li trigo li ok re chi q’ole’k

18–24 marzo

Mateo 13; Lukas 8; 13

"Ani wan xxik, chi’ab’inq"

Naq nakawil ru li hu, k’oxla k’a’ru te’xpatz’ li komon sa’ laa junkab’al naq neke’xyal xq’e chixtawb’al ru li esil sa’eb’ li jaljookil ru aatin. K’a’ru naru taach’a’ajko’q chiruheb’ xtawb’al ru? Chan ru naq rik’in tzolok tatruuq chixkawresinkil aawib’ re xsumenkil lix patz’omeb’?

Xtz’iib’ankil li nakak’oxla

reetalil li wotzok

Xkanab’ankileb’ chi wotzok

Numsi chiru li tzoleb’aal "Li na’leb’ re xchaab’ilob’resinkil lix tzolb’aleb’ li loq’laj hu aajunes" sa’ Kim, Taaqehin—Choq’ reheb’ li komon ut li junkab’al. Kanab’eb’ li komon sa’ li tzoleb’aal chixwotzb’al chan ru naq xe’tzolok chirix Mateo 13 ut chirix Lukas 8; 13.

reetaliil li k’utuk

Xk’utb’al li tzolʼlebʼ

Mateo 13:1–23

Tento taawanq qach’ool chi kawresinb’il re xk’ulb’al li raatin li Dios.

• Re xtenq’ankileb’ li ani tzolb’ileb’ aab’aan chixtawb’al ru li na’leb’ sa’ li jaljookil ru aatin chirix laj awinel, naru taak’am chaq sa’ li tzoleb’aal eb’ li iyaj, jun sek’ nujenaq chi ch’och’, ut jun chik sek’ nujenaq chi pek. Patz’ re jun reheb’ li komon sa’ li tzoleb’aal naq taaraw jun iyaj sa’ li ch’och’, ut jun chik sa’eb’ li pek. B’arwan chi iyaj taanimanq chi us, ut k’a’ut? Chan ru naq li k’anjel a’in naxk’am rib’ rik’in li jaljookil ru aatin sa’ Mateo 13:1–23? Chan ru naq nokoru chixkawresinkil li qach’ool chixk’ulb’al li raatin li Dios?

• Chan ru naru taawoksi li jaljookil ru aatin chirix laj awinel re xk’eeb’aleb’ xch’ool li komon sa’ laa tzoleb’aal re te’xkawresi lix ch’ooleb’ chixk’ulb’al li raatin li Dios? Naru taatz’iib’a Eb’ li tzolom ut Jalaneb’ chik chiru li pizarron. Ye reheb’ li komon naq te’ril sa’ Mateo 13:10–17, ut te’xsik’ chan ru naq li Kolonel kixye naq jalan wi’ eb’ lix tzolom chiruheb’ li jun ch’ol chik li ke’ab’in reheb’ lix jaljookil ru aatin? Chirix a’an, ye reheb’ li komon naq te’sik’oq sa’eb’ li raqal 18–23, re xsik’b’al k’a’ raj ru tixk’e "xjipal qaxik" ut k’a’ru taamutz’ob’resinq li qu chiru li k’a’ru re li musiq’ej. K’a’ru li qab’eresinkil li yooko chixk’ulb’al sa’ li kutan a’in rik’in li Dios ut rik’ineb’ lix moos? Chan ru naq laa’o yooko chixk’alenkil li "chaab’il ch’och’?" (raqal 23).

• Naru taab’oq junjunq reheb’ li komon sa’ li tzoleb’aal re naq kawresinb’ilaqeb’ chixk’utb’al jun raqal re li raatin li Elder Dallin H. Oaks, "Li jaljookil ru aatin chirix laj awinel," (Jolomil Ch’utub’aj-ib’ re abril 2015). Chan ru naq li raatin a’an nokoxtenq’a chixtawb’al ru li jaljookil ru aatin?

Mateo 13:24–35, 44–53

Eb’ lix jaljookil ru aatin li Jesus nokohe’xtenq’a chixtawb’al ru lix k’iijik, li k’a’ru tixk’ul, ut lix loq’alil lix Iglees.

• Chan ru naq tatruuq chixtenq’ankileb’ li komon sa’ laa tzoleb’aal chixtawb’al ru li yaalil na’leb’ chirix li Iglees li k’utb’il sa’eb’ lix jaljookil ru aatin li Jesus sa’ Mateo 13? Naru taatz’iib’a junjunq reheb’ li jaljookil ru aatin chiru li pizarron (chi’ilmanq li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al, ut Enseñanzas de los Presidentes de la Iglesia: José Smith, 309–323). Ye reheb’ li komon naq te’xtz’il rix li junjunq jaljookil ru aatin jo’ kok’ ch’uut, ut te’xsik’ k’a’ru neke’ru chixtzolb’al chirix lix k’iijik li Iglees, ut li k’a’ru tixk’ul. Jun na’leb’ re xch’utub’ankil chixjunil lix k’oxlahomeb’ li junjunq ch’uut, a’an xtz’iib’ankil jun nimla siram chiru li pizarron, ut xtz’iib’ankil chiru Lix Iglees li Kristo ("awa’b’ejihom re choxa"). Naq li junjunq ch’uut naxwotz li raatin, taaruuq te’xtz’iib’a sa’ li siram k’a’ru xe’xtzol chirix lix k’iijik ut li k’a’ru tixk’ul li Iglees.

  jun winq li yoo chi karab’k rik’in yooy

  Li awa’b’ejihom re choxa chanchan jun yooy reheb’ laj kar.

• K’a’ru naqatzol chirix xloq’al li wank sa’ li Iglees rik’ineb’ li jaljookil ru aatin chirix li b’ihomal sa’ li ch’och’ ut li lemtz’il q’ol, li neke’tawman sa’ Mateo 13:44–46? Maare wankeb’ li komon sa’ laa tzoleb’aal (malaj li ani nawb’il ru xb’aaneb’) li xe’xmayeja k’a’ruhaq—maare nim malaj ka’ch’in—re wank choq’ komon sa’ li Iglees. B’oqeb’ li komon sa’ li tzoleb’aal chixwotzb’al li k’a’ru xe’xmayeja eb’ a’an malaj li ani nawb’il ru xb’aaneb’ re wank sa’ li Iglees. K’a’ru li osob’tesink xe’xk’ul xb’aan a’an? Naru taawotz li raatin li Awa’b’ej Gordon B. Hinckley chirix laj taqlanel sa’ li armada sa’ "Xkomon chik li k’anjeleb’aal." Ye reheb’ li komon sa’ li tzoleb’aal naq te’xk’oxla k’a’ru eek’asinb’ileb’ chixmayejankil choq’ re li Iglees.

Mateo 13:24–30, 37–43

Sa’ roso’jik li ruchich’och’, li Qaawa’ tixch’utub’eb’ li tiikeb’ xch’ool ut tixsacheb’ laj maak.

• Chan ru naq tatruuq chixtenq’ankileb’ li komon chixtawb’aleb’ xna’leb’ rik’in li jaljookil ru aatin chirix li trigo ut li yib’ aj pim, li taatenq’anq reheb’ chi wank chi tiikeb’ chi paab’ank jo’ aj Santil Paab’anel sa’ Roso’jikeb’ li Kutan? Re xtikib’ankil, naru taapatz’ re jun li komon naq tixye chi k’osb’il ru k’a’ru naxye li jaljookil ru aatin, ut k’a’ru xyaalalil. Naru ajwi’ taak’ut xjalam-uuch li trigo ut li yib’ aj pim sa’ li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al. K’a’ru li na’leb’ naru naqak’ul sa’ li jaljookil ru aatin a’in choq’ re li kutan li wanko wi’? K’a’ut naq aajel ru xnawb’al naq li Qaawa’ naxkanab’eb’ lix santil paab’anel chi "k’iik chixkab’ichaleb’ " (Mateo 13:30) rik’ineb’ laj maak toj tixtaw xkutankil li q’olok? Chan ru naq nokoru chi wank chi kaw qapaab’aal sa’ li ruchich’och’ a’in, naq wan li maa’usilal yalaq b’ar sa’ qasutam? Sa’ Tzol’leb’ ut Sumwank 86 wan chik li na’leb’ chirix chan ru nak’anjelak li jaljookil ru aatin a’in sa’ roso’jikeb’ li kutan.

• Li raatin li Elder L. Tom Perry sa’ "Xkomon chik li k’anjeleb’aal" naxye naq naru naq li yib’ aj pim a’an li "yib’ aj k’a’aq re ru re li ruchich’och’ " li neke’ok sa’ li qayu’am. Re xtenq’ankileb’ li komon chixk’oxlankil chan ru naq te’ruuq chixtz’ilb’al rix li musiq’ejil yib’ aj pim, tz’iib’a chiruhatq kok’ hu junjunq yaalil na’leb’ chirix li evangelio, ut junjunq li b’alaq’il na’leb’ malaj b’aanuhom re li ruchich’och’. K’ojob’eb’ li kok’ hu sa’ jun k’uleb’aal. Chirix a’an, ye reheb’ li komon sa’ li tzoleb’aal naq te’xsik’ junjunq, ut te’aatinaq chirix b’arwan reheb’ yaaleb’, ut b’arwan reheb’ b’alaq’. (Naab’al reheb’ li yaalil ut b’alaq’il na’leb’ a’in wankeb’ chi yeeb’il resil sa’eb’ li yehom sa’ li jolomil ch’utub’aj-ib’—naru taasik’ aana’leb’ aran.) Chan ru naru taqab’aanu li kixye li Elder Perry re "xch’olaninkil li k’a’ru chaab’il" sa’ li qayu’am?

reetalil li tzolok

Xb’oqb’aleb’ chi tzolok sa’ kab’l

Naru taaye naq li k’a’ru taa’ilmanq ru sa’ li xamaan jun chik na’aatinak chirixeb’ naab’al li ke’taaqenk re li Jesus, ut moqon "ink’a’ chik ke’rochb’eeni" (Jwan 6:66). Ye reheb’ li komon naq te’ruuq chixtawb’al li na’leb’ li taatenq’anq reheb’ ut reheb’ li jun ch’ol chik chi wank chi tiik chixpaab’ankil li Kolonel.

reetalil li k’anjeleb’aal

Xkomon chik li k’anjeleb’aal

Mateo 13; Lukas 8; 13

"Ma ink’a’ tab’i’ yaal?"

Li Awa’b’ej Gordon B. Hinckley kixye resil li k’a’ru kixk’ul rik’in jun aj taqlanel sa’ jun armada aran Asia, li toja’ x’ok sa’ li Iglees:

"Laa’in xinnaw ru naq ok re chi sutq’iik sa’ li ch’och’ kiyo’la wi’. Xoo’aatinak chirixeb’ li yaalil na’leb’ re li evangelio, ut laa’in xinye, "Eb’ laa wech tenamitil maawa’eb’ aj Kristiano. K’a’ru taak’ul naq tatsutq’iiq sa’ kab’l jo’ aj Kristiano, ut jo’kan ajwi’ jo’ Kristiano aj Mormon?"

"A’an xraho’ li rilob’aal, ut xchaq’ok, "Eb’ lin junkab’al te’raho’q xch’ool. Naru naq tine’risi chaq ut tine’xk’oxla jo’ kamenaqin. Ut li k’a’ru yo’oninb’il inb’aan, ut lin trab’aaj, maare chixjunil taamaq’e’q chaq chiwu."

"Laa’in xinpatz’ re, "Ma wan aach’ool chixtojb’al xnimal li tz’aq a’in choq’ re li evangelio?"

"Xe’lememnak xya’al li ru naq xchaq’ok, "Ma ink’a’ tab’i’ yaal?"

"Laa’in xinxuutanak naq xinpatz’ li patz’om, ut xinye, "Hehe’, yaal ajwi’."

"Ut a’an xchaq’ok, "K’a’ chik ru naru xb’aanunkil?" " ("¿No es acaso la verdad?" Liahona, octubre1993, 4).

Tento taqach’olani li chaab’il.

Li Elder L. Tom Perry kixye, "Li najter aj xik’ ilonel re chixjunil li winqilal kixtaw k’iila k’a’aq re ru re rawb’al li yib’ aj pim yalaq b’ar. Kixtaw chan ru roksinkileb’ toj sa’ lix santilal li qochoch. Li yib’ aj k’a’aq re ru re li ruchich’och’ kixjek’i rib’ chi naab’al toj reetal naqak’oxla naq ink’a’ tooruuq chirisinkil sa’ qab’een. Na’ok chiru lix k’amal li kax mu ut li ulul ch’iich’ ut li neke’xnumsi chiru li iq’ sa’eb’ li ch’iich’ li qayoob’ahom re naq taqatzol qib’ ut re taqataw li sahil ch’oolejil. Li trigo ut li yib’ aj pim kik’iik sa’ xyanqeb’. Laj k’aak’alanel li yoo chirilb’al li awimq tento naq tixch’olani, rik’in chixjunil lix wankil, li k’a’ru us re taakawuq ut taatamq xch’ina-usil re naq li yib’ aj pim maak’a’aq xchaq’al ru choq’ re lix naq’ li qu chi moko li qaxik" ("Xtawb’al li tuqtuukilal li nakana ut xwaklesinkileb’ li junelikil junkab’al,"  Jolomil Ch’utub’aj-ib’ re octubre 2014).

Xchaab’ilob’resinkil li qak’utum

K’e aach’ool chixk’utb’al li tz’aqal tzol’leb’. K’e reetal naq li seraq’ sa’ laa tzoleb’aal taawanq chi kab’lanb’il sa’ xb’eeneb’ li tzol’leb’ li neke’tawman sa’eb’ li loq’laj hu. Naru taab’aanu a’in rik’in xtz’aamankil chiruheb’ li komon naq te’rileb’ ru li loq’laj hu chi rub’elaj, rik’in aatinak sa’ li tzoleb’aal chirixeb’ li loq’laj hu, ut rik’in xpatz’b’al reheb’ li komon sa’ li tzoleb’aal naq te’xwotz lix nawomeb’ xch’ool chirix li tz’aqal tzol’leb’. (Chi’ilmanq Li k’utuk jo’ li Kolonel, 20–21.)