Lako mai, Mo Muri Au
15–21 ni Epereli. Siga ni Mate: ‘Ko Iko Bulubulu, Sa Evei na Nomu Gumatua?’

“15–21 ni Epereli. Siga ni Mate: ‘Ko Iko Bulubulu, Sa Evei na Nomu Gumatua?’” Lako Mai, Mo Muri Au—Me Baleta na Matawilivola ni Siga Tabu: Veiyalayalati Vou 2019 (2019)

“15–21 ni Epereli. Siga ni Mate,” Lako Mai, Mo Muri Au—Me Baleta na Matawilivola ni Siga Tabu: 2019

iBulubulu ena Were

15–21 ni Epereli

Siga ni Mate

“Ko Iko Bulubulu, Sa Evei na Nomu Gumatua?”

Ni ko vakavakarau mo veivakavulici ena macawa oqo, mo raica na sala me tara cake kina na veivosaki ni kalasi ni Siga Tabu ni Mate ena vakabauti Jisu Karisito kei na Nona Veisorovaki.

Vola toka na Nomu Nanuma

ivakatakilakila ni veiwasei

Sureta na Veiwasei

Tarogi ira na lewe ni kalasi era na sauma vakacava na taro vakaoqo “Na cava na Veisorovaki i Jisu Karisito?” ka vakakina “Meu na ciqoma vakacava na veivakalougatataki ni Veisorovaki i Karisito?” Era a wilika beka e dua na tiki ni ivolanikalou ena macawa oqo a vukea me sauma na taro e rua oqo?

ivakatakilakila ni veivakavulici

Vakavulica na iVunau

Sa sereki keda ko Jisu Karisito mai na ivalavala ca kei na mate, vaqaqacotaki keda ni da malumalumu, ka vakacegui keda ni da vakatovolei.

  • Era sa kila vinaka tiko li na lewe ni kalasi ni ikuri ni kena uabaleti na ivalavala ca kei na mate, sa rawa me vakacegui keda talega ko Jisu Karisito ni da vakatovolei ka vaqaqacotaki keda ni da malumalumu? Dua na sala mera vukei kine mera kunea na ivakavuvuli oqo o ya me volai toka na veivosa oqo ena vava ni volavola: iValavala Ca, Mate, Veivakatovolei, Malumalumu. Kerei ira na lewe ni kalasi yadua mera wilika e dua na tiki ni ivolanikalou e tiko ena “iKuri ni iVurevure” ka vakasamataka vakatitobu na sala ena vukei keda kina na iVakabula meda uabaleta se vosota na veika oqo. Mera vola toka na lewe ni kalasi na ka era sa vulica mai na ivolanikalou oqo ena kena ulutaga yadua ka wasea nodra ivakadinadina me baleta na iVakabula kei na Nona Veisorovaki.

  • Na cava e vakavulica na ivolanikalou me baleta na isau a volia kina ko Jisu Karisito na noda vakabulai? Me vakataka, raica na Luke 22:39–44; Mosaia 3:7; kei na Vunau kei na Veiyalayalati 19:16–19. Na isau cava a sauma kina na Tamada Vakalomalagi? (raica na Joni 3:16.).

    Vakoti na Karisito

    Na nona Vakoti na Karisito, maivei Louise Parker

  • Ni bera na kalasi, sureta e vica na lewe ni kalasi mera taura mai e dua na malanivosa mai na vosa ni koniferedi e vakamacalataka na sala e vakalougatataki keda kina na iVakabula ena Nona Veisorovaki (me vakataka, raica na “iKuri ni iVurevure”). E vakarabailevutaka vakacava na noda kila vinaka na veivakalougatataki ni Veisorovaki ni iVakabula mai na nodra veivakavulici na parofita edaidai? Era vaqaqacotaka vakacava na noda ivakadinadina me baleta na kaukauwa ni Nona Veisorovaki?

  • E rawa ni veivuke e dua na lesoni me ivakaraitaki ni duidui na savasava mai na ivalavala ca kei na vakataucokotaki na bula me uasivi sara: Mo vola ena vava ni volavola na imatai ni vica na iyatuvosa mai na Moronai 10: 32, ia mo laiva me volai cala tu na sipeli se qarama cala. Mo qai sureta e dua ena lewe ni kalasi me bokoca na veitikina e volai cala. E wali beka kina na leqa? Na lesoni cava eda sa vulica mai na ivolanikalou oqo kei na lesoni ivakaraitaki oqo me baleta na mana ni Veisorovaki kivei keda? Ena veivuke talega na itukutuku oqo nei Peresitedi Dieter F. Uchtdorf: “Kevaka e ibalebale walega ni vakabulai me bokoci ga kina noda cala kei na ivalavala ca, ia na vakabulai—ena kena totoka taucoko—ena sega sara ni se yacova rawa na ka a nakita kina o Tamada me baleti keda. E cecere cake na Nona inaki: E vinakati ira na luvena tagane kei na luvena yalewa mera vakataki Koya” (“Na iSolisoli ni Loloma Vakalou ni Kalou,” Ensign se Liaona, Me 2015, 108).

  • Ena rawa me vukei keda na italanoa kei na vakatautauvata meda kila vinaka kina na Veisorovaki i Karisito. Me vaka, na italanoa nei Elder Jeffrey R. Holland baleta e rua na veitacini cauravou e rau kabata e dua na baba vatu ena nona vosa “Lewa Dodonu, Loloma” (Ensign se Liaona, Me 2015, 104–6). E tiko talega e dua na vidio ena ulutaga vata ga ena LDS.org. Se mo ni sarava na “Handel’s Messiah: Debtor’s Prison” (LDS.org; raica na ivakamacala ena “iKuri ni iVurevure”) ka veivosakitaka na kena sereki keda na Veisorovaki i Jisu Karisito mai na noda vesuki tu.

Era vakadinadinataka na Daunivakadinadina ena Veiyalayalati Vou ni sa qaqa o Jisu Karisito vei mate.

  • Sa rawa me talevi na itukutuku vakaivolanikalou ni imatai ni Siga ni Mate—na Tucaketale i Jisu Karisito. Mo sureta e dua ena lewe ni kalasi me tokaruataka na italanoa ena nona vosa ga (raica na Joni 20:1–17). Sa rawa mo vakaraitaka e dua na vidio ena iVola Tabu me vakataka na “He Is Risen” (LDS.org).

  • Era na rairai kila vakatitobu sara na kalasi na kedra bibi o ira na ivakadinadina ni nona Tucaketale ko Jisu Karisito kevaka mera raitayalotaka ni ra loya se dauvolaitukutuku mera vakadikeva tiko na itukutuku ni sa tucake tale na Karisito. Sureta mera vakasaqara eso ena tiki ni ivolanikalou era rawa ni ivakadinadina (raica na Maciu 28:1–10; Luke 24:13–35; Joni 20:19–29; 1 Korinica 15:3–8, 55–58). Mera vola e dua na ivakalekaleka ni veika era na rawa ni kaya o ira oqo kevaka era na soli ivakadinadina e na vale ni veilewai se vakatarogi me soli itukutuku.

  • Dua na sala me titobu kina na noda vakavinavinakataka na Tucaketale ni iVakabula o ya meda na vakamacalataka vakacava na noda vakabauta vei ira na tamata. Era na wasea vakacava na lewe ni kalasi na nodra ivakadinadina me baleti Jisu Karisito ena ituvaki vakaoqo: sa laurai vua e dua na lewe ni matavuvale e dua na mate bibi; e dua na itokani sa mate e dua na nona daulomani; e taroga e dua na neiba na vuna o marautaka kina na Siga ni Mate. Vakayaloqaqataka mera raica na ivolanikalou (me vaka ena “iKuri ni iVurevure”) ni ra tuvanaka nodra isaunitaro. Kerea e vica na lewe ni kalasi me ra wasea na nodra nanuma.

Sa solia vei keda o Jisu Karisito na inuinui kei na marau.

  • Sa rawa vei keda kece meda rawata na inuinui ka yalo reki ena vuku ni iVakabula. Me wiliki na Joni 16:33 ka veivosakitaka na sala ena vukei keda kina na Veisorovaki i Jisu Karisito meda yalomarau ni da vakatovolei tiko. Eda sa mai marau vakacava ka tokoni tiko ena gauna ni noda vakatovolei?

  • Ni ra wilika na ivakadinadina nei Pita ena 1 Pita 1:3–11 ena vakalevutaka na nodra nuitaka tiko na lewe ni kalasi na Veisorovaki i Jisu Karisito. Solia vei ira na gauna mera vakasamataka vakatitobu na veitikina oqo ka mera veisa ena kena kunei na ivolanikalou tale eso e vakamacalataka talega na sala ni kena rawati na inuinui vei Jisu Karisito (raica na Topical Guide, “Hope”). Sa rawa mera vakayagataka na ivolanikalou era kunea mera cakava e dua na posita me vakaraitaki tu e vale se onolaini (raica na ivakaraitaki ni vosa ni iyaloyalo veivakauqeti ena LDS.org). Sa rawa vei ira na lewe ni kalasi mera raica na kedra ituvaki na lewe ni matavuvale se itokani era gadreva tu mera vakanuinui vakalevu cake.

ivakatakilakila ni vuli

Vakayaloqaqataki na Vuli ena iTikotiko

Na cava ena vakauqeti ira na lewe ni kalasi mera wilika na Maciu 18 kei na Luke 10? Mo tukuna ni vei wase ni ivola oqo e tiko kina e rua na vosa vakatautauvata guilecavi dredre ni iVakabula, e tukuna tiko na lesoni bibi meda veimaliwai kina vakai keda.

ivakatakilakila ni ivurevure

iKuri ni iVurevure

Siga ni Mate

Na Veiivolanikalou baleta na Veisorovaki ni iVakabula.

Na itukutuku me baleta na Veisorovaki ni iVakabula.

Na serenilotu baleta na Veisorovaki ni iVakabula.

Sa rawa vei ira na lewe ni kalasi mera lagata eso na serenilotu ka wilika na ivolanikalou veisemati e tiko ena botoni draunipepa. Era sa rairai vulica beka eso ena lewe ni kalasi na serenilotu eso me tiki ni vuli ivolanikalou vakamatavuvale ena macawa oqo; ka vakayaloqaqataka mera wasea.

Vidio me baleta na Siga ni Mate

Ena veiyabaki sa dau vakarautaka na Lotu na itukutuku ni Siga ni Mate, era tiko ena mormon.org/easter.

Sa sereki keda o Jisu Karisito.

Ena 1741, a bulia o George Frideric Handel e dua na sereivakatagi baleti Jisu Karisito, e vakatokai na Mesaia. A vakadeitaka o Handel me vagolei na ilavo e rawati mai na soqo ni Mesaia me sauma nodra sereki na dinau tu mai na valeniveivesu ni daudinau. Era sa mai sereki e sivia e 140 na tamata era a vesu baleta ni ra a sega ni sauma rawa na nodra dinau. Baleta na ka sa yaco oqo, a kaya kina o Peresitedi Russell M. Nelson, “Ni sega na Veisorovaki i Jisu Karisito, sa sega na inuinui meda sauma na dinau, me vakataki ira era tu ena valeniveivesu ni daudinau. Sa lako mai na noda Dauveivueti, na Turaga ko Jisu Karisito me sauma e dua na dinau a sega ni dinautaka baleta ni da dinau tu ka sega ni sauma rawa.” Na vidio baleta na ka oqo, raica na “Handel’s Messiah: Debtor’s Prison” ena LDS.org.

Vakatorocaketaki ni Noda Veivakavulici

Mo iyaya ni cakacaka ni Yalo. Na nomu inaki vaka-qasenivuli mo kakua ni cakava ga me rawa na nomu veivakavulici ia mo vukei ira na tamata mera ciqoma na veivakauqeti ni Yalo Tabu—o koya na qasenivuli dina. (Raica na Veivakavulici ena iVakarau ni iVakabula, 10.)