Na Mataliataki, maivei Carl Heinrich Bloch

1–14 ni Epereli.

Maciu 16–17; Marika 9; Luke 9

“Oi Kemuni na Karisito”

Na itukutuku cava o a rogoca se wilika mai na koniferedi raraba sa oti e rawa ni tokona na vunau ena veiwase oqo? Ni ko vulica, vakasamataka vakatitobu na nodra gagadre na lewe ni kalasi ka vola na veivakauqeti o sa ciqoma.

Vola na Nomu Nanuma

Sureta na Veiwasei

Dua na sala mo vakayaloqaqataka kina na lewe ni kalasi yadua mera vulica na ivolanikalou vata kei na nodra matavuvale, mo sureta mera wasea ena veimacawa na nodra sa vakalougatataki ni ra vulica na ivolanikalou. Me vakataka, a yaco vakacava na nodra vulica na veiwase oqo me vakauqeta nodra gauna ena koniferedi raraba?

Vakavulica na iVunau

Maciu 16:13–17

Na vakadinadinataki Jisu Karisito e yaco mai ena ivakatakila.

• A dua beka na lewe ni kalasi a vakamacalataka vua e dua na sala a kila kina ni sa dina na kosipeli? Ena Maciu 16:13–17, na cava a vakavulica na iVakabula baleta na sala eda ciqoma kina e dua na ivakadinadina? Sa rawa mo wasea na sala a rawata kina o Alama na nona ivakadinadina (raica na Alama 5:45–46) se na nona vakavulici Oliver Cowdery na Turaga baleta na ivakatakila (raica na V&V 6:14–15, 22–23; 8:2–3). Na cava o nanuma a rawa ni kaya o Pita se Alama se Oliver Cowdery ke dua a taroga na sala cava a kila kina ni dina na kosipeli?

• Era na tiko beka ena kalasi era masulaka tiko beka na nodra ivakatakila ia era lecava na sala mera kila kina ni yaco mai. A vakayagataka o Elder David A. Bednar e rua na gauna kilai vata kei na rarama me vakavulica noda na ciqoma kina na ivakatakila; sa rawa mo wasea veiira na lewe ni kalasi na veivakararamataki nei Elder Bednar (raica na “Na Yalo ni iVakatakila,” Ensign se Liaona, Me 2011, 87–90; raica talega na vidio “Patterns of Light: Spirit of Revelation” on LDS.org). Na veivakavulici ni ivolanikalou se itukutuku tale eso e rawa mera vakasamataka na kalasi ena vukea e dua me kila na nona ivakatakila? (Me ivakaraitaki, raica na 1 Tui 19:11–12; Kalatia 5:22–23; Inosi 1:1–8; V&V 8:2–3.)

Maciu 16:13–19; 17:1–9

Sa ka bibi na idola ni matabete ki na noda vakabulai.

• Me veivosakitaki na idola ni matabete, sa rawa mo vola na taro vakaoqo ena vava ni volavola: Na cava mada na idola ni matabete? Ocei e taura tu na idola ni matabete? Era soli vakacava na idola ni matabete? Sa rawa mo wasea talega eso na tiki ni ivolanikalou ena vukea me sauma na veitaro oqo, me vaka ena Maciu 16:19; Vunau kei na Veiyalayalati 107:18–19; 128:8–11; 132:18–19, 59; kei na Josefa Simici—Ai Tukutuku 1:72. Era na vukei na lewe ni kalasi ni ra raica na iVoladusidusi 2: Veiliutaki ena Lotu (2010), 2.1.1; Na itukutuku nei Elder Neil L. Andersen “Na Kaukauwa e Tiko ena Matabete” (Ensign se Liaona, Nove. 2013, 92–95); se Tudei ena Vakabauta, 126–27. Solia na gauna veiira na lewe ni kalasi mera vakadikeva e dua na taro era sa digitaka. Mera qai veivakavulici vakai ira ena ka era sa vulica.

• Ena veivuke na veivosaki baleti Pita kei na iApositolo eso era a ciqoma na idola ni matabete ena Ulunivanua ni Mataliataki me qaqaco kina na nodra ivakadinadina na lewe ni kalasi baleta na vakalesuimai ni idola ni matabete ena siga edaidai. Me vakauqeti na veivosaki vakaoqo, sa rawa mo kerea e veimama ni kalasi mera vulica na Maciu 17:1–9 (raica talega na na ituvatuva ni macawa oqo ena Lako Mai, Mo Muri Au—Me Baleta na Tamata Yadua kei na Matavuvale) ka mera vulica na ikarua ni veimama ni kalasi na Vunau kei na Veiyalayalati 110. Mera qai veiwasei vakai ira ena ka era sa vulica ka vola na veika e tautauvata ena rua na itukutuku oqo. Ena rawa me veivuke talega na vidio “Priesthood Keys: The Restoration of Priesthood Keys” (LDS.org).

• Era sa kila vinaka tiko beka na kalasi na sala ena vakalougatataki kina na nodra bula ena idola ni matabete? Me vukei ira, sureta mera vakasaqara ena iVoladusidusi 2, 2.1.1, na tamata era taura tu na idola ni matabete. O cei o ira oqo era tiko ena nomuni tabanalevu kei na iteki? Sa rawa mo vola na yacadra ena vava ni volavola se sureta eso vei ira mera mai vosa ena kalasi. Era cakacakataka vakacava na idola ni matabete a soli vei ira mera dusimaka na cakacaka ni matabete ena nodra veikacivi? Eda sa vakalougatataki vakacava ena nodra veiqaravi na iliuliu ni matabete?

Na idola ni matabete sai koya na lewa me dusimaka na vakayagataki ni matabete.

Marika 9: 14–30

Ni da vakasaqara na vakabauta e cecere cake, e dodonu meda taura matua tiko na vakabauta sa tiko rawa vei keda.

• A vakayagataka o Elder Jeffrey R. Holland na italanoa ni dua na tama a vakasaqra me vakabulai o luvena me vakavulica kina na sala meda toso vua na Turaga ni da vakila ni takiveiyaga tu na noda vakabauta (raica na “Kemuni na Turaga, Au sa Vakabauta,” Ensign se Liaona, Me 2013, 93–95). E tolu na yavu mai na nona vosa era oka tiko ena “iKuri ni iVurevure.” Sa rawa mo wasea na kalasi ki na va na ilawalawa ka lesia e dua mera veivosakitaka na Marika 9:14–30 kei na vo ni ilawalawa yadua mera veivosakitaka e dua vei iratou na vakadidike nei Elder Holland. Sa rawa mera raica ena itukutuku ni ivolanikalou e rawa ni vukea me vakalevutaka na noda vakabauta. Mera wasea na ilawalawa yadua ki na vo ni kalasi eso na veivakararamataki mai na nodra veivosaki.

Vakayaloqaqataki na Vuli ena iTikotiko

Mera vakayaloqaqataki ira na lewe ni kalasi mera vuli e vale ena macawa oqo, ka tukuna ni ituvatuva e tarava ena Lako Mai, Mo Muri Au—Me Baleta na Tamata Yadua kei na Matavuvale ena vukei ira kei na nodra matavuvale me vakaibalebale cake na nodra Siga ni Mate. Me ikuri, sa rawa mo kaya ni Siga Tabu ni Siga ni Mate sa gauna vinaka vei ira mera sureti ira sa luluqa tu vakalotu se itokani ni matalotu tale eso mera mai lotu.

iKuri ni iVurevure

Maciu 16–17; Marika 9; Luke 9

Na mataveiliutaki ni mataisoqosoqo kece era sa ciqoma na lewa sa lesi mai.

O ira taucoko na mataisoqosoqo ena tabanalevu kei na iteki era cakacaka ena veidusimaki nei bisopi se peresitedi ni iteki, ka sa tu vua na idola ni vakatulewa. E sega ni soli na idola vei ira na peresitedi ni mataisoqosoqo kei ira na nodra daunivakasala. Era na ciqoma ga na veika sa lesi mai vei ira me baleta na nodra veikacivi” (iVoladusidusi 2, 2.1.1).

E tolu na vakadidike ena vukea meda vakabauta vakalevu.

Ni oti nona tokaruataka na itukutuku ena Marika 9:14–29, a vakavulica o Elder Jeffrey R. Holland:

“Na imatai ni vakadidike e laurai ena italanoa oqo o ya ni sa bolei na vakabauta, a vakadeitaka taumada o tamanigone na nona vakabauta ka qai kila ena gauna oya ni sa vakaiyalayala walega. Na veivakadeitaki taumada o ya e dodonu sara ka sega ni lomalomarua: ‘Kemuni na Turaga, au sa vakabauta.’ Au sa kaya kina vei kemuni kece e gadreva me vakalevutaki na nomuni vakabauta, mo ni nanuma tiko na tamata oqo! E na veigauna ni rere se vakatitiqa se veigauna dredre, taura matua tiko na yavu o sa qaqa tiko kina, ena gauna mada ga e vakaiyalayala tu kina na yavu o ya. … Taura matua na veika o sa kila rawa tu ka kaukauwa tiko me yacova ni ra yaco mai na ikuri ni kila-ka. … Na levu ni nomu vakabauta se na ivakatagedegede ni nomu kila-ka e sega ni kena iusutu—sai koya ga na dina o vakaraitaka kina na nomu vakabauta vata kei na dina o sa kila rawa tiko.

“Na ikarua ni vakadidike e duidui toka mai na kena imatai. Ni dau yaco mai na leqa se lomatarotaro, kakua ni saga mo vakataroga na nomu vakabauta ena nomu taroga na kena e sega ni tiko vei iko, ka veimuataki me vaka ena nomu ‘tawa-vakabauta.’ … Au sega ni kerei iko mo lasutaka nomu vakabauta e sega vei iko. Au sa kerei kemuni mo ni dina ki na vakabauta e tiko vei kemuni. … Me matata nomu taro ni sa gadrevi vakakina; sa sinai kina na bula ena dua na ulutaga se dua tale. Ia kevaka dou gadreva vakamatavuvale mo dou vakabulai, kakua ni laiva na lomatarotaro oqori me veivakataotaki ki na cakamana ni nomudou vakabauta. …

“iOtioti ni vakadidike: ni yaco mai na vakatitiqa se veika dredre, kakua ni rere mo kerea na veivuke. Kevaka eda vinakata oqo ena yalomalua kei na dina me vaka a cakava o tamanigone oqo, eda na rawata. Na ivolanikalou e tukuna tiko ni mataqali gagadre dina vakaoqo esa ‘vakainaki dina,’ ka vakasaqarai ena ‘lomamudou taucoko, sega kina na veidabui kei na veivakaisini ena mata ni Kalou.’ [2 Nifai 31:13]. Au vakadinadinataka ni kena saumi mai na mataqali vakamamasu vaka o ya ena veivuke mai na Kalou mai na yasa ruarua ni ilati me vaqaqacotaka na noda vakabauta” (“Kemuni na Turaga, Au sa Vakabauta,” Ensign se Liaona, Me 2013, 93–94).

Vakatorocaketaki ni Noda Veivakavulici

Taroga na ka e sureta na ivakadinadina. Na taro e vakayaloqaqataka na lewe ni kalasi mera wasea na nodra ivakadinadina sa sala mana me sureta na Yalo. Me vaka, na kena veivosakitaki na Maciu 16:13–17, ka rawa mo taroga, “Na cava o sa vulica baleta na iVakabula e sa vaqaqacotaka na nomu ivakadinadina baleti Koya ni sa iVakabula?” (Raica na Veivakavulici ena iVakarau ni iVakabula, 32.)