laj Jwan aj Kub’sihom Ha’ naq kixkub’si xha’ li Jesus

B’onb’il lem sa’ li santil ochoch re Nauvoo, xb’aan laj Tom Holdman

28 enero–3 febrero

Mateo 3; Markos 1; Lukas 3

"Tuqub’omaq lix b’e li Qaawa’ "

Naq nakawil ut nakak’oxla Mateo 3; Markos 1; ut Lukas 3, tz’iib’a li musiq’anb’il na’leb’ nakak’ul. A’in tixk’e xb’oqb’al li Musiq’ej naq nakakawresi aawib’. Li hu Kim, Taaqehin—Choq’ reheb’ li komon ut li junkab’al ut eb’ li na’leb’ li wankeb’ arin taaruuq tate’xtenq’a chixwaklesinkil xch’ooleb’ li ani wankeb’ sa’ laa tzoleb’aal re te’xtaw ru ut te’xyu’ami li tzol’leb’ sa’eb’ li raqal a’in.

Xtz’iib’ankil li nakak’oxla

reetalil l wotzok

Xkanab’ankileb’ chi wotzok

Re xtenq’ankileb’ li komon chixwotzb’al chan ru naq xe’osob’tesiik sa’ xyu’ameb’ rik’in xtzolb’al li Ak’ Chaq’rab’, naru nakatz’iib’a li patz’om a’in chiru li pizarron: Ma wan k’a’ru xab’aanu xb’aan li k’a’ru xawil sa’ li Ak’ Chaq’rab’ chiru li xamaan a’in?

reetalil li k’utuk

Xk’utb’al li tzolʼlebʼ

Mateo 3:1–12; Lukas 3:2–18

Eb’ li tzolom neke’xkawresi rib’ xjunes ut neke’xkawresi li jun ch’ol chik chixk’ulb’al li Jesukristo.

• Chan ru naq naqakawresi qib’ naq chalk re junaq ula’ li nawb’il ru? Rik’in jun patz’om jo’ a’in naru nakatikib’ jun seraq’ chirix chan ru naq laj Jwan aj Kub’sihom Ha’ kixkawresiheb’ li tenamit chixk’ulb’al li Jesukristo. Chirix a’an tatruuq chixjachb’al ru li tzoleb’aal sa’ oxib’ jachal re te’ril sa’ Mateo 3:1–6; Mateo 3:7–12; ut Lukas 3:10–15, ut te’xk’e reetal chan ru naq laj Jwan aj Kub’sihom Ha’ kixkawresiheb’ li tenamit chixk’ulb’al li Jesukristo sa’ xyu’ameb’. Kanab’ chixjunqaleb’ li ch’uut chixwotzb’al li k’a’ru xe’xtaw.

• Jo’ laj Jwan aj Kub’sihom Ha’, eb’ li yo’yookil profeet nokohe’xkawresi chixk’ulb’al li Kolonel sa’ li qayu’am. Re xtenq’ankileb’ li komon sa’ li tzoleb’aal chixk’eeb’al reetal chan ru naq eb’ li profeet sa’ li kutan a’in chanchaneb’ laj Jwan aj Kub’sihom Ha’, taaruuq taawil li raatin laj Jwan aj Kub’sihom Ha’ sa’ Mateo 3:1–12 ut sa’ Lukas 3:2–18, ut junaq li aatin sa’ li jolomil ch’utub’aj-ib’ li toja’ xb’aanuman. Chan ru naq xpaab’ankil li profeetil na’leb’ a’in nokoxtenq’a chixkawresinkil qib’ re xk’ulb’al li Kolonel?

• Sa’ JJS Lukas 3:4–11 naru natawman li na’leb’ chirix lix taqlanb’il k’anjel li Jesukristo li mas wi’chik chiru li tawb’il sa’ Lukas 3:4–6. K’a’ru neke’xtzol li komon sa’eb’ li raqal a’in chirix li Kolonel ut chirix naq aajel ru xjalb’al qak’a’uxl?

  laj Jwan aj Kub’sihom Ha’ naq yoo chi jultikank aatin

  Laj Jwan aj Kub’sihom Ha’ kijultikan aatin sa’ li yamyookil ch’och’, xb’aan laj Robert T. Barrett

Lukas 3:3–14

Aajel ru naq taak’utunq sa’ li qayu’am li "naruuchin li jalb’a-k’a’uxlej."

• Sa’ Lukas 3:8, laj Jwan aj Kub’sihom Ha’ kixk’ut chiruheb’ li tenamit naq rub’elaj naq te’kub’eeq xha’, tento taawanq rik’ineb’ ruuchinihom li jalok k’a’uxlej. Chan ru naq tatruuq chixtenq’ankileb’ li komon chixk’eeb’al reetal li ruuchinihom lix jalb’aleb’ xk’a’uxl? Naru taaye reheb’ naq te’xsik’ sa’ Lukas 3:8–14 re xk’eeb’al reetal k’a’ru naxk’oxla laj Jwan naq "naruuchin" li jalb’a-k’a’uxlej. Te’ruuq ajwi’ chirilb’al Moroni 6:1–3 ut Tzol’leb’ ut Sumwank 20:37. Taaruuq taatz’iib’a sa’ pizarron xjalam-uuch jun che’ li yoo chi uuchink, ut eb’ li komon te’ruuq chixtz’iib’ankil chiru li ru li che’ li "ruuchinihom" li jalb’a-k’a’uxlej li xe’xtaw. Us ajwi’ sa’ li hoonal a’in aatinak chirix k’a’ru tz’aqal xyaalalil xjalb’al li qak’a’uxl. Ye reheb’ naq jun li na’leb’ nokoru wi’ "chixtiikob’resinkil ru lix b’e" (Lukas 3:4) a’an rik’in xjalb’al qak’a’uxl rik’in li k’a’ru taaramoq chiqu li Musiq’ej.

• Rik’in xb’ichankil li b’ich "K’e insantilal," Eb’ li B’ich, ajl 74, naru teetikib’ aatinak chirix chan ru naq xjalb’al qak’a’uxl nokoxtenq’a chi wank jo’ chanru li Kolonel. Re xtawb’al jun video re li b’ich a’in, chi’ilmanq mormontabernaclechoir.org.

Mateo 3:13–17

Naqataaqe li Jesukristo naq nakub’e li qaha’ ut naqak’ul li Santil Musiq’ej.

• Re xnumsinkil resil lix kub’iha’ li Jesukristo, naru taab’aanu a’in: Patz’ reheb’ li komon chan ru naq te’ruuq chiroksinkil Mateo 3:13–17 re xk’utb’al li kub’iha’ chiru anihaq, jo’ jun li ch’ina al, malaj junaq li jalan chik xpaab’aal. (Naru ajwi’ roksinkil li jalam’uuch sa’ li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al.) K’a’ruheb’ li na’leb’ chirix li kub’iha’ li tento raj xch’olob’ankil? Taaruuq te’xch’olob’ lix na’leb’eb’ chirib’ileb’ rib’ re tzolok.

• Re xtenq’ankileb’ li komon chixjultikankil lix kub’ikeb’ xha’ ut chixk’oxlankil chan ru naq aajel ru xpaab’ankileb’ li sumwank xe’ok wi’ sa’ li kub’iha’, naru taaye reheb’ naq te’ril sa’ Mateo 3:13–17 ut sa’ li raatin li Elder Robert D. Hales sa’ "Xkomon chik li k’anjeleb’aal." Eb’ li komon sa’ laa tzoleb’aal maare te’raj xyeeb’al resil li k’a’ru neke’reek’a chirix lix kub’iha’ ut li sumwank xe’ok wi’ sa’ li kub’iha’. Taaruuq ajwi’ te’xb’icha "Kim, taaqehin," Eb’ li B’ich, ajl 66.

• Laj Jwan aj Kub’sihom Ha’ kixye naq li Kolonel taakub’sinq ha’ "rik’in Santil Musiq’ej ut xam" (Mateo 3:11). Li kub’iha’ rik’in xam nak’ulman naq nokok’ojob’aak ut naqak’ul li maatan re li Santil Musiq’ej. K’a’ut naq tento taqak’ul li maatan re li Santil Musiq’ej re tooruuq chi xik chi uub’ej sa’ lix awa’b’ejihom li Dios? K’a’ru xk’anjel li kub’ih’a rik’in xam ut rik’in Santil Musiq’ej choq’ qe laa’o? (chi’ilmanq Alma 5:14). Li video "El bautismo del Espíritu Santo" (LDS.org) naru natenq’an sa’ li seraq’ a’in.

• A’in jun li k’anjel li taatenq’anq reheb’ li komon chi aatinak chirix li tzol’leb’ re li kub’iha’. Tz’iib’aheb’ li patz’om a’in chiru li pizarron, ut eb’ li raqal sa’eb’ li loq’laj hu chiruheb’ li kok’ hu. B’oqeb’ li komon chixxokb’al jun ch’ina hu, ut chirix a’an chirilb’al jo’ tzoleb’aal li junjunq raqal reheb’ li loq’laj hu. Aatinanqex chirix b’arwan chi patz’om sumenb’il xb’aan li junjunq raqal reheb’ li loq’laj hu. Ma wankeb’ chik li raqal sa’eb’ li loq’laj hu, malaj jalaneb’ chik li na’leb’ li te’ruuq chixsumenkileb’ li patz’om a’in?

  • K’a’ru neke’xk’ut li loq’laj hu chirix x’aajelil ru li kub’iha’? (3 Nefi 11:38)

  • K’a’ru li eetalil k’utb’il rik’in li kub’iha’ chi sub’b’il rub’el ha’? (Romanos 6:3–5)

  • Chan ru naq li sumwank re lin kub’iha’ tento tixjal chan ru naq ninwan? (Mosiah 18:8–10)

  • K’a’ut naq ink’a’ naqakub’siheb’ xha’ li k’uula’al? (Moroni 8:8–12)

  • K’a’ut naq aajel ru naq li kub’iha’ b’aanunb’ilaq xb’aan li ani xk’uluk re li tz’aqal wankilal, ut ink’a’ yal rik’in anchal ch’oolejil? (Hebreos 5:4)

  • Wi ak kub’enaq inha’ sa’ jalan chik iglees, k’a’ut naq aajel ru naq taakub’eeq wi’chik inha’? (Tz. ut S. 22:1–4)

  • K’a’ut naq chirix li kub’iha’ tento taak’ule’q li maatan re li Santil Musiq’ej? (Jwan 3:5)

reetalil li tzolok

Xb’oqb’aleb’ chi tzolok sa’ kab’l

Re xtenq’ankileb’ li komon chixtzolb’al Mateo 4 ut Lukas 4–5 sa’ kab’l, ye reheb’ naq te’xk’oxla jun li aaleek neke’xk’ul, ut ye reheb’ naq eb’ li ch’ol a’in te’xk’ut chiruheb’ k’a’ru kixb’aanu li Kolonel naq kixk’ul li aaleek.

reetalil li k’anjeleb’aal

Xkomon chik li k’anjeleb’aal

Mateo 3; Markos 1; Lukas 3

Xyaalalileb’ li sumwank re li kub’iha’.

Li Elder Robert D. Hales kixk’ut:

"Naq naqataw ru li sumwank noko’ok wi’ sa’ li kub’iha’ ut li maatan re li Santil Musiq’ej, a’an tixjal qayu’am ut tixxaqab’ xwankil li qapaab’aal sa’ lix awa’b’ejihom li Dios. ... K’a’jo’ x’aajelil ru li ok sa’ lix awa’b’ejihom li Dios, jo’kan naq li Jesus kikub’e xha’ re xk’utb’al chiqu "lix laatz’al ru li b’e" [2 Nefi 31:9]. ...

"Naq laa’o naqab’aanu li kixb’aanu li Jesus, laa’o ajwi’ naqak’ut naq taqajal qak’a’uxl ut chaab’ilaqo chixpaab’ankileb’ lix taqlahom li qaYuwa’ sa’ Choxa. Naqatuulanob’resi qib’ chi yot’b’il qach’ool ut chi tuulan qamusiq’ naq naqak’e reetaleb’ li qamaak ut naqapatz’ xkuyb’al li q’etok aatin xqab’aanu [chi’ilmanq 3 Nefi 9:20]. Noko’ok sa’ sumwank naq wan qachʼool chixkʼulbʼal saʼ qabʼeen lix kʼabʼaʼ li Jesukristo ut naq junelik taajultiko’q a’an qe.

"Rik’in xsik’b’al ru wank sa’ lix awa’b’ejihom li Dios, nokowan chi jachjo qu rik’in li ruchich’och’, us ta moko isinb’ilo chaq sa’ a’an. Taawanq chi tiik li qaq’, chi saq ru li qak’a’uxl, ut chi maak’a’ xtz’ajnil li qaatin. Li k’a’ru naqil sa’ li cine ut li tele, li b’ich li naqab’i, eb’ li jar paay chi hu naqil, taawaklesinq musiq’ej. Taqasik’ ru choq’ qochb’een li ani toohe’xtenq’a chixk’ulb’al li k’a’ru naqasik’ sa’ li junelik q’e kutan, ut taawanq xchaab’ilal qach’ool rik’ineb’ li qas qiitz’in. Taqatz’eqtaana li maa’usilal jo’ li yumb’eetak ko’b’eetak, li b’uulik, li mayib’k, li kalaak, ut eb’ li droga. Li k’a’ru naqab’aanu sa’ domingo tixk’am rib’ rik’in lix chaq’rab’ li Dios naq taajultiko’q qe li hilob’aal kutan ut taqasantob’resi. Taqab’aanu jo’ li kixb’aanu li Jesukristo sa’ li naqab’aanu reheb’ li qas qiitz’in. Toowanq chi k’ulub’ej chi ok sa’ rochoch li Qaawa’ " "El convenio del bautismo: Estar en el reino y ser del reino," Liahona, noviembre 2000, 7–8).

Xchaab’ilob’resinkil li qak’utum

Taak’ut tz’aqal li tzolʼlebʼ. Laj Hyrum Smith kixye, "K’utumaqeb’ li xb’een raqal chi na’leb’ re li evangelio—k’uteb’ rajlal rajlal; teetaw naq wulaj wulaj taak’utb’esimanq cheru li ak’ na’leb’ ut xkomon chik li saqen chirix. Taaruuq teenimob’resi ru re teetaweb’ ru chi us. Chirix a’an saqen wi’chik ru naq te’xtaw ru li ani tzolb’ileb’ eeb’aan" (Manuscript History of the Church, vol. E-1, p. 1994, josephsmithpapers.org).