li Jesus naq yoo chi k’utuk chire li palaw

Li Jesus kixtzoleb’ li tenamit chire li palaw, xb’aan laj James Tissot

25 febrero–3 marzo

Mateo 6–7

"Kixtzoleb’ chi wank xwankil"

Naq nakakawresi li k’utuk, tiklan rik’in xkawresinkil aawib’ laa’at. Tzol sa’ Mateo 6–7, ut tz’iib’a li musiq’ejil na’leb’ nakak’ul. A’in tatxtenq’a chixk’ulb’al li k’utb’esink chirix chan ru xtenq’ankil laa tzoleb’aal. Chirix a’an, tz’il rix li tusleb’ aatin a’in re xtawb’al aana’leb’ chirix li tzolok.

Xtz’iib’ankil li nakak’oxla

reetalil li wotzok

Xkanab’ankileb’ chi wotzok

Ye reheb’ li komon naq te’xwotz k’a’ruheb’ li raqal sa’ li aatin jultikanb’il chixb’een li tzuul li neke’xk’oxla naq ajb’ileb’ ru sa’ li kutan a’in. Waklesiheb’ xch’ool li komon re te’xye chik li na’leb’ chirix lix xe’xye lix komoneb’.

reetalil li k’utuk

Xk’utb’al li tzolʼlebʼ

Mateo 6–7

Wi naqab’i ut naqab’aanu li k’a’ru kixk’ut li Qaawa’, taawanq li qayu’am chi k’ojob’anb’il sa’ xb’een jun kawil k’ojleb’aal.

• K’a’ru li na’leb’ k’utb’il sa’ Mateo 6–7 li mas taak’anjelaq choq’ reheb’ li tzolb’ileb’ aab’aan? Naru taak’oxla xtz’iib’ankil chiru li pizarron junjunq reheb’ li raqal sa’ Mateo 6–7 li wankeb’ wi’ li na’leb’ a’in. Eb’ li komon te’ruuq chixsik’b’al ru jun reheb’ li raqal a’an re rilb’al xjunes, ut chirix a’an te’xtz’iib’a chiru li pizarron li musiq’ejil na’leb’ xe’xtzol. Chan ru neke’k’anjelak li na’leb’ a’in sa’ li qayu’am?

• Li Kolonel kixchoy li aatin kixjultika rik’in jun li jaljookil ru aatin li maare tixtenq’aheb’ li wankeb’ sa’ laa tzoleb’aal chixtawb’al ru k’a’ut naq aajel ru xyu’aminkil li k’a’ru kixk’ut li Kolonel (chi’ilmanq Mateo 7:24–27; chi’ilmanq ajwi’ Helaman 5:12). Re xtawb’al ru li jaljookil ru aatin a’in, eb’ li komon maare te’ruuq chi k’anjelak sa’ komonil re xyiib’ankil jun li kawil k’ojleb’aal rik’ineb’ li kok’ che’, li kok’ sek’, malaj jalan chik li k’anjeleb’aal, ut chirix a’an teek’e reetal ma kaw lix k’ojleb’aaleb’. Maare te’ruuq chixtz’iib’ankil chiru li yiib’anb’il wi’ li k’ojleb’aal li k’a’ru neke’ru chixb’aanunkil re xyu’aminkil li kixk’ut li Kolonel. Chan ru naq li na’leb’ a’in tooxtenq’a chixkuyb’al li kaq-sut-iq’ nachal sa’ li qayu’am?

Mateo 6:5–13

Li Kolonel kixk’ut chiqu chan ru tijok.

• Wi neketzol li tij kixye li Kolonel, maare tixtenq’aheb’ li komon chixk’oxlankil chan ru te’ruuq chixchaab’ilob’resinkil lix tijeb’ rik’in xb’aanunkil jo’ kixb’aanu li Qaawa’. Naru taaye reheb’ naq te’xtz’iib’a chiru li pizarron eb’ li aatin sa’ Mateo 6:9–13 (malaj sa’ Lukas 11:1–4) li nawulak chiruheb’. Naq naqak’oxla li raatin li Kolonel, k’a’ru naqatzol chirix li k’a’ru tento taawanq sa’ qach’ool naq nokotijok? K’a’ru naqatzol chirix li k’a’ru tento raj taqatz’aama ut tootijoq wi’? Maare us raj choq’ reheb’ li komon xyeeb’al junjunq li raatin li Kolonel jo’ chanru te’xye raj sa’ lix tijeb’ a’an. Jo’ jun eetalil, maare li aatin "Chak’e ta qe hoon li qawa re rajlal kutan" taaruuq raj chi yeemank, "Chak’e ta intenq’ankil re xk’eeb’al li nak’anjelak re lin junkab’al."

• Eb’ li tzolb’ileb’ aab’aan maare te’tenq’aaq rik’in rilb’al junjunq chik li tij kixye li Kolonel chiru lix Yuwa’, jo’ sa’ Mateo 26:36–42 ut sa’ Jwan 17. Taaruuq taab’oqeb’ li komon chirilb’aleb’ li raqal a’in, ut te’xsik’ xsumenkil li patz’om jo’ a’in: "K’a’ru naqatzol chirix li tijok rik’in chan ru naq kitijok li Kolonel?" ut "Chan ru nokoru chi tijok jo’ kitijok li Kolonel?" Re rilb’aleb’ chik li tij li neke’ru chixtz’ilb’al rix, chi’ilmanq Enos 1:3–17; Alma 31:26–35; 33:3–11.

• Ma wan k’a’ru xak’ul rik’in li tijok li tatruuq chixwotzb’al? Wi nakawotz li k’a’ru xak’ul laa’at, eb’ li komon maare te’raj ajwi’ xb’aanunkil. Li Awa’b’ej Thomas S. Monson kixye resil li k’a’ru kixk’ul a’an rik’in li tijok sa’ li raatin, "Consideren las bendiciones, (Liahona, noviembre 2012, 86–89). Naru tex’aatinaq chirix li na’leb’ sa’ li aatin a’in, ut sa’ li k’a’ru tz’iib’anb’il sa’ "Xkomon chik li k’anjeleb’aal." Li aatin "Tijok" sa’ li K’utul Raqal reheb’ li Loq’laj Hu naru tatxtenq’a.

Mateo 7:7–11

Li qaChoxahil Yuwa’ naxsumeheb’ li tij.

• Re xtenq’ankileb’ li komon re taanimanq xpaab’aaleb’ naq li Dios taarab’i ut tixsumeheb’ xtij,taaruuq taatz’iib’a, tz’aamank, sik’ok, ut b’oqok chiru li pizarron. Chirix a’an, b’oqeb’ li komon chixsik’b’al sa’eb’ li loq’laj hu aniheb’ li "ke’tz’aaman," "ke’sik’ok," ut "ke’b’oqok" (jo’ jun eetalil, chi’ilmanq 1 Nefi 11:1; Eter 2:18–3:6; Jose Smith—Resilal 1:11–17). K’a’ru naqatzol rik’in resileb’ li kristiaan a’in chirix xk’ulb’al xsumenkil li qatij?

• Naru natawman chik ru li aatin sa’ Mateo 7:7–11 rik’in li Santil Hu chi jaltesinb’il ru xb’aan laj Jose Smith, Mateo 7:12–17. Sa’eb’ li raqal a’in, eb’ lix tzolom li Jesus ke’wan xk’a’uxl chirix naq eb’ li te’ab’inq reheb’ ink’a’ te’raj xsik’b’al li yaal rik’in lix Choxahil Yuwa’. Naru taaye reheb’ li komon naq texk’oxla k’a’ raj ru te’xb’aanu wi junaq ramiiw ink’a’ naraj xsik’b’al li na’leb’ ut li osob’tesink rik’in li Qaawa’. K’a’ raj ru te’ruuq chixyeeb’al li komon re xtenq’ankil li amiiw a’in? Chan ru naq taaruuq raj te’roksi li raatin li Kolonel sa’ Mateo 7:7–11?

Mateo 7:15–20

Naru naqatz’il rix aniheb’ li yaalil profeet ut li b’alaq’il profeet rik’in li ruuchinihomeb’.

• Eb’ li komon sa’ laa tzoleb’aal naru naq xe’rab’i li b’alaq’il tzol’leb’ ut xkomon chik li tik’ti’ aj na’leb’ re li maa’us, maare sa’ li internet malaj b’araq chik. Naru ajwi’ naq xe’rab’i chi wech’mank rixeb’ lix moos li Qaawa’. Chan ru naq nakatru chixtenq’ankileb’ re te’xtaw ru chan ru xtz’ilb’aleb’ rix li b’alaq’il profeet ut b’alaq’il na’leb’ chiru li tz’aqal yaal? Taaruuq taak’ut chiruheb’ junjunq paay li ru che’, ut taapatz’ reheb’ k’a’ru nakanaw chirix lix toonaleb’. Chan ru naq li k’anjel a’in nokoxtenq’a chixtawb’al ru Mateo 7:15–20? Naru ajwi’ teeril sa’ komonil junjunq li raatineb’ li yo’yookil profeet. K’a’ru li "na’uuchin" rik’in xtaaqenkil li na’leb’ neke’xk’e eb’ a’an?

  ru che’

  Naru naqanaweb’ ru li yaalil profeet xb’aan li neke’uuchin wi’.

• Li aatin sa’ Mateo 7:15–20 naru chixnimob’resinkil lix paab’aaleb’ li komon chirix lix choxahil k’anjel li profeet aj Jose Smith. K’a’ru x’uuchin rik’in lix k’anjel laj Jose Smith? Re xtawb’al chik li na’leb’, chi’ilmanq li raatin li Elder Neil L. Andersen, "Laj Jose Smith," (Jolomil Ch’utub’aj-ib’ re octubre 2014). Chan ru naru naqoksi li jaljookil ru aatin re li Kolonel sa’ Mateo 7:15–20 re xch’olob’ankil xyaalal li Profeet aj Jose Smith chiruheb’ li qamiiw ut li wankeb’ sa’ li qajunkab’al?

reetalil li tzolok

Xb’oqb’aleb’ chi tzolok sa’ kab’l

Chiru li xamaan a’in, naq eb’ li komon neke’xtzoleb’ li k’iila sachb’a-ch’oolej li kixb’aanu li Kolonel, b’oqeb’ chixk’oxlankileb’ li sachb’a-ch’oolej li xe’k’ulman sa’eb’ li kutan a’in li xe’ril eb’ a’an, ma ninq malaj kok’eb’.

reetalil li k’anjeleb’aal

Xkomon chik li k’anjeleb’aal

Mateo 6–7

Eb’ li b’ich choq’ re li tzoleb’aal.

• K’a’ru chi na’leb’ chirix li tijok neke’xtzol li komon rik’in li raatinul li b’ich "A’an li tijok rajom li aamej"? (Eb’ li B’ich, ajl 86).

• Rik’in xb’ichankil malaj rab’inkil "Nimanb’ilaq li ki’ilok re Jehovah," Eb’ li B’ich, ajl  16, eb’ li komon te’ruuq chixk’oxlankil li k’a’ru x’uuchin li naxk’e chiqanaw naq laj Jose Smith kiwan choq’ profeet re li Dios (chi’ilmanq ajwi’ Tz. ut S. 135:3; "Smith, Jose, Alalb’ej, sa’ li K’utul Raqal reheb’ li Loq’laj Hu).

Eb’ li esilal chirix li tijok.

Li Awa’b’ej Boyd K. Packer kixye resil jun li tij ke’xb’aanu sa’ komonil sa’ lix junkab’al naq a’an ok re chi xik sa’ li ch’och’ California. Jun aj b’anonel kixye chaq reheb’ naq lix wakax ink’a’ taakanaaq chi yo’yo yal ta jun kutan chik. "Li qalal, toj ch’ina ka’ch’in kixye li tij. Xb’een wa kixpatz’ re li qaChoxahil Yuwa’ "chawosob’tesi li qayuwa’ sa’ lix xikik, ut osob’tesiho chiqajunil," toja’ naq ki’ok chi tz’aamank chi anchal xch’ool. Kixye, "At qaChoxahil Yuwa’, chawosob’tesi taxaq li qawakax re naq us taawanq."

"Sa’ California, xinye resil li na’leb’ a’an, ut xinye, "Tento tixtzol naq ink’a’ naqak’ul chixjunil li k’a’ru naqatz’aama sa’ li qatij."

"Kitzole’ jun li na’leb’ sa’ li kutan a’an, a’b’anan laa’in li xintzolok re, moko li walal ta. Naq xinsutq’i sa’ li domingo ewu, li wakax ak "us chik"" ("La oración y las impresiones del Espíritu," Liahona, noviembre 2009, 45).

Jun komon re li Iglees sa’ India, aj Mangal Dan Dipty xk’ab’a’, kixye: "Naq ka’ch’inin chaq, ninwulak sa’ li Iglees Luterano aj Aleman rajlal xamaan. Chi kok’ aj xsa’ nokoxik chi tzuul re tijok sa’ komonil. Sa’ jun kutan naq yoo li hab’, chixjunileb’ li yookeb’ chi tijok t’aqt’aqeb’, ut jun reheb’ laj jultikanel kitijok chi anchal xch’ool, ut kixtz’aama chiru li Qaawa’ naq taach’anaaq li hab’. Kisach qach’ool chiqajunilo naq kiraqe’ li hab’. Rik’in a’an xtikla lin paab’aal chirix li Dios ut li tijok" ("Mi trayecto como pionero de la India," Liahona, julio 2016, 21).

Re rilb’aleb’ chik li esilal chirix li tijok, chi’ilmanq li raqal "Voces de los Santos de los Últimos Días" sa’eb’ li Liahona.

Xchaab’ilob’resinkil li qak’utum.

Matk’oxlak naq maa’ani na’aatinak. "Eb’ li chaab’il patz’om hoonal neke’raj re xsumenkil. Neke’raj li tz’ilok-ix sa’ ch’oolej, li sik’ok, ut li musiq’anb’il na’leb’. Li hoonal na’oyb’eniik wi’ xsumenkil jun li patz’om naru taa’ok choq’ jun loq’laj hoonal re tz’ilok-ix sa’ ch’oolej. Mat-aaleek chixraqb’al li hoonal a’in sa’ junpaat rik’in xsumenkil aajunes aapatz’om, malaj rik’in xtikib’ankil jalan chik li na’leb’ " (Li k’utuk jo’ li Kolonel, 31).