na kai Samaria Dauloloma

Na Kai Samaria Dauloloma, maivei Dan Burr

22–28 ni Epereli

Maciu 18; Luke 10

“A Cava Meu Kitaka Meu Rawata Kina na Bula Tawamudu?”

Wilika na Maciu 18 kei na Luke 10, ka vola na veivakauqeti vakayalo e yaco vei iko. Ni sa vakauqeti na yalomu, o na taroga beka, me vaka a kaya o Elder Richard G. Scott, “E tiko tale beka na ka meu kila?” (“Na Rawati ni Veidusimaki Vakayalo,” Ensign se Liaona, Nove. 2009, 8).

Vola na Veivakauqeti ni Yalomu

wasei ni ivakatakilakila

Sureta na Veiwasei

Era umanaki tu ena wase oqo e vuqa na ivakaraitaki ni vakavulici ni kosipeli e duidui mai na kena e vakavulica vei keda o vuravura. Na dina cava era sa kunea na lewe ni kalasi ena wase oqo e dredre vei ira eso mera ciqoma se bulataka?

ivakatakilakila ni veivakavulici

Vakavulica na iVunau

Maciu 18:21–35

E dodonu meda veivosoti keda vinakata me vosoti keda na Turaga.

• Se gauna cava ga, e gadrevi vei keda kece meda vosota e dua e vakacudrui keda. O na vakayagataka vakacava na vosa vakatautauvata ni dauveiqaravi sega ni dauloloma me vakauqeta kina na lewe ni kalasi mera dauveivosoti? E rawa talega mo vola na taro vakaoqo ena vava ni volavola ka sureta na kalasi mera vakasamataka vakatitobu ena gauna e talanoataka tiko kina e dua na vosa vakatautauvata: O cei e matataka tiko na tui? O cei e matataka tiko na dauveiqaravi sega ni dauloloma? Na cava e vakaibalebaletaka tiko na nona dinau? O cei e matataka tiko na dauveiqaravi? Na cava e vakaibalebaletaka tiko na nona dinau? Na itukutuku me baleta na taledi kei na peni ena “iKuri ni iVurevure” ena soli vakasama ki na kalasi ni rau duidui sara na rua na dinau ena vosa vakatautauvata. Sureta na kalasi mera vakasamataka vakatitobu na itukutuku e solia vei ira yadua na vosa vakatautauvata.

• Sa rawa mo sureta na kalasi mera vakayagataka na vosa vakatautauvata ni dauveiqaravi sega ni dauloloma e vakavulica talega na lesoni ni veivosoti ena ituvaki ni gauna oqo kei na matailalai. (Me ra na cakacaka vakailawalawa ena kena oqo.) Veivosakitaka na kena saumi na taro nei Pita baleta na iwiliwili ni gauna me veivosoti kina.

• Na vidio “Forgive Every One Their Trespasses: The Parable of the Unmerciful Servant” (LDS.org) ena rawa ni vukea na kalasi mera raitayalotaka na vosa vakatautauvata. Me ikuri ki na Maciu 18:35, ena vukea na kalasi na ivolanikalou oqo mera kila vinaka na vuna e vinakata kina na Turaga meda vosota na tamata kecega: Maciu 6:12–15; Efeso 4:32; kei na Vunau kei na Veiyalayalati 64:7–11.

Luke 10: 25–37

Ni gadrevi me rawati na bula tawamudu, e dodonu meda lomana na Kalou kei ira era tu volekati keda.

• Oqo e dua na vakasama vei ira na kalasi mera raica vou kina na vosa vakatautauvata ni kai Samaria dauloloma: Sureta mera raitayalotaka ni ra vakadikeva tiko e dua na kisi ni veimoku kei na butako ena gaunisala ena kedrau tadrua o Jeriko kei Jeruisalemi. Sureta e vica ena kalasi mera vakavakarau mai ki na kalasi mera matataki ira na duidui ni tamata ena vosa vakatautauvata ka vakamacalataka na nodra vakaitavi ena kisi oqo. Me vakataka, na cava rau a sega kina ni tu vakadua ka vukea na tamata a mavoa na bete kei koya na Livai? Na cava a tu kina vakadua na kai Samaria? Na vakasama cava tale e rawa ni tomana o itaukei ni bure? Na cava beka e nanuma o koya a mavoa baleti iratou yadua? Raica na veivosaki me vakauqeta na kalasi mera na vakataka na kai Samaria kei itaukei ni bure ka kakua ni vakataki rau na bete kei na Livai. Ena gauna cava beka era a vakataka kina na kalasi “e dua na tamata,” a gadreva dina sara me vukei? A lako mai vakacava na veivuke? Eda na cakacaka vata vakacava na lewe ni tabanalevu meda veivuke yani, me vakataka na ka rau a cakava na kai Samaria dauloloma kei itaukei ni bure?

• Semati tiko ki na vakavulici ni ibalebale ni noda lomani ira era tiko volekati keda, na vosa vakatautauvata ni kai Samaria dauloloma sa ivakatakilakila talega ni kaukauwa i Jisu Karisito me vakabulai keda. (Na matailalai ni ivakadewa oqo ena kunei tiko ena “iKuri ni iVurevure.”) Sa rawa mo sureta na kalasi mera wilika na vosa vakatautauvata, mera raica oqo kei na ibalebale ni ivakatakilakila oqo kei na so tale. Na cava eda vulica baleta na iVakabula kei na Nona Veisorovaki ni da wilika na vosa vakatautauvata ena sala oqo?

Luke 10:38–42

Eda digitaka na “tikina vinaka o ya” ena digidigi ena veisiga e mua yani ki na bula tawamudu.

• Sa sinai tu na bula ena veika yaga sara meda cakava. Na italanoa i Meri kei Marica ena rawa me vukea na kalasi mera digitaka kina na “tikina vinaka o ya” (tikina e 42; raica talega na na ituvatuva ni macawa oqo ena Lako Mai, Mo Muri Au—Me Baleta na Tamata Yadua kei na Matavuvale). Ni wiliki oti vata na Luke 10:38–42 sa rawa mo taroga na kalasi na cava era na cakava ke sa vakasalataki ira na iVakabula ke o Marica o ira. Ena vakayaco-ka vakacava na ka oqo ena nodra idigidigi ni mataka? Eda na kila vakacava ena noda bula na veika e “gadrevi vakaidina”? (Luke 10:42). Ena rawa vakacava me veivuke na itukutuku nei Elder H. Oaks “Good, Better, Best” (Ensign se Liaona, Nove. 2007, 104–8) vei ira na kalasi?

ivakatakilakila ni vuli

Vakayaloqaqataki na Vuli ena iTikotiko

Tukuna ki na kalasi ni ra wilika na ivakaro ni iVakabula me baleta na Nona sa vakalou ena Joni 7–10 ena kalasi ni macawa tu mai, sa rawa mera kila vakadeitaki cecere sara ni sai Koya na Karisito.

ivakatakilakila ni ivurevure

iKuri ni iVurevure

Maciu 18; Luke 10

Taledi kei na peni.

E dredre me kilai na iwiliwili dodonu ni ilavo e tukuni tiko ena vosa vakatautauvata ni dauveiqaravi sega ni dauloloma (raica na Maciu 18:23–35). Ia, e tiko ena Veiyalayalati Vou na ivakatakilakila mena vukei keda meda kila vinaka na kedrau duidui vakalevu na dinau ni 100 na peni kei na dinau ni 10,000 na taledi.

Na dauveiqaravi ena vosa vakatautauvata a lailai cake na nona dinau ni 100 na peni. Ena Maciu 20:2, na peni (na vosa e baleta e dua ga na peni) sai isau tiko ni cakacaka ni dua na siga ena were ni vaini. O koya gona, a dodonu kina vei dauveiqaravi me a cakacaka me 100 na siga me rawata kina e100 na peni me sauma kina na nona dinau. Ia na ilavo oqo e lail[ai wale sara ni vakatauvatani ki na 10,000 na taledi dinau nei dauveiqaravi sega ni dauloloma. Ena Maciu 25:14–15, na nona iyau taucoko e dua na tamata—“nona iyau”—e kena isau ga e walu na taledi. O koya gona, ena soqoni vata, maroroi vata mai na nodra iyau e sivia e 1,000 na tamata me vakataki koya oqo me sauma kina na dinau nei dauveiqaravi sega ni dauloloma.

koini ni gauna makawa

A vakamacalataka o Jisu na ilavo kei na dinau me vakavulica kina na veivosoti.

Sa mai sauma o Jisu Karisito na noda dinau vakaitamera na tamata yadua.

A wasea o Elder Jeffrey R. Holland na veika a vulica me baleta na vosa vakatautauvata ni dauveiqaravi sega ni dauloloma ena kalasi ni inisitute:

“A raica [o qasenivuli] ni veivosoti ni 100 na peni, eda sa namaki tu kina meda dui solia yani ki na tamata yadua ka kila ni sa iwiliwili ni ilavo vinaka toka, sa … iyau lailai me kerei ni vakatauvatani kei na 10,000 na taledi ni veivosoti i Jisu Karisito kivei keda.

“Na dinau o ya, na noda dinau, sa iwiliwili cecere sara, ni sa tukuna tale vei keda [o qasenivuli], ni sega ni rawa me vakasamataki. Ia a kaya, ni sai koya sara ga na ka e tukuna tiko na iVakabula ena veivakavulici oqo, sa tiki bibi ni vosa vakatautauvata. A nakita o Jisu me ra kidava rawa vakalailai o ira sa rogoca na rai tawamudu kei na isolisoli cecere ni nona loloma veivueti, na nona veivosoti, kei na nona Veisorovaki.

“… Ena imatai ni gauna ni noqu bula au a vakila kina na rabailevu ni solibula ni Karisito baleti au—na isolisoli sega ni se vakasamataki rawa tiko nikua. Ia na isolisoli ena imatai ni gauna, meu vakasamataka vakabibi kina meu na dauvosoti ira na tamata ka meu kakua ni luluqa ena lomani ira ena nodra leqa kei na ituvaki ni bula” (“Students Need Teachers to Guide Them” [Church Educational System satellite broadcast, June 20, 1992]).

Na vakadewa Vakarisito e liu baleta na vosa vakatautauvata ni kai Samaria dauloloma.

Ena veisenitiuri sa oti, era a raica na ivakatakilakila na lotu Vakarisito ena vosa vakatautauvata ni kai Samaria dauloloma ni a vakavulica na ilesilesi i Jisu Karisito ni sa noda iVakabula. Me vakataka, na tamata era a butakoci koya na daubutako sa matataki keda kece sara. O ira na tamata daubutako era matataka na ivalavala ca kei na mate. Na kai Samaria e matataka na iVakabula. Na bure e matataka na Lotu, kei na iyalayala nei kai Samaria mena lesu mai e matataka na iKarua ni Lesu Mai ni iVakabula. (Raica na John W. Welch, Ensign, Feb. 2007, 40–47.)

Vakatorocaketaki ni Noda Veivakavulici

Muria na iVakaraitaki ni iVakabula Ni ko wilika na itukutuku ni veivakavulici ni iVakabula ena Veiyalayalati Vou, vakasaqara na lesoni ena Nona ivakaraitaki ena rawa me vukea mo qasenivuli vinaka cake. Me vakataka, na Luke 10:25–37, na cava a cakava o Jisu me vakavulica kina na loya me rawata kina na bula tawamudu?