li Kristo naq kijaltesiik ru

Li jaltesiik ru, xb’aan laj Carl Heinrich Bloch

1–14 abril

Mateo 16–17; Markos 9; Lukas 9

"Laa’at li Kristo"

K’a’ruheb’ li esil xawab’i malaj xawil ru sa’ li jolomil ch’utub’aj-ib’ xnume’, li naxaqab’an xwankileb’ li raqal a’in? Naq nakattzolok, k’oxla li rajomeb’ ru li komon sa’ laa tzoleb’aal, ut tz’iib’a li na’leb’ nakak’ul.

Xtz’iib’ankil li nakak’oxla

reetalil li wotzok

Xkanab’ankileb’ chi wotzok

Jun na’leb’ re taak’eheb’ xch’ool li komon sa’ laa tzoleb’aal chixtzolb’aleb’ li loq’laj hu xjuneseb’ ut rik’in lix junkab’aleb’, a’an xkanab’ankileb’ rajlal xamaan chixwotzb’al chan ru naq yookeb’ chi osob’tesiik rik’in xtzolb’aleb’ li loq’laj hu. Jo’ jun eetalil, chan ru naq xtzolb’aleb’ li jar ch’ol a’in xtenq’aheb’ naq yookeb’ chirilb’al li jolomil ch’utub’aj-ib’?

reetalil li k’utuk

Xk’utb’al li tzol’leb’

Mateo 16:13–17

Nachal xnawom qach’ool chirix li Kristo chi k’utb’esinb’il.

• Ma x’ajman ru chiru junaq komon sa’ laa tzoleb’aal naq tixch’olob’ chiru anihaq chan ru naq naxnaw naq yaal li evangelio? Sa’ Mateo 16:13–17, k’a’ru kixk’ut li Kolonel chirix chan ru naq naqak’ul lix nawom qach’ool? Naru taawotz chan ru naq laj Alma kixk’ul lix nawom xch’ool (chi’ilmanq Alma 5:45–46), malaj li k’a’ru kixk’ut li Qaawa’ chiru laj Oliver Cowdery chirix li k’utb’esink (chi’ilmanq Tz. ut S. 6:14–15, 22–23; 8:2–3). K’a’ raj ru nakak’oxla naq kixye laj Pedro malaj laj Alma malaj laj Oliver Cowdery wi ta wan ani kipatz’ok reheb’ chan ru naq neke’xnaw naq yaal li evangelio?

• Ma wankeb’ tana’ li komon sa’ laa tzoleb’aal li yookeb’ chi tijok re xk’ulb’al li k’utb’esinb’il na’leb’, a’ut ink’a’ neke’xnaw chan ru naq te’xnaw ru naq neke’xk’ul? Li Elder David A. Bednar kixk’ut wiib’ chi na’leb’ chirix li saqen re xk’utb’al chan ru naq naqak’ul li k’utb’esinb’il na’leb’; maare taawaj xk’utb’al lix na’leb’ li Elder Bednar chiruheb’ li komon sa’ li tzoleb’aal (chi’ilmanq "El Espíritu de Revelación," Liahona, mayo 2011, 87–90; chi’ilmanq ajwi’ li video "Modelos de luz: El espíritu de revelación" sa’ LDS.org). K’a’ chik ru chi na’leb’ malaj esil sa’eb’ li loq’laj hu neke’ru chixk’oxlankil eb’ li komon sa’ laa junkab’al li taatenq’anq re anihaq chixnawb’al ru li k’utb’esink naxk’ul? (Jo’ jun eetalil, chi’ilmanq 1 Reyes 19:11–12; Galatas 5:22–23; Enos 1:1–8; Tz. ut S. 8:2–3.)

Mateo 16:13–19; 17:1–9

Eb’ lix laawil li tijonelil aajeleb’ ru choq’ re li qakolb’al.

• Re xtikib’ankil li seraq’ chirixeb’ lix laawil li tijonelil, taaruuq taatz’iib’a jun patz’om jo’ a’in chiru li pizarron: K’a’ruheb’ lix laawil li tijonelil? Ani nak’amok reheb’ li laaw? Chan ru naq neke’k’eeman lix laawil li tijonelil? Taaruuq ajwi’ taawotz junjunq raqal sa’eb’ li loq’laj hu li sumenb’il wi’ eb’ li patz’om a’in, jo’ sa’ Mateo 16:19; Tzol’leb’ ut Sumwank 107:18–19; 128:8–11; 132:18–19, 59; ut Jose Smith—Resilal 1:72. Eb’ li komon sa’ li tzoleb’aal te’ruuq chixtawb’al xkomon chik li na’leb’ rik’in rilb’al Manual 2: Administración de la Iglesia (2010), 2.1.1; li raatin li Elder Neil L. Anderson, "Poder en el sacerdocio" (Liahona, noviembre 2013, 92–95); malaj Leales a la Fe, 166–167). K’e xhoonaleb’ li komon sa’ li tzoleb’aal re te’tzoloq chirix li patz’om xe’xsik’ ru. Chirix a’an, te’ruuq chixk’utb’al chirib’ileb’ rib’ li k’a’ru xe’xtzol.

• Jun seraq’ chirix chan ru naq laj Pedro ut xkomoneb’ chik li apostol ke’xk’ul xlaawil li tijonelil sa’ xb’een li tzuul re li jaltesiik-u naru chixtenq’ankileb ’ li komon sa’ li tzoleb’aal re te’kawuq lix nawomeb’ xch’ool chirix naq ke’k’ojob’aman wi’chik xlaawil li tijonelil sa’ roso’jikeb’ li kutan. Re xtikib’ankil li seraq’ a’in, naru taapatz’ re xyijach li tzoleb’aal naq te’tzoloq sa’ Mateo 17:1–9 (chi’ilmanq ajwi’ li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al) ut lix yijach chik naq te’tzoloq sa’ Tzol’leb’ ut Sumwank 110. Chirix a’an te’ruuq chixwotzb’al chirib’ileb’ rib’ li k’a’ru xe’xtzol, ut te’xk’e reetal chan ru naq juntaq’eeteb’ li wiib’ chi esil. Li video "Las llaves del sacerdocio: La restauración de las llaves del sacerdocio" (LDS.org) naru ajwi’ tatxtenq’a.

• Ma neke’xtaw ru li komon sa’ laa tzoleb’aal chan ru naq eb’ lix laawil li tijonelil neke’rosob’tesi lix yu’ameb’? Re xtenq’ankileb’, naru taaye reheb’ naq te’ilok sa’ li Manual 2, 2.1.1, re xtawb’al aniheb’ li neke’k’amok reheb’ li laaw. Aniheb’ li komon a’in sa’ laa teep ut laa oqech? Maare tatruuq chixtz’iib’ankil lix k’ab’a’eb’ chiru li pizarron, malaj taapatz’ re junjunq reheb’ naq te’raatina li tzoleb’aal. Chan ru naq neke’xk’anjelaheb’ lix laawil li tijonelil li k’eeb’il reheb’ re xb’eresinkil lix k’anjel li tijonelil sa’ lix b’oqb’aleb’? Chan ru naq osob’tesinb’ilo rik’in lix k’anjeleb’ laj b’eresinel a’in re li tijonelil?

xjalam-uuch laj Pedro, chi chapcho li laaw sa’ ruq’

Eb’ lix laawil li tijonelil, a’aneb’ li wankilal chixb’eresinkil lix k’anjel li tijonelil.

Markos 9:14–30

Naq yooko chixsik’b’al xnimankil li qapaab’aal, tento xb’een wa toowanq chi chapcho chiru li paab’aal li ak wan qe.

• Li Elder Jeffrey R. Holland kixye resil jun yuwa’b’ej li kiraj naq taak’iraaq li ralal re xk’utb’al chan ru naq tento taqajilosi qib’ rik’in li Qaawa’ naq naqeek’a naq moko tz’aqal ta qapaab’aal (chi’ilmanq "Creo," Liahona, mayo 2013, 93–95). Oxib’ xb’eenil na’leb’ re li raatin wan chi tz’iib’anb’il sa’ "Xkomon chik li k’anjeleb’aal." Maare tatruuq chixjachb’al li tzoleb’aal sa’ kaahib’ jachal, ut taaye re jun jachal naq te’aatinaq chirix Markos 9:14–30, ut li oxib’ chik naq te’aatinaq chirix li oxib’ chi na’leb’ sa’ li raatin li Elder Holland. Taaruuq te’xsik’eb’ li na’leb’ sa’ li raqal a’in re li Santil Hu li nokoxtenq’a chixnimob’resinkil li qapaab’aal. Li junjunq ch’uut taaruuq chixwotzb’al rik’in li rela’ li tzoleb’aal li na’leb’ xe’xk’oxla rik’in seraq’ik.

reetalil li tzolok

Xb’oqb’aleb’ chi tzolok sa’ kab’l

Re xk’eeb’aleb’ xch’ool li komon chi tzolok sa’ kab’l chiru li xamaan a’in, ye reheb’ naq li jun chik tusleb’ aatin sa’ Kim, Taaqehin—Choq’ reheb’ li komon ut li junkab’al naru chixtenq’ankileb’ a’an ut eb’ lix junkab’al re naq jwal wi’chik te’xk’oxla li Paswa. Jo’kan ajwi’, naru taaye reheb’ naq chiru li domingo re Paswa, us raj xb’oqb’aleb’ li komon li ink’a’ neke’chal, malaj li jalan chik xpaab’aaleb’ chi chalk sa’ li iglees.

reetalil li k’anjeleb’aal

Xkomon chik li k’anjeleb’aal

Mateo 16–17; Markos 9; Lukas 9

Eb’ li awa’b’ej reheb’ li k’anjenel ch’uut neke’xk’ul li wankilal chi wotzb’il.

"Chixjunileb’ li k’anjenel ch’uut neke’k’anjelak chi b’eresinb’il xb’aan li obiisp malaj li awa’b’ej re li oqech, li nak’amok re xlaawil li jolomink. Eb’ li awa’b’ej reheb’ li k’anjenel ch’uut ut eb’ lix tenq’ aj k’ehol na’leb’ ink’a’ neke’xk’ul li laaw. Neke’xk’ul li wankilal chi wotzb’il, re k’anjelak sa’ lix b’oqb’aleb’ " (Manual 2, 2.1.1).

Oxib’ li na’leb’ nokohe’xtenq’a chixtawb’al chik li qapaab’aal.

Chirix xyeeb’al li esil li natawman sa’ Markos 9:14–29, li Elder Jeffrey R. Holland kixye:

"Li xb’een na’leb’ chirix li esil a’in a’an naq sa’ xk’eeb’al reetal lix ch’a’ajkilal chirix li paab’aal, li yuwa’b’ej xb’een wa kixye resil li wan wi’ xkawilal, ut ka’ajwi’ chirix a’an kixye resil lix majelal. Li xb’een raatin ki’el sa’ junpaat, ut kixch’olob’ xyaalal lix paab’aal: "Qaawa’, ninpaab’." Nawaj xyeeb’al re chixjunileb’ li neke’raj chik xpaab’aaleb’, chijultiko’q eere li winq a’in! Sa’ xhoonal li xiw, malaj xwiib’al eech’ool, malaj ch’a’ajkilal, xaqab’omaq eerib’ sa’ xb’een li k’a’ru ak xek’ul, us ta moko nim ta a’an. ... Chapomaq chi kaw li k’a’ru ak nawb’il eeb’aan ut xaqab’omaq eerib’ chi kaw toj reetal naq taachalq chik xkomon lee nawom. ... Maak’a’ naxye jo’ nimal lee paab’aal ut jo’ k’ihal lee nawom—li na’leb’ aajel ru a’an naq anchalaq eech’ool chirix li paab’aal li ak wan eere ut li yaal li ak nawb’il eeb’aan.

"Li xkab’ na’leb’ chanchan li xb’een, us ta jalb’il b’ayaq ru. Naq nachal li ch’a’ajkilal ut neke’wakli li patz’om, meetikib’ xsik’b’al eepaab’aal rik’in xyeeb’al jo’ nimal li maak’a’ eere, xb’aan a’an ajwi’ li tiklaak rik’in xmaak’a’il lee paab’aal. ... Ink’a’ yookin chixyeeb’al naq teeb’aanu eerib’ jo’ wan eepaab’aal naq maak’a’. Yookin b’an chixyeeb’al naq texwanq chi tiik eeru rik’in li paab’aal li ak wan eere. ... Naru tex’aatinaq chirix lee patz’om chi saqen ru a’ yaal jo’ na’ajman ru; li yu’am nujenaq rik’in li patz’om chirix li k’a’aq re ru. A’b’anan wi nakawaj li k’iraak choq’ aawe ut choq’ re laa junkab’al, maakanab’eb’ li patz’om a’an chixramb’al li paab’aal chixk’anjelankil jun li sachb’a-ch’oolej. ...

"Li rox na’leb’: Naq nachal li ch’a’ajkilal malaj xkab’il rix laa ch’ool, matxuwak chixpatz’b’al aatenq’ankil. Wi naqaj a’an chi tuulan ut chi tiik qach’ool jo’ li yuwa’b’ej a’in, naru naqak’ul. Sa’eb’ li loq’laj hu, yeeb’il resil li rajom ch’oolej a’in jo’ "chi tiik eerajom," ut nab’aanuman "chi anchal li rajom eech’ool, chi maajun ka’pak’alil ut maajun b’alaq’il chiru li Dios" [2 Nefi 31:13]. Ninch’olob’ xyaalal naq wi nokotz’aaman chi jo’ka’in, li Dios tixtaqla qatenq’ankil chalen chaq xka’pak’alil li tz’apleb’ t’ikr, re xkawob’resinkil li qapaab’aal ("Creo," Jolomil Ch’utub’aj-ib’ re abril 2013).

XChaab’ilob’resinkil li qak’utum

Patz’eb’ li patz’om li neke’xb’oq chaq li xnawom ch’oolej. Wi nakapatz’eb’ li patz’om li neke’xk’eheb’ xch’ool li komon chixyeeb’al lix nawomeb’ xch’ool, a’an naru chixk’eeb’al xb’oqb’al li Musiq’ej. Jo’ jun eetalil, naq nekex’aatinak chirix Mateo 16:13–17, taaruuq raj taapatz’, "K’a’ru xetzol chirix li Kolonel li xkawob’resi lix nawom eech’ool naq a’an li Kolonel?" (Chi’ilmanq Li k’utuk jo’ li Kolonel, 32.)