E Kaba e Vu ni Lolo o Sakiusa, maivei James Tissot

20–26 ni Me

Maciu 21–23; Marika 11; Luke 19–20; Joni 12

“Sa Lako Mai na Nomuni Tui”

Ni ko wilika na Maciu 21–23; Marika 11; Luke 19–20; kei na Joni 12, vakasamataka na ka mo taroga me na vukea na nodra gagadre na kalasi. Ena vakauqeti iko na Yalo Tabu mo kila na cava mo taroga kei na ivakavuvuli, oka kina era tukuni tiko ena ituvatuva oqo, me sotava vinaka na gagadre oqori.

Vola na Nomu Nanuma

Sureta na Veiwasei

Ena loma ni macawa ni bera na kalasi, sureta e vica na lewe ni kalasi mera na mai wasea na gauna era vulica tiko mai kina na wase ni macawa oqo. Na veivakalougatataki cava sa yaco vei ira ni ra vulica na ivolanikalou ena loma ni macawa?

Vakavulica na iVunau

Luke 19: 1–10

E kilai keda vakayadua na iVakabula.

• Era na dau nanuma na lewenikalasi ni ra sega ni kauwaitaki se guilecavi ena nodra bula. Na italanoa kei Sakaraia ena vukei ira mera kila vinaka ni o Tamada Vakalomalagi kei Jisu Karisito e kilai ira ka kauwaitaki ira. Ni gadrevi mera vakatauvatana na itukutuku oqo ki na nodra bula, sureta mera raitayalotaka ni ra Sakaraia. Na cava o nanuma sa vulica o koya baleta na iVakabula mai na ka a yaco vua? Na cava eda rawa ni vulica mai na sasaga i Sakaraia me vakasaqara na iVakabula?

• Ena veivuke talega mera kerei na lewenikalasi mera vakasamataka na gauna eso ena ivolanikalou a kacivi ira na tamata na Turaga ena yacadra. (Era vakarautaki tu eso na ivakaraitaki ena “iKuri ni iVurevure.”) Sa rawa mo sureta na lewenikalasi mera wasea na gauna a vakadeitaki vei ira ni kilai ira vakayadua na Turaga.

Maciu 21:1–11; Marika 11:1–11; Luke 19:29–44; Joni 12:12–16

Sa noda Tui o Jisu Karisito.

• Me tekivutaki ena dua na itaviqaravi na kena veivosakitaki na nona curu vakatui na iVakabula ki Jerusalemi: Mera droinitaka e vica na lewe ni kalasi ena vava ni volavola na iyaya vakatui, me vakataka na sala ni tui se idabedabe vakatui, ka mera vakilakila tiko na kena vo na cava era droinitaka tiko. Ka mera qai droinitaka na vo ni lewe ni kalasi e dua na asa kei na veitabani kau. Na cava e yaga kina vua na tui na veika oqo? Mo qai vakaraitaka na iyaloyalo ni nona curu vakatui na iVakabula ki Jerusalemi mai na ituvatuva ni macawa oqo ena Lako Mai, Mo Muri Au—Me Baleta na Tamata Yadua kei na Matavuvale ka sureta na lewe ni kalasi mera wilika na Marika 11:1–11. Era kila vakacava na tamata ni o Jisu sa nodra Tui? Eda sokalou vakacava vei Jisu Karisito ni sa noda Tui mai na noda vosa kei na cakacaka?

• Ni gadrevi mera kila vinaka na lewe ni kalasi ni o Jisu Karisito sa noda Tui, mo kerei ira mera raica na serenilotu “Come, O Thou King of Kings,” Serenilotu, naba 59, se dua tale na serenilotu baleti Jisu ni sa noda Tui. Na qaqani sere cava e tukuna tiko vei keda na dina e tiko ena Maciu 21:1–11; Marika 11:1–11; Luke 19:29–44; kei na Joni 12:12–16?

Maciu 22:34–40

Na vunau levu e rua o ya meda lomana na Kalou ka lomani ira na tamata me vakataki keda.

• E vakavulica o Peresitedi Dieter F. Uchtdorf ni noda vakayacora na veika tani tale eso ka sega ni cakava na rua na vunau levu me usutu ni noda bula sa vaka na vanataka na gasau ena dua na lalaga wale ka droinitaka wavoki na gasau ena takete (raica na “Aiming at the Center,” Ensign se Liahona, Jan. 2017, 4–5). Ena vukea beka na lewe ni kalasi na dikevi ni vakatautauvata oqo mera kila na Matthew 22:34–40? Dua na sala me caka kina oqo o ya me tevuki e dua na pepa levu e ra ka mera vakalutuka kina na peni se penikau. Mera qai droinitaka na takete ni peni se penikau ena pepa ka vola na takete yadua ena dua na vunau. Ni wiliki oti vata na Maciu 22:34–40 sa rawa mo droinitaka e dua na takete vou e wavokita na veitakete tale eso ka vola kina “Lomana na Kalou kei na Wekamu.” E vukei keda vakacava na noda raica matua na rua na vunau levu meda talairawarawa kina ki na vunau tale eso ni Kalou? Meda na vakadeitaka vakacava noda raica matua noda talairawarawa ki na rua na vunau levu oqo?

Maciu 23: 13–33

Eda na taqomaki ni da sega ni muri ira na ivakavuvuli mataboko.

• Ena yaga beka kivei ira na lewe ni nomu kalasi ni veivosakitaki na vosa “ivakavuvuli mataboko,” ka a vakayagataka na iVakabula me vakamacalataki ira na Farisi kei na vunivola mataboko vakayalo? (Maciu 23:16). Mo vakasamataka e dua na sala mo vakaraitaka kina ni na vakacava beka e dua e muria na tamata mataboko. Se mera vola na kalasi ena vava ni volavola na ivakarau ni dua na ivakavuvuli mataboko, e tukuni tiko ena Maciu 23:13–33. Me ikuri ni ka sa volai, sa rawa mo raica na ikuri ni ivolanikalou e vakavulica na mataboko vakayalo, me vaka na 2 Korinica 4:3–4; 2 Nifai 9:28–32; and Jekope 4:14. Eda na kilai ira vakacava na ivakavuvuli mataboko ka sega ni muri ira?

• Sa rawa mo vukea na lewe ni kalasi mera kila vinaka ni o ira na vunivola kei na Farisi era raica matua ga na koula kei na iloloma ena valetabu ka sega ni ibalebale dina ni valetabu (raica na Maciu 23:16–22). Me caka oqo, sa rawa mo wasea na vosa vakatautauvata ni mataniciva kei na kato maivei Peresitedi Boyd K. Packer ena “iKuri ni iVurevure.” Na cava e rawa ni vagolei keda mai na marautaki ni veivakalougatataki dina ni valetabu? ni soqoni ni sakaramede?

Na Dau Kumuna na iVakacavacava sa Veivutuni kei Koya na Farisi sa Vakadonui Koya Ga ena Vale Tabu, maivei Frank Adams

Joni 12:42–43

Na nodra veivakacerecerei na tamata ena rawa me tarovi keda meda tisaipeli qaqa i Jisu Karisito.

• Eso era vakabauti Jisu Karisito era sega beka ni lomadra mera tutaka na Nona kosipeli, vakabibi vei ira na tamata era vakawalena se vakalialia na vakabauta vakalotu. Na lesoni cava e solia na Joni 12:42–43 vei keda nikua? Sa rawa mo sureta na kalasi mera vakasaqara na veiivolanikalou oqo ka raica na tamata era gadreva mera vakalomavinakataka na tamata kei ira era gadreva mera vakalomavinakataka na Kalou: Lako Yani 32:1–8; 1 Samuela 15:18–25; Maciu 14:1–10; 1 Nifai 6:1–6; Mosaia 17:1–12; kei na Moronai 8:16. Na dina cava soti eda vulica mai na ivakaraitaki oqo? Me baleta na ikuri ni noda ilesilesi meda vakaraitaka na noda vakabauta vei ira na tamata, raica na Elder Robert D. Hales, “Maroroi na Galala ni Digidigi, Taqomaki na Galala ni Digidigi,” Ensign se Liaona, Me 2015, 111–13.

Vakayaloqaqataki na Vuli ena iTikotiko

A parofisaitaka na iVakabula ni na yaco ena iotioti ni gauna era na lawakitaki talega o ira sa digitaki (raica na Josefa Simici—Maciu 1:22). Ni gadrevi mera vakauqeti na lewe ni kalasi mera wilika na Josefa Simici—Maciu 1; Maciu 25; Marika 12–13; kei na Luke 21 ena macawa mai oqo, mo kaya ni ra na raica ena wase oqo na idola ni drotani mai na lawaki ena iotioti ni gauna oqo.

iKuri ni iVurevure

Maciu 21–23; Marika 11; Luke 19–20; Joni 12

E kilai kemuni vakayadua na Tamada Vakalomalagi.

E vakaraitaka o Elder Neal A. Maxwell: “Au vakadinadinataka vei kemuni ni sa kilai kemuni vakayadua na Kalou … mai na dua sara na gauna balavu (raica na V&V 93:23). Sa lomani kemuni tu mai ena dua sara na gauna balavu. E sega walega ni kila na yacadra yadua na kalokalo taucoko (raica Same 147:4; Aisea 40:26); E kila na yacamuni kei na rarawa ni yalomuni kei na nomuni reki!” (“Remember How Merciful the Lord Hath Been,” Ensign se Liaona, Me 2004, 46).

Na veigauna a kaciva kina na Turaga na tamata ena yacadra.

• Vakatekivu 17:1–5, 15–16

• 1 Samuela 3:1–10

• Cakacaka 9:1–6

• 1 Nifai 11:1–6

• Inosi 1:5

• Vunau kei na Veiyalayalati 25:1

• Mosese 1:6

Na vosa vakatautauvata ni mataniciva kei na kato.

A wasea na vosa vakatautauvata oqo o Peresitedi Boyd K. Packer: “E dua na dauveivoli a vakasaqara voli na vatu talei eso ka laki kunea sara na mataniciva talei vinaka duadua. A vakarautaka e dua na matai ni ceuceu me ceuta e dua na kato totoka ni vatu talei ka saunaka ena sulu silika karakarawa. A vakatikora na nona mataniciva talei mera raica na talega na tamata. A sarava nodra sa mai raica na tamata. Vakalailai ga sa gole tani ena rarawa. Era mai qoroya ga na kena kato, sega ni mataniciva talei” (“The Cloven Tongues of Fire,” Ensign, May 2000, 7).

Vakatorocaketaki ni Noda Veivakavulici

E sega ni gadrevi mo ubia na ka kecega. “E levu sara na ka me veivosakitaki ena lesoni yadua, ia e sega ni gadrevi me vakaotivi taucoko ena dua na gauna ni kalasi mena tarai kina na yalona e dua—e dua se rua na usutu bibi sa rauta vinaka. Ni ko vakasamataka vakatitobu na nodra gagadre na vuli voli, ena vukei iko na Yalotabu mo raica rawa na ivakavuvuli, italanoa, se ivolanikalou e vakaibalebale vakatabakidua vei ira” (Veivakavulici ena Sala ni iVakabula, 7).