era sarava tiko na matavuvale na ivola ni itaba

31 ni Tiseba–6 ni Janueri

Sa Noda iTavi na Noda Dui Vuli.

Ni ko wilika ka vakasamataka vakatitobu na tiki ni ivolanikalou ena ena ituvatuva oqo, vola na veivakauqeti e yaco vei iko. Oqo ena sureta na Yalo ki na nomu vakavakarau. Lako Mai, Mo Muri Au—Me Baleta na Tamata Yadua kei na Matavuvale kei na vakasama oqo ena vukei iko mo vakauqeta na kalasi mera vulica na Veiyalayalati Vou ena yabaki oqo.

Vola na Nomu Nanuma

ivakatakilakila ni veiwasei

Sureta na Veiwasei

Dua na inaki ni nomu qasenivuli o ya mo vakayaloqaqataki ira na lewe ni kalasi mera vulica ga vakai ira kei na matavuvale na ivolanikalou. Na rogoca na veika era sotava eso ena vakauqeti ira mera vakasaqara ga na nodra. Ia ena itekivu ni kalasi yadua, kerea na lewe ni kalasi mera wasea na ivolanikalou era sa vulica a veivakauqeti se taleitaki vei ira.

ivakatakilakila ni veivakavulici

Vakavulica na iVunau

Meda vuli dina mai vua na iVakabula, me da sa ciqoma na Nona veisureti, “Lako mai, mo muri au.”

• Na vulica na Veiyalayalati Vou sa sega walega ni madigi meda vulica na veika baleta na iVakabula kei na Nona vunau ia me kunei talega na sala meda muri Koya vakauasivi cake. Na itukutuku ena Maciu 19:16–22 sa sala vinaka me vakatakilaitaki kina na ulutaga oqo (raica talega na vidio “Christ and the Rich Young Ruler” ena LDS.org). Sa rawa mo kerea na lewe ni kalasi mera vakasaqara ena itukutuku oqo na ka era sa vulica mera dua kina na tisaipeli i Jisu Karisito ka wasea na ka era sa raica. Me baleta na vakasama ni itaviqaravi e sema ki na ivakavuvuli oqo, raica na ituvatuva ni macawa oqo ena Lako Mai, Mo Muri Au—Me Baleta na Tamata Yadua kei na Matavuvale.

Na vuli e vinakati kina na cakacaka ena vakabauta.

• O na vakauqeta vakacava na lewe ni kalasi mera gumatuataka vakalevu cake na nodra vuli, ka me sega ni ilesilesi nei qasenivuli? Oqo e dua na vakasama. Sureta e dua ena lewe ni kalasi mo viritaka vei iko e dua na ka malumu, ka sega ni o via ciqoma. Vakayagataka na itaviqaravi oqo me tekivu e dua na veivosaki baleta na nodra itavi na gonevuli kei qasenivuli ena vuli kosipeli. Na itukutuku nei Elder David A. Bednar baleta na vuli ena vakabauta, e tiko ena “iKuri ni iVurevure,” ena veivuke ki na veivosaki oqo.

• Ni gadrevi me vukei na lewe ni kalasi mera kila vinaka ni vulica na kosipeli e vinakati kina na vakabauta, wasei ira vakailawalawa ka sureta mera wilika e dua vei ira na itukutuku oqo: Marika 5:25–34; Luke 5:17–26; kei na Joni 9:1–7. Na cava era a cakava na tamata ena itukutuku yadua mera vakaraitaka na nodra vakabauta na iVakabula? Meda na vulica vakacava na kosipeli ka vakaraitaka noda vakabauta ni na vukei keda na Turaga meda vulica na dina?

• Sa itavi kece ni kalasi me sureta na Yalo ki na kalasi. Me vukei na kalasi me kila vinaka oqo, kerea mera wilika na Alama 1:26 kei na Vunau kei na Veiyalayalati 50:13–22; 88:122–23 ka wasea mera na sureta vakacava mai na Yalo o ira na gonevuli kei na qasenivuli. Ena veivuke me volai na nodra itukutuku ena vava ni volavola ena ulutaga vakaoqo: Cava mena cakava o qasenivuli kei na Cava mena cakava o ira na gonevuli. Ena veivuke beka me caka e dua na posita e tiko kina nodra nanuma na lewe ni kalasi mena vakaraitaki ena vica na macawa mai muri?

Ena gadrevi me da kila vakataki keda na dina.

• E vuqa na itukutuku ena Veiyalayalati Vou e vakavulica na ivakavuvuli ena dusimaka noda vakasaqara na dina. Me vakataka na Luke 11:9–13; Joni 5:39; 7:14–17; kei na 1 Korinica 2:9–11. Sa rawa mo sureti ira ena kalasi era wilika na itukutuku oqo mera wasea na veika era sa vulica. Se me wiliki va-kalasi na itukutuku oqo ka sureta mera wasea nodra a rawata vakacava kina na nodra ivakadinadina.

  cauravou kei na goneyalewa ena kalasi

  Na vakasaqara na vuli ena vakabauta ena vukea meda rawata na noda ivakadinadina.

• Se cava sara na balavu ni noda lewena tiko na Lotu, meda vaqaqacotaka tikoga na noda ivakadinadina. Me vukea na kalasi mera kila ga vakai ira na dina eso, mo vola ena tiki ni pepa eso na tiki ni ivolanikalou e vakavulica na ka bibi eso, me vakataka na Joni 3:16–17; 1 Korinica 15:22; Mosaia 3:13; Alama 7:11–13; kei na Vunau kei na Veiyalayalati 135:3. Kerea na lewe ni kalasi mera wilika na ivolanikalou oqo, vakalekalekataka na dina tawamudu era sa kunea, ka veivosakitaka mera na vakadinadinataka vakacava. Me ra vakaitavi vakalevu kina na itabagone, mo vunia na tiki ni pepa ena veitiki ni rumu ka sureta na itabagone mera “vakasaqara na dina.”

• Era vakamacalataki enaCakacaka 17:10–12 na Yalododonu era vakasaqaqara ena ivolanikalou ka rawata nodra ivakadinadina baleta na dina. Ni gadrevi na lewe ni kalasi mera vakatotomuri ira, me wiliki vata na veitikina oqo ka sureta na lewe ni kalasi mera wasea na itukutuku ni ivolanikalou sa vaqaqacotaka na nodra ivakadinadina ni kosipeli.

Mena vakaibalebale cake vakacava na noda vulica na ivolanikalou?

• Me bula vakaivakarautaki na vuli ivolanikalou ena bolei ira beka na lewe ni kalasi era nanuma ni sega nodra gauna, kila vinaka, se kila-ka. O na vukei ira vakacava mera gugumatua kina? Mo tekivu ena kena veivosakitaki na kedra italanoa na dautakau ena “iKuri ni iVurevure.” Me vukea na lewe ni kalasi mera yalonuidei mera vulica na ivolanikalou, mo wasea na itukutuku mai na “Vakasama me Vakatorocaketaka na Nomu Vulica na iVolanikalou” ena Lako Mai, Mo Muri Au—Me Baleta na Tamata Yadua kei na Matavuvale. Sa rawa vei iko se na lewe ni kalasi mo ni wasea na gauna a vakayagataki kina eso na vakasama oqo se gauna vakaibalebale cake tale eso me vulici na ivolanikalou. Sa rawa talega me digitaki e dua na wase ena Veiyalayalati Vou ka tovolei me vulici va-kalasi ni vakayagataki eso na vakasama oqo.

ivakatakilakila ni vuli

Vakayaloqaqataki na Vuli ena iTikotiko

Ni gadrevi mera vakayaloqaqataki na lewe ni kalasi mera vulica mai vale na Maciu 1 kei na Luke 1 mera vakarau mai ki na veivosaki ni macawa mai oqo, mo taroga: “O sa bau kerei mada mo cakava e dua na ka e vaka e dredre me caka?” Na wase oqo era vakaraitaka tiko na dina “ni sa sega ni dredre vua na Kalou e dua na ka” (Luke 1:37).

ivakatakilakila ni ivurevure

iKuri ni iVurevure

Taura me noda na kila-ka vakayalo.

E vakamacalataka o Elder David A. Bednar: “Au sa raica e dua na nodra ivakarau ni bula na dauveituberi era a vakauqeta vakalevu na noqu bula. Era a vukei au meu vakasaqara na vuli ena vakabauta. Era bese ni solia mai na isaunitaro rawarawa ni taro dredre. Na ka dina, a sega ni soli mai e dua na isaunitaro. Ia, era a dusimaki au ka vukea meu kalawa yani meu vakasaqara na noqu isaunitaro. … Na isaunitaro e solia e dua na tamata ena sega ni nanumi tiko vakabalavu, ke nanumi beka. Ia na isaunitaro eda kunea se rawata mai na noda vakabauta, na kena dina, sa dau marroroi tu vakabalavu sara. … Na sala ga oqo ena yaco vua e dua me na vakatikitiki mai na vakararavi tiko ki na nodra kila-ka vakayalo kei na bula sotava eso ka taura vakai ira me nodra na veivakalougatataki oqori” (“Seek Learning by Faith,” Ensign, Sept. 2007, 67).

Me tiko na gauna ni vuli ivolanikalou.

E vakavulica o Brother Tad R. Callister:

“E rau a veisisivi e rua na dautakau … me laurai o cei e taya e levu na kau ena dua na siga. Ni mataka cake sa tekivu na veisivisivi. Ena veiauwa ena gole o koya na tamata lailai ki na veikau me 10 na miniti. Na veigauna kece e cakava oqo, a matadredredre ga na kena isa ka deguvacu, veivakadeitaki tu ni sa liu tiko. A sega ni biuta na nona tikina na tamata levu cake, sega ni mudu na nona musumusu, ka sega ni cegu vakalailai.

“Ni sa cava na siga, a kidroa na tamata levu cake ni kila na nona isa, ka nanumi ni vakaoti gauna vakalevu voli, a musuka e levu cake na vunikau mai vei koya. ‘O cakava vakacava ni a levu sara na nomu cegu?’ a taroga o koya.

“A sauma o koya e qaqa, “Oi, au a vakagata tiko na noqu imatau.’

“Ena veigauna yadua eda vulica kina na ivolanikalou, eda sa vakagatara tiko na noda imatau vakayalo” (“The Joy of Learning,” Ensign, Oct. 2016, 14).

Vakatorocaketaki ni Noda Veivakavulici

Raica matua tikoga na ivunau. Raica me yavutaki tikoga na veivosaki ni kalasi ena ivolanikalou kei na nodra veivakavulici na parofita. Sa rawa mo cakava oqo ena nomu taroga: “Na dina vakosipeli cava eda vulica mai na malanivosa eda sa rogoca?” se “E rawa ni dua me wasea e dua na ivolanikalou e sema tiko ki na veika eda sa veivosakitaka?” (Raica na Veivakavulici ena iVakarau ni iVakabula, 20–21.)