Mo Vakananumi Au, mai vei Walter Rane

3–9 ni June.

Joni 13–17

“Dou Tiko ga ena Noqu Loloma”

Ni ko vulica ena masumasu na Joni 13–17, vakasamataka vakatitobu na sala vinaka sara mo lomani ira kina o vakavulica tiko. Ena soli vakasama mai na Yalo Tabu ni ko vulica na ivolanikalou, Lako Mai, Mo Muri Au—Me Baleta na Tamata Yadua kei na Matavuvale, kei na ituvatuva oqo.

Vola na Nomu Nanuma

Sureta na Veiwasei

Vola na naba 13 ki na 17 ena vava ni volavola, e matataka tiko na wase ena Joni era a wilika na kalasi ena macawa oqo. Sureta e vica na lewe ni kalasi mera vola, e yasa ni naba ni wase yadua, na tikina era kunea e vakaibalebale ka gadrevi me veivosakitaka na kalasi.

Vakavulica na iVunau

Joni 13:1–17

Na iVakabula sa noda ivakaraitaki ni veiqaravi ena yalomalumalumu.

• Ni gadrevi me vukei na nomu lrewe ni kalasi mera vakasamataka vakatitobu na bibi ni vuya na yavadra na Nona tisaipeli o Jisu, mo sureta oti tiko mai e dua na lewe ni kalasi me mai matataki Pita ena italanoa oqo ka me vakatarogi maivei ira na vo ni kalasi. Vakayaloqaqataki ira na lewe ni kalasi mera vakasaqara na Joni 13:1–17 ka vakasamataka na taro e bibi mera na taroga vei Pita. Na cava eda sa vulica mai na itukutuku oqo ena rawa ni veisautaka noda qaravi ira na tamata?

Joni 13:34–35

Na loloma oqo sa ivakarau dina ni tisaipeli i Jisu Karisito.

• Na cava ena vakayaloqaqataki ira na lewe ni kalasi mera dauloloma cake? E rawa ni o taroga na sala cava era kila ni dua era sotava sa daumuria na Karisito. Na ivakarau cava era raica vua na tamata oqo? Sa rawa mo sureta mera vakasaqara ena Joni 13:34–35 na sala mera kilai ira era sa tisaipeli dina ni iVakabula. Na cava eda rawa ni cakava me itovo dina ni noda bula vakatisaipeli na loloma? E veivakauqeti vakacava na veivakavulici oqo ki na noda itovo vei ira eso, oka kina na itukutuku raraba?

• Sa vulica na kalasi e vuqa na ka baleta na iVakabula ena yabaki oqo, oka kina na vuqa na Nona ivakaraitaki ni Nona lomani ira na tamata. Dua na sala mera vakasamataka vakatitobu kina na lewe ni kalasi na ivakaro ena Joni 13:34 o ya mera vola na Me Vaka Kau sa Lomani Kemudou ena vava ni volavola ka kerea na lewe ni kalasi mera vola na ivakaraitaki era raica mai na Veiyalayalati Vou e vakaraitaka na loloma i Jisu. Mo vola sara Dou Veilomani Vakai Kemudou ena vava ni volavola ka kerea na lewe ni kalasi mera vola na sala eso eda rawa ni muria na Nona ivakaraitaki ni loloma. Na kena lagati se rogoci na serenilotu “Love One Another,” Serenilotu, naba 308, se sarava e dua na vidio ena “iKuri ni iVurevure” sa ikuri vinaka ni itaviqaravi oqo.

• Keda sega ni lomani ira tiko na tamata e lomada, na cava eda rawa ni cakava meda vakasaqara kina na isolisoli ni loloma? Na cava e vakuria mai na ivakasala ena Moronai 7:48; 8:26 meda kila vinaka kina na isolisoli oqo? O cei eda kila era gadreva mera vakila na noda loloma?

Na loloma oqo sa ivakarau dina ni tisaipeli i Karisito.

Joni 14:16–27; 15:26; 16:7–15

Sa vagumatuataki keda na Yalo Tabu meda cakava rawa na noda inaki ni tisaipeli i Jisu Karisito.

• Na nodra vukei na leweni kalasi mera vulica na itavi duidui ni Yalo Tabu, mo wasei ira vakailawalawa ka solia ki na ilawalawa yadua e dua vei ira na itukutuku oqo: Joni 14:16–27; 15:26; kei na 16:7–15. Sureta na ilawalawa yadua mera vola ena vava ni volavola na ka era sa vulica baleta na Yalo Tabu mai na itukutuku oqo. Sa rawa mera kuria na lewe ni kalasi eso tale na veivakararamataki era sa kunea ni ra vakadikeva na ivolanikalou era tiko ena “iKuri ni iVurevure.” Na gauna cava eda a vakila kina na veivakauqeti ni Yalo Tabu? Na iyaya cava se iyaloyalo o rawa ni kauta mai na kalasi me vukei ira mera kila vinaka na itavi duidui ni Yalo Tabu?

• Mo sureta taumada tiko mai e vica na lewe ni kalasi me vulica tiko mai e dua na vosa ni koniferedi raraba e tiko ena “iKuri ni iVurevure” (se vosa tale so ni koniferedi raraba era kila tu) e baleta na Yalo Tabu. Kerea mera wasea vakalekaleka ki na kalasi na ka era sa vulica. Na cava era sa kuria na itukutuku oqo ki na veika eda sa vulica baleta na Yalo Tabu mai na Joni 14–16?

Joni 15:1–12

Ni da tiko ga kei na iVakabula, eda na vua ka bula marau.

• Na cava era sa vulica na lewe ni kalasi ena macawa oqo mai na vosa vakatautauvata ni iVakabula baleta na vaini kei na tabana? Sa rawa mo kauta mai e dua na vunikau lailai ki na kalasi me vukei ira na lewe ni kalasi mera raitayalotaka kina na vosa vakatautauvata ni iVakabula. Ni wiliki oti vakalasi na Joni 15:1–12 sa rawa me veivosakitaki na ibalebale ni “dou tu vei [Karisito]” (Joni 15:4). Mo sureta e vica na lewe ni kalasi mera wasea nodra raica na Joni 15:5 ni sa dina sara. (Raica talega na itukutuku nei Elder Jeffrey R. Holland ena “iKuri ni iVurevure.”) Ena rawa ni veivuke na vidio “The Will of God” (LDS.org) ena veivosaki oqo.

Joni 17

Rau sa duavata vakaidina na Tamada Vakalomalagi kei Jisu Karisito, ka Rau gadreva meda sa duavata talega.

• Ena dredre beka mo vakavulica na dina bibi taucoko e tiko ena Joni 17 ena gauna ni veiwasei ni kalasi, ia oqo e dua na sala mera vukei na kalasi mera vakadikeva e vica vei ira. Vola ena vava ni volavola na vakasama mai na Joni 17, me vakaoqo:

  • Na noda veimaliwai kei Jisu Karisito

  • Na veimaliwai i Jisu Karisito kei na Tamana

  • Na noda veimaliwai kei ira e vuravura

  • Na noda veimaliwai vakai keda yadua na Nona tisaipeli

  Sureta na lewe ni kalasi yadua mera digitaka e dua na vakasama oqo ka wilika na Joni 17, ka vakasaqara na tikina e tukuna tiko. Kerea e vica na lewe ni kalasi mera wasea na ka era sa vulica.

Vakayaloqaqataki na Vuli ena iTikotiko

Ni gadrevi mera vakayaloqaqataki na lewe ni kalasi mera wilika na Maciu 26; Marika 14; Luke 22; kei na Joni 18 ena loma ni macawa mai oqo, mo tukuna ni wase oqo, era na wilika kina e dua na usutu ni gauna ni ituvatuva cecere ni veivakabulai ni Kalou.

iKuri ni iVurevure

Joni 13–17

Na vidio ena LDS.org baleta na loloma.

• “Dou Veilomani vakai Kemudou”

• “Solibula ni Matavuvale, Solia, kei na Loloma”

• “Vakavakarau nei Peresitedi Thomas S. Monson: A Vulica me Yalololoma ni Se Cauravou Gone”

Na Yalo Tabu.

• Cakacaka 2:37–38; Kalatia 5:22–23; 1 Nifai 10:17–19; 2 Nifai 32:3–5; Mosaia 3:19; 3 Nifai 27:20; Moronai 8:26; 10:4–5; Vunau kei na Veiyalayalati 8:2–3; 42:17

• Robert D. Hales, “Na Yalo Tabu,” Ensign se Liaona, Me 2016, 105–7

• Henry B. Eyring, “Na Yalo Tabu me Nomu iTokani,” Ensign se Liaona, Nove. 2015, 104–7

• David A. Bednar, “Ciqoma na Yalo Tabu,” Ensign se Liaona, Nove. 2010, 94–97

Tiko Ga Kei Karisito

Me kilai tiko ni vosa na tiko ga e sema tiko ki na tudei kei na dinata, ka vakavulica kina o Elder Jeffrey R. Holland:

“Na vakasama ni [vosa] oqo sai koya na ‘tiko kina—ia na tiko vakadua.’ Oqori na veikacivi ni itukutuku ni kosipeli. … Lako mai, ia lako mai mo mai tiko vakadua. Lako mai ena dina kei na gumatua. …

“E kaya o Jisu, ‘Ke dou sa tawase tani vei au, dou sa sega ni rawata e dua na ka’ [Joni 15:5]. Au vakadinadinataka ni o ya na dina ni Kalou. O Karisito sa veika taucoko ena noda bula, meda ‘tiko ga’ vakadua, tudei, sega ni yavalati, kaukauwa, ka tawamudu kei Koya. Ni gadrevi me buroro ka vakalougatataki keda na vua ni kosipeli, e dodonu meda sema kaukauwa Vua, na noda iVakabula kece, kei na Nona Lotu oqo, sa vakatokai ena Yacana tabu. Sai Koya na vaini ni noda ivurevure dina ni kaukauwa kei na ivurevure duadua ga ni bula tawamudu. Mai Vua eda na sega walega ni gumatua kina ia eda na rawa-ka ka qaqa ena inaki tabu oqo eda na sega ni vakadrukai kina” (“Abide in Me,” Ensign se Liaona, Me 2004, 32).

Vakatorocaketaki ni Noda Veivakavulici

Sureta na Yalotabu. “E sega ni rawa ni dua na qasenivuli, se cava sara na nona kila se veika sa vulica, me sosomitaka rawa na Yalotabu. Ia sa rawa meda iyaya ni cakacaka ena liga ni Kalou meda vukei ira na Luvena mera vuli mai vua na Yalotabu. Me caka oqo, eda na sureta na veivakauqeti ni Yalotabu ki na noda bula ka vakayaloqaqataki ira eda vakavulica mera cakava vakakina. … Na sere ivakatagi vakalou, na ivolanikalou, nodra vosa na parofita edaidai, na vakaraitaki ni loloma kei na ivakadinadina, kei na veigauna ni vakanananu vakatitobu sa rawa kece me sureta mai na Yalotabu. ” (Veivakavulici ena iVakarau ni iVakabula, 10).