li Jesus kixk’irtesi jun winq yeq roq

Wank li k’irtesink sa’ xxik’, xb’aan laj Jon McNaughton

4–10 marzo

Mateo 8–9; Markos 2–5

"Laa paab’aal xk’irtesink aawe"

Natikla xkawresinkil aawib’ chi k’utuk naq nakawil rik’in tijok sa’ Mateo 8–9 ut sa’ Markos 2–5. Li hu Kim, Taaqehin—Choq’ reheb’ li komon ut li junkab’al naru chi tenq’ank aawe chi tzolok, ut naru tixk’e aana’leb’ chirix li k’utuk, rochb’een li k’a’ru k’utb’il arin.

Xtz’iib’ankil li nakak’oxla

reetalil li wotzok

Xkanab’ankileb’ chi wotzok

Naru nakak’ameb’ chaq li jalam-uuch k’utk’u wi’ li yeeb’il resil sa’ Mateo 8–9 ut Markos 2–5 (chi’ilmanq Libro de obras de arte del Evangelio, ajl 40,  41, malaj LDS.org) malaj ut naru taatz’iib’a resileb’ chiru li pizarron. Ye reheb’ li komon naq te’xwotz k’a’ru neke’xnaw chirix li junjunq sachb’a-ch’oolej. K’a’ru li esilal nakataw sa’eb’ li sachb’a-ch’oolej a’in?

reetalil li k’utuk

Xk’utb’al li tzolʼlebʼ

Mateo 8–9; Markos 2; 5

Neke’uxman li sachb’a-ch’oolej naq a’an rajom xch’ool li Dios, ut naq wan qapaab’aal chirix li Jesukristo.

• Eb’ li komon sa’ laa tzoleb’aal maare ak xe’xtaw li xninqal ru na’leb’ naq yookeb’ chaq chixtzolb’aleb’ li sachb’a-ch’oolej sa’eb’ li ch’ol a’in (chi’ilmanq li tusam chirixeb’ li k’irtesink sa’ li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al). Naru taak’oxla xb’oqb’aleb’ li komon sa’ laa tzoleb’aal chixwotzb’al li na’leb’ xe’xtaw rik’in junaq li rochb’een, malaj rik’in chixjunil li tzoleb’aal.

• Re xtenq’ankileb’ li komon chixtawb’al ru chan ru naq li paab’aal wan chi b’ak’b’o rik’ineb’ li sachb’a-ch’oolej, taaruuq teeril junjunq li sachb’a-ch’oolejil k’irtesink li yeeb’ileb’ resil sa’ Mateo 8–9 ut sa’ Markos 2; 5, ut teesik’ resil lix paab’aal li ani k’irtesinb’il, malaj lix paab’aaleb’ jalaneb’ chik. (Wi maak’a’ li hoonal re aatinak chirix chixjunileb’ li sachb’a-ch’oolej, patz’ reheb’ li komon b’arwan li mas nawulak chiruheb’.) Eb’ li raqal a’in sa’eb’ li loq’laj hu te’ruuq chi k’anjelak eere naq nekex’aatinak: Mormon 9:15–21; Eter 12:12–16; Moroni 7:27–37; ut Tzol’leb’ ut Sumwank 35:8. K’a’ru neke’xk’ut li k’irtesink kixb’aanu li Kolonel, ut eb’ li raqal a’in sa’eb’ li loq’laj hu, chirix li paab’aal ut eb’ li sachb’a-ch’oolej? Chi’ilmanq ajwi’ li K’utul Raqal reheb’ li Loq’laj Hu, "Sachb’a-ch’oolej."

• Maare wankeb’ sa’ laa tzoleb’aal ani wankeb’ xpaab’aal ut yookeb’ chixsik’b’al jun li sachb’a-ch’oolej, a’ut ink’a’ xk’ulman li sachb’a-ch’oolej jo’ chanru neke’raj. K’a’ru neke’xk’ut li loq’laj hu ut eb’ li qajolominel sa’ li Iglees chirix a’in? Sa’ jun aatin k’ab’a’inb’il "Aceptar la voluntad y el tiempo del Señor," li Elder David A. Bednar kixye resil chan ru naq kixk’e xna’leb’eb’ jun sumal li wankeb’ chi jo’kan (Liahona, agosto 2016, 17–23; chi’ilmanq ajwi’ 2 Korintios 12:7–10; Tz. ut S. 42:43–52). Ma xe’ril li komon naq xe’osob’tesiik eb’ a’an malaj jalaneb’ chik us ta ink’a’ xe’xk’ul li sachb’a-ch’oolej li ke’raj raj xk’ulb’al?

• Naq nekeril resileb’ li sachb’a-ch’oolej sa’ Mateo 8–9 ut sa’ Markos 2; 5, maare wankeb’ li te’k’oxlanq re, ma naru naq te’k’ulmanq li k’a’aq re ru a’in sa’ li kutan a’in? Laj Moroni kixye chirix li kutan wanko wi’ laa’o: "yeeb’ilaq naq oso’jenaqeb’ li sachb’a-ch’oolej," a’ut kixye ajwi’ naq li Dios a’an jun Dios re sachb’a-ch’oolej, xb’aan naq li Dios "moko naxjal ta rib’ " (Mormon 8:26; 9:18–21; chi’ilmanq ajwi’ Moroni 7:27–29). Chan ru naq nakatru chixtenq’ankileb’ li komon re naq te’nimanq xpaab’aal naq li Dios wan xwankil chirosob’tesinkil lix yu’ameb’? Maare tatruuq chixtz’aamankil chiruheb’ naq te’xye resil li sachb’a-ch’oolej li xe’ril. Naru ajwi’ taak’oxla xwotzb’al resileb’ li sachb’a-ch’oolej sa’ resilal li Iglees (chi’ilmanq "Xkomon chik li k’anjeleb’aal").

jun ixq kixch’e’ xmaril li raq’ li Jesus

Kanab’ aawib’ chiru li Qaawa’, xb’aan xLiz Lemon Swindle

Mateo 8:23–27; Markos 4:35–41

Li Jesukristo wan xwankil chixk’amb’al chaq tuqtuukilal sa’ xyiheb’ li kaq-sut-iq’ re li yu’am a’in.

• Maare nakanaw chirix junjunq li ch’a’ajkilal yookeb’ chixk’ulb’al li komon sa’ laa tzoleb’aal. Rik’in naq chiqajunil wan li xyalb’al qix li naqak’ul sa’ li qayu’am, naq neke’ril li esilal sa’ Markos 4:35–41 naru naniman xpaab’aaleb’ li komon naq li Kolonel naru chixk’amb’al rik’ineb’ li tuqtuukilal. K’e jun ch’ina hu re li junjunq, ut ye reheb’ naq chi junpak’al te’xtz’iib’a jun li ch’a’ajkilal xe’xk’ul. Sa’ li junpak’al chik, ye reheb’ naq te’xtz’iib’a jun aatin sa’ Markos 4:35–41 li naxkawresiheb’ xch’ool chi xik rik’in li Kolonel naq yookeb’ chixk’ulb’al li ch’a’ajkilal. Kanab’eb’ li komon chixwotzb’al li k’a’ru xe’xtz’iib’a, wi wankeb’ xch’ool chixb’aanunkil.

• Li b’ich "Qaawa’, xwakli chik li iq’," Eb’ li B’ich, ajl 105, na’aatinak chirix li esilal sa’ Mateo 8:23–27 ut sa’ Markos 4:35–41. Maare eb’ li komon te’ruuq chixsik’b’al li aatin sa’ li b’ich li na’aatinak chirix li k’a’ru yeeb’il sa’eb’ li loq’laj hu. Naru ajwi’ taak’ut jun jalam-uuch li wan wi’ li yeeb’il resil (chi’ilmanq Libro de obras de arte del Evangelio, ajl 40) ut tex’aatinaq chirix li k’a’ru k’utk’u sa’ li jalam-uuch. Chan chik ru tatruuq chixtenq’ankileb’ li komon chixtawb’al ru lix yaalalil ut lix wankilal li jaljookil ru aatin a’in?

Markos 2:1–12

Re xkolb’aleb’ li ani sachso, tento taqayal qaq’e sa’ junajil.

• Li resilal li sachb’a-ch’oolej a’in naxk’ut chan ru naq aajel ru k’anjelak sa’ junajil re xtenq’ankil li Kolonel chixkolb’aleb’ li wankeb’ xch’a’ajkilal re musiq’ej malaj re tz’ejwalej. Li raatin li Elder Chi Hong (Sam) Wong, "Junajinb’il sa’ xk’amb’aleb’ wi’chik" (Jolomil Ch’utub’aj-ib’ re octubre 2014) naru texxtenq’a chi aatinak chirix li yaalil na’leb’ a’in. Naru taak’e xb’oqb’al jun li komon naq tixye resil li tz’iib’anb’il sa’eb’ li loq’laj hu, ut chirix a’an tixye resil li kixye li Elder Wong. K’a’ru naqatzol sa’ Markos 2:1-12 chirix li k’anjelak sa’ junajil re xkolb’aleb’ li ani te’raj tenq’aak? (chi’ilmanq ajwi’ Markos 3:24–25).

reetalil li tzolok

Xb’oqb’aleb’ chi tzolok sa’ kab’l

Re xk’eeb’aleb’ xch’ool li komon chirilb’al Mateo 10–12; Markos 2; ut Lukas 7; 11 chiru li xamaan chalel, ye reheb’ naq sa’eb’ li ch’ol a’in te’xtaw li na’leb’ li tixtenq’aheb’ chixb’aanunkil lix b’oqb’aleb’ ut lix k’anjeleb’ sa’ li Iglees.

reetalil li k’anjeleb’aal

Xkomon chik li k’anjeleb’aal

Mateo 8–9; Markos 2–5

Li Profeet aj Jose Smith kixk’irtesiheb’ li yaj.

Sa’ julio re 1839, ke’wan naab’aal reheb’ laj santil paab’anel li xe’isiik chaq sa’ li estado Missouri, li yookeb’ chi wark sa’eb’ li b’eleb’aal, sa’eb’ li muheb’aal t’ikr, malaj yal chiru ch’och’, wan wi’ li na’ajej Commerce, Illinois. Naab’al reheb’ yajeb’, ut laj Jose ut li xEmma Smith ak xe’tawa rik’in xtenq’ankileb’. Laj Wilford Woodruff kixch’olob’ li k’a’ru kik’ulman sa’ 22 xb’e li po julio: "A’an xkutankil lix wankilal li Dios. Ke’wan naab’al reheb’ laj santil paab’anel li yajeb’ sa’ xka’pak’al li nima’ [Mississippi], ut laj Jose xko’o sa’ xyiheb’, kixchapeb’ chi ruq’ ut chi kaw xyaab’ xkux kixtaqlaheb’ sa’ xk’ab’a’ li Jesukristo naq te’wakliiq chaq sa’ xch’aateb’ ut te’k’iraaq, ut eb’ a’an ke’pisk’ok chaq sa’ xch’aateb’, chi k’irtesinb’ileb’ xb’aan lix wankil li Dios. ... Relik chi yaal naq a’an xkutankil li sahil ch’oolejil (Willford Woodruff, tz’iib’anb’il esil, julio 22, 1839, Biblioteca de Historia de la Iglesia).

Li Elder Franklin D. Richards kixch’anab’ jun kaq-sut-iq’.

Li Elder Legrand Richards, jun reheb’ li Kab’laju chi Apostol, kixye resil li kixk’ul lix yuwa’ch’in, li Elder Franklin D. Richards, li yoo chaq chixq’axb’al li Palaw Atlantico jo’ aj jolominel re jun teep chi komon aj Britania li yookeb’ chaq chi xik Estados Unidos: "Li jukub’ li wan wi’ li Elder Richards mas xiwxiw naq kiwan wi’ xb’aan jun li kaq-sut-iq’, ut q’axal kiniman a’an, jo’kan naq laj b’eresinel re li jukub’ kichal rik’in li Elder Richards ut kixtz’aama chiru a’an naq tixpatz’ re li Qaawa’ re tixkol li jukub’ ut eb’ li wankeb’ chi sa’; lin yuwa’ch’in kijultiko’ re naq kiyeeman re naq taawanq xwankil sa’ xb’een li k’a’aq re ru wan, jo’kan naq kitaqe’ sa’ xtz’akil li jukub’ ut kixtaqsi li ruq’ chiru choxa, ut kixq’us li palaw ut lix b’oolam, ut sa’ junpaat ke’ch’ana" (sa’ resilal li jolomil ch’utub’aj-ib’, abril 1941, 84).

Xchaab’ilob’resinkil li qak’utum

Ch’olob’ lix nawom aach’ool chi kok’ aj xsa’. Wi nakaye xyaalaleb’ li yaalil na’leb’ chi anchal aach’ool, k’a’jo’ naq taaruuq chi wank xwankil sa’ xch’ooleb’ li ani tzolb’ileb’ aab’aan. Ink’a’ na’ajman ru naq utz’u’ujinb’il laa waatin malaj naq najt tat-aatinaq. Maare yal taach’olob’ xyaalal li sachb’a-ch’oolej naq wan li evangelio sa’ laa yu’am.