li Jesus ki’aatinak rik’in laj Nikodemo

11–17 febrero

Jwan 2–4

"Tento naq texyo’laaq wi’chik"

Us rilb’al sa’ Jwan 2–4 re xtikib’ankil xkawresinkil aawib’ choq’ re li k’utuk. Tz’iib’a li musiq’ejil na’leb’ nakak’ul, ut naru nakawoksi li tusleb’ aatin a’in re xtawb’al chik li aatin ut li na’leb’ chirix li k’utuk.

Xtz’iib’ankil li nakak’oxla

reetalil l wotzok

Xkanab’ankileb’ chi wotzok

Tz’iib’a li oxib’ chi jolomil aatin sa’ xtaqe’qil li pizarron: Jwan 2, Jwan 3, ut Jwan 4. Kanab’eb’ li komon chirilb’aleb’ li oxib’ ch’ol a’in chiru junpaat, ut chirix a’an ye reheb’ naq te’xtz’iib’a rub’el li junjunq jolomil aatin jun raqal li xtenq’ank reheb’ chixtawb’al ru li tzol’leb’ ut li k’a’ru nak’ulman sa’ li jun ch’ol a’an. Aatinanqex chirixeb’ li raqal li xe’xtz’iib’a.

reetalil li k’utuk

Xk’utb’al li tzolʼlebʼ

Jwan 2:1–11

Najala li qayu’am naq naqataaqe li Jesukristo.

• Wan naq naru naqak’ul li musiq’ejil na’leb’ rik’in xk’eeb’al reetal li k’a’ru ka’ch’in yeeb’il resil sa’ jun esilal sa’eb’ li loq’laj hu. Naru taapatz’ reheb’ li komon naq te’ril Jwan 2:1–11 ut te’xtz’iib’a chi tasto li kok’ aatin li nanimob’resink re lix tawomeb’ ru chirix li sachb’a-ch’oolej li kik’ulman sa’ li sumlaak. Chan ru naq li sachb’a-ch’oolej a’in kixk’ut xyaalal lix loq’al li Dios? (chi’ilmanq raqal 11).

• Maare usaq choq’ reheb’ li komon wi neke’xk’oxla li sachb’a-ch’oolej a’in rik’in xnaq’eb’ ru li ani ke’ilok re. Chan ru naq li qana’leb’ laa’o chirixeb’ li sachb’a-ch’oolej wan naq chanchan xna’leb’eb’ li ani ke’wan sa’ li sumlaak—qayehaq, jo’ li xMaria, li kixnaw naq taaruuq taawanq jun li sachb’a-ch’oolej, malaj laj k’ulul ula’ li ink’a’ kixnaw naq x’uxman jun li sachb’a-ch’oolej? Maare taapatz’ re junjunq komon sa’ li tzoleb’aal naq te’xtz’iib’a resil li sumlaak chanchan ta wi’ naq xe’wan aran.

Jwan 2:13–22

Naru naqakol rix li santil na’ajej ut li santil na’leb’.

• Chan ru naq tatruuq chixtenq’ankileb’ li komon chi tzolok rik’in li aatin chirix li Jesus naq kiralinasiheb’ chaq laj yakonel sa’ li santil ochoch? Chan ru naq te’ruuq chixkolb’al rix li santil na’ajej ut santil na’leb’, jo’ eb’ li ochoch, eb’ li ch’utleb’aal, eb’ li santil ochoch, ut eb’ li loq’laj hu? Li raatin li Awa’b’ej David O. McKay maare tatxtenq’a: ""Meek’e choq’ k’ayiil li rochoch lin Yuwa’." (Jwan 2:16.) Xk’ulb’al ut xsachb’al li tumin, ... li wech’ok-ix, ut yoob’ank aatin chirixeb’ li qas qiitz’in sa’ jun li ch’utleb’aal kab’l, a’aneb’ ajwi’ xq’etb’al li chaq’rab’ a’in li kik’eeman ka’ch’in chik ma wiib’ mil chihab’ chaq" (sa’ resilal li jolomil ch’utub’aj-ib’, octubre 1956, 7). Chan ru naq naru naqak’uula xsantilal li santil ochoch, ut xkomoneb’ chik li santil na’ajej?

Jwan 3:1–21

Tento naq tooyo’laaq wi’chik re tooruuq chi ok sa’ li rawa’b’ejihom li Dios.

• Re xtenq’ankileb’ li komon chixtawb’al ru lix yehom li Jesus naq tooyo’laaq wi’chik (chi’ilmanq Jwan 3:3), taaruuq taapatz’ reheb’ naq te’xwotz li k’a’ru neke’xk’oxla chirix li k’a’ru kixye li Jesus re laj Nikodemo sa’eb’ li raqal a’in. K’a’ruheb’ li aatin li kiroksi? K’a’ chik ru chi raqal reheb’ li loq’laj hu malaj raatineb’ laj jolominel sa’ li Iglees tixtenq’aheb’ li komon chixtawb’al ru li b’oqok a’in? (Chi’ilmanq li K’utul Raqal reheb’ li Loq’laj hu, "Yo’laak wi’chik, yo’laak rik’in li Dios" re te’tawmanq xkomoneb’ chik li raqal sa’eb’ li loq’laj hu; chi’ilmanq "Xkomon chik li k’anjeleb’aal" re xtawb’al raatineb’ laj jolominel sa’ li Iglees.)

• Chan ru naq eb’ li komon te’ruuq raj chixch’olob’ankil chiru junaq li jalan chik xpaab’aal k’a’ru xyaalalil li yo’laak wi’chik? Chan ru naq te’xye raj resil li jalb’a-k’a’uxlej, li kub’iha’, ut li k’ojob’ank sa’ li Iglees sa’ li ch’olob’ank a’in? Naru nakakanab’eb’ li komon chixyalb’al xsumenkil li patz’om a’in rik’in li ani wankeb’ chixk’atqeb’. Li raatin li profeet aj Jose Smith sa’ "Xkomon chik li k’anjeleb’aal" naru texxtenq’a sa’ li seraq’ a’in.

• Wankeb’ li neke’k’oxlank re naq maa’ani naru chixjalb’al rib’; a’b’anan laj Nikodemo a’an jun li winq li kixjal rib’ xb’aan xpaab’ankil lix evangelio li Jesukristo. Re xtenq’ankileb’ li komon chirilb’al a’in, naru taaye reheb’ naq te’sik’oq sa’ Jwan 3:1–2; Jwan 7:40–52; ut Jwan 19:39–40. K’a’ru naqatzol sa’eb’ li raqal a’in chirix lix na’leb’ ut lix paab’aal laj Nikodemo? Chan ru naq kixjal rib’ chiru xnumikeb’ li kutan? Ma naru naqawotz ani naqanaw ru li xjal rib’ sa’ xk’ab’a’ li evangelio?

• Naru teeril xjalam-uuch jun k’uula’al, ut tex’aatinaq chirix chan ru naq jun li ak’ k’uula’al chanchan li ani xyo’la wi’chik sa’ li musiq’ej.

Jwan 4:6–34

Li Jesukristo kixyeechi’i qe li yo’yookil ha’ ut tzakemq, a’an xb’aanunkil lix k’anjel li Dios.

• Li qajunxaqalil wulaj wulaj naraj ru li tzakemq ut li ha’. Li Jesus ki’aatinak chirix li ajom a’in naq kixtzol li ixq aj Samaria, ut naq kixtzoleb’ lix tzolom. Re xtenq’ankileb’ li komon chixtawb’al ru li k’a’ru yoo chixk’utb’al li Kolonel, naru taaletz xjalam-uuch li tzakemq ut li ha’ chiru li pizarron, ut rub’eleb’ li jalam-uuch eb’ li komon te’ruuq chixtz’iib’ankil li yaalil musiq’ejil na’leb’ li kixk’ut li Jesus. Chan ru naq xloq’oninkil li Dios sa’ musiq’ej ut rik’in li yaal naru narisi chaq li chaqi-eel sa’ li qamusiq’? Chan ru naq na’isiman xtz’okajik li qamusiq’ rik’in xb’aanunkil li rajom li Dios?

  xnumik li ha’

  Li Jesukristo naxyeechi’i li yo’yookil ha’ qe.

• Rik’in xk’oxlankil chan ru naq li ixq aj Samaria kixch’olob’ xyaalal li Jesukristo, eb’ li komon sa’ laa tzoleb’aal te’ruuq chixk’oxlankil chan ru naq eb’ a’an xe’ok chixnawb’al naq a’an li Mesias. Sik’omaq sa’ komonil li aatin kiroksi li ixq aj Samaria naq ki’aatinak chirix li Kolonel sa’ Jwan 4:6–30. Chan ru naq li aatin a’in naxk’ut xyaalal lix na’leb’ chirix ani li Jesus? Chan ru naq xniman lix nawom qach’ool naq a’an li qaKolonel?

reetalil li tzolok

Xb’oqb’aleb’ chi tzolok sa’ kab’l

Re xk’eeb’aleb’ xch’ool li komon chrilb’al ru Mateo 5 ut Lukas 6, ye reheb’ naq sa’eb’ li ch’ol a’in wan li “li xnimal ru aatin li jultikanb’il, li nawb’il ru qab’aan" (Enseñanzas de los Presidentes de la Iglesia: Joseph Fielding Smith [2013], 249).

reetalil li k’anjeleb’aal

Xkomon chik li na’leb’

Jwan 2–4

Eb’ li video chirix lix b’aanuhom ut lix yehom li Jesus.

“Jesús convierte el agua en vino,” “Jesús purifica el templo,” “Jesús enseña acerca de nacer de nuevo,” “Jesús enseña a una mujer samaritana” (LDS.org)

Li k’a’ru xyaalalil li yo’laak wi’chik.

Li Profeet aj Jose Smith kixye: "Xkub’sinkil xha’ junaq winq chanchan ajwi’ xkub’sinkil xha’ junaq b’oolx nujenaq chi samahi’ wi ink’a’ nab’aanuman choq’ re risinkil li maak ut xk’ulb’al li Santil Musiq’ej. Li kub’iha’ rik’in ha’ a’an yal xyijach jun li kub’iha’, ut maak’a’ na’ok wi’ wi ink’a’ na’ux li xyiijach chik—a’an li kub’iha’ rik’in li Santil Musiq’ej" (Enseñanzas de los Presidentes de la Iglesia: José Smith [2007], 100).

Li Elder David A. Bednar kixk’ut: "Li jalok ch’oolej ... a’an nim, moko ka’ch’in ta—a’an yo’laak wi’chik ut xjalb’al chi junajwa li k’a’ru naqeek’a ut li k’a’ru naqaj, li k’a’ru naqak’oxla ut naqab’aanu, ut aniho. Relik chi yaal naq lix ch’oolil lix evangelio li Jesukristo a’an xjalb’al chi junajwa chan ru naq wanko, ut a’in ka’ajwi’ naru na’uxman rik’in xkanab’ankil qib’ chiru "lix k’ulub’il, ut li ruxtaan, ut li rusilal li Santil Mesias" (2 Nefi 2:8). Naq naqasik’ ru xtaaqenkil li Qaawa’, naqasik’ ru xjalb’al qib’—yo’laak sa’ li musiq’ej ("Os es necesario nacer de nuevo," Liahona, mayo 2007, 20).

Li Elder D. Todd Christofferson kixye: "Maare naru nakapatz’, K’a’ut naq ink’a’ nak’ulman li nimla jalaak a’in wik’in chi jwal sa’ junpaat wi’chik? Tento taajultiko’q aawe naq li k’a’ru ke’xk’ul lix tenamit li rey aj Benjamin, laj Alma, ut xkomoneb’ chik li wankeb’ sa’eb’ li loq’laj hu, maawa’ li neke’xk’ul chixjunileb’. Choq’ qe laa’o, wan naq li jalaak nak’ulman chi timil timil chiru k’iila kutan. Li yo’laak wi’chik jalan wi’ rik’in xyo’lajik li qatib’el, xb’aan naq nak’ulman chiru xnumikeb’ li chihab’, ut ink’a’ sa’ junpaat. Ut a’in rajb’al naq wanko sa’ li yu’am a’in, re xb’aanunkil chi jo’kan" ("Nacer de nuevo," Liahona, mayo 2008, 78).

Li Elder Dallin H. Oaks kixye:

"Xooyo’la wi’chik naq xoo’ok sa’ jun sumwank rik’in li qaKolonel sa’ li yo’laak rik’in ha’ ut rik’in li Musiq’ej, ut sa’ xk’ulb’al sa’ qab’een lix k’ab’a’ li Jesukristo. Naru nokoyo’la wi’chik chi ak’il rajlal hilob’aal kutan naq naqak’ul li loq’laj wa’ak.

"Eb’ laj Santil Paab’anel sa’ Roso’jikeb’ li Kutan neke’xch’olob’ xyaalal naq eb’ li xe’yo’la wi’chik chi jo’kan, wankeb’ choq’ musiq’ejil ralal ut xrab’in li Jesukristo (chi’ilmanq Mosiah 5:7; 15:9–13; 27:25). A’b’anan re taaruuq taqak’ul li osob’tesiik re wank chi yo’lajenaq wi’chik, tento ajwi’ taqapaab’eb’ li qasumwank ut tookuyuq toj sa’ roso’jik. Ut sa’ li kutan a’in, xb’aan li rusilal li Dios, wanko chi yo’lajenaq wi’chik jo’ ak’ yo’ob’tesihom, chiru musiq’ejil na’b’ej yuwa’b’ej, ut naru naqeechani jun nimla eechanihom" ("¿Ha sido usted salvo? Liahona, julio 1998, 65).

Xchaab’ilob’resinkil li qak’utum

Laj k’utunel moko chaab’il ta wi’chik chiru laj tzolonel. Aajel ru laa k’anjel jo’ aj k’utunel, a’b’anan ink’a’ ka’ajwi’ aawik’in laa’at nachal li musiq’anb’il na’leb’ sa’ li tzoleb’aal. Tenq’aheb’ li komon chi tzolok rik’in li Musiq’ej, ut chixwotzb’al chirib’ileb’ rib’ li k’a’ru xe’xtzol.