Kim, Taaqehin
15–21 abril. Li Paswa: "At kamk, b’ar wank laa wankil?"

"15–21 abril. Li Paswa: "At kamk, b’ar wank laa wankil?" " Kim, Taaqehin—Choq’ re li Dominkil Tzoleb’aal: Li Ak’ Chaq’rab’ 2019 (2019)

"15–21 abril. Li Paswa," Kim, Taaqehin—Choq’ re li Dominkil Tzoleb’aal: 2019

Jalam-uuch
li muqleb’aal sa’ li awimq

15–21 abril

Li Paswa

"At kamk, b’ar wank laa wankil?"

Naq nakakawresi aawib’ chi k’utuk chiru li xamaan a’in, k’oxla chan ru naq li seraq’ik sa’ laa tzoleb’aal sa’ li domingo re Paswa naru chixwaklesinkil li paab’aal chirix li Jesukristo ut lix tojb’al rix li maak xb’aan a’an.

Xtz’iib’ankil li nakak’oxla

Jalam-uuch
reetalil li wotzok

Xkanab’ankileb’ chi wotzok

Patz’ reheb’ li komon chan raj ru te’xsume li patz’om jo’ "K’a’ru lix tojb’al rix li maak xb’aan li Jesukristo?" ut "Chan ru naru tink’ul li osob’tesink rik’in lix tojb’al rix li maak xb’aan li Kristo?" Ma xe’ril ru junjunq raqal sa’eb’ li loq’laj hu chiru li xamaan a’in li taatenq’anq reheb’ chixsumenkileb’ li patz’om a’in?

Jalam-uuch
reetalil li k’utuk

Xk’utb’al li tzol’leb’

Li Jesukristo nokoxkol chiru li maak ut li kamk, nokoxkawob’resi sa’ xq’unal qu, ut naxk’ojob’ qach’ool sa’eb’ lix yalb’al qix.

  • Ma neke’xtaw ru li komon sa’ laa tzoleb’aal naq rochb’een xq’axb’al ru li maak ut li kamk, li Jesukristo naru ajwi’ chixk’ojob’ankil qach’ool sa’ lix yalb’al qix, ut chiqakawob’resinkil sa’ lix q’unal qu? Jun na’leb’ re xtenq’ankileb’ chixtawb’aleb’ ru li na’leb’ a’in, a’an xtz’iib’ankileb’ li aatin a’in chiru li pizarron: Maak, Kamk, Xyalb’al qix, Xq’unal qu. Ye re li junjunq komon sa’ li tzoleb’aal naq taaril ru jun reheb’ li raqal sa’eb’ li loq’laj hu li neke’tawman sa’ "Xkomon chik li k’anjeleb’aal," ut te’xk’oxla chan ru naq li Kolonel nokoxtenq’a chixq’axb’al ru malaj chixkuyb’al li k’a’ru tz’iib’anb’il. Eb’ li komon sa’ li tzoleb’aal neke’ru chixtz’iib’ankil li k’a’ru neke’xtzol sa’eb’ li raqal a’in reheb’ li loq’laj hu rub’el li junjunq aatin, ut te’xch’olob’ xyaalal li Kolonel ut lix tojb’al rix li maak xb’aan a’an.

  • K’a’ru neke’xk’ut li loq’laj hu chirix li tz’aq kixtoj li Jesukristo re qakolb’al? Jo’ jun eetalil, chi’ilmanq Lukas 22:39–44; Mosiah 3:7; ut Tzol’leb’ ut Sumwank 19:16–19. K’a’ru lix tz’aq kixtoj li qaChoxahil Yuwa’? (chi’ilmanq Jwan 3:16).

    Jalam-uuch
    li Kristo chiru li krus

    Xkamik li Kristo chiru krus, xb’aan xLouise Parker

  • Rub’elaj li tzoleb’aal k’oxla xyeeb’al re junjunq komon sa’ li tzoleb’aal naq te’xk’am chaq jun aatin yeeb’il sa’ jun jolomil ch’utub’aj-ib’ li naxk’ut chan ru naq li Kolonel nokorosob’tesi rik’in lix tojb’al rix li qamaak xb’aan (re rilb’al junjunq reheb’ chi’ilmanq "Xkomon chik li k’anjeleb’aal"). Chan ru naq li raatineb’ li yo’yookil profeet naxnimob’resi li qana’leb’ chirix li osob’tesink nachal rik’in lix tojb’al rix li maak xb’aan li Kolonel? Chan ru naq neke’xkawob’resi lix nawom qach’ool chirix lix wankil lix tojb’al rix li maak?

  • Maare jun ch’ina k’anjel taatenq’anq chixk’utb’al chan ru naq jalan wi’ li ch’aje’k chiru li maak rik’in tz’aqob’resiiq qe qu: Naru taatz’iib’a chiru li pizarron junjunq aatin sa’ xtiklajik Moroni 10:32, a’ut taatz’iib’a chi ink’a’ us, ut chi wank xmajelal. Chirix a’an, kanab’eb’ li komon sa’ li tzoleb’aal chixtuqub’ankil li majelal. Ma xtz’aqlok ru li ch’a’ajkilal rik’in a’in? K’a’ru li na’leb’ naqatzol rik’in li raqal a’in ut li ch’ina k’anjel a’in chirix lix wankilal lix tojb’al rix li maak choq’ qe? Li raatin li Awa’b’ej Dieter F. Uchtdorf maare taaruuq ajwi’ chatenq’ankil: "Wi li kolb’a-ib’ ka’ajwi’ naraj naxye risinkil li qapaaltil ut li qamaak, jo’kan raj li kolb’a-ib’—us ta k’a’jo’ xchaab’ilal—moko naxtz’aqob’resi ta li rajom li qaYuwa’ choq’ qe. Li rajom q’axal taqenaq chiru a’in: a’an naraj naq li ralal xk’ajol te’wulaq jo’ chanchan a’an" ("Li maatan re usilal,"  Jolomil Ch’utub’aj-ib’ re abril 2015).

  • Wankeb’ li esilal ut li jaljookil ru aatin li neke’ru chiqatenq’ankil re taqataw ru lix tojb’al rix li maak xb’aan li Kristo. Jo’ jun eetalil, li Elder Jeffrey R. Holland kixye resil wiib’ saaj winq riitz’ineb’ rib’ li yookeb’ chi taqe’k chiru jun uul, sa’ lix yehom "Raqleb’ aatin, rahok, uxtaan tz’aqal sa’ junajil" (Jolomil Ch’utub’aj-ib’ re abril 2015). Wan ajwi’ jun video chirix a’an sa’ LDS.org. Malaj ut texruuq chirilb’al sa’ komonil "Handel’s Messiah: Debtor’s Prison" (LDS.org; chi’ilmanq resil sa’ "Xkomon chik li k’anjeleb’aal") ut tex’aatinaq chirix chan ru naq lix tojb’al rix li maak xb’aan li Kristo nokoxkol chiru li tz’alam wanko wi’.

Wankeb’ laj yehol nawom sa’ li Ak’ Chaq’rab’ li ke’xch’olob’ xyaalal naq li Jesukristo kixq’ax ru li kamk.

  • Naru taak’oxla xnumsinkil resil li xb’een Paswa sa’eb’ li loq’laj hu—naq kiwakli li Jesukristo chi yo’yo. Naru taatz’aama re jun komon sa’ li tzoleb’aal naq tixye resil a’an rik’in tz’aqal li raatin (chi’ilmanq Jwan 20:1–17). Taaruuq ajwi’ taak’ut jun video chirix li Santil Hu, jo’ "Himno de la Pascua de Resurrección" (LDS.org).

  • Maare eb’ li komon jwal wi’chik naq te’xtaw ru k’a’ut naq aajeleb’ ru laj yehol nawom chirix lix waklijik li Jesukristo chi yo’yo wi te’xk’oxla naq a’aneb’ raj aj ch’olob’anel chaq’rab’ malaj aj periodista li yookeb’ chixtz’ilb’al rix ma yaal naq kiwakli li Kristo chi yo’yo. Ye reheb’ naq te’xtaw ani sa’eb’ li loq’laj hu te’ruuq chi wank choq’ aj yehol nawom chirix (chi’ilmanq Mateo 28:1–10; Lukas 24:13–35; Jwan 20:19–29; 1 Korintios 15:3–8, 55–58). Te’ruuq ajwi’ chixtz’iib’ankil jun ch’ina esil chirix k’a’ raj ru te’xye li kristiaan a’in wi ta te’ch’olob’anq sa’ jun raqleb’aal aatin, malaj naq te’xye resil choq’ re jun periodico.

  • Jun na’leb’ re taachamo’q li qanawom chirix lix waklijik li Kolonel chi yo’yo a’an xk’oxlankil chan ru naq laa’o taqak’ut raj li qapaab’aal chiruheb’ li jun ch’ol chik. Chan raj ru te’xch’olob’ li komon lix nawomeb’ xch’ool chirix li Jesukristo wi ta te’xk’ul a’in: wi jun komon sa’ lix junkab’aleb’ xk’ul jun nimla yajel; wi jun ramiiw xkam jun lix komon; wi jun rech kab’al xpatz’ k’a’ut naq nakanima li Paswa. Ye reheb’ naq te’xye resileb’ li loq’laj hu (jo’ li wankeb’ sa’ "Xkomon chik li k’anjeleb’aal") naq neke’xk’oxla chan raj ru te’xsume. Kanab’eb’ junjunq li komon sa’ li tzoleb’aal chixyeeb’al lix k’oxlahomeb’.

Li Jesukristo naxk’e qe li yo’onink ut li sahil ch’oolejil.

  • Chiqajunil wan qayo’onihom ut naru nasaho’ qach’ool sa’ xk’ab’a’ li Kolonel. Naru taawil sa’ Jwan 16:33 ut tex’aatinaq chirix chan ru naq lix tojb’al rix li maak xb’aan li Jesukristo nokoxtenq’a chi wank xsahil qach’ool us ta wan qach’a’ajkilal. Chan ru naq xqak’ul li sahil ch’oolejil ut xooten’qaak sa’ xyi li qach’a’ajkilal?

  • Rik’in rilb’al lix ch’olob’ahom laj Pedro sa’ 1 Pedro 1:3–11, eb’ li komon jwal wi’chik naq te’ruuq chi wank xyo’onihomeb’ chirix lix tojb’al rix li maak xb’aan li Jesukristo. K’e li hoonal re te’xk’oxlaheb’ li raqal a’in, ut che’k’anjelaq sa’ wiib’al re xsik’b’al chik li raqal sa’eb’ li loq’laj hu li neke’xch’olob’ xyaalal chan ru xtawb’al qayo’onihom chirix li Jesukristo (chi’ilmanq li K’utul Raqal reheb’ li Loq’laj Hu, "Yo’onink"). Naru te’roksiheb’ li raqal xe’xtaw sa’eb’ li loq’laj hu re xk’uub’ankil junaq eetalil re xk’utb’al sa’ rochocheb’, malaj chiru li internet (chi’ilmanq junjunq li jalam-uuch ut aatin sa’ LDS.org). Eb’ li komon sa’ li tzoleb’aal maare te’ruuq chixk’oxlankil ani wan sa’ xjunkab’aleb’ malaj ani li ramiiweb’ li te’raj ru naq te’wanq chik xyo’onihom.

Jalam-uuch
reetalil li tzolok

Xb’oqb’aleb’ chi tzolok sa’ kab’l

K’a’ru tixk’e xch’ooleb’ li komon sa’ li tzoleb’aal chirilb’al ru Mateo 18 ut Lukas 10? Naru taaye reheb’ naq sa’eb’ li ch’ol a’in wankeb’ wiib’ reheb’ lix jaljookil ru aatin li Kolonel li jwal ch’ina-useb’, li neke’xk’ut li na’leb’ chirix chan ru naq tento toowanq chiqib’il qib’.

Jalam-uuch
reetalil li k’anjeleb’aal

Xkomon chik li k’anjeleb’aal

Li Paswa

Eb’ li raqal sa’eb’ li loq’laj hu chirix lix tojb’al rix li maak xb’aan li Kolonel.

Eb’ li esil chirix lix tojb’al rix li maak xb’aan li Kolonel.

Eb’ li b’ich chirix lix tojb’al rix li maak xb’aan li Kolonel.

Eb’ li komon sa’ li tzoleb’aal maare taawulaq chiruheb’ xb’ichankil junjunq reheb’ li b’ich a’in, ut rilb’aleb’ ru li raqal yeeb’il resil sa’ xtaq’ahil li perel. Maare wankeb’ li komon sa’ li tzoleb’aal li xe’xtzol junjunq li b’ich jo’ jun raqal li tzolok sa’ junkab’al chiru li xamaan a’in; kanab’eb’ chixyeeb’al resil li k’a’ru xe’xk’ul.

Eb’ li video chirix li Paswa

Rajlal chihab’ li Iglees naxk’uub’eb’ li esil choq’ re li Paswa, li neke’tawman sa’ mormon.org/spa/pascua.

Li Jesukristo nokorach’ab’.

Sa’ 1741, laj George Frideric Handel kixtz’iib’a jun ch’uut’ chi b’ich chirix li Jesukristo, a’an Mesias xk’ab’a’. Jun sut naq kib’ichaman li Mesias, li Qawa’ Handel kixk’e xch’ool naq li tumin li taatojmanq taakub’simanq re xtojb’aleb’ rix li preex li wankeb’ sa’ jun tz’alam choq’ reheb’ laj k’as. Numenaq 140 kristiaan li ke’wan sa’ tz’alam xb’aan naq ink’a’ neke’ru chixtojb’al lix k’aseb’ ke’ach’ab’aak xb’aan a’an. Naq ki’aatinak chirix a’in, li Awa’b’ej Russell M. Nelson kixye, "Wi ta maak’a’ lix tojb’al rix li maak xb’aan li Jesukristo, chiqajunilo toowanq raj sa’ k’as, jo’ chanru eb’ li kristiaan a’an li ke’wan sa’ tz’alam. Laj Tojol qix, li Qaawa’ Jesukristo, kichal chixtojb’al jun li k’as li moko re ta a’an, xb’aan naq laa’o wan jun qak’as li moko xooru ta laa’o chixtojb’al. Re rilb’al jun video chirix a’in, chi’ilmanq "Handel’s Messiah: Debtor’s Prison" sa’ LDS.org.

Xchaab’ilob’resinkil li qak’utum

Chatwanq choq’ k’anjeleb’aal sa’ ruq’ li Musiq’ej. Laa k’anjel jo’ aj k’utunel maawa’ k’utuk na’leb’, a’an b’an xtenq’ankileb’ laa komon chixk’ulb’al lix wankil li Santil Musiq’ej—a’an li tz’aqal aj k’utunel. (Chi’ilmanq Li k’utuk jo’ li Kolonel, 10.)

Isi reetalil