Kim, Taaqehin
18–24 febrero. Mateo 5; Lukas 6: "Us xaq eere"


"18–24 febrero. Mateo 5; Lukas 6: "Us xaq eere" " Kim, Taaqehin—Choq’ re li Dominkil Tzoleb’aal: Li Ak’ Chaq’rab’ 2019 (2019)

"18–24 febrero. Mateo 5; Lukas 6," Kim, Taaqehin—Choq’ re li Dominkil Tzoleb’aal: 2019

Jalam-uuch
li aatin jultikanb’il chiru li tzuul

Li aatin jultikanb’il chiru li tzuul, xb’aan laj Jorge Cocco

18–24 febrero

Mateo 5; Lukas 6

"Us xaq eere"

Tz’iib’a li musiq’ejil na’leb’ nakak’ul naq nakatzol Mateo 5 ut Lukas 6. Taachalq li k’utb’esink aawe naq nakayal aaq’e chixb’aanunil li na’ajman ru choq’ re aatzoleb’aal. Li tusleb’ aatin a’in naru naxk’e chik xkomon aana’leb’.

Xtz’iib’ankil li nakak’oxla

Jalam-uuch
reetalil li wotzok

Xkanab’ankileb’ chi wotzok

Li Awa’b’ej Joseph Fielding Smith kixye naq li aatin jultikanb’il chixb’een tzuul a’an "li xnimal ru aatin li jultikanb’il, li nawb’il ru qab’aan" (Enseñanzas de los Presidentes de la Iglesia: Joseph Fielding Smith [2013], 249). K’a’ut naq neke’xk’oxla li komon naq yaal a’in? K’a’ru neke’ru chixwotzb’al?

Jalam-uuch
reetalil li k’utuk

Xk’utb’al li tzolʼlebʼ

Mateo 5:1–12

Li sahil ch’oolejil li ink’a’ nalaj na’oso’ nachal rik’in wank jo’ chanru naq kixye ut kiwan li Jesukristo.

  • Li raatin li Kolonel li kixjultika chixb’een li tzuul, li kixye reheb’ lix tzolom li jwal neke’paab’ank re, natikla rik’ineb’ li aatin "us xaq reheb’," sa’ li nokoxb’oq wi’ li Kristo chixk’oxlankil chi ak’il k’a’ru xyaalal jun li osob’tesinb’il yu’am—jun yu’am wan wi’ li sahil ch’oolejil li ink’a’ nalaj na’oso’. Re xtikib’ankil li aatinak chirix li sahil ch’oolejil li ink’a’ nalaj na’oso’, naru taapatz’ reheb’ li komon naq te’xye k’a’ru li neke’saho’ wi’ xch’ool. Jo’ yeeb’il sa’eb’ li "us xaq," k’a’ru kixye li Jesus naq tixk’am chaq li osob’tesink, malaj li sahil ch’oolejil chi junelik? Chan ru naq jalan wi’ lix yehom li Jesus rik’in li k’a’ru chik neke’xb’aanu li tenamit re xsik’b’al li sahil ch’oolejil?

  • Re naq eb’ li komon te’xtaw ru li aatin jo’ saq ru xch’ool malaj k’anjelak chirix li tuqtuukilal, taaruuq taatz’iib’a junjunq li aatin li neke’tawman sa’eb’ li raqal 3–12 chiru li pizarron. Chirix a’an, naru taapatz’ reheb’ li komon naq te’xye k’a’ru jun li aatin li nasachok xwankil li junjunq chi aatin, ut k’a’ru neke’xk’oxla chirix li junjunq chi aatin rik’in xb’aanunkil a’in. Patz’ reheb’ li komon naq te’xk’oxla k’a’ru te’ruuq chixjalb’al, re naq te’ruuq chi osob’tesiik jo’ yeeb’il sa’eb’ li raqal a’in. K’a’ chik ru chi na’leb’ k’eeb’il sa’ 3 Nefi 12:3, 6 li nokoxtenq’a chixtawb’al ru Mateo 5:3, 6?

  • Jun chik na’leb’ re xtz’ilb’aleb’ rix li jar raqal a’in, a’an xpatz’b’al re chixjunqaleb’ li komon sa’ li tzoleb’aal chixsik’b’al jun chik raqal sa’eb’ li loq’laj hu chirix jun reheb’ li raqal a’in, ut te’xk’ut chiru li tzoleb’aal k’a’ru xe’xtzol. Ani nawb’il ru xb’aaneb’ li naxk’ut rik’in xb’aanuhom li na’leb’ a’an?

Jalam-uuch
li aatin jultikanb’il chiru li tzuul

Li aatin jultikanb’il chiru li tzuul, xb’aan laj Frank Adams

Mateo 5:14–16

Eb’ lix tzolom li Kolonel tento te’wanq choq’ xsaqen li ruchich’och’.

  • K’a’ru neke’xk’oxla li komon naq neke’ril li raatin li Jesus naq tento te’wanq choq’ "xkutan li ruchich’och’ "? K’a’ru xyaalalil "xtz’apb’al sa’ uk’al" li qasaqenk, ut chan ru naq aalenb’ilo chixb’aanunkil a’in? Li raatin li Elder Robert D. Hales sa’ "Xkomon chik li k’anjeleb’aal" maare tixwaklesi eech’ool chirix a’in. Ani wanjenaq choq’ "saqenk" chiruheb’ li komon sa’ laa tzoleb’aal?

  • K’oxla chan ru xk’utb’al xyaalal lix yehom li Kristo naq tento toowanq choq’ saqenk chiru li ruchich’och’. Ma tatruuq chixk’utb’al jun jalam-uuch re jun nimla tenamit sa’ q’ojyin, nak’utun wi’ xsaqenkil? Naru taak’am chaq jun li pook, ut taamuq rub’el jun chakach. K’a’ut naq li Kolonel naxjuntaq’eetaheb’ lix tzolom rik’in jun li saqenk? Chan ru naq tooruuq chiroksinkil li na’leb’ a’in re wank choq’ saqenk chiru li jun ch’ol chik? (chiʼilmanq Tz. ut S. 103:9–10). Eb’ li komon te’ruuq chi aatinak chirix malaj chixk’utb’al chan ru naq lix saqenkil li evangelio naru chi lemtz’unk sa’ xyu’ameb’ ut naru chirosob’tesinkil lix yu’ameb’ li jun ch’ol chik.

  • Wankeb’ chik li raqal sa’eb’ li loq’laj hu li te’ruuq chi tenq’ank eere naq nekex’aatinak chirix li saqen, jo’ sa’ 3 Nefi 18:24; Tzol’leb’ ut Sumwank 50:24; 84:44–47; 88:50 67; ut 93:36–40. Eb’ li komon maare te’raj ajwi’ xb’ichankileb’ li b’ich chirix li saqen, jo’ "Laa’at lin saqen" ut "Chaab’il saqen," Eb’ li B’ich, ajl 47 ut 52. Chan ru naq eb’ li b’ich ut li raqal a’in nokohe’xtenq’a chixtawb’al ru Mateo 5:14-16?

Mateo 5:17–48

Li Jesukristo kixk’ut jun li chaq’rab’ li q’axal taqenaq wi’chik, li naru tixk’am qab’e rik’in lix tz’aqalil qe qu.

  • Li k’a’aq re ru yeeb’il resil sa’ Mateo 5 a’an li na’uxman chaq sa’ xkutankil li Kolonel, a’ut li na’leb’ kixk’ut a’an yalaq b’ar nak’anjelak. Re xtenq’ankileb’ li komon chirilb’al chan ru naq neke’k’anjelak li na’leb’ a’an sa’ xyu’ameb’, ye reheb’ naq te’xsik’ ru jun reheb’ li raqal a’in, ut te’xk’oxla chan ru naq nak’anjelak li yoo chaq chixk’utb’al li Kolonel sa’ li kutan a’in: eb’ li raqal 21–24; 27–30; 33–37; 38–39; 40–42; ut 43–44. Taaruuq te’xb’aanu a’in xjuneseb’ malaj sa’eb’ li kok’ ch’uut, ut te’xwotz li k’a’ru xe’xk’oxla rik’in li tzoleb’aal.

  • Eb’ li saaj komon maare taawulaq chiruheb’ jun b’atz’unk li naxtenq’aheb’ chirilb’al naq lix yehom li Kolonel li natawman sa’ Mateo 5:21–48 naxq’ax xwankil lix chaq’rab’ laj Moises. Naru taatz’iib’a chiru jun siir li kok’ pimul hu li yehom li neke’tikla rik’in li aatin "Eerab’ihom resil" (chirix lix chaq’rab’ laj Moises) sa’ Mateo 5:21–44. Taak’uub’ jun siir chik wan wi’ li aatin li isinb’ileb’ sa’eb’ li jar raqal li neke’tikla rik’in li aatin "A’ut laa’in ninye eere" (chirix lix chaq’rab’ li Kristo li taqenaq wi’chik xwankil). Naru taak’ojob’eb’ li kok’ pimul hu chi b’alq’usinb’ileb’, ut kanab’ jun li saaj komon chixsik’b’al ru jun reheb’ li kok’ hu wan wi’ "eerab’ihom resil," ut jun reheb’ li jun siir chik, ut tixk’e reetal ma neke’xk’am rib’ xkab’ichaleb’. Texwanq chixb’aanunkil toj reetal naq eb’ li komon ak xe’xk’e li na’leb’ sa’ lix chaq’rab’ laj Moises rik’in lix ak’ yehom li Kristo. Rajlal sut naq neke’xk’e sa’ wiib’al li aatin li neke’xk’am rib’, aatinanqex chirix k’a’ut naq na’ajman ru li raatin li Kolonel sa’ li qakutan laa’o.

  • Chan ru naq nakatru chixtenq’ankileb’ li komon chirilb’al naq lix taqlahom li Kolonel naq "tz’aqalaq qe qu" naraj naxye, jo’ kixye li Awa’b’ej Russell M. Nelson, naq "taatz’aqloq qu," malaj naq "tooyaalo’q"? (Mateo 5:48; "La inminencia de la perfección," Liahona, enero1996, 99–102). A’in jun k’anjel naru taab’aanu: taaseti jun xjalam-uuch li Kolonel sa’ jun ch’ina jorb’a-k’a’uxlej, ut ye reheb’ li komon naq te’xtz’iib’a sa’ rix li junjunq jachal jun aatin sa’ Mateo 5 li neke’reek’a naq tento te’xyu’ami. Chirix a’an, che’k’anjelaq sa’ komonil re xyiib’ankil li jorb’a-k’a’uxlej. Chan ru naq lix tojb’al rix li maak xb’aan li Jesukristo nokoxtenq’a chi "tz’aqloq qu," malaj chi "yaalo’k"? (chi’ilmanq Li K’utul Raqal reheb’ li Loq’laj Hu, “Usilal”).

  • Naru ajwi’ taak’e xb’oqb’aleb’ li komon chixxaqab’ankil jun jayalihom naq te’xb’aanu li k’a’ru xe’reek’a naq tento xb’aanunkil naq yookeb’ chixtzolb’al Mateo 5. K’oxla chan ru naq tatruuq chi aatinak chirix li b’oqok a’in sa’eb’ li tzolom li toj te’chalq.

Jalam-uuch
reetalil li tzolok

Xb’oqb’aleb’ chi tzolok sa’ kab’l

Re xwaklesinkileb’ xch’ool li komon chirilb’al Mateo 6–7 chiru li xamaan taachalq, taaruuq taaye reheb’ naq li Awa’b’ej Harold B. Lee kixye naq li aatin jultikanb’il chixb’een li tzuul a’an "xna’il li chaq’rab’ re taawanq chi tz’aqal re ru qayu’am" (Enseñanzas de los Presidentes de la Iglesia: Harold B. Lee [2000], 222).

Jalam-uuch
reetalil li k’anjeleb’aal

Xkomon chik li k’anjeleb’aal

Mateo 5; Lukas 6

Wank choq’ saqen.

Li Elder Robert D. Hales kixye: "Ma xak’oxla jun sutaq naq maare laa’at li saqen taqlanb’il xb’aan li qaChoxahil Yuwa’ re xk’amb’al xb’e jalan chik sa’ li rochoch, malaj re naq tatwanq laa’at choq’ jun k’utleb’aal saqen chalen chaq chi najt, re xk’utb’al b’ar wan li b’e laatz’ ut ka’ch’in ru li naxk’am sa’ li junelik yu’am? Laa saqen a’an jun li k’utleb’aal li tento naq maajo’q’e taachupq, chi moko naq tixsach xb’e li ani yoo chixsik’b’al xb’e toj sa’ kab’l ("That Ye May Be the Children of Light" [Brigham Young University fireside, 3 noviembre, 1996], 9; speeches.byu.edu).

Xsik’b’al xtz’aqalil qe qu.

Li Awa’b’ej Harold B. Lee kixk’ut: "Ma nekek’oxla tab’i’ naq li Kolonel yoo chireetalinkil junaq jayalihom li ink’a’ nokoru chixtawb’al, ut naq yoo chaq chiqeetz’unkil naq naqayal qaq’e chixsik’b’al lix tz’aqalil qe qu? Ink’a’ naru chiqu sa’ li yu’am a’in wulak sa’ lix tz’aqalil qe qu li ki’aatinak wi’ li Kolonel, a’b’anan sa’ li yu’am a’in naqak’e xk’ojob’ankil li k’a’ru taqakab’la sa’ li junelik q’e kutan; chi jo’kan, tento naq taqak’e reetal naq k’ojk’o li qak’ojlajik sa’ xb’een li yaal, li tiikilal, ut li paab’aal" (Enseñanzas de los Presidentes de la Iglesia: Harold B. Lee, 216).

Li Awa’b’ej Joseph Fielding Smith kixye: "Lix tz’aqalil qe qu ink’a’ taachalq sa’ junpaat, taachalq b’an chi junjunqil li raqal, chi junjunqil li na’leb’, chi junjunqil li k’utb’il b’aanuhom, ut rik’in a’an toj maji’ taqak’ul naq wanko sa’ li yu’am a’in sa’ ruchich’och’. ... A’b’anan arin naqak’e xk’ojob’ankil. Arin nak’ute’ chiqu li yaalil na’leb’ chirix lix evangelio li Jesukristo, sa’ li kawresink-ib’ a’in, re qakawresinkil re naq tz’aqalaq qe qu. Lin k’anjel laa’in, ut lee k’anjel laa’ex, a’an naq chaab’ilaqin wi’chik chiru li xinwan wi’ ewer, ut naq chaab’ilaqex wi’chik laa’ex chiru li xexwan wi’ ewer, ut chaab’ilaqex wi’chik wulaj chiru li xexwan wi’ anajwan" (Enseñanzas de los Presidentes de la Iglesia: Joseph Fielding Smith [2013], 249–250).

Xchaab’ilob’resinkil li qak’utum

Re naq q’axal wi’chik te’tz’aqonq li komon. Wankeb’ naab’al li k’anjel li neke’ru chi b’aanumank jo’ tzoleb’aal, sa’eb’ li kok’ ch’uut, ut sa’eb’ li sumal, malaj rik’in jun ch’ina ch’uut chi aj aatinanel. Naru taajal chan ru taab’aanumanq, re naq te’tz’aqonq li ani ink’a’ raj te’tz’aqonq. (Ch’ilmanq Li k’utuk jo’ li Kolonel, 33.)

Isi reetalil