“29 ni Epereli–5 ni Me. Joni 7–10: ‘Oi Au na iVakatawa Vinaka’” Lako Mai, Mo Muri Au—Me Baleta na Matawilivola ni Siga Tabu: Veiyalayalati Vou 2019 (2019)
“29 ni Epereli–5 ni Me. Joni 7–10,” Lako Mai, Mo Muri Au—Me Baleta na Matawilivola ni Siga Tabu: 2019
O Koya Vei Kemudou sa Sega ni iValavala Ca, maivei Liz Lemon Swindle
29 ni Epereli–5 ni Me
Joni 7–10
“Oi Au na iVakatwa Vinaka”
Ena yaco vei iko kei na lewe ni kalasi na veivakararamataki ni dou wilika na Joni 7–10 ena macawa oqo. Nanuma tiko ni vakasama ena ituvatuva oqo me sema ka sega ni sosomitaka na veivakauqeti ni ko vulica na ivolanikalou.
Vola na Nomu Nanuma
Sureta na Veiwasei
Vakananumi ira na lewe ni kalasi na bibi ni cakava na nodra itikotiko me vanua ni vuli kosipeli. Na itukutuku cava mai na Joni 7–10 era a veivosakitaka na lewe ni kalasi kei na nodra matavuvale ena loma ni macawa? Na itukutuku cava a vukei ira sara vakalevu?
Vakavulica na iVunau
Sai Jisu Karisito na iVakabula kei vuravura.
-
Ena loma ni Joni 7–10, a veivakaroti raraba kina vakavica na iVakabula ka na vukea na lewe ni kalasi mera kila vinaka na Nona ilesilesi ka toro voleka Vua. Mo sureta na lewe ni kalasi mera wilika na veitikini ivolanikalou oqo ka wasea na ka era sa vakavulica baleta na ilesilesi vakalou ni iVakabula. E cakava vakacava na Karisito na ilesilesi oqo ki na noda bula?
-
Joni 7:37–39: “Kevaka e dua sa via gunu, me lako mai vei au ka gunu”
-
Joni 8:58: “Ni sa bera ni sucu ko Eparama, au sa bula” (raica na ituvatuva ni macawa oqo ena Lako Mai, Mo Muri Au—Me Baleta na Tamata Yadua kei na Matavuvale me baleta na veivakararamataki ni tikina oqo)
-
Joni 9:8–10, 35–38: “Na Luve ni Kalou”
-
Joni 10:7–9: “Na katuba”
-
Joni 10:11–14: “Na ivakatawa vinaka”
-
Na Rarama kei Vuravura, maivei Howard Lyon
Ni da bulataka tiko na veivakavulici i Jisu Karisito, eda na yaco meda na kila ni sa dina.
-
Era na kila vinaka na lewe ni kalasi ni dau tarai cake na ivakadinadina ni bulataki tiko e dua na ivunau ke ra vakatauvatana na cakacaka ni vulica e dua na kila ni ra dui cakava. Me vaka, nomu sureta na lewe ni kalasi era kila na veisautaki e vuqa na polo e ligadra se vakatagitaka e dua na iyaya ni ivakatagi mera tukuna era a tara cake vakacava na kila oqo. Era a vakavulici vakacava mai na nodra vakatovotovotaka ga vakai ira ka sega ni saravi ira walega era cakava tiko? Veivosakitaka vakalasi, ni vakatauvatani vakacava na sasaga mo kila ki na iwalewale vakayalo e vakamacalataka tiko na iVakabula ena Joni 7:14–17. Na veika cava era sotava na kalasi mera wasea baleta na vakamuri ni iwalewale oqo me rawati na kila-ka vakayalo?
-
O na vakaraitaka vakacava na dina e vakavulici tiko ena Joni 7:14–17? Dua na vakasama o ya mo kerea na kalasi me ra wasea na gauna era a taura kina e dua na ivakadinadina ni dua na dina ni kosipeli ni ra a bulataka. Na itukutuku nei Sister Bonnie L. Oscarson ena “iKuri ni iVurevure” sa dua talega na ivakaraitaki vinaka. Solia na gauna ki na lewe ni kalasi mera vakasamataka e dua na ivakavuvuli ni kosipeli me qaqaco kina na nodra vakadinadinataka, ka vakayaloqaqataka mera lalawataka mera bulataka vakataucoko.
Ni sa yaco meda kilai Jisu Karisito, eda na kila kina na Tamana.
-
E vakaraitaka o Elder Jeffrey R. Holland: “Eso ena vuravura nikua era vakaleqai tiko ena vakasama cala veivakaogai baleta na [Kalou na Tamana]. … Era kaya e vuqa na tamata nikua ni ra vakacegu cake ena liga i Jisu, ia era masa ni ra vakasamataka na veisotari kaukauwa ni Kalou” (“The Grandeur of God,” Ensign se Liaona, Nov. 2003, 71). Na cava e vakavulica na vosa ni iVakabula ena Joni 8:18–19, 26–29 baleta na kena isema o Koya kei na Tamana? Ni wiliki ka veivosakitaki oti na veitikina oqo, sa rawa mera vola na lewe ni kalasi ena vava ni volavola na veika a cakava, cavuta, se vakavulica o Jisu. Na cava eda sa vulica baleta na Kalou na Tamada mai na veika oqo?
Sa yaco na loloma veivueti ni iVakabula vei ira kece sa veivutuni.
-
Kivei ira era vakila ni ra cudruvi baleta nodra ivalavala ca, na itukutuku ni iVakabula ni solia na loloma veivueti kei na veivutuni vua na yalewa dautagane sa rawa me ivurevure ni veivakayaloqaqataki. Se, ra temaki na lewe ni kalasi mera cudruva e dua ni ra sa valavala ca, na italanoa oqo sa rawa me ivakaro. Sa rawa mo sureti ira mera wilika na Joni 8:1–11, ka kunea na isau ni taro me vakaoqo: Na cava e vakavulica na italanoa oqo baleta na loloma veivueti ni iVakabula? Ena vukei keda vakacava na Nona loloma veivueti ni da caka cala ni da temaki meda vakalewai ira na tamata? (raica na Alama 29:9-10). Sa rawa mo vakaraitaka na vidio “Go and Sin No More” (LDS.org).
-
Ni gadrevi mera kunea na lewe ni kalasi na itukutuku e baleti ira yadua ena Joni 8:1–11, mo wasea na kalasi ki na tolu na ilawalawa—e dua me raica na nodra vosa kei na itovo na Farisi, e dua tale me raica na vosa kei na itovo ni iVakabula, ka dua tale me raica na vosa kei na itovo nei yalewa. Sureta na ilawalawa yadua mera vola na dina vakayalo eso era vulica ni ra wilika na tiki yadua ni itukutuku.
-
Eso na gauna eda sega tu ni kila na sala eda sa vakalewa kina eso. Oqo e dua na itaviqaravi me vukea na lewe ni kalasi mera uabaleta na ivakarau oqo: Kerea na kalasi mera vukei iko me volai na sala eda vakalewai ira kina na tamata (na kedra irairai, nodra itovo, kedra irogorogo, kei na so tale). Solia veiira na lewe ni kalasi na tiki ni pepa e kotivi tu ena ibulibuli ni dua na vatu, ka kerea mera digitaka e dua na sala era na vakalelewa kina era vakila ni ra sa cala kina ka vola ena vatu pepa. Na cava eda vulica mai na vosa ni iVakabula kivei ira na Farisi ena Joni 8:1–11? Sureta na kalasi mera vola ena yasa kadua ni vatu pepa na ka ena vakavotuya vei ira mera kakua ni vakalelewa (na malanivosa beka mai na Joni 8).
Vakayaloqaqataki na Vuli ena iTikotiko
Kerea na lewe ni kalasi mera vakasamataka na gauna era a vakayalia kina e dua na ka vakamereqeti. Ena ivolanikalou ni lesoni ena macawa mai oqo, era na vulica na sala e dau nanuma kina na Tamada Vakalomalagi kei Jisu Karisito o ira sa yali tu.
iKuri ni iVurevure
Ni da bulataka e dua na ivakavuvuli eda na rawata na kena ivakadinadina.
E kaya o Sister Bonnie L. Oscarson:
“E vakavulica na iVakabula, “Kevaka e dua na tamata sa via cakava na lomai koya, ena kila se sa ka mai vua na Kalou na ivunau, seu sa vosa vakaiau ga” [Joni 7:17]. Ena so na gauna eda dau tovolea me da cakava vakasukasuka. Me kena ivakaraitaki, eda na cakava beka vaqo: Au na marautaka meu bulataka na lawa ni ikatini, ia meu kila rawa mada ni dina. Eda dau masulaka beka me da rawata e dua na ivakadinadina ni lawa ni ikatini ka nuitaka me vakalougatataki keda na Turaga ena ivakadinadina oya ni se bera ni da vakalewena e dua na tikidua ni soli ikatini. E sega ni dau vaqori. Na Turaga e namaka me da cakacakataka noda vakabauta. Me da sauma tiko vakadodonu e veigauna na noda ikatini me da qai rawata e dua na ivakadinadina ni ikatini. …
“Au vinakata meu wasea e dua na ivakaraitaki ni ivakarau ena vukei keda kina noda bulataka e dua na ivakavuvuli me da saumaki ki na ivakavuvuli oya. … Era vakavulica vei au na noqu itubutubu kei na noqu qasenivuli ena lotu na kena bibi meu rokova na yagoqu, vakasavasavataka noqu vakasama, ka bibi duadua, vulica meu vakabauta na ivakaro ni Turaga. Au sa vakatulewa me na levei na veigauna au kila ni na yaco kina na gunu ka vagalalataki au mai na tavako kei na waigaga. Ena vuqa na gauna e kena ibalebale meu kakua ni wili ena veisoqo ni marau, dau tu yadua sara noqu veigadivi. Sa takalevu cake tikoga vei ira na itabagone na vakayagataki ni waigaga, ka sega soti ni se kilai levu ena gauna ko ya na kena rerevaki me vaka ena gauna oqo. E levu vei ira na noqu ilala era qai sotava na vakacaca tudei ena nodra bula mai na waigaga dau vukica na ivakarau ni vakasama ka ra vakabobulataki sara vakaca. Au vakavinavinaka ni a vakavulici vei au meu bulataka na Vosa ni Vuku mai neitou vale, kau rawata e dua na ivakadinadina titobu ni ivakavuvuli oya ni kosipeli ena noqu cakacakataka na noqu vakabauta ka bulataka. Na lomavinaka a yaco mai vei au ena noqu bulataka e dua na ivakavuvuli dina ni kosipeli sai koya na Yalo ni Yalo Tabu ka vakadeitaka tiko ni dina na ivakavuvuli” (“Mo Dou Saumaki Mai,” Ensign se Liaona, Nove. 2013, 77).
Vakatorocaketaki ni Noda Veivakavulici
Mo bula kilikili ki na veidusimaki ni Yalo. Ni ko bulataka tiko na kosipeli, sa kilikili kina me nomu itokani na Yalo, o koya sa qasenivuli vinaka duadua. Ni ko vakasaqara na Nona veidusimaki, ena soli vakasama kei na vakanananu vei iko na Yalo Tabu ena sala mo sotava kina na nodra gagadre o vakavulica ( raica na Veivakavulici ena iVakarau ni iVakabula, 5).