Meda Rokovi Koya, maivei Dana Mario Wood

14–20 ni Janueri.

Luke 2; Maciu 2

Keitou sa Lako Mai me Cuva Vua

Ni bera ni ko wilika na vakasama ena ituvatuva oqo, vulica na Luke 2 kei na Maciu 2, ka vola na nomu vakauqeti vakayalo. Oqo ena vukea mo ciqoma na ivakatakila ena sala mo sotava vinaka kina na gagadre ni nomu kalasi.

Vola na Nomu Nanuma

Sureta na Veiwasei

O na vakayaloqaqataki ira vakacava na lewe ni kalasi mera wasea na veivakararamataki kei na veika era sotava ni ra vulica na ivolanikalou oqo vata kei na nodra matavuvale? Dina ni ra kila tu na italanoa ni nona sucu na iVakabula, e rawa mera na dau vakararamataki vou vakayalo. Sureta e vica na lewe ni kalasi mera wasea e dua na itukutuku era kunea ena Luke 2 se Maciu 2 a vakauqeti ira ena dua na sala vou.

Vakavulica na iVunau

Luke 2:1–38; Maciu 2:1–12

E vuqa era a vakadinadinataka na sucu i Karisito.

• Na imatai ni kedra itukutuku na sokalou ena Luke 2 kei na Maciu 2 ena vukea na lewe ni kalasi mera vakasamataka vakatitobu na sala mera vakaraitaka kina na nodra lomana na iVakabula. Taleva na jata ena ituvatuva ni macawa oqo ena Lako Mai, Mo Muri Au—Me Baleta na Tamata Yadua kei na Matavuvale. Eso ena nomu kalasi era na rawa ni veivakararamataki mai na itaviqaravi oqo, se mo cakava vakalasi na itaviqaravi oqo. Na cava e bibi kina mera lako mai na vakadinadinataki Karisito ena ituvaki ni bula duidui? Eda na muria vakacava na nodra ivakaraitaki?

• Ni bera ni ra mai sokalou na ivakadinadina vua na gone na Karisito, era a vakasaqarai Koya taumada. Ni gadrevi mera vulica na kalasi na nodra ivakaraitaki, mo vola ena vava ni volavola na ulutaga oqo: iVakatawa, Ana, Simioni, kei iratou na Tamata Vuku. Mo qai sureta na lewe ni kalasi mera vakasaqara ena Luke 2 kei na Maciu 2 ka vola ena vava ni volavola era a vakasaqara vakacava o ira oqo na iVakabula. Na cava e vakatura na itukutuku oqo baleta na sala eso meda vakasaqara kina na Karisito?

  

  O iratou na ivakatawa a so vei ira na imatai ni vakadinadinataka na sucu ni iVakabula.

• Ena vakauqeta beka na lewe ni nomu kalasi e dua na lesoni ivakaraitaki mera vagalalataka nodra bula vua na iVakabula? Oqo e dua na vakasama: Kauta mai e dua na joke ki na kalasi, ni talevi oti vata na Luke 2:7, kerea na lewe ni kalasi mera vakasinaita na joke ena so na iyaya lalai e matataka na sala eso eda vakayagataki gauna kina. Ni sa sinai na joke, sureta e dua me ciqimaka e dua na iyaloyalo ni iVakabula. Na cava e vakatura tiko na vakatautauvata oqo ena kena vagalalataki na bula me nei Karisito? Na duidui cava eda rawa ni cakava meda vagalalataki keda Vua? Ena veivuke na itukutuku nei Peresitedi Thomas S. Monson ena “iKuri ni iVurevure” me sau ni taro oqo.

Maciu 2:13–23

Era na ciqoma na itubutubu na ivakatakila me taqomaka nodra matavuvale.

• Dua na lesoni mai na nodrau dro ki Ijipita o Josefa kei Meri o ya ni na solia na Turaga na ivakatakila mera vukei na itubutubu mera taqomaka nodra matavuvale mai na veika rerevaki. Me na vakauqeti na veivosaki, mo sureta na lewe ni kalasi mera vola ena vava ni volavola eso na veika rerevaki era sotava tu nikua na matavuvale. Na cava eda vulica mai na Maciu 2:13–23 baleta na sala meda taqomaka kina na noda matavuvale kei keda mai na veika rerevaki oqo? E sa vukei keda vakacava na noda ivakatakila meda taqomaka kina na noda matavuvale se noda daulomani mai na veika rerevaki? Na ivakasala cava era sa solia na parofita kei na iapositolo me vukea noda taqomaka noda matavuvale?

• Me tiki ni veivosaki oqo, mo sureta na lewe ni kalasi mera lagata na “Home Can Be a Heaven on Earth,” Serenilotu, naba 298, se dua tale e baleta na matavuvale. Na cava e vakavulica na serenilotu ena ka era rawa ni bula kilikili kina na itubutubu ki na ivakatakila mera liutaka kina na nodra matavuvale?

Luke 2:40–52

Ni se itabagone mada ga, a raica matua tiko o Jisu me cakava na lomai Tamana.

• Na italanoa ni nona veivakavulici o Jisu ena valetabu ni se qai yabaki 12 ena veivakaukauwataki vakatabakidua vei ira na itabagone era vakasamataka tiko na cau mera na cakava ki na cakacaka ni Kalou. Sa rawa mera veisasa yarua na kalasi mera wilika vata na Luke 2:40–52 (raica na veivakararamataki mai na ivakadewa i Josefa Simici e tiko ena Luke 2:46, ivakamacala e botona c). Me rau veiwasei ena vica na miniti na veisa yadua na veika rau sa vakauqeti kina baleta na itukutuku oqo. Na madigi cava meda na taura meda wasea kina na ka eda sa kila tu baleta na kosipeli? Na veika cava eda sotava e rawa meda wasea?

• Ke o vakavulici ira tiko na uabula, na itukutuku oqo sa madigi vinaka me veivosakitaki kina mera gugumatua vakacava na itabagone. Me dua me qai vakalekalekataka na itukutuku ena Luke 2:40–52, ka me veivosakitaka na kalasi na sala e veivakauqeti kina na ka oqo ena nodra digovi ira tiko na itabagone ena Lotu. Na madigi cava meda solia vei ira na itabagone mera “tiko [ena] vale nei Tama[dra]” me vaka a cakava o Jisu? (Luke 2:49). Na gauna cava eda a kurabui kina ena veivakararamataki vakayalo ni dua na itabagone se gonelailai? E rawa ni sema na vosa oqo nei Peresitedi Henry B. Eyring ki na veivosaki oqo: “Ni gauna e vosa kina e dua na lewe ni Matabete i Eroni, … au sa dau namaka niu na rogoca tiko na vosa ni Kalou. Sa lailai na noqu lomaleqa ka sa levu na noqu kurabui” (“Ia ena Kaukauwa Sara kina Ko Koya,” Ensign se Liaona, Nove. 2016, 77).

• Na cava e vakavulica vei keda na Luke 2:40–52 baleta na itovo i Jisu ni a se itabagone kina? Na ivakarau ni tubu ni tamata yadua e vakaturi tiko ena Luke 2:52 ena vakauqeta me veivosakitaki na cava eda sa cakava tiko meda vakataka vakalevu kina na Karisito. Mo vakatura ki na lewe ni kalasi mera vakasamataka vakatitobu na nodra sa tubu cake tiko ena vuku (kila), ituvaki (vakayago), taleitaka na Kalou (vakayalo), ka taleitaka na tamata (veimaliwai). Sa rawa mera lalawataka e dua se so na ituvaki oqo.

Vakayaloqaqataki na Vuli ena iTikotiko

Ni gadrevi mera vakarautaki na lewe ni kalasi me veivosakitaki na Joni 1 ena macawa mai oqo, kerea mera vola toka na veitikina ena wase yadua a vakadinadinataki Jisu Karisito kina e dua.

iKuri ni iVurevure

Luke 2; Maciu 2

Na iwalewale ni kena vakasaqarai o Jisu.

A vakavulica o Peresitedi Thomas S. Monson:

“Na iwalewale meda vakasaqarai Jisu kina sa kena e tautauvata tu ga mai liu sara—na masu vagumatua yalodina ni dua ena yalo malumalumu ka savasava. …

“Ni bera ni da vakasaqarai Jisu vagumatua vakai keda yadua, meda vakarautaka noda gauna Vua ki na noda bula ka vagalalataka na yaloda Vua. Ena osooso ni gauna oqo e vuqa sa tu na nodra gauna ni qito golf, gauna ni laki volivoli, gauna ni cakacaka, gauna ni qito—ia e sega na gauna nei Karisito.

“Na itikotiko lomani era vakasinaita na vanua ka vagalalatala na vanua ni kana, vanua ni moce, vanua ni qito, vanua ni culacula, vanua ni TV, ia e sega na vanua nei Karisito.

“E cariba beka na noda vakasama ni da nanuma lesu na nona vosa: ‘Sa vaqara na fokise, a sa vakairoro na manumanu vuka; ia na Luve ni tamata sa sega vua na tikina me kotora kina na uluna.’ (Maciu 8:20.) Se da mata madua ni da nanuma, ‘A sa vakasucuma na nona ulumatua na gonetagane, a sa viviraka vua nai sulu ni gone, ka vakadavora ena nodra tikina na manumanu; ni sa sega na tiki ni bure me nodratou.’ (Luke 2:7.) Sega na tikina. Sega na tikina. Sega na tikina. Sa dau vaka tu oqo.

“Ni da vakasaqarai Jisu vakai keda yadua, ka vukei ka dusimaki ena ivakavuvuli ni masu, sa ka bibi kina meda kilai koya tiko vakamatata o cei eda vakasaqara tiko. Era a vakasaqara na ivakatawa ni gauna makawa na gone o Jisu. Ia eda sa vakasaqarai Jisu na Karisito, na Tuakada, na noda Dauveisereki vua na Tamada, noda Dauveivueti, sa Vakatekivuna na noda vakabulai; a tiko e liu kei na Tamana mai na ivakatekivu; o Koya sa taura vua na ivalavala ca kei vuravura ka lomana ga me mate meda na bula tawamudu koi keda. Oqo na Jisu eda sa vakasaqara tiko” (“The Search for Jesus,” Ensign, Dec. 1990, 4–5).

iVakaraitaki ni nona sucu o Jisu

Vakasamataka na sala e rawa ni vaqaqacotaka kina na cakacaka ni liga me veivosakitaki na sucu i Karisito. (Me vakataka, nomu raica na Gospel Art Book se history.lds.org/exhibit/birth-of-christ.)

Vakatorocaketaki ni Noda Veivakavulici

Okati ira na vuli era sega ni vuli ivolanikalou tiko e vale. Dina ga ni so na lewe ni kalasi era a sega ni wilika mai na Luke 2 kei na Maciu 2 sa rawa mera wasea eso na veivakararamataki bibi ni caka na vuli vata ena kalasi. Raica me soli na madigi ki na kalasi taucoko mera vakaitavi ka cau ena veivosaki.