e mokoti luvena tagane o tagane

Na Gonetagane Cidroi, maivei Liz Lemon Swindle

6–12 ni Me

Luke 12–17; Joni 11

“Tou mai Reki Vata; Niu sa Kunea na Noqu Sipi sa Yali”

Vakavakarau ena nomu vulica ena masumasu na Luke 12–17 kei na Joni 11. Na “sipi cava sa yali” ena nomu kalasi e vakasamataki rawa? Vakayagataka na Lako Mai, Mo Muri Au—Me Baleta na Tamata Yadua kei na Matavuvale kei na ituvatuva oqo ni ko vakasaqara na veidusimaki ni Turaga mo sotava vinaka kina na nodra gagadre na lewe ni kalasi, ni ra sega mada ga ni tiko ena kalasi.

Vola na Nomu Nanuma

ivakatakilakila ni veiwasei

Sureta na Veiwasei

Na cakava e tiki bibi ni vuli, mo sureta kina na lewe ni kalasi mera wasea nodra digitaka na ka mera bulataka era sa vulica oti mai na ivolanikalou ena macawa oqo.

ivakatakilakila ni veivakavulici

Vakavulica na iVunau

Luke 14: 15–24

E sega na iulubale vinaka me cakitaki kina na kosipeli.

• Ni gadrevi me vukei na lewe ni kalasi mera vulica na vosa vakatautauvata ni kana vata cecere, mera raitayalotaka ni ko sureti ira ki na dua na kana magiti. Mera qai wasea na vuna eso era na tiko kina se sega. Wilika vata na Luke 14:15–24 ka veivosakitaka na nodra iulubale na tamata era tukuni tiko ena vosa vakatautauvata ni ra sa sureti ki na kana magiti e matataka tiko na kalougata ni kosipeli. Na cava era vakaiulubaletaka na tamata nikua era sega ni ciqoma kina na veisureti ni iVakabula mera ciqoma na veivakalougatataki ni Tamada Vakalomalagi? E rawa mera wasea na lewe ni kalasi na nodra kalougata ni ra sa cakava na solibula eso me rawa ni ra bulataka kina eso na ivakavuvuli ni kosipeli.

Luke 15

Eda rawa ni da vakasaqarai ira sa yali tu ka reki vata kei Tamada ni ra sa lesu mai.

• O na vakauqeti ira vakacava o vakavulica tiko mera vakasaqarai ira sa “yali” tu mera lesu mai baleta ni sega vei ira na kalougata ni kosipeli? Sa rawa mo sureta na lewe ni kalasi mera vakananumi ira mada na “sipi sa yali” era kila tu ka willika na Luke 15:1–7 ka vakananuma na tamata o ya. Na cava era sa vakauqeti kina mera dodoliga kina vua na tamata o ya ena kila kei na loloma? Ena veivuke ki na veivosaki oqo na italanoa nei Peresitedi Thomas S. Monson ena “iKuri ni iVurevure” se vosa nei Elder Mervyn B. Arnold “To the Rescue: We Can Do It” (Ensign se Liaona, Me 2016, 53–55).

• Ena veivuke beka ki na lewe ni kalasi mera kila vinaka na sala e dau yali kina e dua na tamata? Mo wasea vakailawalawa na lewe ni kalasi ka lesia mera vulica e dua vei iratou na vosa vakatautauvata ena Luke 15 . Na cava era tukuna tiko na vosa vakatautauvata ena sala meda kunei ira sa yali tu? Na vosa cava ena Luke 15 e vakatakila na yalona na Tamada Vakalomalagi baleti ira sa yali tu? Na lagati vata ni “Dear to the Heart of the Shepherd,” Serenilotu, naba 221, ena vakaibalebaletaka cake na veivakavulici ni vosa vakatautauvata oqo.

• Era na kune ka vinaka na lewe ni kalasi ni ra raica matua na vosa kei na itovo nei cauravou qase ena vosa vakatautauvata nei gonetagane cidroi. E rawa ni ra vola e dua na ka e tarava ni oti na vosa vakatautauvata ni a duatani na itovo nei cauravou qase vei tacina. Na ivakasala cava nei tama ena vosa vakatautauvata e vakavulica meda itovo vakacava vei ira sa yali tu kei ira sa lesu mai ki na kosipeli? (Raica talega na itukutuku nei Elder Jeffrey R. Holland ena “iKuri ni iVurevure.”) Se mo kerea na lewe ni kalasi mera raitayalotaka ni ra sa tama ena vosa vakatautauvata oqo. Na ikuri ni vakasala cava era na solia vei cauravou qase me vukea nona rekitaki ira sa toso cake se rawa-ka tiko?

Joni 11:1–46

Sai Jisu Karisito na Tucake Tale kei na Bula.

• Ni ra wilika ena macawa oqo na nona vakabulai o Lasarusa, era a kunea beka e dua na ka a vaqaqacotaka na nodra vakabauti Jisu Karisito ni sa Luve ni Kalou ka Mesaia sa yalataki tu? Sureti ira me ra wasea na veika era sa kunea. Na cava tale era sa sotava sa tara cake na nodra vakabauti Jisu Karisito? Sa rawa mo vakaraitaka ni gauna ni caka mana oqo, a sega ni tucaketale mai o Lasarusa ia a vakabulai ga mai na mate.

  E tagi tiko o Jisu

  Sa Tagi ko Jisu, maivei James Tissot

• Dua na sala me dikevi na Joni 11:1–46 o ya me kerei na lewe ni kalasi mera wilika na veitikina vakaveitaravi mai vakai ira ka sureta mera cegu ni ra kunea na ivakadinadina ni vakabauti Jisu Karisito. Kerei ira mera veivosakitaka na ka era sa kunea. Ena rawa vakacava ki na veivakatovolei kei na malumalumu me vaqaqacotaka noda vakabauti Koya?

• Na sala meda wilika tale kina na itukutuku oqo o ya me ra raica e vica na lewe ni kalasi na nodra rai na tamata era oka kina—me vakataka na iVakabula, iApositolo, Marica, Meri, kei Lasarusa. Na cava e rawa ni da vulica maivei ira yadua? Na cava eda rawa ni vulica baleta na iVakabula ena Joni 11:33–35? Na cava e bibi kina meda kila na veika oqo baleti Koya?

ivakatakilakila ni vuli

Vakayaloqaqataki na Vuli ena iTikotiko

Me vakayaloqaqataki na lewe ni kalasi ena nodra wilika na Maciu 19–20; Marika 10; kei na Luke 18, mo taroga vakaoqo “Na cava beka na nomu nanuma ke o cakacaka ena siga taucoko ka tautauvata na kemu isau kei koya a cakacaka ga me dua na auwa?” Tukuna ni dua na vosa vakatautauvata ena wiliwili ni macawa mai oqo e tukuna ni rawa me dodonu vinaka oqo.

ivakatakilakila ni ivurevure

iKuri ni iVurevure

Luke 12–17; Joni 11

“O sa kunei au.”

E wasea eke o Peresitedi Thomas S. Monson e dua na gauna a se bisopi tiko kina: “Au a raica ena dua na mataka ni Siga Tabu ni dua vei ira na neitou bete o Richard, e vakavudua na nona mai lotu, sa baci yali tale mai na soqoni ni matabete. Au biuta na kuoramu ena veiliutaki nei daunivakasala ka laki sikova na vale nei Richard. E kaya o tinana ni cakacaka tiko ena dua na qaraji ni vakavinakataki motoka vakaitaukei. Au draiva sara ki na garaji meu vaqarai Richard ka vakararai e veivanua ia au sega ni raici koya. Vakasauri, noqu vakauqeti meu rai sobu ki na dua na qara qiqo makawa ka toka ena yasa ni vale. Mai na vanua butobuto e rawa meu raica e rua na yaloka ni mata serau. Au rogoca ni kaya o Richard, ‘O sa kunei au, Bisopi! Au sa lako cake yani.’ Ni keirau sa sota kei Richard, au tukuna vua na levu ni neimami vakananumi koya ka gadrevi koya. Au a cakava me yalataka me na tiko ena nona soqoni. … [E muri], a qai kaya o Richard ni a sauvuki na nona bula ena gauna a kunei koya kina o bisopi ni a vuni toka ena qara ni qirisi ka vukea me lesu tale ki lotu” (“Sugar Beets and the Worth of a Soul,” Ensign, July 2009, 6–7).

Na vuli mai vua e dua tale na cidroi.

A dikeva rawa oqo o Elder Jeffrey R. Holland baleti koya na tuakai gonetagane cidroi:

“A sega ni cudruvaka vakalevu o gonetagane oqo na nona lesu mai o tacina ia a cudruvaka ni rau a marau kina vakalevu na nona itubutubu. Nona vakila ni tawakauwaitaki ka vaka me lomalomani koya, a guilecava vakalailai o gonetagane daucakacaka oqo—ni sa daucakacaka totoka ka se bera mada ni kila na cava na ka vakasisila se veilecayaki, rere se cati koya ga. E guilecava vakalailai ni luve ni bulumakau yadua e susu tiko sa nona tu vakakina na isulu totoka ena kovate kei na mama kece ena drowa. E guilecava vakalailai ni nona yalodina sa dau saumi ka na saumi tikoga.

“Sega, o koya sa tu na ka kece vua, vakakina vei koya sa daucakacaka, sa saumi vakatotoka kina, sa sega vua e dua na ka e rawa me qai tamata taucoko ni Turaga sa voleka me yacova. Sa voleka tiko me yacova na yalololoma kei na loloma veivueti, na rai ni icegu ni dauloloma me raica ni oqo e sega ni lesumai ni veisaqasaqa. Oqo o tacina. Ni a vakamasuti koya o tamana me raica, ni sa mate sa qai bula tale. Sai koya e dua sa yali ka sa qai kune tale” (“The Other Prodigal,” Ensign, Me 2002, 63).

Vakatorocaketaki ni Noda Veivakavulici

Laki kauti koya mai. Me vakataka na ivakatawa ena vosa vakatautauvata ni iVakabula (raica na Luke 15:4), “mo laki kauti ira mai era sa yali tiko mai na nomu kalasi. Na nomu madigi mo veivakavulici ka laveta cake na lewe ni kalasi ka vukei ira mera lako mai vei Karisito e teteva yani na taudaku ni rumu ni kalasi ki na taudaku vei ira era dau tiko ena kalasi” (Veivakavulici ena iVakarau ni iVakabula, 8).