13–19 ni Me

Maciu 19–20; Marika 10; Luke 18

“A Cava Tale sa Vo Vei Au?”

Ni ko vulica na Maciu 19–20; Marika 10; kei na Luke 18, vakasamataka ena masumasu na veika cava era sa rairai vulica se vakila na kalasi ena nodra dui vuli.

Vola na Nomu Nanuma

Sureta na Veiwasei

Ena veivuke toka ke me dau veivosakitaki na veika era sotava na kalasi me baleta na vakalevutaki ena yabaki oqo na usutu ni vulici na kosipeli ena itikotiko. Na veika cava soti era sa rawata e rawa me ra wasea? Na veivakataotaki se ibolebole cava era sa sotava tiko? Na cava e rawa ni ra veivakasalataki kina vakai ira?

Vakavulica na iVunau

Maciu 19:3–9

Nodrau vakamau e dua na tagane kei na yalewa sa ilesilesi va-Kalou.

• Sa levu tikoga na vakasama ni kena sa gole tani mai na ka dina tawamudu na vakamau. Ni gadrevi me vukei nomu kalasi mera vulica na nanuma ni Kalou baleta na vakamau, mo sureta mera wilika na Maciu 19:3–9 ka vola ena vava ni volavola na dina era sa kunea baleta na vakamau. Sa rawa talega mera vola na ikuri ni dina era kunea ena kena oqo: Vakatekivu 1:27–28; 1 Korinica 11:11; Vunau kei na Veiyalayalati 42:22; 49:15–17; 131:1–4; 132:19; kei na Mosese 3:18, 21–24. Era sa vaqaqacotaki vakacava na dina oqo e “Na Matavuvale: Ai Vakaro ki Vuravura Raraba”? (Ensign se Liaona, Nove. 2010, 129).

• O na vukea vakacava na kalasi mera vakavakarau vinaka cake mera na vakamacalataka se taqomaka na ivakavuvuli ni Turaga baleta na vakamau? Sa rawa mo sureta mera vola ena vava ni volavola eso na taro era sa rogoca baleta na ivakavuvuli ni Lotu baleta na vakamau. Sa rawa kina mera vakatura eso na kena isau ena nodra vakayagataka na veika era sa kila baleta na ituvatuva ni veivakabulai kei na itukutuku mai “Na Matavuvale: Ai Vakaro ki Vuravura Raraba,” Maciu 19:3–9, kei na veivakavulici ena “iKuri ni iVurevure.” Sa rawa mo sureta na kalasi mera dramataka nodra rawa ni vakamacalataka noda vakabauta baleta na vakamau vua e dua e duatani na nona nanuma.

• Sa rawa mo vakaraitaka na ulutaga ni vakamau ena malanivosa oqo nei Elder Robert D. Hales: “Sega ni dua vei keda e vakawatitaka na vinaka taucoko; eda vakawatitaka na rawa ni rawata” (“Sotavi na Bolebole ni Vuravura Oqo,” Ensign se Liaona, Nove. 2015, 46). Sureta na kalasi mera vakasamataka e dua na veiwatini era dau qoroya. Na yavunibula cava e tiko vei rau na veiwatini oqo? Na yavunibula cava era vinakata na kalasi me tiko vei watidra, se yavunibula cava mera na vakatorocaketaka mera tamata vakawati vinaka kina? Mo raica talega na itukutuku cava mo na vakayagataka mai na vosa nei Peresitedi Russell M. Nelson “Vakamau Vakasilesitieli” (Ensign se Liaona, Nove. 2008, 92–95) me vukea nodra vakauqeti na kalasi mera vakasaqara na vakamau vakasilesitieli.

Sa tiki ni ituvatuva ni Kalou na vakamau tawamudu.

Maciu 20:1–16

Sa vakarautaki tu na bula tawamudu ki na tamata kecega—se totolo se bera sara na gauna eda ciqoma kina na kosipeli.

• Na cava ena vukea na nomu kalasi ni ra vakayagataka na ivakavuvuli ni vosa vakatautauvata ni tamata cakacaka ena were ni vaini? Sa rawa mo sureta e vica na lewe ni kalasi mera na dramataka na vosa vakatautauvata ki na kalasi. Ni oti na drama, sa rawa vei ira era matataki ira na tamata cakacaka mera wasea na nodra nanuma me baleta na isau era sa ciqoma kei na vuna. Na cava e tukuna tiko na vosa vakatautauvata oqo baleta na matanitu vakalomalagi? Na ikuri ni veivakararamataki cava era sa rawata na kalasi baleta na vosa vakatautauvata oqo mai na itukutuku nei Elder Jeffrey R. Holland e “Na Tamata Cakacaka ena Were ni Vaini”? (Ensign se Liaona, Me 2012, 31–33).

Maciu 19:16–22; Marika 10:17–27

Ena dusimaki keda vakavoleka Vua na iVakabula ni da kerea na Nona veivuke.

• O na vukea vakacava na kalasi mera kila ka vakayagataka na ivakavuvuli mai na italanoa nei cauravou vutuniyau? Dua na sala o ya mera na wilika na Marika 10:17–27 ka raica ke ra sa bau vakanananu beka vakataki cauravou vutuniyau. Na cava era sa bau vukei kina mera muria na ivakasala ni iVakabula ni dredre toka mada ga? E rawa e dua ena kalasi me wasea na gauna a taroga kina, “A cava tale sa vo vei au?” (Maciu 19:20) ka ciqoma e dua na veivakauqeti vakayalo me torocake? Na duidui cava sa yaco ki na nona bula?

Luke 18:9–14

E dodonu meda nuitaka ga na loloma veivueti ni Kalou, sega ni noda ivalavala dodonu.

• Na vosa vakatautauvata ni iVakabula ni vakatauvatana na masu ni dua na Farisi kei koya sa dau kumuna na ivakacavacava ena vukea mo laveta cake na vakasama sa kerea tiko na Turaga vei ira era vakasaqara mera muri Koya. Me vukea na kalasi mera vakayagataka na vosa vakatautauvata oqo nikua, mo sureta mera vola tale na masu nei Farisi ena sala sa vakayagataki tu nikua ia me tukuna tikoga na itovo o ya. Mera na cakava talega ena masu nei dau kumuna na ivakacavacava ka wasea na veika era sa vola. E sema vakacava na tikina e 15–17 kei na 18–24 ki na ka e vakavulica na iVakabula ena vosa vakatautauvata oqo?

• Ena veivakauqeti vakacava na tikina oqo vei ira o vakavulica mera yalomalumalumu tikoga, me vakataki dau kumuna na ivakacavacava? Ena rairai veivuke na vosa oqo baleta na veitikina oqo maivei Elder Dale G. Renlund: “E matata na itukutuku vei keda: sa toro voleka vua na Kalou na tamata ivalavala ca sa qai veivutuni mai vua na tamata sa vakadonui koya ka vakacacana na tamata ivalavala ca” (“Na iVakatawa Vinaka,” Ensign se Liaona, Me 2017, 31).

Vakayaloqaqataki na Vuli ena iTikotiko

Ni gadrevi mera vakayaloqaqataki na kalasi mera vulica na Maciu 21–23; Marika 11–12; Luke 19–20; kei na Joni 12, mo tarogi ira, “Na cava o na cakava ke sa vo ga e dua na macawa mo bula tiko kina?” Tukuna vei ira ni wase oqo sa vakatakila tiko na veika a cakava na iVakabula ena iotioti ni macawa ni Nona bula.

iKuri ni iVurevure

Maciu 19–20; Marika 10; Luke 18

Na vakamau e uto ni nona ituvatuva na Kalou.

E ratou a vakaraitaka na Mataveiliutaki Taumada kei na Kuoramu ni Apositolo Le Tinikarua na itukutuku oqo baleta na vakamau vakamataqali vata:

“Keitou sa vakayaloqaqataki kemuni mo ni nanuma tiko ni sa inaki nei Tamada Vakalomalagi me bulia na vuravura oqo ka vakarautaka meda sucu vakayago ka bula eke ni da sa Luvena [raica na Vakatekivu 1:27–28; 2:24]. … Na vakawati ni dua na turaga kei na dua na marama a yavutaki mai vua na Kalou ka sa ka bibi ki na Nona ituvatuva me baleti ira na Luvena kei na tiko vinaka ni matatamata. …

“… E namaka vei keda na Kalou me da tutaka ka rokova na Nona ivakaro veitalia na vakasama duidui se ivalavala ena noda veivanua. E matata tu na Nona lawa ni tiko savasava: e dodonu walega na veiyacovi vei rau na tagane kei na yalewa erau sa vakamau vakalawa me rau veiwatini” (“LDS Church Instructs Leaders Regarding Same-Sex Marriage,” Jan. 10, 2014, mormonnewsroom.org).

iKuri ni veivakararamataki baleta na vakamau.

Ena rawa ni veivuke“Na Matavuvale: Ai Vakaro ki Vuravura Raraba” ena kena veivosakitaki na vuna era veivakaroti kina na parofita ni Turaga baleta na ka cava ga sa saqata tiko na vakamau ni dua na tagane kei na dua na yalewa. Na veivakasama eso oqo ena rawa talega ni veivuke:

• Na matavuvale sa ituvatuva tawamudu. Eda sa tiki taucoko ni matavuvale ni Kalou, ka sa Nona ituvatuva me ra vakamau na tagane kei na yalewa ka vauci me rawa ni ra bula vakamatavuvale me tawamudu (raica na Vakatekivu 2:18, 21–24; 1 Korinica 11:11).

• Me tiki ni ituvatuva ni Kalou, era sa vakaroti na tagane kei na yalewa vakawati mera vakaluveni ka vakatawana na vuravura (raica na Vakatekivu 1:28) ka susugi ira na luvedra ena ivalavala dodonu.

• Na inaki cecere ni Kalou sai koya na bula vakacerecerei, se bula tawamudu, vata kei na Kalou, na vanua era yaco kina na tagane vakawati kei na watidra mera tubu tawamudu ka reki tawamudu (raica na V&V 132:19–21). Na ituvatuva ni Kalou sa sala duadua ga me rawati kina na bula vakacerecerei (raica na V&V 131:1–4).

• Sa namaka tiko na Turaga meda lomana ka yalololoma vei ira era sega ni tutaka se vakaitavi ena ituvatuva ni Kalou baleta na vakamau, me vakataka na vakawati sega ni vakamau se na vakamau vakamataqali vata (raica na mormonandgay.lds.org). Na yalololoma dina e oka kina noda vinaka taucoko meda sureti ira ena yalomalumalumu kei na vosota mera muria na ituvatuva ni Kalou, ni sai koya ga na ituvatuva ni marau dina. Na noda ciqoma se duavata ki na veibasai ni ituvatuva ni Kalou ena veivakacacani vakalevu ka sega ni veivukei.

Vakatorocaketaki ni Noda Veivakavulici

E gadreva tu na Kalou na nomu taledi kei na gugumatua duatani. “Sa na rawa ni ko vakalougatataki ira na luvena na Kalou ena nomu vakayagataka na nomu dau lomani ira na tani, na isolisoli sa solia vei iko na Kalou kei na veika o sa sotava ena nomu bula. Ni ko sa veiqaravi vinaka ka vaqara na veivukei ni Kalou, o Koya ena vakalevulevui iko, ka ko na tubu ena nomu sasaga mo vakavulica na kosipeli ena nona sala na iVakabula” (Veivakavulici ena Sala ni iVakabula, 5).