li Jesus naq kixk’ojob’ laj Pedro

11–17 marzo

Mateo 10–12; Markos 2; Lukas 7; 11

"Eb’ li kab’laju a’in ke’taqlaak xb’aan li Jesus"

Naq nakawil ru Mateo 10–12; Markos 2; ut Lukas 7; 11 ut nakak’oxlaheb’ li ani tzolb’ileb’ aab’aan, tatruuq chixk’ulb’al aana’leb’ rik’in li Santil Musiq’ej chirix k’a’ru neke’raj ru. Tz’iib’a resil li musiq’ejil na’leb’ nakak’ul, ut il ru li tusleb’ aatin a’in re xk’ulb’al chik aana’leb’ chirix li k’utuk.

Xtz’iib’ankil li nakak’oxla

reetalil li wotzok

Xkanab’ankileb’ chi wotzok

K’e xb’oqb’al wiib’ oxib’ li komon sa’ li tzoleb’aal naq te’chalq chi kawresinb’il re xwotzb’al lix patz’omeb’ chirix Mateo 11:28–30. (Re rilb’al junjunq li patz’om, chi’ilmanq li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al.) K’a’ru lix sumenkil xe’xtaw?

reetalil li k’utuk

Xk’utb’al li tzolʼlebʼ

Mateo 10

Li Qaawa’ naxk’e reheb’ lix moos li wankilal re xb’aanunkil lix k’anjel.

• Li k’a’ru kixtaqla li Kolonel reheb’ lix tzolom naru nokoxtenq’a sa’ li k’a’ru teneb’anb’il sa’ qab’een laa’o. Eb’ li komon sa’ li tzoleb’aal maare ak wan li na’leb’ xe’xk’ul chirix a’in sa’ tzolok xjuneseb’; jo’ jun eetalil, wan jun k’anjel chirix li na’leb’ a’in sa’ Kim, Taaqehin—Choq’ reheb’ li komon ut li junkab’al. Kanab’eb’ chixwotzb’al li k’a’ru xe’xtzol, malaj naru texk’anjelaq sa’ kok’ ch’uut re xb’aanunkil li k’anjel a’in sa’ li tzoleb’aal. Kanab’eb’ li komon chixwotzb’al chan ru naq xe’reek’a lix wankil li Kolonel naq xe’xb’aanu lix b’oqb’aleb’.

• Jun chik na’leb’ re naq eb’ li komon sa’ li tzoleb’aal te’xnumsi Mateo 10 a’an xsik’b’al sa’ li jun ch’ol a’in k’a’ru kixpatz’ li Kolonel naq te’xb’aanu li apostol, ut xtz’iib’ankil xjalam-uuch li na’leb’ a’an. Taaruuq te’xwotz lix tz’iib’ahomeb’, ut li k’a’ru xe’xtzol chirix lix taqlankileb’ li kab’laju chi apostol.

• Chan ru naq li tzolok chirix lix taqlankileb’ li apostol li kixk’e li Kristo sa’ Mateo 10 naru chixtenq’ankileb’ li komon sa’ laa tzoleb’aal chixtawb’al ru lix k’anjeleb’ li profeet ut li apostol sa’eb’ li kutan a’in? Maare us raj rilb’al chan ru naq lix taqlankileb’ li kab’laju li kixk’e li Kolonel najter chanchaneb’ lix taqlankileb’ lix Molameb’ li Kab’laju chi Apostol sa’ xtiklajik li jun k’ojlajik a’in, li natawman sa’ "Xkomon chik li k’anjeleb’aal." Chan ru naq eb’ li komon xe’tenq’aak xb’aan lix k’anjeleb’ li yo’yookil apostol? Ch’olob’ lix nawom aach’ool chirix naq b’oqb’ileb’ xb’aan li Dios li yo’yookil apostol ut profeet, ut kanab’eb’ li komon sa’ li tzoleb’aal chixyeeb’al xnawomeb’ xch’ool a’an.

• Re xk’utb’al xyaalal naq li junjunq li xk’uluk re li tijonelil naru naxtaw naq xchal li wankilal a’an rik’in li Jesus naq kixk’ojob’eb’ lix apostol, patz’ re jun li nak’amok re li tijonelil naq tixwotz lix "linea de autoridad."

Lix Molameb’ li Kab’laju

Eb’ li kab’laju chi apostol neke’xb’aanu lix k’anjel li Qaawa’ sa’ li kutan a’in.

Mateo 10:17–20

Naq wanko sa’ lix k’anjel li Qaawa’, a’an tooxtenq’a chixnawb’al li aatin li tento taqaye.

• Wankeb’ li neke’chal xxiw naq neke’k’utuk malaj naq neke’aatinak rik’ineb’ li jun ch’ol chik chirix li evangelio. A’ut li Qaawa’ kixye reheb’ li tzolom naq a’an tixtenq’aheb’ chixnawb’al k’a’ru te’xye. K’a’ru tento taqab’aanu re taqak’ul qajunes li qatenq’ankil li yeechi’inb’il xb’aan li Qaawa’? B’oqeb’ li komon sa’ li tzoleb’aal chirilb’al Mateo 10:19–20; Tzol’leb’ ut Sumwank 84:85; ut Tzol’leb’ ut Sumwank 100:5–8 re xtawb’al xsumenkil li patz’om a’in. Jo’q’e naq xatxtenq’a li Santil Musiq’ej chixnawb’al k’a’ru taaye? Naru taaye li k’a’ru xak’ul, ut taakanab’eb’ li komon sa’ li tzoleb’aal chixwotzb’al li k’a’ru xe’xk’ul eb’ a’an.

Mateo 12:1–13; Markos 2:23–28

Li hilob’aal kutan a’an jun kutan re xb’aanunkil li us.

• Re xsantob’resinkil li hilob’aal kutan, eb’ laj Fariseo ke’xxaqab’eb’ chaq k’iila raqal chi chaq’rab’ ut xna’leb’eb’ li winq, li kixmuhob’resi chiruheb’ k’a’ru tz’aqal xyaalalil naq wan li hilob’aal kutan. Ma us raj choq’ reheb’ li tzolb’ileb’ aab’aan naq te’seraq’iq chirix k’a’ut naq li Qaawa’ kixk’e li hilob’aal kutan qe? Taaruuq taapatz’ reheb’ li komon sa’ li tzoleb’aal naq te’xnumsi li esilal sa’ Mateo 12:1–13 ut sa’ Markos 2:23–28 ut te’xwotz k’a’ru kixk’ut li Kolonel chirix li hilob’aal kutan. K’a’ru chik li na’leb’ naqak’ul chirix li hilob’aal kutan sa’ Exodo 31:16–17; Isaias 58:13–14; ut Tzol’leb’ ut Sumwank 59:9–13? K’a’ruheb’ li najteril na’leb’ malaj li kok’ chaq’rab’ li neke’ru chiqajalb’ehinkil chaq rik’in tz’aqal lix yaalalil li hilob’aal kutan?

• Naq eb’ laj Fariseo ke’xk’e xwankil k’iila raqal chi chaq’rab’ chirix li hilob’aal kutan, li Kolonel kixk’ut jun li na’leb’ li moko ch’a’aj ta: "Naru xb’aanunkil li us sa’ li hilob’aal kutan" (Mateo 12:12). Eb’ li neke’xyu’ami li na’leb’ a’in, moko ch’a’aj ta chiruheb’ xsantob’resinkil li hilob’aal kutan. K’a’ chik ru chi na’leb’ naxtenq’aheb’ li komon sa’ li tzoleb’aal chixsantob’resinkil li hilob’aal kutan? K’a’ut naq jwal us wi’chik xk’utb’al jun li yaalil na’leb’ chiru jun raqal chi chaq’rab’, re taa’uxq li musiq’ejil nimank? (chi’ilmanq lix yehom li Profeet aj Jose Smith sa’ "Xkomon chik li k’anjeleb’aal"). Ma wankeb’ chik li yaalil na’leb’ naru naqak’oxla, li nokohe’xtenq’a chixpaab’ankileb’ lix taqlahom li Dios? Jo’ jun eetalil, k’a’ruheb’ li yaalil na’leb’ li taatenq’anq reheb’ li na’b’ej yuwa’b’ej re te’xk’e xch’ooleb’ li ralal xk’ajol chixpaab’ankil li Aatin re Chaab’il Na’leb’, malaj re xsik’b’al resileb’ lix xe’toonileb’?

• Li raatin li Awa’b’ej Russell M. Nelson, "Li hilob’aal a’an sahil kutan" (Jolomil Ch’utub’aj-ib’ re abril 2015) ut li video wan wi’ li raatin li Elder Jeffrey R. Holland sa’ "Xkomon chik li k’anjeleb’aal" maare texxtenq’a sa’ aatinak chirix li hilob’aal kutan.

• Maare us ajwi’ wi eb’ li komon te’xnumsi "La observancia del día de reposo" sa’ li hu Para la Fortaleza de la Juventud. Te’ruuq chixk’utb’al chan ru naq te’xch’olob’ chiru li ani jalan chik xpaab’aal chirix k’a’ut naq neke’roxloq’i li hilob’aal kutan.

Lukas 7:36–50

Naq nakuye’ li qamaak, naniman li qarahom choq’ re li Kolonel.

• K’a’ru naru naqatzol rik’in li kixb’aanu li ixq ut li kixk’ut li Kolonel sa’ Lukas 7:36–50 naq laa’o yooko chixsik’b’al xkuyb’al li qamaak? Chan ru naq li jalb’a-k’a’uxlej nokoxnach’ob’resi rik’in li Kristo? Chan ru naq nokoru chiroksinkil li esilal a’in re xk’utb’al chiru anihaq k’a’ru xyaalal xsik’b’al lix kuyb’al li qamaak?

reetalil li tzolok

Xb’oqb’aleb’ chi tzolok sa’ kab’l.

Naru taak’e xb’oqb’aleb’ li komon sa’ li tzoleb’aal naq te’rileb’ ru li jaljookil ru aatin sa’ Mateo 13 ut sa’ Lukas 8; 13 ut te’xkawresi rib’ chixwotzb’al sa’ li tzoleb’aal sa’ li jun xamaan chik jun xk’oxlahomeb’ chirix junaq na’leb’ xe’xk’ul sa’ jun reheb’ li jaljookil ru aatin.

reetalil li k’anjeleb’aal

Xkomon chik li k’anjeleb’aal

Mateo 10–12; Markos 2; Lukas 7;  11

Li osob’tesink nachal rik’in roxloq’inkil li hilob’aal kutan.

Sa’ wiib’ li video, li Elder Jeffrey R. Holland nak’utuk chirix li osob’tesink nachal rik’in roxloq’inkil li hilob’aal kutan: "En mi día santo—Acercarse más a Dios" ut "En mi día santo—Descansar y renovarse" (LDS.org).

Jun xtaqlankileb’ li apostol sa’ roso’jikeb’ li kutan.

Naq ke’b’oqe’ junjunq reheb’ li xb’een komon re lix Molameb’ li Kab’laju chi Apostol sa’ li jun k’ojlajik a’in, laj Oliver Cowdery kixk’e jun xtaqlankileb’, chanchan li kixk’e li Jesukristo sa’ Mateo 10. Aʼan kixye:

""Taa’ajmanq ru naq teeyal eeru rik’in lix kawil xjolomeb’ chixjunileb’ li tenamit. ... Chi jo’kan, nekexintij naq teek’uula xnimal li tuulanil, xb’aan naq ninnaw ru lix q’etq’etil xch’ooleb’ li winq. Cheril eerib’, maare anchal taqsinb’ilaqex xb’aaneb’ laj sahob’resihom ch’oolej re li ruchich’och’. Chek’e reetal, mare anchal taak’ame’q eech’ool xb’aan li k’a’aq re ru re li ruchich’och’. Chiwanq lee taqlanb’il k’anjel chi xb’een b’een. ... Aajel ru naq eejunes teek’ul jun xnawom eech’ool li chalenaq chaq sa’ choxa, re texruuq chixch’olob’ankil xyaalal li yaal.  ...

""... Tento naq teek’am li esilal a’in rik’ineb’ li neke’xk’oxla rib’ naq ninqeb’ xna’leb’. Naru naq texrahob’tesiiq xb’aan xkomoneb’ a’an; naru ajwi’ naq teesik’ eeyu’am. Laj xik’ ilonel junelik naxsik’ xyu’ameb’ lix moos li Dios. Chi jo’kan, rajlal tento sa’ eeb’een naq kawresinb’ilaqex chixmayejankil eeyu’am, wi li Dios taaraj re xtiikisinkil chi uub’ej ut re xwaklesinkil lix k’anjel. ...

"Chirix a’an kixchap li junjunq chi ruq’ ut kixye, "Ma rik’in tz’aqal x’anchalil aach’ool nakak’ul aana’aj sa’ li k’anjel a’in, re xjultikankil li evangelio chi yalb’il tz’aqal aaq’e aawochb’eeneb’ laa komon a’in, jo’ chanru lix yaalalil ut li rajb’al laa taqlankil li xak’ul?" Li junjunq kixsume naq tixb’aanu" (sa’ Joseph Smith papers, Documents, volume 4: abril 1832–septiembre 1835, ed. Matthew C. Godrey ut xkomon chik [2016], 243–44, 247).

Xk’utb’aleb’ li yaalil na’leb’.

Sa’ jun kutan, wan ani xpatz’ok re li Profeet aj Jose Smith chan ru naq naru chixjolominkileb’ chi chaab’il li k’iila tenamit li wankeb’ sa’ Nauvoo. Li profeet kixch’olob’, "Nink’ut chiruheb’ li yaalil na’leb’, ut eb’ a’an xjuneseb’ rib’ neke’xjolomi rib’eb’ " (chi’ilmanq Enseñanzas de los Presidentes de la Iglesia: José Smith [2007], 300).

Xchaab’ilob’resinkil li qak’utum

Yeechi’iheb’ li osob’tesink. Naq naqab’oqeb’ li tzolb’ileb’ aab’aan chixb’aanunkil k’a’ruhaq, ch’olob’ chiruheb’ naq te’xk’ul li osob’tesink yeechi’inb’il xb’aan li Dios wi te’xk’anjela li paab’aal chirix li k’a’ru kixk’ut a’an. Ink’a’ us wi yal re xk’ulb’al li osob’tesink naq naqapaab’eb’ li chaq’rab’, a’ut li qaChoxahil Yuwa’ naraj rosob’tesinkil chixjunileb’ li ralal xk’ajol. (Chi’ilmanq Li k’utuk jo’ li Kolonel, 35.)