Na iKarua ni Lako Mai

Na iKarua ni Lako Mai, mai vei Harry Anderson

27 ni Me–2 ni June

Josefa Simici—Maciu 1; Maciu 25; Marika 12–13; Luke 21

“Ni na Lako Mai na Luve ni Tamata”

Nanuma me tekivutaki nomu vakavakarau ni veivakavulici mo wilika ka masulaka na Josefa Simici—Maciu 1; Maciu 25; Marika 12–13; kei na Luke 21. Mo vakasaqara vakai iko na veivakauqeti, ka taleva tale na ituvatuva oqo me baleta na ikuri ni vakasama.

Mo Vola toka na Nomu Nanuma

ivakatakilakila ni veiwasei

Sureta mera Veiwasei

Vola ena vava ni volavola na vei italanoa vakatautauvata ni iVakabula e kune ena veitikina ka wiliki mai ena macawa oqo, me vakataka na vu ni lolo, na tamata vinaka kei koya na daubutako, ko iratou na italai yalodina kei ira na italai ca, ko iratou na goneyalewa le tini, na taledi, ka vakakina na italanoa ni sipi kei na me. Kerei ira na lewe ni kalasi mera wasea na dina era sa vulica mai ena vei italanoa vakatautauvata oqo ena vukei ira ena nodra vakavakarau ki na iKarua ni Nona Lako Mai na Turaga. Na cava era sa cakava mera bulataka kina na dina oqo ena nodra bula?

ivakatakilakila ni veivakavulici

Vakatavulica na iVunau

Josefa Simici—Maciu 1:21–37

Ena vukei keda na kena parofisaitaki mai na iKarua ni Nona Lako mai na iVakabula meda sotava kina na veisiga ni mataka ena vakabauta.

• Ena dredre toka vei ira eso na lewe ni kalasi mera kila vakavinaka na ivakatakilakila ni iKarua ni Nona Lako Mai na iVakabula. Ena rawa ni veivuke vei ira ke ra cakacaka vata vakailawalawa mera vakasaqara na vei ivakatakilakila ena Josefa Simici-Maciu 1:21-37. Ena rawa talega ni vukei ira mera kila vakavinaka na bibi ni vei ivakatakilakila oqo ke vaka mera vakatauvatana ki na ivakatakilakila ni gaunisala. Na cava era rui bibi kina na vei ivakatakilakila ni gaunisala? Na cava e tukuna tiko oqo vei keda me baleta na ivakatakilakila ni iKarua ni Nona Lako Mai? E rawa mo solia ki na vei ilawalawa yadua na tikini pepa e droinitaki tu kina na vei ivakatakilakila ni gaunisala ka mera qai vola ena vei tikini pepa yadua eso na ivakatakilakila ni iKarua ni Nona Lako Mai. Mera qai wasea na cava era sa kunea, ka sureti ira na lewe ni kalasi mera veivosakitaka na ivakadinadina ni vei ivakatakilakila oqo e vuravura nikua.

• Ena ituvatuva ni macawa oqo ena Lako Mai, Mo Muri Au—Me Baleta na Tamata Yadua kei na Matavuvale, era sa sureti na lewe ni kalasi mera vakasaqara na vei ivakasala mai na veitikina oqo ena sala “meda kakua ni vakaleqai” ena veigauna voravora ni sa roro tiko mai na iKarua ni Nona Lako Mai (raica talega na itukutuku nei Peresitedi Thomas S. Monson ena “iKuri ni iVurevure”). Vakaraitaka e dua na iyaloyalo e tukuna tiko na iKarua ni Nona Lako Mai (raica Na iKarua ni Nona Lako Mai, Gospel Art Book, naba 66), ka sureti ira na lewe ni kalasi mera wasea na tikina era a vola tiko mai ena gauna ni nodra dui vuli.yadudua. Na cava e veivakalougatataki kina meda kila na veika ena yaco ni bera na iKarua ni Nona Lako Mai na iVakabula?

Josefa Simici—Maciu 1:26–27, 38–55; Maciu 25:1–13

E dodonu meda na vakavakarau tiko ki na iKarua ni Nona Lako Mai na iVakabula.

• Dina ga ni sa kerea tiko na iVakabula meda vakavakarau tiko ki na iKarua ni Nona Lako Mai, ia e dau rawarawa meda kuitaki tani ena veika e dau yaco ena noda bula ni veisiga ka sega nida vakasamataka sara tu vakabibi. Ena rawa ni veivuke vei ira na lewe ni kalasi na vei italanoa vakatautauvata ka tiko ena Josefa Simici—Maciu 1:26–27, 38–55 kei na Maciu 25:1–13 mera kila kina na kena bibi ni nodra vakavakarau yani ki na iKarua ni Nona Lako Mai. Sureti ira na lewe ni kalasi mera vakasaqara na vei italanoa vakatautauvata oqo kei na veika era vakatautauvatataki tiko kina ka wasea na veika era vakatavulica tiko me baleta na vakavakarau ki na iKarua ni Nona Lako Mai. De rairai ena vinaka me dua se rua na lewe ni kalasi me rau na vakavakarau tiko mai ena dua na ka erau nanuma me via tautauvata toka kei na italanoa vakatautauvata.

• Ena rawa ni vukei ira na lewe ni kalasi na italanoa vakatautauvata ni le tini na goneyalewa mera raica na nodra bula ni vakavakarau vakayalo mera sotava kina na iVakabula. E solia o Elder David A. Bednar e dua na ivakadewa ni italanoa vakatautauvata ena rawa me veivuke (raica na “iKuri ni iVurevure”). E rawa nira veivosakitaka na lewe ni kalasi na cava eda rawa ni cakava ena noda bula ni veisiga me na qai taucoko kina na noda na saumaki mai ki na kosipeli. Na cava na vuna e rui bibi kina meda vakila vakataki keda nida sa saumaki mai? Na cava e kuria na Vunau kei na Veiyalayalati 45:56–57 meda kila vakavinaka kina na italanoa vakatautauvata oqo?

• E rawa ni lagati na serenilotu me baleta na iKarua ni Nona Lako Mai ka veivosakitaki talega na itukutuku era vakatavulica (raica na “iKuri ni iVurevure”).

Maciu 25:14–46

Ena iOtioti ni Veilewai, eda na dui soli itukutuku kina vua na Turaga me baleta na noda dui bula yadudua.

• Na italanoa vakatautauvata me baleta na taledi ka vakakina na italanoa vakatautauvata ni sipi kei na me ena rawa ni vakauqeti keda meda nanuma lesu kina na itukutuku ni noda bula meda na solia vua na Turaga ena iOtioti ni Veilewai. E rawa mo ni wilika vata na italanoa vakatautauvata ka sureti ira yadudua mera wasea e dua na taro ena rawa me taroga na iVakabula ena gauna eda na laki solia kina na itukutuku ni noda bula. Solia e dua na gauna vei ira na lewe ni kalasi mera tuvanaka nodra na cakacakataka na veivakauqeti era sa ciqoma ena gauna ni veivosaki.

  sipi kei na me

  E vakayagataka na Karisito na sipi kei na me me vakavulica na iOtioti ni Veilewai (raica na Maciu 25:31–33).

• Sa rawa me talevi lesu vata kei na lewe ni kalasi na ibalebale ni iOtioti ni Veilewai e tiko ena iDusidusi ki na iVolanikalou, “Judgment, The Last,” scriptures.lds.org. Mo qai kerei ira na lewe ni kalasi mera taleva lesu tale eso na tiki ni ivolanikalou me baleta ena vakacava tu beka na iOtioti ni Veilewai me vaka ena Alama 5:17–25. Na cava soti e vakauqeti keda kina na vei tiki ni ivolanikalou oqo meda cakava meda vakavakarau kina ena siga koya?

• Me vukei ira na lewe ni kalasi mera raica kena ibalebale ni italanoa vakatautauvata ni taledi ki na nodra dui bula yadua (raica na Maciu 25:14–30), mo wasea eso na vakasama se vakayagataka na itaviqaravi mai “Na Vosa Vakatautauvata ni Taledi,” maivei Elder Ronald A. Rasband (Ensign, Aug. 2003, 32–35).

• Ni gadrevi me vakauqeti na veivosaki baleta na Maciu 25:34–40, mo sureti ira na lewe ni kalasi mera wasea na ivakaraitaki ni so na tamata era vakaraitaka na yalololoma e vakamacalataki tiko ena veitikina oqo. Solia na gauna mera vakasamataka vakatitobu se o cei soti beka ena gadreva na nodra veiqaravi. Na sala cava soti e rawa nida muria mera na vakani kina ko ira era viakana, mera vakaisulutaki kina na luvaiwale, ka ra sikovi talega kina na tauvimate?

ivakatakilakila ni vuli

Vakayaloqaqataki na Vuli ena iTikotiko

Mera vakayaloqaqataki na lewe ni kalasi mera wilika na Joni 13–17 ena loma ni macawa mai oqo, kerei ira mera vakasamataka toka mai se cava era na rawa ni tukuna vua e dua na luvena tagane se luvena yalewa ni bera ni ra na gole yani ki kaulotu. Ena Joni 13–17, eda na wilika kina na iotioti ni vakasala ka solia na iVakabula vei iratou Nona tisaipeli ni bera ni Lauvako ena Kauveilatai.

ivakatakilakila ni ivurevure

iKuri ni iVurevure

Josefa Simici—Maciu 1; Maciu 25; Marika 12–13; Luke 21

Serenilotu baleta na iKarua ni Nona Lako Mai.

• “Me da Sa Mai Marau,” Serenilotu, naba. 3

• “Meda Lako ki Vua,” Serenilotu, naba. 29

• “Bau Mai na tui ni Tui,” Serenilotu, naba. 30

• “Au Kilai Jisu,” Serenilotu, naba. 74

• “Meda Marau,” Serenilotu, naba. 116

Na waiwai ni saumaki vou.

E vakatura o Elder David A. Bednar na ivakadewa oqo ni italanoa vakatautauvata me baleta e le tini na marama:

“Raica na waiwai oqo ni sa waiwai ni saumaki vou [raica na Maciu 25:4–9]. …

“Eratou a kocokoco li na goneyalewa vuku ena nodratou sega ni via wasea, se ratou a tukuna tiko vakadodonu ni waiwai ni saumaki vou e sega ni dau kerei? Ena rawa beka li ni soli tale vua e dua na tamata na kaukauwa vakayalo e taukena e dua mai na nona talairawarawa vakawasoma ki na ivunau? Ena rawa beka li ni vakadewataki vua e dua e gadreva tu, na kila-ka e rawati mai ena kena dau wiliki vakagumatua ni ivolanikalou? Ena rawa beka li ni vakadewataki na vakacegu e kauta mai na kosipeli ki vua e dua na Yalododonu Edaidai yalodina ki vua e dua ka sotava tiko na dredre se na vei bolebole lelevu? Na isau matata ki na veitaro kece oqori, E sega ni rawa.

“Me vaka ga eratou sa vakamatatataka mai na goneyalewa vuku, e dodonu vei keda me da sa dui ‘volia vakai keda na ka me baleti keda.’ Na veivakauqeti ni nodratou bula na goneyalewa oqori eratou sega ni vakamacalataka tiko e dua na ka vakabisinisi, ia eratou vakabibitaka tiko na noda dui itavi yadudua me rawa ni na waqa tikoga kina na noda cina ni ivakadinadina kei na kena rawati na waiwai ni saumaki vou. Na waiwai vakamareqeti oqo e rawati ena veituru yadua—‘vosa ena vosa [kei na] ivunau ena ivunau’ (2 Nifai 28:30), ena yalo ni vosota kei na gugumatua” (“Saumaki Vua na Turaga,” Ensign se Liaona, Nove. 2012, 109).

Kakua ni rere

E kaya vakaoqo ko Peresitedi Thomas S. Monson:

“E dina ni na kumukumuni mai na o ni cava, ka tauci keda mai na uca, ia na noda kilaka ena kosipeli kei na noda lomana na Tamada Vakalomalagi kei na noda iVakabula ena kauta mai na vakacegu ka tokoni keda ka kauta mai na reki ni lomada ni da sa tudei tu ka muria na ivunau. …

“Kemuni na taciqu kei na ganequ lomani, ni kakua ni rere. Dou vakacegu. Na veisiga ni mataka sa rarama me vaka na nomu vakabauta” (“Dou Vakacegu,” Ensign se Liaona, Me 2009, 92).

Vakatorocaketaki ni Noda Veivakavulici

Vakadeitaka ni ko sa vakavulica tiko na ivakavuvuli dina. “Mo tarogi iko tiko e veigauna ‘Na sala cava era na vukei kina na noqu lewe ni kalasi mai na veika au sa vakavulici ira tiko kina me ra tara cake na nodra vakabauti Karisito, mera veivutuni, mera cakava eso na veiyalayalati ka muria tiko nodra veiyalayalati kei na Kalou, ka ciqoma na Yalo Tabu?’” (Veivakavulici ena iVakarau ni iVakabula, 20).