li Kristo naq kixk’e chi wa’ak li k’iila tenamit

K’ehomaqeb’ chi wa’ak, xb’aan laj Jorge Cocco

25–31 marzo

Mateo 14–15; Markos 6–7; Jwan 5–6

"Mexxiwak"

Naq nakakawresi aawib’ chixk’utb’al li k’a’ru wan sa’ Mateo 14–15; Markos 6–7; ut Jwan 5–6, sik’eb’ li esilal li te’k’anjelaq choq’ re laa tzoleb’aal. Naq yookat chixb’aanunkil, k’oxla chan ru xtenq’ankileb’ li komon sa’ laa tzoleb’aal chixsik’b’al li na’leb’ sa’eb’ li loq’laj hu.

Xtz’iib’ankil li nakak’oxla

reetalil li wotzok

Xkanab’ankileb’ chi wotzok

Jun na’leb’ chan ru xtikib’ankil li seraq’ chirixeb’ li jar ch’ol a’in, a’an xpatz’b’al re junjunq reheb’ li komon naq te’xsik’ junaq ch’ol li xe’ril ru ut te’chalq chi kawresinb’il re xk’utb’al jun li na’leb’ sa’ li jun ch’ol a’an li xwulak chiruheb’. Naq yookeb’ chi wotzok, li jun ch’ol chik chi komon sa’ li tzoleb’aal te’ruuq chixpatz’b’al li patz’om, malaj chixyeeb’al lix na’leb’eb’ chirix.

reetalil li k’utuk

Xk’utb’al li tzolʼlebʼ

Jwan 5:16–47

Li Jesukristo a’an li Ralal li qaChoxahil Yuwa’ li raaro xb’aan.

• Sa’ Jwan 5, li Jesus kixye junjunq li na’leb’ chirix a’an, chirix lix Yuwa’, ut chirix chan ru naq wankeb’ chirib’ileb’ rib’. Re xtenq’ankileb’ li komon chixtawb’aleb’ li na’leb’ a’in, naru taajacheb’ ru sa’ jar ch’uut ut taakanab’ chiru junjunq k’asal naq te’xtz’iib’a jo’ k’ihaleb’ li yaalil na’leb’ naru neke’xtaw sa’eb’ li raqal 16–47 chirix chan ru naq wan li Dios, li Jesukristo, ut chan ru naq wankeb’ chirib’ileb’ rib’. B’oqeb’ li jar ch’uut naq te’xye chixjunjunqaleb’ li yaalil na’leb’ xe’xtz’iib’a, toj reetal naq akaq xe’xwotz chixjunileb’ li yaalil na’leb’. Chan ru naq eb’ li yaalil na’leb’ a’in nokohe’xtenq’a chixtawb’al ru li qaChoxahil Yuwa’ ut li Ralal? Chan ru naq nokoru chixb’aanunkil jo’ kixb’aanu li Jesukristo sa’ ab’ink chiru li Yuwa’b’ej?

• Jun li k’anjel sa’ li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al naxb’oqeb’ li yookeb’ chi tzolok re te’xk’e reetal li junjunq sut naroksi li Jesus li aatin inYuwa’ sa’ Jwan 5. Kanab’eb’ junjunq li komon sa’ li tzoleb’aal naq te’xwotz k’a’ru xe’xtzol sa’ xb’aanunkil li k’anjel a’in. K’a’ru li na’leb’ xe’xk’ul chirix li qaChoxahil Yuwa’ ut li Ralal li raaro xb’aan? K’a’ru naxk’ut li evangelio li k’ojob’anb’il wi’chik, li jwal wi’chik nokoxtenq’a chixtawb’al ru ani li qaYuwa’, ut k’a’ut naq naqaloq’oni? Junjunq na’leb’ neke’ru chi tawmank sa’ li K’utul Raqal reheb’ li Loq’laj Hu rub’el li aatin "Dios, Roxichal li Dios", jo’ ajwi’ rub’el li atin "Dios el Padre" sa’ Leales a la Fe, 62–64. Naq yookex chi aatinak chirix a’in, sa’ komonil naru teeb’icha, teerab’i, malaj teeril ru "At Yuwa’," Eb’ li B’ich, ajl 188.

Mateo 14:16–21; Markos 6:33–44; Jwan 6:5–14

Li Kolonel naru chixnimob’resinkil ru li qamayej re xk’eeb’al chi uxmank li rajom.

• K’a’ru tixtenq’aheb’ li komon sa’ li tzoleb’aal chixtawb’al li na’leb’ li taak’anjelaq reheb’ rik’in resil li sachb’a-ch’oolej naq li Jesus kixk’e chi wa’ak li oob’ mil? Naru taapatz’ chan ru naq rilb’al resil li sachb’a-ch’oolej a’in naxnimob’resi lix paab’aaleb’ chirix lix wankil li Kolonel chirosob’tesinkil li junjunq reheb’. Ma xe’reek’a jun sutaq naq moko tz’aqal ta li k’a’ru reheb’ malaj lix seeb’aleb’ re xtz’aqob’resinkil ru junaq jayalihom malaj junaq taqlahom re li Dios? Ma xe’reek’a jun sutaq naq li Kolonel xnimob’resi ru malaj xk’ihob’resi lix k’anjeleb’ re taa’uxmanq li k’a’ru chanchan ink’a’ naru xb’aanunkil?

  eb’ li kaxlan wa ut li kar

  Li Jesus kixk’e chi wa’ak oob’ mil rik’in oob’ kaxlan wa ut wiib’ kar.

• Li video "La alimentación de los cinco mil" (LDS.org) naru chixtenq’ankileb’ li komon sa’ li tzoleb’aal chixk’oxlankil li sachb’a-ch’oolej li yeeb’il resil sa’eb’ li raqal a’in. K’a’ru li na’leb’ naqataw sa’ li esilal a’in li naxnimob’resi li qapaab’aal chirix li Kolonel? Chan ru naru li Kolonel chixk’eeb’al qe li musiq’ejil tzakemq? Jo’q’e xook’ehe’ chi wa’ak ut xooch’olaniik xb’aan li Jesukristo? Re xtawb’al jun sachb’a-ch’oolej sa’eb’ li kutan a’in li chanchan li sachb’a-ch’oolej reheb’ li kaxlan wa ut li kar, chi’ilmanq li video "Fe pura y sencilla" (LDS.org), malaj laj Paul VanDenBerghe, "El poder de la oración," Liahona, julio 2012, 50–52.

Mateo 14:22–33

Li Jesukristo nokoxb’oq chixkanab’ankil li qaxiw ut xkab’il rix qach’ool re naq jwal wi’chik tooruuq chi chalk rik’in a’an.

• Li esil sa’ Mateo 14:22-33 naru chixtenq’ankileb’ li komon sa’ li tzoleb’aal chixnimankil lix paab’aaleb’ chirix li Kolonel, ut li rajomeb’ chixtaaqenkil. Ye reheb’ li komon naq te’ril ru li esil a’in, ut naq te’xk’e reetal li aatin yeeb’il xb’aan li Kristo, xb’aan laj Pedro, ut xb’aaneb’ chik li apostol. Chan ru naq li raatin li Jesus kiru chixtenq’ankil laj Pedro re kiwan xpaab’aal chi elk chaq sa’ li jukub’ ut chi b’eek chiru li ha’? Chan ru naq li raatin li Jesus, "kawaq eech’ool," ut "mexxiwak" (raqal 27) neke’k’anjelak choq’ qe sa’ li kutan a’in? K’a’ru naru naqatzol rik’in laj Pedro chirix li wank choq’ xtzolom li Jesukristo ut xkanab’ankil qib’ chiru?

• Sa’ Mateo 14:22–33 wankeb’ li aatin li te’ruuq chireek’asinkileb’ li komon re naq jwal wi’chik te’xk’anjela lix paab’aal chirix li Kolonel. Patz’ reheb’ naq te’xsik’eb’ li aatin a’an li nawulak chiruheb’, naq te’xtz’iib’a chiru li pizarron, ut naq te’aatinaq chirix li k’a’ru xe’xtz’iib’a. Ma neke’ru li komon chireek’ankil li kireek’a laj Pedro? Naru taaye reheb’ naq te’xk’oxla ut te’xye resil li k’a’ru xe’xk’ul naq xe’xk’e xch’ool chixtaaqenkil li Kolonel, us ta ink’a’ xe’xnaw k’a’ru te’xk’ul rik’in xb’aanunkil. K’a’ru xe’xtzol rik’in a’an? Chan ru naq li Jesukristo xchal chixkolb’aleb’ sa’ xhoonal li xiw malaj xwiib’aleb’ xch’ool?

Jwan 6:22–71

Jo’ lix tzolom li Kristo, tento taawanq qach’ool chixpaab’ankil ut chixk’ulub’ankil li yaal, us ta wan naq ch’a’aj xb’aanunkil.

• Li na’leb’ yeeb’il resil sa’ Jwan 6 naru tooxtenq’a naq wan ani naxwech’ rix lix tzol’leb’ lix Iglees li Kristo, malaj b’ar xchal chaq, malaj k’a’ru nab’aanuman chi sa’. Sa’ li jun ch’ol a’in, wankeb’ laj taaqenel re li Jesus li ink’a’ ke’xk’ulub’a li raatin naq a’an li yo’yookil wa, ut naq ka’ajwi’ te’ruuq chi kole’k rik’in li mayej re lix tib’el ut lix kik’el. Re xtenq’ankileb’ li komon re te’xjuntaq’eeta li esilal a’in rik’in lix yu’ameb’, naru taatz’iib’aheb’ li patz’om jo’ li we’ chiru li pizarron ut taaye reheb’ li komon naq te’xsik’ xsumenkileb’ sa’eb’ li raqal 22–71: K’a’ru xe’xk’oxla li tenamit naq taak’ulmanq? (chi’ilmanq raqal 26). K’a’ru kixyeechi’i li Kristo reheb’ ruuchil a’an? (chi’ilmanq raqal 51). K’a’ru ink’a’ ke’xtaw ru li tenamit? (chi’ilmanq raqal 41–42, 52). Chan ru naq nokoru chixsik’b’al ru b’eek qochb’een li Kristo, us ta toj wan li qapatz’om? Ye reheb’ naq te’xk’oxla lix patz’om li Kolonel ut li kichaq’ok wi’ laj Pedro sa’eb’ li raqal 67–69. K’a’ruheb’ junjunq li tzol’leb’, li k’ojob’anb’il k’anjel, malaj xkomoneb’ chik "li aatin nak’ehok li junelik yu’am" li ka’ajwi’ natawman sa’ lix Iglees li Kristo li k’ojob’anb’il wi’chik? B’oqeb’ li komon sa’ li tzoleb’aal re te’xwotz chan ru naq eb’ li tzol’leb’ ut li k’ojob’anb’il k’anjel a’in xe’rosob’tesiheb’ a’an ut eb’ lix junkab’aleb’. Re xtawb’al chik li na’leb’ k’eeb’il xb’aan jun li yo’yookil apostol, ye reheb’ li komon naq te’ril ru li raatin li Elder M. Russell Ballard sa’ "Xkomon chik li k’anjeleb’aal."

reetalil li tzolok

Xb’oqb’aleb’ chi tzolok sa’ kab’l

Eb’ li komon sa’ li tzoleb’aal maare te’eek’asiiq chirilb’aleb’ ru li raqal choq’ re li tzoleb’aal sa’ li jun xamaan chik wi taaye reheb’ naq li na’leb’ neke’ril ru maare tixchaab’ilob’resi choq’ reheb’ li jolomil ch’utub’aj-ib’ li taachalq. Ye reheb’ naq te’chalq sa’ li tzoleb’aal jun chik chi kawresinb’il chixwotzb’al li na’leb’ xe’xtzol.

reetalil li k’anjeleb’aal

Xkomon chik li k’anjeleb’aal

Mateo 14–15; Markos 6–7; Jwan 5–6

"Ma teeraj ajwi’ xik laa’ex?"

Chirix xyaab’asinkil Jwan 6:68–69, li Elder M. Russell Ballard kixye:

"Wankeb’ li toj ch’a’aj neke’xk’ul lix b’oqb’aleb’ rik’in li Kristo naq te’paab’anq ut ink’a’ te’xkanab’. Wankeb’ li tzolom li neke’elajik rik’in junaq li taqlahom malaj junaq k’utum sa’ li Iglees. Wankeb’ li neke’xtaw ch’a’ajkilal sa’ li k’a’ru xk’ulman qik’in junxil, malaj sa’ xmajelaleb’ li komon ut li jolominel, junxil jo’ ajwi’ anajwan. Wankeb’ li neke’xtaw naq ch’a’aj wank sa’ jun li paab’aal li naraj naab’al li k’anjel. Ut wankeb’ ajwi’ li "xe’lub’ sa’ xb’aanunkil li us" [Tz. ut S. 64:33]. Jo’kan naq wankeb’ li neke’wiib’an sa’ xpaab’aal, ut neke’xpatz’ ma usaq raj wi te’xtaaqeheb’ li “ke’sutq’iik chirixeb’, ut ink’a’ chik ke’rochb’eeni” li Jesus.

"Wi yookat chi wiib’ank sa’ laa paab’aal, ninpatz’ aawe li k’a’ru kixpatz’ laj Pedro: “Ani aj-ik’in tatxik?”

"... Chi toj maji’ nakasik’ li xuwajelil b’e re tat-elq, nink’e laa ch’ool naq taaxaqab’ aawib’ ut tatk’oxlanq chi us, xb’een wa chiru xkanab’ankil li k’a’ru xatxk’am chixtawb’al lix nawom aach’ool chirix lix evangelio li Jesukristo junxil. Xaqab’ aawib’ ut k’oxla li k’a’ru ak xaweek’a arin ut k’a’ut naq xaweek’a. K’oxlaheb’ li hoonal naq li Santil Musiq’ej xk’utb’esi chawu li na’leb’ re junelik q’e kutan" ("Ani aj-ik’in tooxik?" Jolomil Ch’utub’aj-ib’ re octubre 2016).

Xchaab’ilob’resinkil li qak’utum

Ab’in. "Li ab’ink a’an jun b’aanuhom re rahok. ... Patz’ re li qaChoxahil Yuwa’ naq tatxtenq’a chixtawb’al ru li k’a’ru neke’xye li komon sa’ li tzoleb’aal. Naq taak’e aach’ool chirab’inkil lix na’leb’eb’, li te’xye ut li ink’a’ te’xye, q’axal wi’chik tat-ok chixtawb’al ru li neke’raj ru, lix patz’omeb’, ut li rajomeb’ xch’ool" (Li k’utuk jo’ li Kolonel, 34).