Meri kei Ilisapeci

7–13 ni Janueri.

Maciu 1; Luke 1

“Me Yaco ga Vei Au me Vaka na Nomuni Vosa”

Ni bera ni ko wilika e dua na ikuri ni ivola ni vuli, wilika ka vakasamataka vakatitobu na Maciu 1 kei na Luke 1, ka vola na nomu nanuma vakayalo. Me tuberi iko na Yalotabu ena nomu vakavakarau. Vakadikeva mada na vakasama ena ituvatuva oqo kei na kena ena Lako Mai, Mo Muri Au—Me Baleta na Tamata Yadua kei na Matavuvale.

Vola na Nomu Nanuma

ivakatakilakila ni veiwasei

Sureta na Veiwasei

Solia e vica na miniti ki na kalasi mera raica na Maciu 1 se Luke 1, ka sureti ira mera wasea na nodra tikini ivolanikalou taleitaki ka vakamacalataka na dina vakaivunau cava era sa vulica. O na raica ni na veivuke me raici taumada vakalekaleka na veika sa yaco ena wase oqo me kilai na veitikina sa wasei.

ivakatakilakila ni veivakavulici

Vakavulica na iVunau

Maciu 1:18–25; Luke 1:5–80

Ena cakacaka na Tamada Vakalomalagi maivei ira na luvena yalodina me vakayacori kina na Nona inaki.

• Ena vakaibalebale cake na veika era sotava na kalasi ni ra vulica na Veiyalayalati Vou ena yabaki oqo ke ra vuli mai na veika era sotava na tamata era wilika tiko. Me vukei mera cakava oqo, sa rawa mo vola na yacadra na tamata ena Maciu 1 kei na Luke 1 ena vava ni volavola, vata kei na tikini ivolanikalou baleti ira oqo:

  • Meri (Luke 1:26-56)

  • Josefa (Maciu 1:18–25)

  • Ilisapeci (Luke 1:5–7, 24–25, 40–45, 57–60)

  • Sakaraia (Luke 1:5–23, 59–64)

  Sureta na kalasi me digitaka e dua era gadreva mera vulica vakalevu, wilika na tikina sa volai, ka wasea vua e dua ena kalasi na ka era sa vulica mai na ka a sotava na tamata o ya. Na cava meda cakava meda muria kina na ivakaraitaki ni yalodina ni tamata o ya?

  Rairai o Keperieli vei Meri

  Na iTukutuku ni Kacivaki, maivei John Scott

• Me vukei nodra vakasamataka vakatitobu na kalasi na itovo kei na ilesilesi i Meri ena ituvatuva ni Kalou, mo vakaraitaka na vidio “An Angel Foretells Christ’s Birth to Mary” kei na “Mary and Elisabeth Rejoice Together” (LDS.org) se wiliki vata na Luke 1:26–38, 46–56, me laurai na veika e kaya o Meri me kilai kina na nona itovo ni bula. Na cava tale eda vulica baleti Meri? Na cava e rawa ni vakavulici keda kina baleta na noda ciqoma na lewa ni Kalou?

Luke 1:5–25

Ena yaco mai na veivakalougatataki ni Kalou ena Nona gauna ga.

• Era na tiko beka ena nomu kalasi o ira sa vakataki Ilisapeci kei Sakaraia, era bula dodonu ka se bera ni nuitaka tiko na veivakalougatataki. Mo na vukei ira vakacava mera vuli mai na ivakaraitaki nei Ilisapeci kei Sakaraia? Sa rawa mo tekivu ena taroga na kalasi mera vola na veivakalougatataki era nuitaka tiko. Mera na qai vakasaqara ena Luke 1:5–25, na lesoni mera vulica maivei Ilisapeci kei Sakaraia me baleta na waraka na Turaga. E rawa talega mera wilika ka vakasamataka vakatitobu na veivosa ena “iKuri ni iVurevure.” Vakayaloqaqataka mera vola na ka era sa vulica e tarava ki na nuitaki na veivakalougatataki ke rawa, mera wasea talega na nodra nanuma.

• Na ivakaraitaki cava tale ni waraka na gauna ni Turaga e rawa ni ra wasea na kalasi mai na nodra bula se mai na ivolanikalou? Na cava soti eda vulica mai na ivakaraitaki oqo?

Luke 1: 26–38

“Ni na sega ni dredre vua na Kalou e dua na ka.”

• Eso na gauna era na lomatarotaro na kalasi—me vakataki Meri—na kena yaco rawa vei ira na ituvatuva kei na yalayala ni Kalou. Me vukei nodra kila vinaka na kalasi ni kaukauwa ni Kalou ena rawa kina na ka kecega, mo vakaraitaka na iyaloyalo The Annunciation: The Angel Gabriel Appears to Mary (Gospel Art Book, no. 28) ka sureta mera wilika vata na Luke 1:26–38. Na cava eda rawa ni vulica meda valuta rawa na veika dredre ena vulici na vosa kei na cakacaka i Meri? Kerei ira na kalasi mera wasea na gauna a vukei ira kina na Kalou mera rawata e dua na ka era a nanuma ni dredre. Me baleta na ivakaraitaki nikua ni Yalododonu ena veivuke ni Kalou era rawata kina na veika dredre, sarava na vidio “Sealed Together: The Manaus Temple Caravan” (LDS.org).

• Na bula ni iVakabula e vakaraitaka na dina a tukuna o Keperieli: “Ni na sega ni dredre vua na Kalou e dua na ka” (Luke 1:37). Me vakamacalataki na ivakavuvuli oqo, mo kerea na kalasi mera vakasamataka na gauna a rawata kina na iVakabula na veika dredre ni cakava tiko na lewa nei Tamana (raica, na kena ivakaraitaki, Joni 9:1–7). Me vukei mera raica na kalasi na kena cakacaka na ivakavuvuli oqo ena nodra bula, mo sureta mera vakasamataka vakatitobu na taro vakaoqo: Na duidui cava ena yaco ki na nomu bula ni ko kila ni sega na ka e dredre vua na Kalou? Ena veisautaka vakacava na nomu veiqaravi ena Lotu? na sala o veimaliwai kina kei na nomu matavuvale? Ena veivuke talega ke laurai vata kei na Luke 1:37 ena vosa ni iVakabula ena Marika14:36.

Maciu 1:18–25; Luke 1:26–55

O Jisu Karisito na Luve ni Kalou.

• E dua na inaki bibi i Maciu, Luke, kei na dauvola Kosipeli tale eso o ya me vakadinadinataka ni o Jisu Karisito na Luve ni Kalou. Mo na vukea vakacava na kalasi mera kila na inaki oqo ena imatai ni wase era na wilika ena Veiyalayalati Vou? Oqo e dua na kena vakasama: Wasea vakailawalawa se vakayarurua, ka solia ki na ilawalawa yadua e vica na tikina mai na Maciu 1 se Luke 1. Sureta mera raica na veika se vosa e vakaqaqacotaka nodra vakabauta ena ilesilesi vakalou i Jisu Karisito ni sa Luve ni Kalou ka wasea ki na kalasi na ka era sa kunea. Eso na itukutuku o rawa ni vakatura e oka kina na Maciu 1:18–25 kei na Luke 1:26–38, 39–45, 46–55. Vakatura ki na kalasi ni ra vulica na Veiyalayalati Vou ena yabaki oqo, era rawa ni vola toka na itukutuku e vakadinadinataka ni o Jisu Karisito e Luve ni Kalou. Sa rawa me maroroya na kalasi na veika sa volai oqo.

ivakatakilakila ni vuli

Vakayaloqaqataki na Vuli ena iTikotiko

Me vakayaloqaqataki na kalasi mera wilika na Maciu 2 kei na Luke 2 baleta na lesoni ni macawa mai oqo, sa rawa mo vakatura ke ra wilika ena masumasu na itukutuku ni nona sucu na iVakabula, era na vakararamataki ena ka vou, ke ra sa wilika oti mada ga vakavica.

ivakatakilakila ni ivurevure

iKuri ni iVurevure

Maciu 1; Luke 1

Waraka na Turaga.

E vakavulica o Elder Neal A. Maxwell, “E oka ena vakabauta … na nuitaka tiko na gauna ni Kalou, ni a kaya o Koya, ‘Raica ena yaco na ka kecega ena kena gauna.’ (V&V 64:32.)” (“Lest Ye Be Wearied and Faint in Your Minds,” Ensign, May 1991, 90).

E vakavulica o Peresitedi Dieter F. Uchtdorf:

“O keda vakayadua eda sa dau kacivi me da wawa ena noda dui sala. Eda dau waraka na isau ni masu. Eda dau waraka na veika eso, eda dau nanuma ni sa dodonu ka vinaka sara vei keda, ka sega kina ni da vakasamataka rawa na vuna e vakabera tiko kina o Tamada Vakalomalagi na kena isau.

“Au nanuma na gauna au a vakavakarau tiko kina meu vulica meu pailate ni waqavuka ni vala. E levu na gauna ni tereni vakaivalu ni vakavakarau sa dau vakayacori kina na tereni ni vakaukauwa yago. … Ia, keimami dau cici ka cici tikoga.

Niu dau cici tiko sa tekivu meu raica e dua na ka, sa dina, au a lomaleqa kina. Ena veigauna eso era dau cici siviti au kina na dau vakatavako, gunu, ka cakava na ivalavala kecega e veisaqasaqa kei na kosipeli, vakauasivi, kei na Vosa ni Vuku.

“Au nanuma niu a vakasama vakaoqo, ‘Wawa mada vakalailai! E sega li ni dodonu meu cici tiko ka sega ni malumalumu mai?” Au sa oca, ka ra sa cici siviti au tiko na tamata sa kilai tu ni ra sega ni muria tiko e dua na ka e semati ki na Vosa ni Vuku. Au vakatusa niu a lomaleqa kina ena gauna ko ya. Au a tarogi au, e dina beka na yalayala se sega?

“A sega ni yaco mai ena gauna vata ga oqori na kena isau. Ia au a qai kila ni nona yalayala na Kalou e sega ni dau vakayacori vakatotolo se ena sala eda namaka tiko beka; era dau yaco me vaka na Nona gauna kei na Nona sala. Ena veiyabaki e muri, au rawa ni raica na ivakadinadina ni veivakalougatataki vakayago ena yaco vei ira era rokova na Vosa ni Vuku—me ikuri ni veivakalougatataki vakayalo ena yaco vakatotolo mai ena talairawarawa ki na dua ga na nona lawa na Kalou” (“Continue in Patience,” Ensign se Liaona, Me 2010, 58).

Vakatorocaketaki ni Noda Veivakavulici

Vakayaloqaqataki ira na kalasi mera vulica na ivolanikalou ena itikotiko. O rawa ni vakayaloqaqataka na vulici ni ivolanikalou ena itikotiko o ya mo solia na gauna ki na kalasi mera wasea na veika sa kunei kei na veivakararamataki mai na nodra vuli yadua ka vakamatavuvale. (Raica na Veivakavulici ena Sala ni iVakabula, 29.)