqoma e dua na veisureti me ‘lako mai ka raica.’ Meda sa nanumi ira talega era a tiko vata kei keda e liu ia oqo eda sega ni bau raici ira, ka meda sureti ira me ra lesu mai ka raica tale mada vakadua. …

“Kivei ira era vakayagataka tiko na Initaneti kei na talevoni veikauyaki, era sa tu na sala vovou me ra sureti kina na tamata me ra ‘lako mai ka raica.’ Meda cakava na noda wasea na noda vakabauta ena onolaini me sa tiki vakalevu ni noda bula ena veisiga” (“E Dua na Cakamana,” Ensign se Liaona, Me 2013, 79).

Na sereivakatagi eda na vulici Karisito kina.

Sa rawa mo vakayagataka na serenilotu “For the Beauty of the Earth,” Serenilotu, naba 92, ni veivosakitaki na ilesilesi ni iVakabula ni sa Dauveibuli (raica na Joni 1:3). Sa rawa talega mo vakayagataka na vidio ni “For the Beauty of the Earth” ena mormontabernaclechoir.org.

Vakatorocaketaki ni Noda Veivakavulici

Vukei ira na vuli me ra vakatauvatana na ivolanikalou vei ira. Na veisureti vata ga i Karisito vei iratou na Nona tisaipeli—mera lako mai ka raica—ena vukei ira o vakavulica mera gadreva na muria na iVakabula. Vakayaloqaqataki ira era vuli tiko mera vakayagataka na ivakavuvuli e tiko ena ivolanikalou ki na nodra dui bula ka sureta eso mera cakava vakakina. (Raica na 1 Nifai 19:23; Veivakavulici ena iVakarau ni iVakabula, 21.)