« ថ្ងៃទី ១១-១៧ ខែ កុម្ភៈ ។ យ៉ូហាន ២–៤ ៖ ‹ ត្រូវតែកើតជាថ្មី › » ចូរមកតាមខ្ញុំ—សម្រាប់សាលាថ្ងៃអាទិត្យ ៖ ព្រះគម្ពីរសញ្ញាថ្មី ឆ្នាំ ២០១៩ ( ឆ្នាំ ២០១៩ )

« ថ្ងៃទី ១១-១៧ ខែ កុម្ភៈ ។ យ៉ូហាន ២–៤ » ចូរមកតាមខ្ញុំ—សម្រាប់សាលាថ្ងៃអាទិត្យ ៖ ព្រះគម្ពីរសញ្ញាថ្មី ឆ្នាំ ២០១៩

ថ្ងៃទី ១១-១៧ ខែ កុម្ភៈ

យ៉ូហាន ២-៤

« ត្រូវតែកើតជាថ្មី »

ការអាន យ៉ូហាន ២–៤ គឺជាវិធីដ៏ល្អមួយដើម្បីចាប់ផ្ដើមរៀបចំខ្លួនបង្រៀន ។ សូមកត់ត្រាចំណាប់អារម្មណ៍ខាងវិញ្ញាណណាមួយដែលអ្នកទទួលបាន ហើយប្រើគម្រោងមេរៀននេះដើម្បីស្វែងរកការយល់ដឹងបន្ថែមទៀត និងគំនិតសម្រាប់ការបង្រៀន ។

កត់ត្រាចំណាប់អារម្មណ៍របស់បងប្អូន

អញ្ជើញឲ្យចែកចាយ

សូមសរសេរចំណងជើងចំនួនបីនៅលើក្ដារខៀន ៖ យ៉ូហាន ២, យ៉ូហាន ៣, និង យ៉ូហាន ៤ ។ សូមទុកពេលពីរបីនាទីឲ្យសិស្សដើម្បីរំឭកជំពូកទាំងនេះឡើងវិញ រួចហើយសូមឲ្យពួកគេសរសេរនៅក្រោមចំណងជើងនីមួយៗនូវខគម្ពីរមួយដែលបានជួយពួកគេឲ្យយល់អំពីគោលលទ្ធិ និងព្រឹត្តិការណ៍នានានៅក្នុងជំពូកនោះ ។ សូមពិភាក្សាអំពីខគម្ពីរដែលពួកគេបានសរសេរ ។

បង្រៀនគោលលទ្ធិ

យ៉ូហាន ២:១–១១

ជីវិតរបស់យើងត្រូវបានផ្លាស់ប្ដូរ នៅពេលយើងធ្វើតាមព្រះយេស៊ូវគ្រីស្ទ ។

ពេលខ្លះ យើងអាចទទួលបានការយល់ដឹងខាងវិញ្ញាណតាមរយៈការយកចិត្តទុកដាក់លើសេចក្តីលម្អិតនៅក្នុងដំណើររឿងខាងបទគម្ពីរ ។ សូមពិចារណាអញ្ជើញសិស្សឲ្យអាន យ៉ូហាន ២:១–១១ ហើយសរសេរសេចក្តីលម្អិតដែលធ្វើឲ្យពួកគេមានអំណរគុណយ៉ាងខ្លាំងអំពីអព្ភូតហេតុនៅឯពិធីមង្គលការនោះ ។ តើអព្ភូតហេតុនេះបានបង្ហាញនូវសិរីល្អរបស់ព្រះតាមរបៀបណា ? ( សូមមើល ខទី ១១ ) ។
វាអាចនឹងជួយសិស្សឲ្យយល់រឿងនេះ ប្រសិនបើពួកគេពិចារណាអំពីអព្ភូតហេតុនោះចេញពីទស្សនវិស័យដាច់ដោយឡែកនៃអ្នកដែលបានឃើញរឿងនោះ ។ តើយើងមានឥរិយាបថបែបណាចំពោះអព្ភូតហេតុទាំងឡាយដូចជាមនុស្សនៅឯពិធីជប់លៀងមង្គលការនោះ—ឧទាហរណ៍ ដូចជាម៉ារាដែលបានដឹងអំពីអព្ភូតហេតុមួយបានកើតឡើង ឬអ្នកគ្រប់គ្រងនោះដែលពុំបានដឹងថា មានអព្ភូតហេតុមួយបានកើតឡើង ? សូមពិចារណាអញ្ជើញសិស្សពីរបីនាក់ឲ្យនិទានដំណើររឿងមួយអំពីពិធីជប់លៀងនោះ ហាក់បីដូចជាពួកគេគឺជាមនុស្សម្នាក់ដែលបានចូលរួមក្នុងពិធីនោះដែរ ។

យ៉ូហាន ២:១៣-២២

យើងអាចការពារទីកន្លែង និងរឿងដ៏ពិសិដ្ឋទាំងឡាយ ។

តើអ្នកអាចជួយសិស្សឲ្យរៀនចេញពីដំណើររឿងអំពីព្រះយេស៊ូវបណ្ដេញពួកអ្នកទារប្រាក់ចេញពីព្រះវិហារបរិសុទ្ធតាមរបៀបណា ? តើពួកគេអាចការពារទីកន្លែង និងរឿងពិសិដ្ឋដូចជា គេហដ្ឋាន ព្រះវិហារ ព្រះវិហារបរិសុទ្ធ និងព្រះគម្ពីរតាមរបៀបណា ? សេចក្ដីថ្លែងការណ៍នេះមកពីប្រធាន ដេវីឌ អូ មិកឃេ អាចនឹងជួយ ៖ « ‹ កុំឲ្យយកដំណាក់នៃព្រះវរបិតាខ្ញុំ ធ្វើជាផ្ទះជំនួញឡើយ › ។ ( យ៉ូហាន ២:១៦ ) ។ ការរកប្រាក់ និងការចំណាយប្រាក់ … កំហុសឆ្គង និងជាពិសេស ការនិយាយដើមអំពីអ្នកជិតខាងនៅក្នុងដំណាក់ថ្វាយបង្គំ គឺជាការបំពានដ៏ធំដល់សេចក្ដីបង្គាប់នេះដែលបានប្រទានឲ្យជិតពីរពាន់ឆ្នាំមុន » ( នៅក្នុង Conference Report ខែតុលា ឆ្នាំ១៩៥៦ ទំព័រ ៧ ) ។ តើយើងអាចរក្សាភាពបរិសុទ្ធនៃព្រះវិហារបរិសុទ្ធ និងទីបរិសុទ្ធផ្សេងទៀតតាមរបៀបណា ?

យ៉ូហាន ៣:១-២១

យើងត្រូវតែកើតជាថ្មី ដើម្បីចូលទៅក្នុងនគរព្រះបាន ។

ដើម្បីជួយសិស្សឲ្យយល់អំពីការអញ្ជើញរបស់ព្រះយេស៊ូវឲ្យកើតជាថ្មី ( សូមមើល យ៉ូហាន ៣:៣ ) អ្នកអាចអញ្ជើញពួកគេឲ្យចែកចាយការយល់ដឹងដែលពួកគេទទួលបានពីអ្វីដែលព្រះអង្គសង្គ្រោះបានបង្រៀនដល់នីកូដេមនៅក្នុងខគម្ពីរទាំងនេះ ។ តើពាក្យ និង ឃ្លាណាខ្លះដែលទ្រង់បានប្រើ ? តើបទគម្ពីរ និងសេចក្ដីថ្លែងការណ៍អ្វីផ្សេងទៀតមកពីថ្នាក់ដឹកនាំសាសនាចក្រដែលអាចពង្រីកការយល់ដឹងរបស់សមាជិកថ្នាក់អំពីការអញ្ជើញនេះ ? ( សូមមើល Topical Guide « Man, New, Spiritually Reborn » សម្រាប់ឧទាហរណ៍ពីព្រះគម្ពីរ សូមមើល « ធនធានបន្ថែមទាំងឡាយ » សម្រាប់សេចក្តីថ្លែងការណ៍មកពីថ្នាក់ដឹកនាំសាសនាចក្រ ) ។
តើសិស្សអាចពន្យល់ទៅកាន់មនុស្សម្នាក់ដែលមានសាសនាផ្សេងនូវអត្ថន័យនៃការកើតជាថ្មីតាមរបៀបណា ? តើពួកគេដាក់បញ្ចូលការប្រែចិត្ត បុណ្យជ្រមុជទឹក និងពិធីបញ្ជាក់នៅក្នុងការសន្ទនានេះតាមរបៀបណា ? សូមពិចារណាអញ្ជើញសិស្សឲ្យហាត់អនុវត្តអំពីរបៀបដែលពួកគេនឹងឆ្លើយសំណួរនេះជាមួយនឹងមនុស្សដែលអង្គុយនៅក្បែរពួកគេ ។ ពាក្យដកស្រង់មកពីព្យាការីយ៉ូសែប ស្ម៊ីធ នៅក្នុង « ធនធានបន្ថែមទាំងឡាយ » អាចដាក់បន្ថែមនៅក្នុងការពិភាក្សានេះ បាន ។
មានមនុស្សខ្លះជឿថា មនុស្សពុំអាចផ្លាស់ប្ដូរបានទេ ប៉ុន្តែនីកូដេម គឺជាឧទារណ៍មួយនៃមនុស្សម្នាក់ដែលបានផ្លាស់ប្ដូរ ដោយសារតែការធ្វើតាមដំណឹងល្អនៃព្រះយេស៊ូវគ្រីស្ទ ។ ដើម្បីជួយសិស្សឲ្យមើលឃើញពីការណ៍នេះ អ្នកអាចអញ្ជើញពួកគេឲ្យស្រាវជ្រាវ យ៉ូហាន ៣:១–២, យ៉ូហាន ៧:៤០–៥២ និង យ៉ូហាន ១៩:៣៩–៤០ ។ តើយើងរៀនអ្វីខ្លះ ចេញពីវគ្គទាំងនេះអំពីឥរិយាបថ និងជំនឿរបស់នីកូដេម ? តើគាត់បានផ្លាស់ប្ដូរបន្តិចម្ដងៗតាមរបៀបណា ? តើយើងអាចចែកចាយគំរូអ្វីខ្លះអំពីមនុស្សដែលយើងស្គាល់ ដែលបានផ្លាស់ប្ដូរដោយសារតែដំណឹងល្អ ?
ដោយមើលទៅទារកតូច ឬរូបភាពនៃទារកមួយអាចនឹងផ្ដល់ឱកាសដ៏ល្អដល់សិស្សរបស់អ្នក ដើម្បីប្រៀបធៀបអំពីគុណសម្បត្តិរបស់ទារកដែលទើបនឹងកើត ជាមួយនិងគុណសម្បត្តិរបស់មនុស្សម្នាក់ដែលបានកើតជាថ្មីខាងវិញ្ញាណ ។

យ៉ូហាន ៤:៦-៣៤

ព្រះយេស៊ូវគ្រីស្ទប្រទានទឹករស់ និង « ស្បៀងអាហារ » នៃការធ្វើកិច្ចការល្អដល់យើង ។

រូបកាយយើងចាំបាច់ត្រូវមានអាហារ និងទឹកជារៀងរាល់ថ្ងៃ ។ ព្រះយេស៊ូវបានថ្លែងអំពីសេចក្ដីត្រូវការជាសាកលទាំងនេះ នៅពេលទ្រង់បានបង្រៀនដល់ស្ត្រីសាសន៍សាម៉ារី និងពួកសិស្សរបស់ទ្រង់ ។ ដើម្បីជួយសិស្សឲ្យយល់អ្វីដែលព្រះអង្គសង្គ្រោះកំពុងបង្រៀន អ្នកអាចដាក់រូបភាពអាហារ និងទឹកនៅលើក្ដារខៀន ហើយអញ្ជើញសិស្សឲ្យសរសេរនៅក្រោមរូបភាពនីមួយៗអំពីសេចក្ដីពិតខាងវិញ្ញាណដែលព្រះយេស៊ូវបានបង្រៀន ។ តើការថ្វាយបង្គំព្រះនៅក្នុងស្មារតី និងក្នុងសេចក្ដីពិតអាចបំបាត់ការស្រេកឃ្លានខាងវិញ្ញាណរបស់យើងតាមរបៀបណា ? តើការស្រេកឃ្លានខាងវិញ្ញាណរបស់យើងត្រូវបានបំពេញដោយការធ្វើតាមព្រះឆន្ទៈរបស់ព្រះតាមរបៀបណា ?

ព្រះយេស៊ូវគ្រីស្ទប្រទានទឹករស់ដល់យើង ។
ដោយសញ្ជឹងគិតអំពីការរីកចម្រើននៃទីបន្ទាល់របស់ស្ត្រីសាសន៍សាម៉ារីអំពីព្រះយេស៊ូវគ្រីស្ទអាចជួយសិស្សរបស់អ្នកឲ្យពិចារណាអំពីរបៀបដែលពួកគេបានស្គាល់ទ្រង់ថាជាព្រះមែស៊ី ។ សូមរកមើលទាំងអស់គ្នានូវពាក្យដែលស្ត្រីសាសន៍សាម៉ារីបានប្រើដើម្បីនិយាយអំពីព្រះអង្គសង្គ្រោះនៅក្នុង យ៉ូហាន ៤:៦–៣០ ។ តើពាក្យទាំងនេះចង្អុលបង្ហាញអ្វីខ្លះអំពីចំណេះដឹងរបស់គាត់ថាតើព្រះយេស៊ូវគឺជានរណា ? តើយើងបានរីកចម្រើននៅក្នុងទីបន្ទាល់របស់យើងថាទ្រង់គឺជាព្រះអង្គសង្គ្រោះរបស់យើងតាមរបៀបណា ?

លើកទឹកចិត្តឲ្យមានការរៀនសូត្រនៅឯគេហដ្ឋាន

ដើម្បីបំផុសគំនិតសិស្សឲ្យអានម៉ាថាយ ៥ និង លូកា ៦ សូមប្រាប់ពួកគេថា ជំពូកទាំងនេះមាននូវអ្វីដែលប្រធានយ៉ូសែប ហ្វីលឌីង ស្ម៊ីធ បានហៅថា « [ការបង្រៀន ]ដ៏អស្ចារ្យបំផុតដែលមិនធ្លាប់មានបង្រៀនពីមុនមក តាមដែលយើងដឹង »( Teachings of Presidents of the Church: Joseph Fielding Smith [ ឆ្នាំ២០១៣ ] ទំព័រ ២៣៤ ) ។

ធនធានបន្ថែមទាំងឡាយ

យ៉ូហាន ២-៤

វីដេអូស្ដីពីសកម្មភាព និងការបង្រៀនរបស់ព្រះយេស៊ូវ ។

« Jesus Turns Water into Wine », « Jesus Cleanses the Temple », « Jesus Teaches of Being Born Again », « Jesus Teaches a Samaritan Woman » (LDS.org)

តើការកើតជាថ្មីមានន័យដូចម្ដេច ?

ព្យាការីយ៉ូសែប ស្ម៊ីធ បានបង្រៀនថា ៖ « ប្រសិនបើអ្នកពុំបានធ្វើបុណ្យជ្រមុជទឹកដោយការផ្ដាច់បាប ហើយទទួលព្រះវិញ្ញាណបរិសុទ្ធនោះទេ គឺអ្នកដូចជាជ្រមុជទឹកឲ្យបាវខ្សាច់ដូច្នោះដែរ ។ បុណ្យជ្រមុជទឹកដោយទឹក គឺជាបុណ្យជ្រមុជទឹកពាក់កណ្ដាល ហើយវាពុំល្អទេ ប្រសិនបើគ្មានពាក់កណ្ដាលទៀត—ដែលជាបុណ្យជ្រមុជដោយព្រះវិញ្ញាណបរិសុទ្ធ » ( Teachings of Presidents of the Church:Joseph Smith [ ឆ្នាំ ២០០៧ ] ទំព័រ ៩៥ ) ។

អែលឌើរ ដេវីឌ អេ បែដណា បានបង្រៀនថា ៖ « ការប្រែចិត្តជឿ … គឺធំ មិនមែនតូចទេ—ជាការកើតជាថ្មីខាងវិញ្ញាណ និងជាការផ្លាស់ប្ដូរជាមូលដ្ឋាននៃអ្វីដែលយើងមានអារម្មណ៍ និងប្រាថ្នា ជាអ្វីដែលយើងគិត ហើយធ្វើ ព្រមទាំងអ្វីដែលជាអត្តសញ្ញាណរបស់យើងផងដែរ ។ ពិតណាស់ សារៈសំខាន់នៃដំណឹងល្អរបស់ព្រះយេស៊ូវគ្រីស្ទតម្រូវឲ្យមានការផ្លាស់ប្ដូរជាមូលដ្ឋាន និង ជាអចិន្ដ្រៃយ៍នៅក្នុងនិស្ស័យរបស់យើង ដែលកើតមានតាមរយៈការពឹងផ្អែករបស់យើងទៅលើ ‹ បុណ្យគុណ និង សេចក្ដីមេត្តាករុណា និង ព្រះគុណនៃព្រះម៊ែស៊ីដ៏បរិសុទ្ធ › ( នីហ្វៃទី ២ ២:៨ ) ។ នៅពេលយើងជ្រើសរើសធ្វើតាមលោកចៅហ្វាយ យើងជ្រើសរើសដើម្បីផ្លាស់ប្ដូរ —ដើម្បីកើតខាងវិញ្ញាណ » ( « Ye Must Be Born Again » Ensign ឬ Liahona ខែ ឧសភា ឆ្នាំ ២០០៧ ទំព័រ ២០ ) ។

អែលឌើរ ឌី ថត គ្រីស្តូហ្វឺសិន បានបង្រៀនថា « អ្នកអាចសួរថា ហេតុអ្វីការផ្លាស់ប្ដូរយ៉ាងធំនេះមិនកើតឡើងលឿនជាងនេះចំពោះខ្ញុំ ? អ្នកគួរតែចងចាំថា គំរូដ៏អស្ចារ្យនៃប្រជាជនរបស់ស្ដេចបេនយ៉ាមីន អាលម៉ា និងអ្នកផ្សេងទៀតមួយចំនួននៅក្នុងព្រះគម្ពីរ គឺ—អស្ចារ្យបែបនោះ ហើយពុំមែនសាមញ្ញទេ ។ សម្រាប់ពួកយើងភាគច្រើន ការផ្លាស់ប្ដូរទាំងឡាយគឺភាគច្រើនកើតឡើងបន្តិចម្ដងៗ ហើយកើតឡើងច្រើនដង ។ ការកើតជាថ្មី គឺពុំដូចជាការកើតខាងរូបកាយទេ វាគឺជាដំណើរការមួយ មិនមែនជាព្រឹត្តិការណ៍មួយនោះទេ ។ ហើយការចូលរួមក្នុងដំណើរការនោះ គឺជាគោលបំណងដ៏សំខាន់នៃជីវិតរមែងស្លាប់ » ( « Born Again » Ensign ឬ Liahona ខែ ឧសភា ឆ្នាំ ២០០៨ ទំព័រ ៧៨ ) ។

អែលឌើរ ដាល្លិន អេក អូក បានបង្រៀនថា ៖

« យើងបានកើតជាថ្មី នៅពេលយើងចូលទៅក្នុងទំនាក់ទំនងសេចក្ដីសញ្ញាមួយជាមួយនឹងព្រះអង្គសង្គ្រោះរបស់យើង ដោយការកើតអំពីទឹក ហើយអំពីព្រះវិញ្ញាណ ហើយដោយលើកដាក់មកលើខ្លួនយើងនូវព្រះនាមនៃព្រះយេស៊ូវគ្រីស្ទ ។ យើងអាចរំឭកការកើតជាថ្មីនោះនៅរាល់ថ្ងៃឈប់សម្រាក នៅពេលយើងទទួលទានសាក្រាម៉ង់ ។

« ពួកបរិសុទ្ធថ្ងៃចុងក្រោយបញ្ជាក់ថា អស់អ្នកដែលបានកើតជាថ្មីតាមរបៀបនេះគឺជាបុត្រាបុត្រីជាទីស្រឡាញ់ខាងវិញ្ញាណរបស់ព្រះយេស៊ូវគ្រីស្ទ ( សូមមើល ម៉ូសាយ ៥:៧, ១៥:៩–១៣, ២៧:២៥ ) ។ ទោះយ៉ាងណាក៏ដោយ ដើម្បីស្គាល់ពរជ័យដែលចង់បាននៃស្ថានភាពកើតជាថ្មីនេះ យើងត្រូវតែបន្តរក្សាសេចក្ដីសញ្ញារបស់យើង ហើយកាន់ខ្ជាប់ដរាបដល់ចុងបញ្ចប់ ។ នៅពេលនេះ តាមរយៈព្រះគុណរបស់ព្រះ យើងបានកើតជាថ្មី ជាមនុស្សថ្មីដែលមានឪពុកម្ដាយថ្មីខាងវិញ្ញាណ និងអនាគតនៃមរតកដ៏រុងរឿង » ( « Have You Been Saved? » Ensign ខែឧសភា ឆ្នាំ១៩៩៨ ទំព័រ ៥៦ ) ។

ការកែលម្អការបង្រៀនរបស់យើង

គ្រូបង្រៀនពុំមែនពូកែជាងសិស្សនោះទេ ។ តួនាទីរបស់អ្នកក្នុងនាមជាគ្រូបង្រៀនមានសារៈសំខាន់ ប៉ុន្តែអ្នកពុំមែនជាប្រភពតែមួយនៃការបំផុសគំនិតនៅក្នុងថ្នាក់រៀនឡើយ ។ សូមជួយសិស្សឲ្យរៀនមកពីព្រះវិញ្ញាណ ហើយចែកចាយនឹងគ្នានូវអ្វីដែលពួកគេរៀន ។